រដ្ឋមន្ត្រីការពារជាតិ លោក ទៀ បាញ់ អះអាងថា កម្ពុជានឹងសាងសង់ស្តូបឈ្នះឈ្នះបន្ថែមទៀតនៅក្នុងខេត្តមួយចំនួន ដើម្បីអបអរសាទរខួបនយោបាយឈ្នះឈ្នះ លើកទី២៥ឆ្នាំរបស់គណបក្សប្រជាជនកម្ពុជា។
រដ្ឋមន្ត្រីក្រសួងការពារជាតិ លោក ទៀ បាញ់ បានលើកឡើងក្នុងពិធីអបអរសាទរខួប ២៤ឆ្នាំនៃនយោបាយឈ្នះឈ្នះរបស់លោក ហ៊ុន សែន នៅវិមានឈ្នះឈ្នះ កាលពីថ្ងៃទី២៩ ខែធ្នូ ឆ្នាំ២០២២ នេះថា ការសាងសង់ស្តូបឈ្នះឈ្នះទាំងនេះ គឺដើម្បីផ្សារភ្ជាប់ទៅនឹងប្រវត្តិសាស្ត្រជាក់ស្ដែងតាមផែនការដែលបានគ្រោងទុករបស់រាជរដ្ឋាភិបាលកម្ពុជា។
លោក ទៀ បាញ់ លើកឡើងថា ស្តូបឈ្នះឈ្នះនឹងត្រូវសាងសង់បន្ថែមទៀតនៅស្រុកអន្លង់វែង ខេត្តឧត្តរមានជ័យ និងខេត្តប៉ៃលិន ជាដើម ខណៈស្តូបឈ្នះឈ្នះខេត្តកោះកុង នឹងត្រូវសាងសង់រួចរាល់នៅដំណាច់ឆ្នាំ២០២៣។
លោកបន្ថែមទៀតថា ស្តូបឈ្នះឈ្នះនឹងក្លាយទៅជាការពង្រាយ និងបញ្ជ្រាបនូវខ្លឹមសារនយោបាយឈ្នះឈ្នះរបស់ប្រមុខរដ្ឋាភិបាលលោក ហ៊ុន សែន ដែលជាមគ្គុទ្ទេសក៍ដឹកនាំនៅគ្រប់ទីកន្លែង ហើយស្តូបឈ្នះឈ្នះដែលបានសាងសង់នៅគ្រប់ទីកន្លែងទាំងអស់នោះ នឹងក្លាយជាកន្លែងសាធារណៈ ដោយមិនយកថ្លៃចូលទស្សនាសិក្សាស្រាវជ្រាវ ឬមកបំពេញទស្សនកិច្ចសិក្សាឡើយ។
រដ្ឋមន្ត្រីក្រសួងការពារជាតិរូបនេះបញ្ជាក់ថា រដ្ឋាភិបាលកម្ពុជានឹងធ្វើការផ្សព្វផ្សាយរំឭកពីនយោបាយឈ្នះឈ្នះ តាមរយៈនៃការបោះពុម្ពឯកសារ និងរូបភាពផ្សេងៗ ដើម្បីបង្កើនការអប់រំសិស្ស និស្សិត យុវជន មន្ត្រីរាជការ កងកម្លាំងប្រដាប់អាវុធ និងប្រជាជនផ្សេងៗទៀតឱ្យយល់ច្បាស់ពីគុណតម្លៃសន្តិភាព និងរាល់សមិទ្ធផលនៃសង្គមជាតិដែលកើតចេញពីនយោបាយឈ្នះឈ្នះនេះ។
វិមាន និងស្តូបឈ្នះឈ្នះ ត្រូវបានគណបក្សប្រជាជនកម្ពុជា រួមទាំងមេដឹកនាំទីក្រុងភ្នំពេញ លោក ហ៊ុន សែន មានមោទកភាពខ្លាំងបំផុតដែលបានសាងសង់វិមាននេះឡើងនៅក្នុងសម័យរបស់លោក ដែលជានិមិត្តរូបសន្តិភាពក្រោយពីបានផ្ដួលរំលំរបបខ្មែរក្រហមដោយជោគជ័យ។
អ្នកវិភាគឯករាជ្យ និងជាប្រធានវេទិកាពលរដ្ឋ លោក គឹម សុខ ប្រាប់សារព័ត៌មាន The Cambodia Daily នៅថ្ងៃទី៣០ ធ្នូ នេះថា ការបន្តសង់ស្តូបឈ្នះឈ្នះរបស់បក្សកាន់អំណាច គឺជាផែនការមួយនៃនយោបាយដំណាក់កាលរវាងវៀតណាម និងលោក ហ៊ុន ម៉ាណែត ដោយប្រើឧបាយកលផ្សព្វផ្សាយនយោបាយឈ្នះឈ្នះជាឧបករណ៍បំភ័ន្តភ្នែករបស់ប្រជាពលរដ្ឋខ្មែរ។
លោក គឹម សុខ លើកឡើងថា ស្តូបឈ្នះឈ្នះនេះ គឺជាថ្នូរមួយក្នុងចំណោមលក្ខខណ្ឌនានារបស់វៀតណាម ដែលគេយល់ព្រមគាំទ្រលោក ហ៊ុន ម៉ាណែត ជានាយករដ្ឋមន្ត្រីនៅថ្ងៃអនាគត។ លោកបន្ថែមថា វាមិនមែនជារឿងធម្មតានោះទេចំពោះស្តូបមួយ គណបក្សប្រជាជនកម្ពុជានឹងអនុញ្ញាតឲ្យវៀតណាមរៀបចំសមាគមធំមួយដែលមានរចនាសម្ព័ន្ធរដ្ឋបាល និងប្រដាប់អាវុធសម្រាប់ការពារស្តូបនោះទៀតផង។
អ្នកវិភាគរូបនេះបញ្ជាក់ថា ស្តូបមាននៅទីណា សមាគមវៀតណាមដែលការពារស្តូបនោះនឹងមានអំណាចស្មើនឹងអាជ្ញាធរខ្មែរនៅទីនោះ ក្នុងការសម្រេចកិច្ចការសំខាន់ៗជាច្រើនទៀត។ លោកបន្តថា ពេលមានស្តូបនេះមានកាន់តែច្រើន សមាគមវៀតណាមដែលមានអំណាចបែបនេះ ក៏កាន់តែច្រើនលើទឹកដីកម្ពុជាដែរ ដែលនោះគឺជាការរៀបឧបាយកលមួយដើម្បីឲ្យវៀតណាមគ្រប់គ្រងខ្មែរដូចគ្នានឹងវៀតណាមគ្រប់គ្រងឡាវ ក្នុងពេលបច្ចុប្បន្ននេះដែរ។
កាលពីថ្ងៃទី១៩ ខែកុម្ភៈ ឆ្នាំ២០២២ អគ្គនាយកនៃអគ្គនាយកដ្ឋានទំនាក់ទំនងអន្តរជាតិនៃក្រសួងការពារជាតិ និងជាប្រធានក្រុមការងារសាងសង់វិមានឈ្នះឈ្នះ លោក ណឹម សុវត្ថិ បានអះអាងថា ក្រោយពេលបញ្ចប់ការសាងសង់វិមានឈ្នះឈ្នះនៅរាជធានីភ្នំពេញហើយនោះ រាជរដ្ឋាភិបាលកម្ពុជានឹងកសាងស្តូបវិមានឈ្នះឈ្នះនៅទីតាំងអនុស្សាវរីយ៍ផ្សេងទៀត ដូចជានៅខេត្តកំពង់ស្ពឺ នៅខេត្តបាត់ដំបង ខេត្តកោះកុង នៅខេត្តឧត្តរមានជ័យ និងត្រូវកសាងនៅតាមបណ្ដាខេត្តនានាជាបន្តបន្ទាប់ទៀតផងដែរ៕