ក្រុមអ្នកតស៊ូមតិរិះគន់ថា ការដំឡើងប្រាក់បៀវត្សជូនមន្ត្រីរាជការនៅមុនការបោះឆ្នោតរបស់រដ្ឋាភិបាលដែលដឹកនាំដោយបក្សប្រជាជនកម្ពុជា បង្កប់នូវល្បិចនយោបាយប្រជាភិថុតិ ដើម្បីទាក់ទាញសន្លឹកឆ្នោតតែប៉ុណ្ណោះ។
អ្នកវិភាគឯករាជ្យ និងជាប្រធានវេទិកាពលរដ្ឋ លោក គឹម សុខ ប្រាប់សារព័ត៌មាន The Cambodia Daily នៅថ្ងៃទី៦ កុម្ភៈ នេះថា ការដំឡើងប្រាក់បៀវត្សជូនមន្ត្រីរាជការនៅមុនការបោះឆ្នោត គឺបង្កប់នូវល្បិចប្រជាភិថុតិមួយចំនួន ដូចជាការទាក់ទាញសន្លឹកឆ្នោតពីមន្ត្រីរាជការទាំងអស់។
លោកបន្ថែមថា ល្បិចប្រជាភិថុតិមួយទៀតនោះ គឺការដំឡើងប្រាក់បៀវត្សនេះនឹងធ្វើជារនាំងទប់ស្កាត់មិនឱ្យមន្ត្រីរាជការងើបឡើងទាមទារ ឬប្រឆាំងនឹងការដឹកនាំរបស់លោក ហ៊ុន សែន ដែលធ្វើឱ្យធ្លាក់ចុះនូវសេដ្ឋកិច្ចសង្គមបន្តិចម្តងៗសព្វថ្ងៃនេះដែរ។ លោកបន្តថា បើមានការតវ៉ាកើតឡើង នោះការបោះឆ្នោតនៅពេលខាងមុខ ក៏នឹងត្រូវបរាជ័យ ហើយបើការបោះឆ្នោតនេះបរាជ័យ គឺផែនការផ្ទេរអំណាចរបស់លោក ហ៊ុន សែន ទៅលោក ហ៊ុន ម៉ាណែត ក៏បរាជ័យដែរ ដូច្នេះទើបគាត់ដំឡើងបៀវត្សឱ្យមន្ត្រីរាជការនៅពេលនេះ។
លោក គឹម សុខ លើកឡើងថា បើទោះបីជាលោក ហ៊ុន សែន បង្ហាញពីតួលេខថវិកាដែលត្រូវដំឡើងប្រាក់បៀវត្សជូនមន្ត្រីរាជការនៅពេលនេះ ក៏មិនប្រាកដថានឹងមានស្ថិរភាពក្នុងការអនុវត្តបាននោះដែរ ពីព្រោះការមិនស្ដារប្រជាធិបតេយ្យនៅមុនការបោះឆ្នោតជាតិឆ្នាំ២០២៣ នេះ នឹងធ្វើឱ្យអន្តរជាតិដាក់គំនាបសេដ្ឋកិច្ចគ្រប់បែបយ៉ាងកាន់តែខ្លាំងបន្ថែមទៀតនៅពេលខាងមុខ។
អ្នកវិភាគឯករាជ្យរូបនេះបញ្ជាក់ថា សហគមន៍អន្តរជាតិដែលជាម្ចាស់ជំនួយអនុគ្រោះសេដ្ឋកិច្ចពាណិជ្ជកម្មក្នុងការស្ដារសេដ្ឋកិច្ចកម្ពុជា ដូចជាសហភាពអឺរ៉ុប និងសហរដ្ឋអាមេរិក ព្រមទាំងសម្ព័ន្ធមិត្តរបស់ពួកគេ ជាដើម នឹងរឹតបន្តឹងកាន់តែខ្លាំងនូវដង្ហើមសេដ្ឋកិច្ចកម្ពុជា ដែលនឹងធ្វើឱ្យវិបត្តិអត់ការងារធ្វើកាន់តែកើតមាន វិបត្តិសង្គមកាន់តែធំ ខណៈរដ្ឋាភិបាលឯកបក្សរបស់លោក ហ៊ុន សែន នឹងជួបវិបត្តិគ្មានប្រាក់ចំណូលគ្រប់គ្រាន់សម្រាប់បើកប្រាក់បៀវត្សជូនមន្ត្រីរាជការនេះតែម្តង។
លោក គឹម សុខ គូសបញ្ជាក់ថា លោកអបអរសាទរដែលរដ្ឋាភិបាលដំឡើងប្រាក់បៀវត្សជូនមន្ត្រីរាជការស៊ីវិល គ្រូពេទ្យ គ្រូបង្រៀន និងមន្ត្រីកងកម្លាំងប្រដាប់អាវុធ ពីព្រោះនេះគឺជាកាតព្វកិច្ចដែលរដ្ឋាភិបាលត្រូវតែធ្វើ ប៉ុន្តែលោក ហ៊ុន សែន បែរជាយករឿងនេះមកភ្ជាប់ជាមួយនឹងផលប្រយោជន៍នយោបាយរបស់ខ្លួន ជាជាងការយកចិត្តទុកដាក់លើសុខទុក្ខរបស់មន្ត្រីរាជការដោយស្មោះត្រង់ទៅវិញ។
កាលពីពេលថ្មីៗនេះ រាជរដ្ឋាភិបាលកម្ពុជាបានគ្រោងថវិកាប្រមាណ ២២៩៥លានដុល្លារអាមេរិកសម្រាប់ចំណាយទៅលើបុគ្គលិករដ្ឋនៅក្នុងឆ្នាំ២០២៣ ដើម្បីដំឡើងប្រាក់បៀវត្សជូនមន្ត្រីរាជការស៊ីវិល គ្រូពេទ្យ គ្រូបង្រៀន និងមន្ត្រីកងកម្លាំងប្រដាប់អាវុធផងដែរ។
ក្នុងច្បាប់ថវិកាជាតិឆ្នាំ២០២៣ បញ្ជាក់ថា ចាប់ពីខែមករា ឆ្នាំ២០២៣ បៀវត្សអប្បបរមារបស់មន្ត្រីរាជការត្រូវបានដំឡើងតាមការងាររបស់ខ្លួន ដូចជាបៀវត្សអប្បបរមារបស់មន្ត្រីរាជការស៊ីវិលត្រូវបានដំឡើងពីចំនួនជាង ១លាន ១សែនរៀលទៅ ១លាន ៣សែនរៀលក្នុងឆ្នាំ២០២៣ ខណៈគ្រូបង្រៀន និងគ្រូពេទ្យ នឹងត្រូវដំឡើងពីចំនួន ១លាន ២សែន ៧ម៉ឺន ២៥០០រៀលនៅឆ្នាំ២០២២ ដល់ ១លាន ៤សែនរៀលក្នុងឆ្នាំ២០២៣ ផងដែរ។
ទាក់ទិននឹងបញ្ហានេះ កាលពីថ្ងៃទី២៨ ខែកញ្ញា ឆ្នាំ២០២២ ប្រមុខរាជរដ្ឋាភិបាលកម្ពុជា លោក ហ៊ុន សែន ក៏បានចេញអនុក្រឹត្យស្ដីពីតារាងនៃប្រាក់បៀវត្សជាប់ពន្ធប្រចាំខែសម្រាប់ឆ្នាំ២០២៣ នេះផងដែរ។
ក្នុងអនុក្រឹត្យដដែលនោះ បញ្ជាក់ថា និយោជិត ឬមន្ត្រីរាជការដែលមានប្រាក់បៀវត្សចាប់ពី ១លាន ៥សែន ១រៀលរហូតដល់ ២លានរៀល តម្រូវឱ្យបង់ពន្ធលើប្រាក់បៀវត្សចំនួន ៥% ដែលស្មើនឹង ៧ម៉ឺន ៥ពាន់រៀលក្នុង ១ខែ។ លើសពីនេះ បើមានប្រាក់បៀវត្សចាប់ពី ២លានរៀលរហូតដល់ ៨លាន ៥សែនរៀល តម្រូវឱ្យបង់ពន្ធ ១០% ដែលស្មើនឹង ១សែន ៧ម៉ឺន ៥ពាន់រៀលក្នុង ១ខែផងដែរ។
ជាងនេះទៀត អ្នកដែលមានប្រាក់បៀវត្សចាប់ពី ៨លាន ៥សែន ១រៀលរហូតដល់ ១២លាន ៥សែនរៀល តម្រូវឱ្យបង់ពន្ធ ១៥% ដែលស្មើនឹង ៦សែនរៀលក្នុង ១ខែ ខណៈនិយោជិត ឬមន្ត្រីរាជការដែលមានប្រាក់បៀវត្សលើសពី ១២លាន ៥សែនរៀល តម្រូវឱ្យបង់ពន្ធ ២០% ដែលស្មើនឹង ១លាន ៥សែន ២ម៉ឺន ៥ពាន់រៀលក្នុង ១ខែ។
ទាក់ទិននឹងបញ្ហានេះ អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន្ត បានអះអាងកាលពីពេលថ្មីៗនេះថា ប្រាក់បៀវត្សសម្រាប់មន្ត្រីរាជការនៅទូទាំងប្រទេស គឺបានមកពីការប្រមូលពន្ធគ្រប់ផ្នែកទាំងអស់ មិនមែនជាប្រាក់កម្ចីពីបរទេសនោះទេ៕