28 C
Phnom Penh

រដ្ឋាភិបាល​ឱ្យ​ក្រុមហ៊ុន​សុខា​អូតែល​សង់​ព្រះពុទ្ធ​បដិមា​កម្ពស់​១០៨​ម៉ែត្រ​លើ​ខ្នងភ្នំ​បូកគោ

ដោយ ឌឹ ខេមបូឌា ដេលី

បទវិភាគ

ក្រៅពី​ការ​វាយ​កម្ទេច​រំលាយ​បុរាណ​វត្ថុ វប្បធម៌​ជាតិ​ក្នុង​វត្ត មន្ត្រី​រាជរដ្ឋាភិបាល​និយាយ​ថា គេ​ស្ថាបនា​មហា​ព្រះពុទ្ធ​បដិមា​លើ​កំពូលភ្នំ ដើម្បី​លើកស្ទួយ​ព្រះពុទ្ធ​សាសនា។ នេះ​ជា​ភាសា​ធ្វើ​ពើ​លាក់​ពុត។

រដ្ឋមន្ត្រី​ក្រសួង​រៀបចំ​ដែនដី នគរូបនីយកម្ម និង​សំណង់ អះអាង​ថា រាជរដ្ឋាភិបាល​កម្ពុជា​បាន​សម្រេច​ឱ្យ​ក្រុមហ៊ុន សុខា អូតែល សាងសង់​ព្រះពុទ្ធ​បដិមា​កម្ពស់ ១០៨​ម៉ែត្រ​លើ​ខ្នងភ្នំ​បូកគោ ស្ថិត​នៅ​ក្នុង​ឧទ្យាន​ជាតិ​ព្រះមុនីវង្ស «បូកគោ» នោះ​ហើយ ដោយ​គោរព​ទៅ​តាម​ប្លង់​មេ និង​រចនាបថ​តាម​ក្រុម​ការងារ​អន្តរ​ក្រសួង​បាន​សម្រេច ព្រមទាំង​មាន​ការ​គាំទ្រ​ពី​គណៈសង្ឃ​នាយក​នៃ​ព្រះរាជាណាចក្រ​កម្ពុជា​ផង​ដែរ។

រដ្ឋមន្ត្រី​ក្រសួង​រៀបចំ​ដែនដី នគរូបនីយកម្ម និង​សំណង់ លោក ជា សុផារ៉ា ចេញ​សេចក្តី​ប្រកាស​ព័ត៌មាន​នៅ​ថ្ងៃទី​៣ ខែ​មករា ឆ្នាំ​២០២៣ នេះ​ថា ពិធី​បញ្ចុះ​បឋម​សិលា​បើក​ការដ្ឋាន​សាងសង់​ព្រះពុទ្ធ​បដិមា​កម្ពស់ ១០៨​ម៉ែត្រ​នៅ​លើ​ខ្នងភ្នំ​បូកគោ ក្នុង​ភូមិសាស្ត្រ​វាលស្រែ​៥០០ នៃ​ឧទ្យាន​ជាតិ​ព្រះមុនីវង្ស «បូកគោ» ក្នុង​ខេត្ត​កំពត ប្រព្រឹត្ត​ទៅ​នៅ​ថ្ងៃទី​៤ ខែ​មករា ឆ្នាំ​២០២៣។

លោក ជា សុផារ៉ា លើកឡើង​ថា ការ​សាងសង់​ព្រះពុទ្ធ​បដិមា​នេះ នឹង​ចូលរួម​ចំណែក​លើក​កម្ពស់​ការ​គោរព​ព្រះពុទ្ធ​សាសនា​ក្នុង​ព្រះរាជាណាចក្រ​កម្ពុជា ព្រមទាំង​បង្កើត​នូវ​សក្ដានុពល​ទេសចរណ៍​ថ្មី​មួយ​ទៀត​នៅ​ឧទ្យាន​ជាតិ​ព្រះមុនីវង្ស «បូកគោ» ផង​ដែរ ហើយ​ព្រះពុទ្ធ​បដិមា​នេះ​នឹង​ក្លាយ​ជា​ព្រះពុទ្ធ​បដិមា​ទ្រង់​ព្រះ​ភ្នែន​ខ្ពស់​ជាងគេ​នៅ​លើ​ពិភពលោក។

ការ​សម្រេច​សាងសង់​ព្រះពុទ្ធ​បដិមា​នេះ ធ្វើ​ឡើង​បន្ទាប់ពី​រាជរដ្ឋាភិបាល​បាន​ចេញ​សេចក្ដី​សម្រេច​ឱ្យ​ក្រុមហ៊ុន សុខា អូតែល របស់​ឧកញ៉ា សុខ គង់ ម្ចាស់​ក្រុមហ៊ុន​សណ្ឋាគារ កាស៊ីណូ សុខា អូតែល ជា​ផ្លូវការ​កាលពី​ថ្ងៃទី​១ ខែ​កញ្ញា ឆ្នាំ​២០២២ កន្លងទៅ។

ឧកញ៉ា សុខ គង់ ដែល​ធ្លាប់​គ្រប់គ្រង​ប្រាសាទ​អង្គរ​ប្រមូល​ចំណេញ​បាន​រាប់​រយ​លាន​ដុល្លារ​ពី​ទេសចរ អះអាង​កាលពី​ពាក់កណ្តាល​ខែ​ធ្នូ ឆ្នាំ​២០២២ ថា ព្រះពុទ្ធ​បដិមា​នេះ​នឹង​ក្លាយ​ជា​ព្រះពុទ្ធ​បដិមា​ខ្ពស់​ជាងគេ​នៅ​លើ​ពិភពលោក ដែល​គ្រោង​នឹង​ចំណាយ​ថវិកា​ប្រមាណ​ពី ៣០ ទៅ ៤០​លាន​ដុល្លារ​សហរដ្ឋ​អាមេរិក។

ស្ថាបនិក​អង្គការ​អភិវឌ្ឍន៍​ផ្នត់គំនិត បណ្ឌិត សេក សុជាតិ ប្រាប់​សារព័ត៌មាន The Cambodia Daily នៅ​ថ្ងៃទី​៣ មករា នេះ​ថា ការ​សាងសង់​និមិត្តរូប​ព្រះពុទ្ធ​បដិមា​នេះ​គឺជា​រឿង​ល្អ ប្រសិនបើ​រូបសំណាក​នោះ​ធ្វើ​ឡើង​តាម​ទម្រង់​បែបបទ​របស់​ខ្មែរ និង​មាន​គោលដៅ​ទុក​ជា​ទី​សក្ការៈ ប៉ុន្តែ​បើ​ទ្រង់ទ្រាយ​នៃ​ការ​សាងសង់​រូប​បដិមា​នេះ​មិន​ដូច​ទម្រង់​នៃ​ព្រះពុទ្ធ​បដិមា​ដែល​ពលរដ្ឋ​ខ្មែរ​ធ្លាប់​គោរព​បូជា​ទេ ការ​សាងសង់​នេះ​អាច​នឹង​មាន​ចេតនា​ផ្សេង​ក្រៅពី​ការ​គោរព​បូជា និង​ទាក់ទាញ​ទេសចរណ៍។

លោក​បញ្ជាក់​ថា ថ្ងៃ​ក្រោយ​អាច​នឹង​ជួប​វិបត្តិ​ផ្សេងៗ ហើយ​វិស័យ​ព្រះពុទ្ធ​សាសនា​នឹង​ធ្លាក់​ចុះ​ផង​ដែរ ខណៈ​ការ​គោរព​ព្រះពុទ្ធ​សាសនា​តាម​បែប​ប្រជាពលរដ្ឋ​ខ្មែរ​ដែល​ធ្លាប់​បូជា ក៏​អាច​នឹង​ប្រែ​ក្លាយ​ន័យ​ដើម​ថែម​ទៀត។

ទាក់ទិន​នឹង​បញ្ហា​នេះ ក្រុម​អ្នក​សង្កេតការណ៍​លើកឡើង​ថា គោលបំណង​អាទិភាព​របស់​ឧកញ៉ា សុខ គង់ ដែល​សាងសង់​ព្រះពុទ្ធ​បដិមា​ដ៏​ធំ​ជាងគេ​លើ​ពិភពលោក​លើ​តំបន់​កាន់កាប់​របស់​គាត់​បែប​នេះ គឺ​ដើម្បី​តែ​ផល​ប្រយោជន៍​ដែល​នឹង​ហូរ​ចូល​តាមរយៈ​ទេសចរ​ដែល​នឹង​ទៅ​កម្សាន្ត​នៅ​តំបន់​នោះ ខណៈ​ការ​គោរព​ចំពោះ​ព្រះពុទ្ធ​បដិមា​នេះ គឺជា​រឿង​បន្ទាប់បន្សំ​ប៉ុណ្ណោះ។

ភ្នំ​បូកគោ​ត្រូវ​បាន​រាជរដ្ឋាភិបាល​កម្ពុជា​ផ្តល់​សិទ្ធិ​អភិវឌ្ឍន៍​រយៈពេល ៩៩​ឆ្នាំ​ដល់​ក្រុមហ៊ុន សុខា អូតែល របស់​ឧកញ៉ា សុខ គង់ ដែល​ជា​ជនជាតិ​វៀតណាម លើ​ផ្ទៃដី​ជិត ២៤០០​ហិកតារ​ចាប់តាំងពី​ឆ្នាំ​២០១០ មក ខណៈ​ការ​អភិវឌ្ឍ​បាន​ចាប់ផ្តើម​ពី​ដើមដំបូង​រាប់​ទាំង​សណ្ឋាគារ កាស៊ីណូ ផ្លូវ​ឡើង​ភ្នំ និង​ហេដ្ឋារចនាសម្ព័ន្ធ​ជាច្រើន​ទៀត ដែល​ក្រុមហ៊ុន​នេះ​បាន​វិនិយោគ​អស់​ទឹកប្រាក់​ចន្លោះ​ពី ៤០០ ទៅ ៥០០​លាន​ដុល្លារ​សហរដ្ឋ​អាមេរិក​ហើយ​បើ​គិត​មក​ទល់​នឹង​ពេល​នេះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស