អ្នកឃ្លាំមើលនិយាយថា អំពើនិទ្ទណ្ឌភាពនៅកម្ពុជានឹងនៅតែបន្តកើតមានទៅថ្ងៃមុខ ប្រសិនបើពលរដ្ឋមិនចូលរួមលុបបំបាត់ និងមិនឱ្យតម្លៃលើវីរភាពរបស់អ្នកដែលតស៊ូដើម្បីសិទ្ធិសេរីភាពសម្រាប់សង្គមជាតិ និងអំពាវនាវឲ្យរដ្ឋាភិបាលវែកមុខរកឃាតករពិតយកមកផ្ដន្ទាទោស ដើម្បីផ្តល់យុត្តិធម៌ជូនអតីតប្រធានសហជីពសេរីកម្មករលោក ជា វិជ្ជា ទេនោះ។
អតីតតំណាងសហជីពសេរីកម្មករ និងជាប្រធានសមាគមសេដ្ឋកិច្ចប្រជាធិបតេយ្យឯករាជ្យក្រៅប្រព័ន្ធ (IDEA) លោក វន់ ពៅ ប្រាប់សារព័ត៌មាន The Cambodia Daily នៅថ្ងៃទី២៣ មករា នេះថា អស់រយៈពេលជិត ២០ឆ្នាំហើយ ឃាតកម្មក្រៅប្រព័ន្ធច្បាប់លើលោក ជា វិជ្ជា នៅតែគ្មានពន្លឺយុត្តិធម៌សម្រាប់រូបលោក និងក្រុមគ្រួសារដដែល ដែលបញ្ហានេះនឹងរុញឱ្យកម្ពុជាធ្លាក់ទៅក្នុងប្រទេសមួយដែលកើតមាននូវអំពើនិទ្ទណ្ឌភាពធ្ងន់ធ្ងរ។
លោកបន្ថែមថា ឃាតកម្មក្រៅប្រព័ន្ធច្បាប់ដែលរកមុខឃាតករពិតមិនឃើញនេះ មិនមែនកើតឡើងតែទៅលើលោក ជា វិជ្ជា នោះទេ ប៉ុន្តែឧក្រិដ្ឋកម្មបែបនេះក៏បានកើតឡើងទៅលើមនុស្សល្បីៗជាច្រើនផ្សេងទៀតដែលឃាតករពិតនៅតែមិនត្រូវបានយកមកផ្ដន្ទាទោសដូចគ្នា។
ប្រធានសមាគមសេដ្ឋកិច្ចប្រជាធិបតេយ្យឯករាជ្យក្រៅប្រព័ន្ធរូបនេះអះអាងថា តំណាងសហជីព តំណាងអង្គការសង្គមស៊ីវិល និងសមាគមនានានៅតែទន្ទឹងរង់ចាំចំណាត់ការរបស់រដ្ឋាភិបាលវែកមុខរកឃាតករពិតយកមកផ្ដន្ទាទោស ដើម្បីផ្តល់យុត្តិធម៌ជូនអតីតប្រធានសហជីពសេរីកម្មករ លោក ជា វិជ្ជា គ្រប់គ្នា បើទោះបីជាឃាតកម្មក្រៅប្រព័ន្ធច្បាប់នេះកន្លងទៅជិត ២ទសវត្សទៅហើយក្តី។
លោក វន់ ពៅ អំពាវនាវឱ្យរដ្ឋាភិបាលបន្តស្វែងរកយុត្តិធម៌ជូនអតីតប្រធានសហជីពសេរីកម្មករ លោក ជា វិជ្ជា និងសកម្មជនសង្គមដទៃទៀតដែលត្រូវបានសម្លាប់ក្រៅប្រព័ន្ធទាំងអយុត្តិធម៌ ដែលឃាតករពិតមិនត្រូវបានចាប់យកមកផ្ដន្ទាទោសរហូតមកដល់ពេលនេះ ដើម្បីបញ្ចប់នូវវប្បធម៌និទ្ទណ្ឌភាពកុំឱ្យកើតមានបន្តទៀត និងដើម្បីលើកកម្ពស់យុត្តិធម៌សង្គមផងដែរ។
កាលពីថ្ងៃទី២២ ខែមករា ឆ្នាំ២០២៣ ថ្នាក់ដឹកនាំ សមាជិកសហព័ន្ធសហជីពសេរីកម្មករ និងតំណាងអង្គការសង្គមស៊ីវិលជាច្រើន ដូចជាប្រធានសហភាពការងារកម្ពុជា (CLC) លោក អាត់ ធន់ តំណាងសមាគមការពារសិទ្ធិមនុស្ស និងអភិវឌ្ឍន៍នៅកម្ពុជា (ADHOC) ព្រមទាំងក្រុមគ្រួសារ សាច់ញាតិ មិត្តភក្ដិប្រមាណ ១០០នាក់ បាននាំគ្នាមកជួបជុំគ្នាស្ថិតនៅទីតាំងតម្កល់រូបសំណាករបស់លោក ជា វិជ្ជា ដែលជាអតីតប្រធានសហជីពសេរីកម្មករ ដែលត្រូវឃាតករបាញ់សម្លាប់យ៉ាងព្រៃផ្សៃកាលពីថ្ងៃទី២២ ខែមករា ឆ្នាំ២០០៤ កន្លងទៅ។
