បញ្ញវន្តខ្មែរនៅក្រៅស្រុក អំពាវនាវឱ្យប្រមុខរដ្ឋាភិបាលកម្ពុជា លោក ហ៊ុន សែន ប្រគល់គណបក្សសង្គ្រោះជាតិឱ្យមេដឹកនាំបក្សប្រឆាំង លោក កឹម សុខា វិញ ដើម្បីឱ្យរដ្ឋាភិបាលទទួលបាននូវការស្វាគមន៍ពីទំនាក់ទំនងនយោបាយការទូតជាមួយប្រទេសលោកសេរីឡើងវិញ និងជាការលើកទឹកចិត្តដល់អ្នកនយោបាយអហិង្សាផងដែរ។
អតីតប្រធានចលនានិស្សិតដើម្បីប្រជាធិបតេយ្យ លោក សារ៉ូ សូវិជ័យ លើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី១៧ មករា ថា មេដឹកនាំបក្សកាន់អំណាច លោក ហ៊ុន សែន តែងប្រកាសកម្ទេចមិនឱ្យមានការដឹកនាំនយោបាយបែបជ្រុលនិយម ប៉ុន្តែការបិទខ្ទប់ និងរារាំងមិនផ្តល់គណបក្សសង្គ្រោះជាតិឱ្យលោក កឹម សុខា ដែលជាអ្នកនយោបាយអហិង្សា គឺស្មើនឹងលោក ហ៊ុន សែន លើកទឹកចិត្តដល់អ្នកដឹកនាំនយោបាយតាមបែបជ្រុលនិយមដូច្នោះដែរ។
អតីតប្រធានចលនានិស្សិតដើម្បីប្រជាធិបតេយ្យរូបនេះ លើកឡើងថា ការប្រគល់គណបក្សសង្គ្រោះជាតិឱ្យលោក កឹម សុខា ដើម្បីឱ្យគាត់អាចចូលរួមក្នុងឆាកនយោបាយនៅឆ្នាំ២០២៣ នេះ គឺជារឿងល្អទាំងអស់គ្នា ទាំងមុខមាត់របស់រដ្ឋាភិបាល មុខមាត់បក្សកាន់អំណាច និងធានាបាននូវការបោះឆ្នោតមួយដែលមានការអបអរសាទរពីសហគមន៍អន្តរជាតិ ដែលជាគណបក្សប្រឆាំងមួយគួរទុកចិត្តបានក្នុងការចូលរួមការបោះឆ្នោតនៅអាណត្តិទី៧ ខាងមុខនេះ។
លោក សារ៉ូ សូវិជ័យ បញ្ជាក់ថា ការប្រគល់បក្សប្រឆាំងឱ្យលោក កឹម សុខា វិញ ក៏បង្ហាញពីសីលធម៌នយោបាយរបស់លោកនាយករដ្ឋមន្ត្រី ហ៊ុន សែន ដែរ ត្បិតអ្នកដឹកនាំប្រទេសក្រៅពីការគោរពច្បាប់ ក៏ត្រូវតែជាមនុស្សដែលមានសីលធម៌ខ្ពស់ដែរ ព្រោះប្រទេសកម្ពុជាត្រូវការអ្នកនយោបាយចាស់ទុំ ដើម្បីចូលរួមគ្នាកសាងប្រទេសជាតិឱ្យរីកចម្រើនទៅមុខ ប៉ុន្តែបើកម្ពុជានៅតែបន្តនយោបាយដែលដឹកនាំឱ្យបែកបាក់ជាតិដូចសព្វថ្ងៃនេះ គឺជាហានិភ័យយ៉ាងខ្លាំងសម្រាប់ប្រទេសកម្ពុជាទៅថ្ងៃអនាគត។
ការអះអាងនេះ ធ្វើឡើងស្របពេលដែលការបោះឆ្នោតជាតិអាណត្តិទី៧ ក៏កាន់តែខិតជិតមកដល់ ខណៈមេដឹកនាំបក្សប្រឆាំង លោក កឹម សុខា ក៏នៅតែបន្តជាប់រឿងក្តីក្ដាំនៅតុលាការនៅឡើយ។
អតីតអ្នកទោសនយោបាយ និងជាអតីតមន្ត្រីជាន់ខ្ពស់បក្សប្រឆាំង លោក មាជ សុវណ្ណារ៉ា លើកឡើងក្នុងកម្មវិធីនេះថា ដើម្បីឱ្យកម្ពុជាធានាបាននូវការអនុវត្តសិទ្ធិនយោបាយ សិទ្ធិបញ្ចេញមតិ និងការអនុវត្តតាមបែបប្រជាធិបតេយ្យពេញលេញ គ្មានជម្រើសផ្សេងណាក្រៅពីបើកលំហសេរីភាពឱ្យលោក កឹម សុខា មានសិទ្ធិពេញលេញ ដើម្បីធ្វើនយោបាយឡើងវិញនោះទេ ព្រោះថានេះគឺជាគន្លឹះនយោបាយតែមួយគត់ដែលធ្វើឱ្យកម្ពុជាលែងជាប់គាំងនយោបាយដូចសព្វថ្ងៃនេះទៀត។
លោក មាជ សុវណ្ណារ៉ា លើកឡើងថា មកទល់នឹងពេលនេះ សហគមន៍អន្តរជាតិមិនទាន់ផ្តល់ការគាំទ្រលើគណបក្សក្រៅរដ្ឋាភិបាលណាមួយថាជាគណបក្សដែលគួរឱ្យទុកចិត្តបានក្នុងការចូលរួមបោះឆ្នោតជាតិអាណត្តិទី៧ ឆ្នាំ២០២៣ នេះទេ ប៉ុន្តែអង្គទូតតំណាងប្រទេសទាំងនោះនៅតែបន្តជួបលោក កឹម សុខា ដែលជាសញ្ញាមួយបង្ហាញថា ពួកគេនៅតែមានទំនុកចិត្ត និងចង់ឃើញមេដឹកនាំបក្សប្រឆាំងរូបនេះមានសេរីភាពនយោបាយឡើងវិញ ជាពិសេសគឺការចូលរួមការបោះឆ្នោតនៅឆ្នាំ២០២៣ នេះ។
ទាក់ទិននឹងបញ្ហានេះ កាលពីថ្ងៃទី១៨ ខែសីហា ឆ្នាំ២០២២ សមាជិកព្រឹទ្ធសភា និងជាប្រធានអនុគណៈកម្មការព្រឹទ្ធសភាទទួលបន្ទុកទំនាក់ទំនងការបរទេសសហរដ្ឋអាមេរិក លោក Edward J. Markey បានជំរុញឱ្យរដ្ឋាភិបាលកម្ពុជាទម្លាក់ចោលបទចោទលើមេដឹកនាំបក្សប្រឆាំង លោក កឹម សុខា និងបើកឱ្យគណបក្សសង្គ្រោះជាតិរស់ឡើងវិញ ដើម្បីទទួលបានសិទ្ធិសេរីភាពពេញលេញក្នុងការចូលរួមការបោះឆ្នោតជាតិក្នុងឆ្នាំ២០២៣ ខាងមុខនេះ។
ទោះបីជារយៈពេលជាង ៥ឆ្នាំនៃការរឹតត្បិតសេរីភាពលោក កឹម សុខា ដោយមិនទាន់អាចកាត់ទោសលោកពីបទល្មើសណាមួយក៏ដោយ ប៉ុន្តែតុលាការក្រុងភ្នំពេញបានប្រកាសរំលាយគណបក្សសង្គ្រោះជាតិកាលពីថ្ងៃទី១៦ ខែវិច្ឆិកា ឆ្នាំ២០១៧ រួចហើយ។ ជាងនេះទៀត កៅអីតំណាងរាស្ត្ររបស់បក្សនេះទាំង ៥៥ និងកៅអីសមាជិកក្រុមប្រឹក្សាឃុំ-សង្កាត់ទាំងជាង ៥ពាន់ ក៏ត្រូវដកហូតយកទៅបែងចែកឱ្យគណបក្សផ្សេងថែមទៀត ទាំងដែលខ្លួនមិនទាន់បានកាត់ទោសមេបក្សរបស់ពួកគេពីបទល្មើសណាមួយនៅឡើយ។
យ៉ាងណាក៏ដោយ កាលពីអំឡុងខែកញ្ញា ឆ្នាំ២០២០ ក្នុងកិច្ចប្រជុំគណៈរដ្ឋមន្ត្រីនៅវិមានសន្តិភាព មេដឹកនាំបក្សកាន់អំណាច លោក ហ៊ុន សែន អះអាងថា ករណីលោក កឹម សុខា អាចនឹងត្រូវអូសបន្លាយពេល ៤ឆ្នាំទៀត គឺត្រូវពន្យាររហូតដល់ក្រោយការបោះឆ្នោតជាតិក្នុងឆ្នាំ២០២៣ ឯណោះ៕