34 C
Phnom Penh

មេ​បក្ស​ប្រឆាំង​ទើប​ចេញពី​គុក​ដឹកនាំ​បាតុករ​អង្រួន​ប្រទេស​បង់ក្លាដេស​ទាមទារ​នាយករដ្ឋមន្ត្រី​ចុះ​ចេញពី​តំណែង

ដោយ ឌឹ ខេមបូឌា ដេលី

បទវិភាគ

បាតុកម្ម​រយៈពេល​ពីរ​ថ្ងៃ​មក​នេះ បាន​និង​តែ​កំពុង​អង្រួន​រដ្ឋធានី​ដាកា នៃ​ប្រទេស​បង់ក្លាដេស ហើយ​មហា​បាតុកម្ម​នេះ​ដឹកនាំ​ដោយ​មេ​បក្ស​ប្រឆាំង លោក Mirza Abbas ដែល​ទើប​ត្រូវ​បាន​ដោះលែង​ឱ្យ​មាន​សេរីភាព​វិញ​ពី​ការ​ឃុំ​ខ្លួន​ក្នុង​ពន្ធនាគារ​កាលពី​ថ្ងៃ​ចន្ទ​ក្នុង​សប្ដាហ៍​នេះ។

តាម​បណ្ដាញ​ផ្សាយ​ព័ត៌មាន Aljazeera បាតុករ​យ៉ាងតិច​ប្រាំ​ម៉ឺន​នាក់​បាន​ចុះ​ដើរ​តាម​ផ្លូវ​នានា​នៅ​រដ្ឋធានី​ដាកា និង​ទីក្រុង​ជាច្រើន​ទៀត ដោយ​ពួកគេ​បាន​ស្រែក​ទាមទារ​ឱ្យ​អ្នកស្រី​នាយករដ្ឋមន្ត្រី Sheikh Hasina លាលែង​ពី​តំណែង។ បាតុករ​ស្រែក​ថា ការ​ដឹកនាំ​របស់​អ្នកស្រី​ធ្វើ​ឱ្យ​សេដ្ឋកិច្ច​បង់ក្លាដេស ទៅ​រក​ការ​រំលំ និង​ការ​រីក​រាលដាល​នៃ​អំពើពុករលួយ​ដូច​ដំបៅ​មហារីក។

ប្រឈម​នឹង​ការ​ឡើង​ថ្លៃ​នៃ​ទំនិញ​គួបផ្សំ​នឹង​អំពើពុករលួយ បាតុករ​បាន​បញ្ចេញ​កំហឹង និង​ទាមទារ​ឱ្យ​នាយករដ្ឋមន្ត្រី​ចុះចេញ​ពី​តំណែង រួច​រៀបចំ​ការ​បោះឆ្នោត​សភា​ឡើងវិញ។ ការ​ធ្វើ​បាតុកម្ម​នេះ ផ្ដួចផ្ដើម​ឡើង​ដោយ​គណបក្ស​ជាតិ​និយម​បង់ក្លាដេស BNP និង​សម្ព័ន្ធ​បក្ស​ប្រឆាំង Awami។

បាតុកម្ម​ប្រព្រឹត្ត​ទៅ​នៅ​រដ្ឋធានី​ដាកា និង​នៅ​តាម​ក្រុង​តូច​ធំ​ចំនួន ៩ ផ្សេង​ទៀត។ តែ​បើ​តាម Aljazeera មាន​គណបក្ស​យ៉ាងតិច ៣២​គណបក្ស​បាន​មក​រួបរួម​ធ្វើ​បាតុកម្ម​ជាមួយ​គណបក្ស​ជាតិ​និយម​បង់ក្លាដេស BNP ដែល​បាតុកម្ម​នេះ​ដឹកនាំ​ដោយ​អតីត​អ្នកទោស​នយោបាយ លោក Mirza Abbas ដែល​ជា​មេដឹកនាំ​ជាន់ខ្ពស់​បក្ស BNP ជា​បក្ស​ប្រឆាំង​ធំ​ជាងគេ។

ក្នុង​ព្រឹត្តិការណ៍​នេះ បាតុករ​បាន​មក​ប្រមូលផ្ដុំ​គ្នា​នៅ​មុខ​ទីស្នាក់ការ​គណបក្ស ដើម្បី​ស្តាប់​លោក Mirza Abbas និង​ទាមទារ​ឱ្យ​អ្នកស្រី Sheikh Hasina លាលែង​តំណែង​ពី​នាយករដ្ឋមន្ត្រី។

តែ​ក្នុង​ព្រឹត្តិការណ៍​នេះ សកម្មជន​បក្ស​ជាតិ​និយម​បង់ក្លាដេស​ជាង ៣០​នាក់​ត្រូវ​បាន​ចាប់​ខ្លួន ហើយ​យ៉ាងតិច​ណាស់ ១០០​នាក់​ផ្សេង​ទៀត​បាន​រង​របួស​ដោយ​ការ​វាយតប់​គ្នា​ជាមួយ​នឹង​សកម្មជន​បក្ស​កាន់​អំណាច។ ភាគី​ទាំង​ពីរ​ក្រុម​បាន​ប៉ះទង្គិច​គ្នា​ដោយ​គប់​ជាតិ​ផ្ទុះ វាយ​គ្នា​នឹង​ដំបង គប់​គ្នា​នឹង​ដុំ​ថ្ម។

ប៉ូលិស​បង្ក្រាប​កុបកម្ម​បាន​ចូល​ទៅ​បំបែក​ហ្វូង​ដោយ​ចាប់​បាតុករ​ទាំង​ពីរ​ក្រុម​នាំ​ទៅ​ឃុំ​ខ្លួន។

ដើមចម​ដែល​នាំ​ឱ្យ​ផ្ទុះ​បាតុកម្ម​ដ៏​ធំ​នៅ​ថ្ងៃ​នេះ បន្ទាប់ពី​មេដឹកនាំ​បក្ស​ជាតិ​និយម​បង់ក្លាដេស​ជា​អ្នកទោស​នយោបាយ​ដ៏​ល្បី​លោក Mirza Abbas បាន​បញ្ជូន​សារ​របស់​លោក​ភ្លាមៗ​ទៅ​កាន់​អ្នកគាំទ្រ និង​ពលរដ្ឋ​បង់ក្លាដេស បន្ទាប់ពី​លោក​ត្រូវ​បាន​ដោះលែង​ពី​ពន្ធនាគារ។

សារ​របស់​លោក​រៀបរាប់​ថា លោក​មាន​សេរីភាព​វិញ​ហើយ តែ​លោក​ចង់​ឃើញ​អ្នកស្រី Sheikh Hasina លាលែង​ពី​តំណែង។ តែ​យ៉ាងណា មិនមែន​មាន​តែ​រឿង​សារ​របស់​មេ​បក្ស​ប្រឆាំង​ដ៏​ធំ​នេះ​ទេ ដែល​នាំ​ឱ្យ​មាន​បាតុកម្ម​ប្រឆាំង​រដ្ឋាភិបាល​របស់​អ្នកស្រី Sheikh Hasina គឺ​វិបត្តិ​សេដ្ឋកិច្ច ស្បៀង​អាហារ និង​ប្រេងឥន្ធនៈ​ឡើង​ថ្លៃ​ខ្លាំង រួម​នឹង​អំពើពុករលួយ​ក៏​ជា​ដើមចម​មួយ​ដែរ​បាន​នាំ​ឱ្យ​បាតុករ​ទាមទារ​រំលាយ​សភា ហើយ​បោះឆ្នោត​ឡើងវិញ​នៅ​ចុង​ឆ្នាំ​នេះ ឬ​នៅ​ខែ​មករា ឆ្នាំ​២០២៤។

មក​ដល់​ពេលនេះ រដ្ឋាភិបាល​របស់​អ្នកស្រី Sheikh Hasina និង​អ្នកស្រី​ផ្ទាល់​ពុំ​ទាន់​ប្រតិកម្ម​ចំពោះ​បាតុករ​ដែល​ទាមទារ​ឱ្យ​អ្នកស្រី​លាលែង​ពី​តំណែង និង​បោះឆ្នោត​សភា​ឡើងវិញ​នៅឡើយ​ទេ។ បង់ក្លាដេស​ស្ថិត​ក្នុង​តំបន់​អាស៊ី​ខាងត្បូង។ ប្រទេស​មាន​ប្រជាជន​ជិត ១៧០​លាន​នាក់ ហើយ​ភាគច្រើន​កាន់​សាសនា​អ៊ីស្លាម។ តែ​ប្រទេស​នេះ​មាន​កំណើន​សេដ្ឋកិច្ច​ខ្លាំង​មួយ​ដែរ​នៅ​អាស៊ី​ខាងត្បូង។

វិបត្តិ​ប្រេងឥន្ធនៈ​ដោយសារ​សង្គ្រាម​រុស្ស៊ី​ចូល​ឈ្លានពាន​អ៊ុយក្រែន បាន​ជំរុញ​ឱ្យ​សេដ្ឋកិច្ច​ប្រទេស​បង់ក្លាដេស​ដាំ​ក្បាល​ចុះ បង្ក​ឱ្យ​ហក់​ឡើង​តម្លៃ​ស្បៀង និង​ប្រេងឥន្ធនៈ ថ្នាំពេទ្យ។ តែ​ទោះ​ជា​យ៉ាងណាក៏ដោយ ប្រទេស​នេះ​មិនទាន់​ដល់​ថ្នាក់​ដូច​ប្រទេស​ស្រីលង្កា ដែល​សេដ្ឋកិច្ច​ក្រឡាប់​ទៅ​ហើយ​ដោយសារតែ​ធ្លាក់​ក្នុង​វិបត្តិ​បំណុល​ចិន និង​បំណុល​ស្ថាប័ន​ហិរញ្ញវត្ថុ​ជាច្រើន​ទៀត​គរ​ដូច​ភ្នំ​នោះ​ទេ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស