ក្រុមអ្នកឃ្លាំមើលសង្គម លើកឡើងថា សំណល់អយុត្តិធម៌ដ៏អាក្រក់នឹងបន្តរីកដុះដាលកាន់តែធំឡើងៗដូចជំងឺមហារីកនៅក្នុងសង្គម នៅពេលដែលប្រទេសជាតិមួយប្រកាន់យកការដឹកនាំតាមបែបអត្តាធិបតេយ្យ ឬយកបុគ្គលដែលជាមេដឹកនាំធំជាងនីតិរដ្ឋរបស់ប្រទេស។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ សរសេរលើគណនីហ្វេសប៊ុករបស់ខ្លួននៅថ្ងៃទី២ កុម្ភៈ នេះថា គ្មានបុគ្គលដែលដឹកនាំតាមបែបអត្តាធិបតេយ្យណាម្នាក់នៅលើពិភពលោកសុខចិត្តបោះបង់ចោលអំណាច និងផលប្រយោជន៍ផ្ទាល់ខ្លួន ផលប្រយោជន៍គ្រួសារ និងបក្ខពួករបស់គេ ដោយងាកមកលើកស្ទួយយុត្តិធម៌សង្គម នៅពេលដែលគេកំពុងសោយសុខ និងធ្វើមានធ្វើបានក្នុងប្រព័ន្ធដឹកនាំតាមបែបបុគ្គលនិយមនេះឡើយ។
លោក សេក សុជាតិ ថាសង្គមជាតិមួយនឹងវិនាសអន្តរាយសាបសូន្យនៅពេលដែលច្បាប់ប្រទេសជាតិបាត់បង់មូលដ្ឋានគ្រឹះយុត្តិធម៌ ហើយសង្គមទាំងមូលនឹងបាត់បង់យុត្តិធម៌នៅពេលដែលច្បាប់ស្ថិតនៅក្រោមឥទ្ធិពលរបស់អ្នកមានអំណាច។ ចុងក្រោយ សង្គមនោះនឹងបាត់បង់អ្វីៗគ្រប់យ៉ាងទាំងអស់ ដែលនឹងក្លាយទៅជាសង្គមអនាធិបតេយ្យ ហើយពលរដ្ឋគ្រប់រូបនឹងគ្មានសិទ្ធិសេរីភាពស្របតាមរដ្ឋធម្មនុញ្ញដែលបានចែងនោះឡើយ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិតរូបនេះបញ្ជាក់ថា ការធ្លាក់ចុះសីលធម៌របស់សង្គមមួយដោយការសម្ងំសុខរៀងៗខ្លួនរបស់ពលរដ្ឋ នឹងធ្វើឱ្យសង្គមនោះធ្លាក់ចុះនូវសិទ្ធិសេរីភាព អរិយធម៌ វប្បធម៌ និងកិត្តិយសជាតិ ដែលជាគ្រោះថ្នាក់ដ៏ធំសម្រាប់អនាគតនៃប្រទេសនោះ។
លោកថា ដូច្នេះ ពលរដ្ឋគ្រប់រូបមិនត្រូវនាំគ្នាឈរមើលសង្គមជាតិរបស់ខ្លួនធ្លាក់ចូលក្នុងភាពអនាធិបតេយ្យឡើយ ព្រោះថាវានឹងនាំឱ្យសង្គមជាតិទាំងមូលបាត់បង់សណ្ដាប់ធ្នាប់ដែលគ្រប់គ្រងដោយច្បាប់ ហើយនៅពេលដែលសង្គមនោះបាត់បង់សណ្ដាប់ធ្នាប់ ពលរដ្ឋគ្រប់រូបនៃសង្គមនោះក៏បាត់បង់សិទ្ធិ និងសេរីភាពដូចគ្នាដែរ។
លោក សេក សុជាតិ បញ្ជាក់ថា គ្មានអំពើអយុត្តិធម៌ណាមួយរលាយបាត់ពីសង្គមទេ ប្រសិនបើពលរដ្ឋនៃសង្គមនោះមិននាំគ្នាតស៊ូតវ៉ាទាមទាររកយុត្តិធម៌មកវិញ។
ការអះអាងនេះ ធ្វើឡើងស្របពេលដែលគេរកឃើញកម្ពុជាដែលក្រោមការដឹកនាំរបស់មេដឹកនាំបក្សកាន់អំណាច លោក ហ៊ុន សែន បានរុញឱ្យប្រទេសដ៏កម្សត់មួយនេះធ្លាក់ទៅក្នុងការដឹកនាំតាមបែបបុគ្គលនិយម ជាជាងការអនុវត្តច្បាប់ស្របតាមរដ្ឋធម្មនុញ្ញរបស់ខ្លួនសព្វថ្ងៃនេះ។
មន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា អះអាងកាលពីពេលថ្មីៗនេះថា នៅកម្ពុជា អំណាចរបស់លោក ហ៊ុន សែន ធំលើសអំណាចរដ្ឋសភា អំណាចរដ្ឋាភិបាល និងអំណាចតុលាការទៅទៀត។ ដូច្នេះ បើទោះបីជាកម្ពុជាអនុវត្តតាមរបបប្រជាធិបតេយ្យដែលព្រះមហាក្សត្រអាស្រ័យធម្មនុញ្ញក៏ដោយ ប៉ុន្តែខ្លឹមសារពិតប្រាកដ កម្ពុជាបានអនុវត្តតាមបញ្ជារបស់លោកនាយករដ្ឋមន្ត្រី ហ៊ុន សែន តែម្នាក់ប៉ុណ្ណោះ។
ទាក់ទិននឹងបញ្ហានេះ កាលថ្ងៃទី១៣ ខែកញ្ញា ឆ្នាំ២០២២ លោក ហ៊ុន សែន ធ្លាប់បានគំរាមថា លោកមានសិទ្ធិដកតំណែងសមាជិកតំណាងរាស្ត្រទាំងអស់ពេលណាក៏បាន ព្រោះថានៅកម្ពុជា ពលរដ្ឋបោះឆ្នោតឲ្យគណបក្ស ដូច្នេះក្នុងនាមលោកជាប្រធានបក្សត្រូវតែមានសិទ្ធិដកអ្នកទាំងនោះគ្រប់ពេល ប្រសិនបើពួកគេមិនធ្វើតាមបញ្ជារបស់លោកទេនោះ។
អង្គការ Freedom House បានចេញរបាយការណ៍របស់ខ្លួននៅឆ្នាំ២០២២ នេះថា ប្រព័ន្ធនយោបាយរបស់ប្រទេសកម្ពុជា ត្រូវបានលោកនាយករដ្ឋមន្ត្រី ហ៊ុន សែន គ្រប់គ្រងផ្ដាច់មុខទាំងស្រុង ក្នុងនោះគណបក្សប្រឆាំង បណ្ដាញសារព័ត៌មានឯករាជ្យ អ្នកតវ៉ាទាមទារសិទ្ធិសេរីភាព គ្មានសិទ្ធិបញ្ចេញមតិលើសបន្ទាត់ក្រហមដែលបក្សកាន់អំណាចបានកំណត់ឡើយ៕