តំណាងអង្គការសង្គមស៊ីវិលទាំងនោះអះអាងថា ការជួបជុំគ្នាក្នុងពិធីរំលឹកខួប ១៩ឆ្នាំនៃការបាញ់សម្លាប់អតីតប្រធានសហជីពសេរីកម្មករ លោក ជា វិជ្ជា នេះ គឺដើម្បីរំលឹកនូវគុណូបការៈដ៏ថ្លៃថ្លា និងវីរភាពដ៏អង់អាចក្លាហានរបស់លោកកាលនៅរស់រានមានជីវិត ក្នុងការទាមទារសិទ្ធិសេរីភាព លក្ខខណ្ឌការងារល្អប្រសើរជូនកម្មករកម្មការិនី ដែលលោកធ្លាប់បានដឹកនាំ និងជំរុញឲ្យមានការគោរពសិទ្ធិមនុស្ស និងលទ្ធិប្រជាធិបតេយ្យនៅកម្ពុជាកន្លងមក។
ថ្នាក់ដឹកនាំ សមាជិកសហព័ន្ធសហជីពសេរីកម្មករ និងតំណាងអង្គការសង្គមស៊ីវិលទាំងអស់ អំពាវនាវឲ្យសមត្ថកិច្ចនគរបាលយុត្តិធម៌គ្រប់ជាន់ថ្នាក់ គ្រប់ផ្នែក ជាពិសេសរដ្ឋាភិបាលកម្ពុជា ចាត់ការស៊ើបអង្កេតតាមនីតិវិធីស្វែងរកមុខឃាតករពិតប្រាកដ និងអ្នកបញ្ជាពីក្រោយខ្នងយកមកផ្ដន្ទាទោសតាមច្បាប់ ដើម្បីផ្តល់យុត្តិធម៌ដល់ក្រុមគ្រួសារ សាច់ញាតិជនរងគ្រោះ ឈានទៅលុបបំបាត់វប្បធម៌និទ្ទណ្ឌភាព និងពង្រឹងយុត្តិធម៌សង្គមនៅកម្ពុជាទៅថ្ងៃមុខផងដែរ។
អតីតប្រធានសហជីពសេរីកម្មករ លោក ជា វិជ្ជា ដែលកម្មករចាត់ទុកថាជាមេសហជីពដ៏ក្លាហាន ត្រូវបានខ្មាន់កាំភ្លើងបាញ់សម្លាប់នៅតូបលក់កាសែតកែងរបងវត្តលង្កា ក្រុងភ្នំពេញ កាលពីថ្ងៃទី២២ ខែមករា ឆ្នាំ២០០៤ ប៉ុន្តែមុនឃាតករបាញ់សម្លាប់ លោក ជា វិជ្ជា បានទទួលសារក្នុងទូរស័ព្ទដៃរបស់លោកគំរាមផ្ដាច់ជីវិតកាលពីអំឡុងខែកក្កដា ឆ្នាំ២០០៣ ជាមុនផងដែរ ស្របពេលដែលលោកកំពុងដឹកនាំកម្មករធ្វើបាតុកម្មប្រឆាំងរដ្ឋាភិបាលដើម្បីសិទ្ធិសេរីភាព និងលទ្ធិប្រជាធិបតេយ្យនៅកម្ពុជា និងទាមទារឱ្យកម្មករហ៊ានតវ៉ាចំពោះថៅកែរោងចក្រ ដើម្បីកុំឱ្យជិះជាន់កម្លាំងពលកម្មរបស់កម្មករក្នុងវិស័យកាត់ដេរនៅពេលនោះ។
អង្គការគម្រោងយុត្តិធម៌ពិភពលោក (The World Justice Project) បានបន្តដាក់កម្ពុជាស្ថិតក្នុងចំណាត់ថ្នាក់ទាបបន្តទៀតឲ្យឈរក្នុងលេខរៀងទី១៣៩ ក្នុងចំណោម ១៤០ប្រទេសដែលមាននីតិរដ្ឋទាបបំផុតកាលពីអំឡុងខែតុលា ឆ្នាំ២០២២ កន្លងទៅ ក្រោយគេរកឃើញថា កម្ពុជាគឺជាប្រទេសដែលដឹកនាំគ្មានតម្លាភាព ពោរពេញដោយការគំរាមកំហែងសិទ្ធិជាមូលដ្ឋានរបស់ពលរដ្ឋ និងការមិនធានាបាននូវប្រព័ន្ធយុត្តិធម៌របស់ខ្លួនតាមផ្លូវតុលាការ ជាដើម៕