30 C
Phnom Penh

លោក ហ្សេឡេនស្គី ថា​លោក ពូទីន លែង​សម​ជា​មេដឹកនាំ​រុស្ស៊ី​ទៀត​ហើយ

ដោយ ឌឹ ខេមបូឌា ដេលី

បទវិភាគ

សង្គ្រាម​ដែល​រុស្ស៊ី​ឈ្លានពាន​អ៊ុយក្រែន មាន​ចំនួន ៣៣៧​ថ្ងៃ​ហើយ និង ១២​ខែ​ហើយ បើ​គិត​ត្រឹម​ថ្ងៃទី​២៧ ខែ​មករា ឆ្នាំ​២០២៣ នេះ។

អ្វី​ដែល​ពិភពលោក​ចាប់អារម្មណ៍​ជាងគេ​នោះ គឺ​លោក​ប្រធានាធិបតី​អ៊ុយក្រែន បន្ត​វាយ​ចំអក​ឲ្យ​លោក វ៉្លាឌីមៀរ ពូទីន ប្រធានាធិបតី​រុស្ស៊ី ថា​ជា​មេដឹកនាំ​ឥត​បាន​ការ ហើយ​លែង​សម​ជា​មេដឹកនាំ​របស់​ប្រជាជន​រុស្ស៊ី​ទៀត​ហើយ។ មិន​តែប៉ុណ្ណោះ លោក​ថ្លែង​ថា លោក​មិន​ចរចា​ជាមួយ​មេដឹកនាំ​ប្រទេស​មួយ​ដែល​ឥត​បាន​ការ​នោះ​ទេ។

នៅ​ក្នុង​កិច្ចសម្ភាសន៍​មួយ​ជាមួយ​សារព័ត៌មាន​អង់គ្លេស Sky News កាលពី​ថ្ងៃ​ព្រហស្បតិ៍ ទី​២៦ មករា លោក ហ្សេឡេនស្គី បាន​ប្រាប់​ថា លោក ពូទីន គឺជា​មនុស្ស​គ្មាន​ប្រយោជន៍។ លោក ហ្សេឡេនស្គី ថ្លែង​ដូចនេះ​នៅ​ពេល​អ្នក​ព័ត៌មាន​សួរ​លោក​ថា តើ​លោក​ចង់​ជួប​ផ្ទាល់​តទល់​មុខ​ជាមួយ​នឹង​លោក ពូទីន ដែរ​ឬ​ទេ បើ​លោក ពូទីន ដាក់​សំណើ​ជួប​លោក​ដើម្បី​បញ្ចប់​សង្គ្រាម។

សំណួរ​របស់​អ្នកកាសែត Sky News បាន​សួរ​ទៅ​លោក ហ្សេឡេនស្គី ទៀត​ថា បើ​លោក ពូទីន សុំ​ជួប​លោក​នៅ​ក្នុង​បន្ទប់​ប្រជុំ​មួយ​តែ ២​នាក់ ហើយ​ពិភាក្សា​អំពី​សន្តិភាព​រវាង​ប្រទេស​ទាំង​ពីរ​ដោយ​ការ​បញ្ចប់​សង្គ្រាម​ថា​តើ​គួរតែ​ជួប​លោក ពូទីន ឬ​ទេ?

បន្ទាប់ពី​ការ​ដាក់​សំណួរ​នេះ​មក លោក ហ្សេឡេនស្គី បាន​ថ្លែង​តប​មក​វិញ​ថា មិន​សំខាន់​សោះ​សម្រាប់​លោក ពូទីន ចំពោះ​រូបលោក។ លោក​បន្ត​ថា វា​មិន​សំខាន់​ទេ​ចំពោះ​ការ​ជួប​គ្នា​នេះ ហើយ​គ្មាន​អ្វី​ដែល​ត្រូវ​ជួប​គ្នា​រវាង​ប្រតិភូ​នៃ​ប្រទេស​ទាំង​ពីរ​នោះ​ទេ ពីព្រោះ​ភាគី​ទាំង​ពីរ​ធ្លាប់​បាន​ជួប​គ្នា​ជាច្រើន​លើក​ច្រើនសា​រួច​មក​ហើយ តែ​ពុំ​មាន​អ្វី​ជា​ការ​ទុកចិត្ត​ទៀត ហើយ​ម្យ៉ាង​ទៀត លោក ពូទីន លែង​សម​ជា​មេដឹកនាំ​តំណាង​ឲ្យ​រុស្សី ឬ​ប្រជាជន​រុស្ស៊ី​ទៀត​ហើយ។

សម្ដី​របស់​លោក ហ្សេឡេនស្គី ទៅ​លើ​លោក ពូទីន បាន​នាំ​ឱ្យ​មាន​ប្រតិកម្ម​ពី​អ្នក​នាំពាក្យ​វិមាន​ក្រឹមឡាំង ដោយ​បង្ហាញ​ការ​ខឹងសម្បា​ជា​ខ្លាំង។ លោក Dmitry Peskov និយាយ​ថា លោក ហ្សេឡេនស្គី មិន​អាច​ប្រៀប​ស្មើ​នឹង​លោក ពូទីន បាន​ឡើយ។

លោក Dmitry Peskov បន្ថែម​ថា លោក ហ្សេឡេនស្គី មិន​ត្រឹមតែ​មិន​ធ្វើ​ទៅ​តាម​កិច្ចព្រមព្រៀង Minsk ប៉ុណ្ណោះ​ទេ ប៉ុន្តែ​ថែមទាំង​ការ​ត្រៀម​រៀបចំ​សង្គ្រាម​ថែម​ទៀត ហើយ​សម្រាប់​រុស្ស៊ី និង​អ៊ុយក្រែន បាន​ត្រៀម​លក្ខណៈ​រៀងៗ​ខ្លួន​ទុក​ជា​មុន​ក្នុង​ការ​ធ្វើ​សង្គ្រាម​ដ៏​ធំ​មួយ​ទៀត​ក្នុង​រដូវ​ផ្កា​រីក​មក​ដល់។

កាលពី​ថ្ងៃ​ពុធ ទី​២៥ ខែ​មករា សហរដ្ឋ​អាមេរិក អាល្លឺម៉ង់ និង ១១​ប្រទេស​ទៀត បាន​ប្រកាស​ការ​បញ្ជូន​រថក្រោះ​ប្រយុទ្ធ​របស់​ខ្លួន​ប្រភេទ Abram M1 និង Leopard2 ទៅ​ឱ្យ​អ៊ុយក្រែន ខណៈ​បណ្តា​ប្រទេស​មួយ​ចំនួន​ក្នុង​អង្គការ​ណាតូ បាន​សន្យា​ផ្តល់​គ្រឿង​ឧបករណ៍​យោធា​ផ្សេងៗ​រៀងៗ​ខ្លួន​ជួយ​ដល់​អ៊ុយក្រែន ដើម្បី​ត្រៀម​ធ្វើការ​វាយប្រហារ​ដើម្បី​យក​តំបន់​ដុនបាស់ ពី​រុស្ស៊ី មក​វិញ។

ការ​ថ្លែង​របស់​លោក ហ្សេឡេនស្គី ក៏​ជួន​ពេល​លោក ចូ បៃដិន ប្រធានាធិបតី​សហរដ្ឋ​អាមេរិក​បាន​ថ្លែង​ថា សេតវិមាន និង​សហភាព​អឺរ៉ុប បាន​សហការ​រួម​គ្នា​ទាំងស្រុង គឺ​ខុស​ពី​អ្វី​ដែល​មេដឹកនាំ​រុស្ស៊ី​លោក ពូទីន ធ្លាប់​បាន​គិត​ថា​មាន​ការ​បែកបាក់​គ្នា។

លោក ចូ បៃដិន បញ្ជាក់​ថា លោក​បាន​ធ្វើ​ការ​សន្ទនា​ជាមួយ​ក្រុម​សម្ព័ន្ធមិត្ត​ណាតូ ដោយ​ជជែក​ជាមួយ​អធិការបតី​អាល្លឺម៉ង់ លោក អូឡាហ្វ ស្ហូល ប្រធានាធិបតី​បារាំង លោក អេម៉ានុយអែល ម៉ាក្រុង នាយករដ្ឋមន្ត្រី​អង់គ្លេស លោក Rishi Sunak និង​នាយករដ្ឋមន្ត្រី​អ៊ីតាលី អ្នកស្រី Giorgia Meloni។ លោក​ថា មេដឹកនាំ​ប្រទេស​ទាំងនោះ​សន្យា​បន្ត និង​ធ្វើ​កិច្ចសហការ​សម្របសម្រួល​ដោយ​ជិតស្និទ្ធ និង​បញ្ជាក់​លើ​ការ​គាំទ្រ​អ៊ុយក្រែន​ទាំងស្រុង។

មេដឹកនាំ​សហរដ្ឋ​អាមេរិក​រូប​នេះ ចុងក្រោយ​បាន​ប្រាប់​លោក ពូទីន ថា ត្រូវ​ដក​កងទ័ព​រុស្ស៊ី​ចេញពី​ក្នុង​ទឹកដី​អ៊ុយក្រែន ព្រោះ​វា​ជា​ដំណោះស្រាយ​តែ​មួយ​គត់​ក្នុង​ការ​បញ្ចប់​សង្គ្រាម។ ការ​ថ្លែង​របស់​លោក​ប្រធានាធិបតី ចូ បៃដិន បាន​ធ្វើ​ឡើង​នៅ​ថ្ងៃទី​២៥ ខែ​មករា ឆ្នាំ​២០២៣ ដែល​ពេល​នោះ​លោក​បាន​ប្រកាស​ការ​ផ្តល់​រថក្រោះ​ទំនើប​បំផុត Abram M1 ចំនួន ៣១​គ្រឿង ខណៈ​សម្ព័ន្ធមិត្ត​អាមេរិក ១១​ប្រទេស​ទៀត​សន្យា​បញ្ជូន​រថក្រោះ Leopard-2 ចំនួន ១០០​គ្រឿង​ទៅ​ឱ្យ​អ៊ុយក្រែន ដែល​ត្រៀម​រៀបចំ​ការ​វាយប្រហារ​ដ៏​ធំ​មួយ​លើ​ទាហាន​រុស្ស៊ី ក្នុង​រដូវ​ផ្កា​រីក​ជិត​មក​ដល់​នេះ ហើយ​រំពឹង​ថា​អ៊ុយក្រែន នឹង​ប្រើ​សព្វាវុធ​ទាំងនេះ​ដើម្បី​វាយលុក​រំដោះ​ឧបទ្វីប​គ្រីមៀរ មក​វិញ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស