មេដឹកនាំបក្សកាន់អំណាច លោក ហ៊ុន សែន សម្រេចលុប ស.ជ.ណ ដែលបានបញ្ជាឱ្យចាប់ខ្លួនឧកញ៉ា សៀង ចាន់ហេង នាយកក្រុមហ៊ុន ហេង អភិវឌ្ឍន៍ ទាក់ទិននឹងការប្រើប្រាស់ឯកសារក្លែងក្លាយដើម្បីរំលោភយកអចលនទ្រព្យអ្នកដទៃ។
ប្រមុខរដ្ឋាភិបាលកម្ពុជា សរសេរលើទំព័រហ្វេសប៊ុករបស់ខ្លួននៅថ្ងៃទី១១ មករា នេះថា ដើម្បីបញ្ចប់នូវភាពមិនច្បាស់លាស់មុនពេលរដ្ឋមន្ត្រីក្រសួងដែនដី នគរូបនីយកម្ម និងសំណង់ លោក ជា សុផារ៉ា ដែលត្រូវលើកឡើងពីបញ្ហាទាក់ទិននឹងឧកញ៉ា សៀង ចាន់ហេង ជុំវិញបញ្ហាដីធ្លីស្ថិតក្នុងគម្រោងសាងសង់ព្រលានយន្តហោះតេជោក្រុងតាខ្មៅ លោកសម្រេចនិរាករណ៍សេចក្តីជូនដំណឹងដែលបានចេញកាលពីសប្តាហ៍មុន ដែលតម្រូវឱ្យចាប់ខ្លួនឧកញ៉ា សៀង ចាន់ហេង ចាប់ពីពេលនេះតទៅ។
កាលពីថ្ងៃទី៥ ខែមករា ឆ្នាំ២០២៣ ទីស្ដីការគណៈរដ្ឋមន្ត្រីបានចេញសេចក្តីជូនដំណឹងមួយទៅកាន់រដ្ឋមន្ត្រីក្រសួងមហាផ្ទៃ លោក ស ខេង និងអភិបាលខេត្តកណ្តាល ឱ្យចាប់ខ្លួនឧកញ៉ា សៀង ចាន់ហេង និងបក្សពួកប្រគល់ឱ្យអយ្យការអមសាលាដំបូងខេត្តកណ្ដាល ដើម្បីចោទប្រកាន់ និងផ្ដន្ទាទោសតាមច្បាប់ ជុំវិញនៃការប្រើប្រាស់ឯកសារក្លែងបន្លំដើម្បីកាន់កាប់អចលនទ្រព្យរបស់ឈ្មោះ ហ៊ុន ប៊ុនធឿន និងឈ្មោះ ហៀវ លន់ នៅភូមិទួលសាលា ឃុំស្អាងភ្នំ ស្រុកស្អាង ខេត្តកណ្ដាល។
សេចក្តីជូនដំណឹងដដែលបញ្ជាក់ថា ដោយផ្អែកលើលិខិតរបស់ក្រសួងមហាផ្ទៃ និងចំណារឯកភាពរបស់លោកនាយករដ្ឋមន្ត្រី ហ៊ុន សែន កាលពីថ្ងៃទី២៩ ខែធ្នូ ឆ្នាំ២០២២ ទីស្ដីការគណៈរដ្ឋមន្ត្រីអះអាងថា រាជរដ្ឋាភិបាលសម្រេចទទួលស្គាល់ភាពស្របច្បាប់នៃឯកសារកាន់កាប់ដីធ្លីរបស់ឈ្មោះ ហ៊ុន ប៊ុនធឿន និងឈ្មោះ ហៀវ លន់ ដោយបដិសេធឯកសារឧកញ៉ា សៀង ចាន់ហេង ចោលទាំងស្រុង។
ទាក់ទិននឹងការប្រើប្រាស់ឯកសារក្លែងបន្លំកាន់កាប់អចលនទ្រព្យរបស់ឧកញ៉ា សៀង ចាន់ហេង ដែលជានាយកក្រុមហ៊ុន ហេង អភិវឌ្ឍន៍ រូបនេះ កាលពីអំឡុងឆ្នាំ២០១៦ សាលាដំបូងរាជធានីភ្នំពេញបានផ្ដន្ទាទោសឧកញ៉ារូបនេះឲ្យជាប់ពន្ធនាគាររយៈពេលមួយឆ្នាំ និងសងជំងឺចិត្តទៅភាគីដើមបណ្ដឹងនូវទឹកប្រាក់ចំនួន ៤០០លានរៀលម្តងរួចមកហើយ ទាក់ទងនឹងរឿងក្លែងឯកសារកម្មសិទ្ធិដីធ្លីទំហំ ១៤៦ហិកតារ នៅភូមិទឹកល្អក់ ឃុំទឹកហូត ស្រុករលាប្អៀរ ខេត្តកំពង់ឆ្នាំង ដែលបានកើតឡើងកាលពីឆ្នាំ២០១៣។
មេធាវីដើមបណ្ដឹង លោក ថាន ថាវរៈ អះអាងថា សំណុំរឿងនោះគឺជាសំណុំរឿងមួយក្នុងចំណោមពាក្យបណ្តឹងជាច្រើនទៀតដែលប្រឆាំងនឹងការប្រើប្រាស់ឯកសារក្លែងបន្លំរបស់ឧកញ៉ា សៀង ចាន់ហេង ព្រោះឧកញ៉ារូបនេះបានលក់ដីឲ្យកូនក្ដីរបស់លោកដែលជាពាណិជ្ជករចិន ប៉ុន្តែក្រោយទទួលលុយគ្រប់ចំនួន ឧកញ៉ា សៀង ចាន់ហេង បានយកដីនោះទៅលក់ឱ្យអ្នកផ្សេងបន្តទៀតទៅវិញ។
មេធាវីរូបនោះបញ្ជាក់ថា ក្រោយកូនក្ដីរបស់លោកដាក់ពាក្យបណ្តឹងទៅតុលាការ ឧកញ៉ា សៀង ចាន់ហេង បានខ្ចីដៃសមត្ថកិច្ចដាក់ពាក្យប្តឹងកូនក្ដីរបស់លោកវិញ ដើម្បីឲ្យកូនក្ដីលោកដកពាក្យបណ្តឹងចេញពីតុលាការ ប៉ុន្តែកូនក្ដីរបស់លោកមិនព្រម។
ឧកញ៉ា សៀង ចាន់ហេង មានតួនាទីក្នុងវិស័យព្រះពុទ្ធសាសនា ជាទីប្រឹក្សាផ្ទាល់របស់សម្តេចសង្ឃរាជគណៈធម្មយុត្តិកនិកាយ បួរ គ្រី និងមានងារបន្ថែមជា នាងវិសាខាអគ្គមហាឧបាសិកាពុទ្ធសាសនូបត្ថម្ភក៍ផងដែរ។ ក្រៅពីមានតួនាទីក្នុងព្រះពុទ្ធសាសនា ឧកញ៉ា សៀង ចាន់ហេង ក៏ត្រូវគេស្គាល់ថាជាម្ចាស់រមណីយដ្ឋានរាជិនីលង្វែក ដែលស្ថិតក្នុងភូមិជំនីក ឃុំកំពង់ហ្លួង ស្រុកពញាឮ ខេត្តកណ្តាល ដោយលាតសន្ធឹងនៅលើផ្ទៃដីប្រមាណជា ២៥០ហិកតារថែមទៀត៕