32 C
Phnom Penh

វិទ្យាស្ថាន​សិក្សា​សង្គ្រាម​ថា​លោក ពូទីន វាយតម្លៃ​ខុស​ពី​ការ​វាយ​យក​តំបន់​ដុនបាស់​ពី​អ៊ុយក្រែន​ត្រឹម​ខែ​មីនា

ដោយ ឌឹ ខេមបូឌា ដេលី

បទវិភាគ

វិទ្យាស្ថាន​សិក្សា​សង្គ្រាម ISW ដែល​មាន​ការិយាល័យ​នៅ​ក្រុង​វ៉ាស៊ីនតោន បាន​ហៅ​ការ​វាយតម្លៃ​របស់​ប្រធានាធិបតី​រុស្ស៊ី វ៉្លាឌីមៀរ ពូទីន ថា​ជា​ការ​គិត​ហួស​ប្រមាណ ដែល​ថា​រុស្ស៊ី​មាន​លទ្ធភាព​វាយ​យក​បាន​ទាំងស្រុង​នូវ​តំបន់​ដុនបាស់ នៅ​ភាគ​ខាងកើត​ប្រទេស​អ៊ុយក្រែន។

ដុនបាស់ គឺជា​តំបន់​ដ៏​ធំ​មួយ​មាន​ព្រំដែន​គោក​ជាប់​នឹង​ប្រទេស​រុស្ស៊ី។ តំបន់​នេះ​មាន​ផ្ទៃដី​ជាង ២​ម៉ឺន ៦​ពាន់​គីឡូម៉ែត្រ​ក្រឡា ប៉ុន្តែ​តំបន់​នេះ​មាន​ខេត្ត​ចំណុះ​តែ ២ ប៉ុណ្ណោះ គឺ​ខេត្ត​លូហាន់ និង​ខេត្ត​ដូណេត។ បច្ចុប្បន្ន រុស្ស៊ី​កំពុង​បង្កើន​ទ័ព​វាយ​សម្រុក​យក​ទឹកដី​របស់​អ៊ុយក្រែន​មក​វិញ ដោយ​ក្រុង​មូស្គូ លើក​ទ័ព​ជាង ២០​ម៉ឺន​នាក់។ នេះ​បើ​តាម​ប្រធាន​ចារកម្ម​អ៊ុយក្រែន លោក Kyrylo Budanov។

បើ​តាម​របាយការណ៍​របស់​វិទ្យាស្ថាន​សិក្សា​សង្គ្រាម ISW គិត​មក​ដល់​ពេលនេះ រុស្ស៊ី​ពុំ​ទាន់​វាយ​យក​បាន​ខេត្ត​ទាំង​ពីរ​នេះ​ពី​អ៊ុយក្រែន​បាន​ទាំងស្រុង​នោះ​ទេ។ ចំណែក​អ៊ុយក្រែន បាន​វាយ​យក​បាន​ពី​ទ័ព​រុស្ស៊ី​វិញ​ជាង ៤២% នៃ​ផ្ទៃដី​ទាំងមូល​នៅ​ក្នុង​សង្គ្រាម​នៅ​រយៈពេល​ជិត​មួយ​ឆ្នាំ​មក​នេះ។

លោក ពូទីន បាន​ចេញ​បទបញ្ជា​ឱ្យ​កងទ័ព​របស់​លោក​ត្រូវ​វាយ​កាន់កាប់​តំបន់​នេះ​ទាំងស្រុង​នៅ​ត្រឹម​ខែ​មីនា។ បើ​ដូច្នេះ​មែន មាន​ន័យ​ថា​ផ្ទៃដី​ដែល​អ៊ុយក្រែន​កំពុង​កាន់កាប់​បាន​ពី​រុស្ស៊ី​ជាង ៤២% គឺ​ទ័ព​រុស្ស៊ី​ត្រូវតែ​វាយ​យក​ឱ្យ​បាន។

លោក Andriy Chernyak អ្នក​នាំពាក្យ​នៃ​អង្គភាព​ចារកម្ម​អ៊ុយក្រែន បាន​ប្រាប់​សារព័ត៌មាន The Kyiv Post ថា បើ​តាម​ការ​ផ្ដល់​ព័ត៌មាន​ពី​ក្រុង​មូស្គូ លោក ពូទីន បាន​ចេញ​បទបញ្ជា​ទៅ​កងទ័ព​របស់​លោក ទោះ​ជា​ត្រូវ​បាត់បង់​ទ័ព​យ៉ាងណា​ក៏ដោយ គឺ​ត្រូវ​វាយ​យក​ឱ្យ​បាន​តំបន់​ដុនបាស់ ដែល​មាន​ខេត្ត​ពីរ​នេះ​ជា​ចំណុះ។

ខេត្ត​លូហាន់ និង​ខេត្ត​ដូណេត ត្រូវ​បាន​សភា​រុស្ស៊ី​អនុម័ត​ថា​ជា​ដែនដី​របស់​រុស្ស៊ី កាលពី​ចុង​ខែ​កញ្ញា ឆ្នាំ​២០២២ ដោយ​ហៅថា​ជា​ដែនដី​សាធារណរដ្ឋ​ដូណេត និង​លូហាន់។ សភា​រុស្ស៊ី​ក៏​បាន​អនុម័ត​យក​តំបន់​ខឺសុន និង​ហ្សាប៉ូរីហ្សីយា ជា​ដែនដី​ចំណុះ​របស់​រុស្ស៊ី​ដែរ។ តែ​ដែនដី​ពីរ​នេះ​នៅ​ភាគ​ខាងត្បូង​ប្រទេស ដែល​ទ័ព​អ៊ុយក្រែន​វាយ​រំដោះ​បាន​វិញ​សឹងតែ​ទាំងស្រុង​ទៅ​ហើយ។

វិទ្យាស្ថាន​សង្គ្រាម​មើល​ឃើញ​ថា ប្រធានាធិបតី​រុស្ស៊ី​អាច​កំពុង​ដាក់​បញ្ជា​ថា កុំ​ស្ទាក់ស្ទើរ​ក្នុង​វាយ​លុក​ចូល​ទឹកដី​អ៊ុយក្រែន ជាពិសេស​នៅ​ភាគ​ខាងកើត​ប្រទេស ហើយ​ត្រូវ​សម្រុក​វាយ​នៅ​មុន​ការ​មក​ដល់​នៃ​រថក្រោះ​របស់​ពួក​បស្ចិម​ប្រទេស​ដែល​បញ្ជូន​ទៅ​ឱ្យ​អ៊ុយក្រែន។

ដូចនេះ លោក ពូទីន អាច​ប៉ាន់ស្មាន​ហួស​ការពិត​អំពី​សមត្ថភាព​កងទ័ព​របស់​ខ្លួន។ បើ​តាម ISW ឲ្យ​ដឹង​ថា គេ​ពុំ​មាន​ការ​អង្កេត​ឃើញ​ណា​មួយ​ដែល​ថា​កងទ័ព​រុស្ស៊ី អាច​ស្ដារ​សមត្ថភាព​របស់​ខ្លួន​ឱ្យ​ទាន់​ពេលវេលា ដើម្បី​យក​ឈ្នះ​កងទ័ព​អ៊ុយក្រែន​បាន​យ៉ាង​ងាយ​នោះ​ណាស់។

ចំពោះ​ការ​បញ្ជា​ឱ្យ​ទ័ព​វាយ​យក​ឱ្យ​បាន​តំបន់​ដុនបាស់​ទាំងមូល​នៅ​ភាគ​ខាងកើត​ប្រទេស​នៅ​ត្រឹម​ខែ​មីនា គឺ​មិន​អាច​ទៅ​រួច​នោះ​ទេ ហើយ​សូម្បី​ខេត្ត​ដូណេត​មួយ​ដែល​មាន​ផ្ទៃដី​ជាង ១១៣០០​គីឡូម៉ែត្រ​ដែល​អ៊ុយក្រែន​វាយ​រំដោះ​បាន​មក​វិញ​ជាង ៤០% ក៏​មិន​អាច​សម្រេច​ផែនការ​បាន​ដែរ ព្រោះ​ទ័ព​រុស្ស៊ី​ដែល​មាន​ភាព​ក្លាហាន និង​ជាតិ​និយម​ស្លាប់​ច្រើន​ណាស់​ទៅ​ហើយ។

បើ​តាម ISW លោក ពូទីន មាន​ផែនការ​វាយលុក​ទ្រង់ទ្រាយ​ធំ​ដំណាក់កាល​ចុងក្រោយ​មួយ​ទៀត គឺ​មុន​ខែ​មេសា ឆ្នាំ​២០២៣ ដែល​ជា​រដូវ​ស្លឹកឈើ​ជ្រុះ។

