ក្រុមសិទ្ធិមនុស្សក្នុងស្រុក អំពាវនាវឱ្យគណៈកម្មាធិការសិទ្ធិមនុស្សកម្ពុជា យកចិត្តទុកដាក់ការពារសិទ្ធិរបស់ពលរដ្ឋឱ្យបានពេញលេញ ជាជាងការការពារទង្វើរបស់រដ្ឋាភិបាលនៅពេលដែលមានការរិះគន់ពីការរំលោភសិទ្ធិមនុស្សនៅកម្ពុជា។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ប្រាប់សារព័ត៌មាន The Cambodia Daily នៅថ្ងៃទី៣ កុម្ភៈ នេះថា សិទ្ធិជាមូលដ្ឋានរបស់ពលរដ្ឋដែលរងនូវការំលោភបំពានកន្លងមក ដូចជាការរំលោភសិទ្ធិលើកម្មករនិយោជិត ជាពិសេសការរំលោភសិទ្ធិពីសំណាក់ថៅកែក្រុមហ៊ុនណាហ្គាវើលដ៍ ជាដើមនោះ គឺគណៈកម្មាធិការសិទ្ធិមនុស្សកម្ពុជាមិនដែលធ្វើការពាក់ព័ន្ធលើកិច្ចការនេះម្តងណាឡើយ បើទោះបីជាមានការចោទប្រកាន់លើកម្មករទាំងនោះទាំងអយុត្តិធម៌ពីសំណាក់អាជ្ញាធរ ឬថៅកែក្រុមហ៊ុន រហូតឈានដល់ការចាប់ឃុំខ្លួនតំណាងកម្មករ ដូចជាកញ្ញា ឈឹម ស៊ីថរ នៅពេលនេះក៏ដោយ។
លោក ស៊ឹង សែនករុណា លើកឡើងថា ជារឿងល្អដែលគណៈកម្មាធិការសិទ្ធិមនុស្សកម្ពុជា និងការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា បើកវគ្គបណ្តុះបណ្តាលជុំវិញការលើកកម្ពស់សិទ្ធិមនុស្សនៅកម្ពុជា ដូច្នេះភាគីពាក់ព័ន្ធគួរអនុវត្តនូវកិច្ចការរបស់ខ្លួនឲ្យបានទូលំទូលាយ ក្នុងការការពារសិទ្ធិមូលដ្ឋានរបស់ពលរដ្ឋកុំឱ្យមានការរំលោភបំពានសិទ្ធិជនរងគ្រោះបន្តទៀត។
មន្ត្រីជាន់ខ្ពស់ទទួលបន្ទុកសិទ្ធិមនុស្សរូបនេះបញ្ជាក់ថា កម្ពុជាបានជាប់កាតព្វកិច្ចផ្តល់សច្ចាប័នក្នុងការគោរព និងលើកស្ទួយសិទ្ធិមនុស្សស្របទៅតាមអនុសញ្ញានានា សេចក្តីថ្លែងការណ៍ជាសកលរបស់អង្គការសហប្រជាជាតិស្ដីពីសិទ្ធិមនុស្ស និងរដ្ឋធម្មនុញ្ញរបស់ខ្លួនជាដើម ដូច្នេះគណៈកម្មាធិការសិទ្ធិមនុស្សកម្ពុជា គួរពិនិត្យឱ្យបានហ្មត់ចត់ជុំវិញការធានានូវការអនុវត្តសិទ្ធិមូលដ្ឋានរបស់ពលរដ្ឋ ថាតើមានភាពពេញលេញដូចមានចែងក្នុងរដ្ឋធម្មនុញ្ញហើយឬនៅសព្វថ្ងៃនេះ។
កាលពីថ្ងៃទី២ ខែកុម្ភៈ ឆ្នាំ២០២៣ គណៈកម្មាធិការសិទ្ធិមនុស្សកម្ពុជា និងតំណាងការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា បានបើកវគ្គបណ្តុះបណ្តាលស្ដីពីបទដ្ឋានសិទ្ធិមនុស្សអន្តរជាតិ ដើម្បីពង្រឹងសមត្ថភាពបន្ថែមដល់មន្ត្រីគណៈកម្មាធិការសិទ្ធិមនុស្សកម្ពុជា លើបទដ្ឋានសិទ្ធិមនុស្សជាតិ និងអន្តរជាតិពាក់ព័ន្ធនឹងទារុណកម្ម និងការប្រព្រឹត្តមិនគប្បី ការត្រួតពិនិត្យកន្លែងឃុំឃាំង ការស៊ើបអង្កេត និងធ្វើរបាយការណ៍លើករណីសង្ស័យមានទារុណកម្ម និងការប្រព្រឹត្តមិនគប្បី ជាដើម។
ប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី បានលើកឡើងនៅក្នុងវគ្គបណ្តុះបណ្តាលនេះថា គណៈកម្មាធិការសិទ្ធិមនុស្សកម្ពុជាតែងតែចុះពិនិត្យជាប្រចាំនៅតាមពន្ធនាគារ មន្ទីរឃុំឃាំង និងមណ្ឌលអប់រំកែប្រែ ព្រមទាំងមានយន្តការដោះស្រាយពាក្យបណ្ដឹងពាក់ព័ន្ធនឹងការរំលោភបំពានសិទ្ធិមនុស្សផងដែរ។ ជាងនេះទៀត គណៈកម្មាធិការនេះតែងចុះធ្វើការអប់រំសិទ្ធិមនុស្សនៅតាមគ្រឹះស្ថានអប់រំនានា ដើម្បីធានានូវការការពារ និងលើកកម្ពស់សិទ្ធិមនុស្សនៅកម្ពុជារហូតមក។
កាលពីថ្ងៃទី១៣ ខែធ្នូ ឆ្នាំ២០២២ សមាជិកសភាសហភាពអឺរ៉ុបចំនួន ១៣ប្រទេសដែលមកពីប្រទេសហ្វាំងឡង់ អាល្លឺម៉ង់ និងប្រទេសស៊ុយអែត បានចេញលិខិតរួមគ្នាទៅកាន់ប្រធានក្រុមប្រឹក្សាអឺរ៉ុប លោក ស្ហាល មីឈែល (Charles Michel) និងតំណាងជាន់ខ្ពស់នៃសហភាពអឺរ៉ុបទទួលបន្ទុកកិច្ចការបរទេស និងគោលនយោបាយសន្តិសុខ លោក Josep Borrell ថា រដ្ឋាភិបាលកម្ពុជារបស់លោក ហ៊ុន សែន ត្រូវតែទទួលខុសត្រូវទាំងស្រុងចំពោះការរំលោភសិទ្ធិមនុស្ស ការរំលាយបក្សប្រឆាំង និងការជាន់ឈ្លីលទ្ធិប្រជាធិបតេយ្យ ជាដើម ដែលកំពុងបង្កឱ្យកើតមាននូវវិបត្តិសិទ្ធិមនុស្សធ្ងន់ធ្ងរក្រោមការដឹកនាំរបស់ខ្លួនក្នុងពេលបច្ចុប្បន្ននេះ៕