ក្រសួងការបរទេសសហរដ្ឋអាមេរិក ផ្ដល់រង្វាន់អ្នកការពារសិទ្ធិមនុស្សប្រចាំឆ្នាំ២០២២ ដល់ថ្នាក់ដឹកនាំសហជីពក្រុមហ៊ុនណាហ្គាវើលដ៍ (Naga World) កញ្ញា ឈឹម ស៊ីថរ ក្នុងចំណោមម្ចាស់ពាន ១០រូបនៅជុំវិញសកលលោកនៅអំឡុងពេលដែលកញ្ញាកំពុងជាប់ពន្ធនាគារព្រៃស។
កញ្ញា ឈឹម ស៊ីថរ ត្រូវបានអាជ្ញាធរចាប់ខ្លួនជាថ្មីម្តងទៀតពីបទល្មើសបម្រាមតុលាការ ក្រោយពេលកញ្ញាបានធ្វើដំណើរត្រឡប់មកពីប្រជុំនៅប្រទេសអូស្ត្រាលី វិញ កាលពីថ្ងៃទី២៦ ខែវិច្ឆិកា ឆ្នាំ២០២២។ កញ្ញាត្រូវអាជ្ញាធរដោះលែងឱ្យនៅក្រៅឃុំម្តងកាលពីខែមីនា ឆ្នាំ២០២២។
សេចក្តីប្រកាសព័ត៌មានរបស់ស្ថានទូតសហរដ្ឋអាមេរិកប្រចាំកម្ពុជា ចុះថ្ងៃទី២ ខែកុម្ភៈ ឆ្នាំ២០២៣ ឲ្យដឹងថា មេដឹកនាំសហជីពក្រុមហ៊ុនណាហ្គាវើលដ៍ កញ្ញា ឈឹម ស៊ីថរ បានទទួលពានរង្វាន់អ្នកការពារសិទ្ធិមនុស្សប្រចាំឆ្នាំ២០២២ ក្នុងចំណោមម្ចាស់ពាន ១០រូបនៅជុំវិញសកលលោក។
ស្ថានទូតអាមេរិកបញ្ជាក់ថា ពានរង្វាន់ដ៏មានកិត្យានុភាពមួយនេះទទួលស្គាល់បុគ្គលក្លាហានទាំងឡាយណាដែលបង្ហាញពីភាពក្លាហានយ៉ាងពិសេស និងភាពជាអ្នកដឹកនាំក្នុងការតស៊ូមតិដើម្បីលើកកម្ពស់ និងការពារសិទ្ធិមនុស្ស ដែលគេទទួលស្គាល់ជាសកល និងសេរីភាពជាមូលដ្ឋាន ខណៈកញ្ញាគឺជាមនុស្សទីមួយនៅកម្ពុជាដែលទទួលបានពានរង្វាន់នេះ។
ឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោក Patrick Murphy បានលើកឡើងនៅក្នុងសេចក្តីប្រកាសព័ត៌មាន ដោយសម្ដែងការអបអរ និងទទួលស្គាល់ថា កញ្ញា ស៊ីថរ ជាអ្នកការពារសិទ្ធិមនុស្សឆ្នាំ២០២២ ម្នាក់។ លោកបញ្ជាក់ថា កញ្ញា ស៊ីថរ ជាថ្នាក់ដឹកនាំសហជីពការងារដ៏ក្លាហាន និងអត់ធ្មត់ដែលតស៊ូមតិដោយសន្តិវិធីដើម្បីសិទ្ធិរបស់កម្មករកម្ពុជា។
បន្ថែមពីនេះ លោកថាការការពារ និងគាំទ្រអ្នកការពារសិទ្ធិមនុស្ស គឺជាអាទិភាពចម្បងនៃគោលនយោបាយការបរទេសរបស់សហរដ្ឋអាមេរិក ហើយស្ថានទូតអាមេរិកនៅកម្ពុជាអបអរសាទរដល់កញ្ញា ឈឹម ស៊ីថរ និងអ្នកទទួលទាំងអស់នៃពានរង្វាន់អ្នកការពារសិទ្ធិមនុស្សឆ្នាំ២០២២។
បើតាមក្រសួងការបរទេសអាមេរិក ឲ្យដឹងថា ទោះបីជាមានការបៀតបៀនរូបកាយ និងការចាប់ខ្លួនកាលពីខែមករា ឆ្នាំ២០២២ ក្នុងពេលធ្វើកូដកម្មរកដំណោះស្រាយវិវាទការងារជាមួយក្រុមហ៊ុនណាហ្គាវើលដ៍ក៏ដោយ ក៏កញ្ញា ស៊ីថរ បានបន្តចេញមុខនិយាយអំពីសិទ្ធិការងារ។
ក្រសួងការបរទេសសហរដ្ឋអាមេរិក បញ្ជាក់ថា បច្ចុប្បន្នកញ្ញាត្រូវបន្តឃុំខ្លួនដោយរង់ចាំការកាត់ទោសដែលមិនទាន់កំណត់ពេល ហើយមិនអាចធ្វើដំណើរទៅចូលរួមយកពានរង្វាន់នៅរដ្ឋធានីវ៉ាស៊ីនតុន ជាមួយអ្នកទទួលពានដទៃទៀតនោះទេ។ តែយ៉ាងណា ពានរង្វាន់អ្នកការពារសិទ្ធិមនុស្សនេះ ត្រូវបានប្អូនប្រុសរបស់កញ្ញា ឈឹម ស៊ីថរ ទៅទទួលជំនួស។
កញ្ញា ឈឹម ស៊ីថរ ត្រូវបានអាជ្ញាធរចាប់ខ្លួន និងចោទប្រកាន់ពីបទ «ញុះញង់ឱ្យប្រព្រឹត្តបទឧក្រិដ្ឋ» បន្ទាប់ពីថ្នាក់ដឹកនាំសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនកាស៊ីណូណាហ្គាវើលដ៍ បានដឹកនាំបុគ្គលិកកម្មករក្រុមហ៊ុននេះធ្វើកូដកម្មដោយសន្តិវិធី ដើម្បីទាមទារឱ្យក្រុមហ៊ុនដំឡើងប្រាក់ខែ និងទទួលយកបុគ្គលិកជាសមាជិកសហជីពរាប់រយនាក់កាលពីចុងឆ្នាំ២០២១ អំឡុងពេលក្រុមហ៊ុនល្បែងនៅកណ្ដាលរាជធានីភ្នំពេញ បានបណ្តេញបុគ្គលិកចេញពីការងារទាំងអយុត្តិធម៌។
ការចាប់ខ្លួនកញ្ញា ឈឹម ស៊ីថរ ជាថ្មីនេះ ទាំងមេធាវី និងកញ្ញាបានអះអាងថា ការចេញទៅក្រៅប្រទេសនេះ ដោយសារកញ្ញាមិនបានទទួលដីកាដាក់ឱ្យស្ថិតនៅក្រោមការត្រួតពិនិត្យរបស់តុលាការចាប់តាំងពីតុលាការដោះលែងកាលពីខែមីនា ឆ្នាំ២០២២ ខណៈសមត្ថកិច្ចក៏មិនដែលហៅកញ្ញាទៅបង្ហាញខ្លួន និងប្រាប់ពីដីកាដាក់ឱ្យស្ថិតក្រោមការត្រួតពិនិត្យដែរ។
សេចក្តីប្រកាសព័ត៌មានរបស់ស្ថានទូតសហរដ្ឋអាមេរិកប្រចាំកម្ពុជា ឲ្យដឹងថា ក្រៅពីកញ្ញា ឈឹម ស៊ីថរ ក៏នៅមានថ្នាក់ដឹកនាំសហជីពជាង ១០រូបកំពុងប្រឈមនូវការចោទប្រកាន់បទល្មើសព្រហ្មទណ្ឌ បន្ទាប់ពីពួកគេបាននាំគ្នាធ្វើកូដកម្មដើម្បីទាមទារដំណោះស្រាយវិវាទការងារនៅក្រុមហ៊ុនណាហ្គាវើលដ៍៕