អ្នកឃ្លាំមើលលើកឡើងថា ភាពខ្វះចន្លោះនៃការមិនដាក់បញ្ជូនទោសទណ្ឌទៅលើអ្នកតែងតាំងសែស្រឡាយ និងបក្ខពួកក្នុងស្ថាប័នរដ្ឋនូវច្បាប់ស្ដីពីការប្រឆាំងអំពើពុករលួយ បានធ្វើឲ្យប្រជាពលរដ្ឋបាត់បង់ផលប្រយោជន៍ និងបង្កផលប៉ះពាល់ដល់សង្គមជាតិធ្ងន់ធ្ងរ។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី កត់សម្គាល់ថា ការដាក់សែស្រឡាយ និងបក្សពួកនិយមក្នុងស្ថាប័នសាធារណៈរបស់រដ្ឋ ដោយសារអំពើពុករលួយ និងការស៊ីសំណូកសូកប៉ាន់។ ករណីនេះបានធ្វើឲ្យមានទំនាស់ផលប្រយោជន៍នៅក្នុងការមុខតំណែងសាធារណៈ និងការដំឡើងឋានៈបែបនេះ។
លោកបន្តថា បញ្ហានេះវាបានបង្កផលប៉ះពាល់ធ្ងន់ធ្ងរដល់សង្គមជាតិ និងនាំឲ្យស្ថាប័នសាធារណៈមិនមានសុចរិតភាព ហើយគណនេយ្យភាពទាបដោយឈានទៅដល់ការសម្រេចចិត្តមិនត្រឹមត្រូវលើគោលនយោបាយផ្សេងៗ និងកិច្ចការសាធារណៈដែលជាប្រយោជន៍ពលរដ្ឋ ដោយសារអ្នកសម្រេចចិត្តទាំងនោះមានទំនាស់ផល់ប្រយោជន៍។
លោកបន្ថែមថា មួយវិញទៀត ការដាក់សែស្រឡាយ និងបក្សពួកនិយមនេះក៏បានធ្វើឲ្យបាត់បង់ឱកាស និងភាពស្មើភាពគ្នាក្នុងការទទួលបានការងារ និងមុខងារសំខាន់ៗនៅក្នុងស្ថាប័នរដ្ឋដែរ ខណៈអ្នកដែលមានសមត្ថភាពពិតប្រាកដ ប៉ុន្តែមិនមានសាច់ញាតិ ឬលុយកាក់សម្រាប់សូកប៉ាន់នោះ ពួកគេនឹងមិនទទួលបានមុខតំណែងសំខាន់ៗទាំងនោះទេ។
លោក ប៉ិច ពិសី បន្តថា ការមិនកំណត់ទោសទណ្ឌលើអ្នកដាក់គ្រួសារ និងសាច់ញាតិ ព្រមទាំងបក្ខពួកខ្លួននៅក្នុងច្បាប់ស្ដីពីការប្រឆាំងអំពើពុករលួយ ទើបជំរុញឲ្យការតែងតាំងសែស្រឡាយ និងបក្សពួកនៅតាមស្ថាប័នរដ្ឋកំពុងកើតមានឡើងនៅកម្ពុជា។
លោកបង្ហាញការសោកស្ដាយចំពោះភាពខ្វះចន្លោះ ដែលអ្នកធ្វើច្បាប់មិនបញ្ចូលការដាក់សែស្រឡាយ និងបក្សពួកនិយមនៅក្នុងច្បាប់ស្ដីពីការប្រឆាំងអំពើពុករលួយនៅកម្ពុជា ខណៈច្បាប់ស្ដីពីការប្រឆាំងអំពើពុករលួយ ទាល់តែមានភស្តុតាងបញ្ជាក់ពីអំពើពុករលួយ ឬការសូកប៉ាន់ផ្សេងៗក្នុងការទទួលបានមុខតំណែងនៅស្ថាប័នសាធារណៈទាំងនោះ ទើបជាបទល្មើស។ ប៉ុន្តែនៅក្នុងគោលការណ៍ជាសកលរបស់អង្គការសហប្រជាជាតិ និងការអនុវត្តល្អជាទូទៅ រាល់ការជ្រើសរើស ឬដំឡើងមុខតំណែងសាធារណៈ លោកថាគេបានហាមប្រាមមិនឲ្យមានពាក់ព័ន្ធនឹងសែស្រឡាយ និងបក្សពួកនិយមនេះ ដើម្បីកុំឲ្យមានទំនាស់ផលប្រយោជន៍ និងប៉ះពាល់ដល់ប្រយោជន៍សាធារណៈ និងកិច្ចការជាតិ។
អ្នកវិភាគនយោបាយ និងជាប្រធានវេទិកាពលរដ្ឋ លោក គឹម សុខ បានប្រាប់សារព័ត៌មាន The Cambodia Daily ថា សម្រាប់លោកមិនមានអ្វីចម្លែកទេ ដោយសារប្រព័ន្ធដឹកនាំរដ្ឋាភិបាលបច្ចុប្បន្នជាប្រព័ន្ធដឹកនាំតាមជំហានគីង្គក់របស់លោក ហ៊ុន សែន។ លោកបញ្ជាក់ថា ប្រព័ន្ធគីង្គក់នេះអាចដំណើរការ ឬរស់ទៅបានដោយមានកត្តាតែមួយគត់ គឺការពារជន ឬអ្នកប្រព្រឹត្តិអំពើពុករលួយ បក្ខពួកនិយម ទើបរដ្ឋាភិបាលដឹកនាំដោយលោក ហ៊ុន សែន បណ្ដោយឲ្យមានអំពើពុករលួយជាប្រព័ន្ធ និងការបង្កើតបក្ខពួកនិយម គ្រួសារនិយមនៅពេញក្រសួងស្ថាប័នតែម្ដង។
អ្នកវិភាគនយោបាយរូបនេះថា ការដឹកនាំបែបពុករលួយជាប្រព័ន្ធ ដោយបក្ខពួកនិយម គ្រួសារនិយមបែបនេះ ប្រជាពលរដ្ឋមិនបានទទួលផលប្រយោជន៍នោះទេ។ ផ្ទុយទៅវិញ លោកថាពលរដ្ឋ និងប្រទេសជាតិកាន់តែរងគ្រោះធ្ងន់ធ្ងរ ដោយសារការដឹកនាំរដ្ឋាភិបាលបែបបក្ខពួកនិយម គ្រួសារនិយម។ អំណាចនៃជីវិតរបស់លោក ហ៊ុន សែន មានមកដល់បច្ចុប្បន្ននេះ ដោយសារបណ្ដោយឲ្យមានអំពើពុករលួយជាប្រព័ន្ធនេះ។
ការលើកឡើងរបស់អ្នកឃ្លាំមើលនេះ ក្រោយពីមន្ត្រីមួយចំនួនស្នើទៅរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងអង្គភាពប្រឆាំងអំពើពុករលួយ ឲ្យបើកការស៊ើបអង្កេតករណីអគ្គនាយកដ្ឋានហិរញ្ញវត្ថុថ្នាក់ក្រោមជាតិនៃក្រសួងសេដ្ឋកិច្ច បានដាក់គ្រួសារ និងសាច់ញាតិក្នុងស្ថាប័នខ្លួនកំពុងដឹកនាំ។
លោក កែវ បេងវឌ្ឍន៍ អគ្គនាយកដ្ឋានហិរញ្ញវត្ថុថ្នាក់ក្រោមជាតិក្រសួងសេដ្ឋកិច្ច បានដាក់ប្អូនប្រុសបង្កើតរបស់ខ្លួនឈ្មោះ កែវ បេងវី ធ្វើជាអគ្គនាយករង ខណៈកូនបង្កើតឈ្មោះ កែវ បេងវឌ្ឍន៍វិស្ណុ ត្រូវបានលោក កែវ បេងវឌ្ឍន៍ ដាក់ឲ្យធ្វើជាប្រធាននាយកដ្ឋានគ្រប់គ្រងហិរញ្ញវត្ថុ រដ្ឋបាលថ្នាក់ក្រោមជាតិទី៣ នៅក្នុងអគ្គនាយកដ្ឋានហិរញ្ញវត្ថុថ្នាក់ក្រោមជាតិនៃក្រសួងសេដ្ឋកិច្ច។
ការតែងតាំងសែស្រឡាយមិនមែនមានតែស្ថាប័នរដ្ឋមួយនេះទេ កាលពីថ្ងៃទី២១ ខែមករា ឆ្នាំ២០២២ កូនៗរបស់រដ្ឋមន្ត្រីក្រសួងធនធានទឹក លោក លឹម គានហោ ត្រូវបានតែងតាំងជារដ្ឋលេខាធិការ និងអនុរដ្ឋលេខាធិការក្រសួងធនធានទឹក និងឧតុនិយមព្រមៗគ្នា បន្ទាប់ពីលោក ហ៊ុន សែន បានទូលថ្វាយទៅព្រះមហាក្សត្រ។
ក្រៅពីអគ្គនាយកដ្ឋានហិរញ្ញវត្ថុថ្នាក់ក្រោមជាតិក្រសួងសេដ្ឋកិច្ច និងក្រសួងធនធានទឹក និងឧតុនិយមនេះ ការតែងតាំងសែស្រឡាយ និងបក្ខពួករបស់ខ្លួនក៏មាននៅតាមក្រសួងស្ថាប័នរដ្ឋផ្សេងទៀត ខណៈអំពើពុករលួយនេះកំពុងចាក់ឫសយ៉ាងជ្រៅក្នុងស្ថាប័ននីមួយៗក្នុងប្រទេសកម្ពុជា។
អង្គការតម្លាភាពអន្តរជាតិ (Transparency International) ដែលមានមូលដ្ឋាននៅទីក្រុងប៊ែរឡាំង ប្រទេសអាល្លឺម៉ង់ ទើបបានចេញផ្សាយសេចក្តីរាយការណ៍មួយកាលពីថ្ងៃទី២៥ ខែមករា ឆ្នាំ២០២២ ដោយចាត់ចំណាត់ថ្នាក់អំពើពុករលួយកម្ពុជានៅឆ្នាំ២០២១ ជាប់ចំណាត់ថ្នាក់ទី១៥៧ ក្នុងចំណោមប្រទេសចំនួន១៨០ នៅទូទាំងពិភពលោក៕