តាមពិត រុស្ស៊ី​មាន​ផែនការ​វាយលុក​ទ្រង់ទ្រាយ​ធំ​នៅ​រដូវ​ត្រជាក់​នេះ តែ​រុស្ស៊ី​មិន​នឹកស្មាន​ថា ទ័ព​អ៊ុយក្រែន​មាន​ភាព​អត់ធ្មត់ និង​មាន​ការ​ប្រុងប្រយ័ត្ន​ខ្ពស់​ក្នុង​ការ​ត្រៀម​ដើម្បី​សង្គ្រាម​ត្រជាក់។

តែ​យ៉ាងណា លោក ពូទីន និង​ក្រុមប្រឹក្សា​សន្តិសុខ​ជាតិ​រុស្ស៊ី ទំនង​នៅតែ​គិត​ថា​ខ្លួន​ងាយ​វាយលុក​ចូល​អ៊ុយក្រែន​នៅ​រដូវ​ស្លឹកឈើ​ជ្រុះ​នេះ ដោយ​ប្រើ​រថក្រោះ ប្រព័ន្ធ​កាំភ្លើង​ធំ​រាប់​ពាន់​គ្រឿង​ជាមួយ​នឹង​កងទ័ព​ច្រើន​ម៉ឺន​នាក់ អម​ដោយ​ការ​បាញ់​កាំជ្រួច និង​ការ​បាញ់​ពី​យន្តហោះ​ចម្បាំង អន្តរាគមន៍​ជួយ​កងទ័ព​ថ្មើរ​ជើង។ តែ​ទំនង​មិន​អាច​ដូច​បំណង​បាន​ឡើយ ព្រោះតែ​កម្លាំង​ទ័ព​របស់​អ៊ុយក្រែន បាន​ត្រៀម​រួច​ហើយ។ ម្យ៉ាង​ទៀត សព្វាវុធ​ដែល​ជា​ជំនួយ​របស់​ពួក​បស្ចិម​ប្រទេស និង​សហរដ្ឋ​អាមេរិក នឹង​មក​ដល់​អ៊ុយក្រែន​ចាប់ពី​ពាក់កណ្ដាល​ខែ​មីនា នេះ។

តាម​ការ​ផ្ទៀងផ្ទាត់​នេះ រុស្ស៊ី​អាច​មាន​លទ្ធភាព​ត្រឹម​ប្រយុទ្ធ​ជាមួយ​ទ័ព​អ៊ុយក្រែន នៅ​ភាគ​ខាងកើត និង​ខាងត្បូង ដោយ​ការ​បាញ់​មីស៊ីល បាញ់​ដ្រូន ឬ​យន្តហោះ​ចម្បាំង។ ដូចនេះ​ហើយ រុស្ស៊ី​នៅ​មាន​ប្រៀប​ជាង​ទ័ព​អ៊ុយក្រែន​តែ​នៅ​តំបន់​ព្រំដែន​អ៊ុយក្រែន-រុស្ស៊ី​តែប៉ុណ្ណោះ។

ណា​មួយ​ទៀត បើ​អ៊ុយក្រែន​វាយលុក​ចូល​ឧបទ្វីប​គ្រីមៀរ អាច​មិន​ប្រាកដ​ថា​រុស្ស៊ី​ទប់ទល់​បាន​នោះ​ទេ ព្រោះ​ទឹកចិត្ត​អ្នក​ឈ្លានពាន និង​ទឹកចិត្ត​អ្នក​ប្រយុទ្ធ​ដើម្បី​រំដោះ​ទឹកដី​មក​វិញ យ៉ាងហោចណាស់​ក៏​ខុស​ដែរ​ខ្លះ​ដែរ។

បើ​មិន​ដូច​ផែនការ​ដែល​បាន​កំណត់​នោះ​ទេ ការ​ដឹកនាំ​របស់​លោក ពូទីន អាច​នឹង​អស់​ឥទ្ធិពល ព្រោះតែ​ប្រជាជន​ក៏​អាច​អស់​ជំនឿ​លើ​លោក ពូទីន ដែល​បង្កើត​សង្គ្រាម​ពង្រីក​ទឹកដី។ បើ​ដូចនេះ រុស្ស៊ី​អាច​នឹង​អស់​យុទ្ធសាស្ត្រ​ដើម្បី​បន្ត​សង្គ្រាម​ឈ្លានពាន​អ៊ុយក្រែន។ វា​លើកលែងតែ​លោក ពូទីន ធ្វើ​សង្គ្រាម​នុយក្លេអ៊ែរ ដែល​ជា​អាវុធ​ប្រល័យ​លោក​ដ៏​សហាវ​បំផុត​ប៉ុណ្ណោះ។ តែ​នេះ​ក៏​ជា​យុទ្ធសាស្ត្រ​ចុងក្រោយ​របស់​លោក ពូទីន៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស