អតីតមេដឹកនាំបក្សប្រឆាំង លោក សម រង្ស៊ី ជូនពរឆ្នាំថ្មីឱ្យប្រទេសកម្ពុជាមានសេរីភាព យុត្តិធម៌ និងប្រជាធិបតេយ្យពិតប្រាកដ នៅពេលដែលរបបផ្ដាច់ការត្រូវបានកម្ចាត់ចោលឲ្យរលាយសាបសូន្យពីទឹកដីខ្មែរ។
អតីតមេដឹកនាំប្រឆាំងដែលកំពុងរស់នៅនិរទេសខ្លួននៅក្រៅស្រុក លោក សម រង្ស៊ី បានសរសេរលើទំព័រហ្វេសប៊ុករបស់ខ្លួននៅថ្ងៃទី៣ ខែមករា ឆ្នាំ២០២៣ ថា សូមឲ្យមាតុភូមិកម្ពុជាទទួលបាននូវការផ្លាស់ប្ដូរជាវិជ្ជមាន ដូចអ្វីដែលប្រជារាស្ត្រខ្មែរប្រាថ្នាចង់បាន គឺការគោរពឆន្ទៈរបស់ប្រជារាស្ត្រ ដែលស្រឡាញ់សេរីភាព យុត្តិធម៌ និងប្រជាធិបតេយ្យពិតប្រាកដ បន្ទាប់ពីកម្ចាត់របបផ្ដាច់ការឱ្យរលាយសាបសូន្យពីមាតុភូមិដ៏បវរមួយនេះ។
ការអះអាងរបស់អតីតមេដឹកនាំប្រឆាំងនេះ ធ្វើឡើងស្របពេលដែលគេមើលឃើញថាប្រទេសកម្ពុជាកាន់តែធ្លាក់ចុះនូវប្រព័ន្ធយុត្តិធម៌សង្គម និងលទ្ធិប្រជាធិបតេយ្យត្រូវបានរំលោភ និងជាន់ឈ្លីក្រោមការដឹកនាំនៃបក្សកាន់អំណាចរបស់លោក ហ៊ុន សែន សព្វថ្ងៃនេះ។
អនុប្រធានវេទិកាពលរដ្ឋ លោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី៤ មករា នេះថា ដើម្បីឆ្ពោះទៅរកការផ្លាស់ប្ដូរជាវិជ្ជមានដូចការលើកឡើងរបស់លោក សម រង្ស៊ី ទាល់តែក្រុមប្រឆាំងនាំគ្នាងើបឡើងដឹកនាំប្រជាពលរដ្ឋធ្វើការតស៊ូជាមួយបក្សកាន់អំណាច ហើយហ៊ានប្រឈមទៅនឹងការបង្ក្រាបតាមបែបផ្ដាច់ការរបស់រដ្ឋាភិបាលក្រុងភ្នំពេញគ្រប់បែបយ៉ាង នោះទើបអាចមានពន្លឺនៃការផ្លាស់ប្ដូរជាវិជ្ជមាននៅប្រទេសកម្ពុជាទៅថ្ងៃមុខ។
លោក ម៉ែន ណាត លើកឡើងថា បើគ្រាន់តែនិយាយហើយគ្មានសកម្មភាពពីក្រុមអ្នកស្នេហាប្រជាធិបតេយ្យដូចសព្វថ្ងៃនេះ ការផ្លាស់ប្ដូរជាវិជ្ជមានក៏មិនអាចកើតមានបានដែរ។ លោកបន្តថា ប្រសិនបើមេដឹកនាំបក្សប្រឆាំងទាំងក្នុងស្រុក និងក្រៅស្រុកមិនស្រុះស្រួលគ្នាដើម្បីកំណត់គោលដៅរបស់ខ្លួនឡើងវិញទេ នោះការផ្លាស់ប្ដូរដែលលោក សម រង្ស៊ី លើកឡើងនៅពេលនេះគ្រាន់តែជាក្តីស្រមៃខ្យល់ប៉ុណ្ណោះ។
អនុប្រធានវេទិកាពលរដ្ឋរូបនេះបញ្ជាក់ថា បញ្ហាផ្លាស់ប្ដូរបាន ឬមិនបាន គឺស្ថិតនៅត្រង់ថា តើមេដឹកនាំបក្សប្រឆាំងហ៊ានលះបង់សិទ្ធិសេរីភាព និងជីវិតផ្ទាល់ខ្លួនដើម្បីដឹកនាំប្រជាពលរដ្ឋរកការផ្លាស់ប្ដូរ ឬក៏អត់ប៉ុណ្ណោះ ត្បិតប្រជាពលរដ្ឋនៅពេលនេះរង់ចាំតែពួកគេចេញមុខដឹកនាំធ្វើសកម្មភាពប៉ុណ្ណោះ។
លោក ម៉ែន ណាត បន្ថែមថា ផ្ទុយទៅវិញ បើខ្លួនឯងជាអ្នកនយោបាយដែលត្រូវដឹកនាំប្រជាពលរដ្ឋមិនហ៊ានចេញមុខតទល់នឹងបក្សកាន់អំណាចផងនោះ តើឲ្យប្រជាពលរដ្ឋប្រមូលផ្ដុំកម្លាំងតទល់ជាមួយនឹងបក្សកាន់អំណាចដើម្បីធ្វើការផ្លាស់ប្ដូរតាមការលើកឡើងរបស់ខ្លួនម្តេចនឹងកើត?
ភាពជាក់ស្តែងមួយ គណបក្សសង្គ្រោះជាតិដែលមានការគាំទ្រពីប្រជាពលរដ្ឋជិតកន្លះប្រទេស ត្រូវតុលាការប្រកាសរំលាយកាលពីឆ្នាំ២០១៧ តាមបញ្ជារបស់លោក ហ៊ុន សែន ខណៈមេបក្សប្រឆាំងលោក កឹម សុខា ត្រូវអាជ្ញាធរចាប់ដាក់គុក ស្របពេលដែលលោក សម រង្ស៊ី ត្រូវនិរទេសខ្លួនទៅរស់នៅក្រៅប្រទេសរហូតចូលស្រុកមិនបានដល់សព្វថ្ងៃនេះ៕