មន្ត្រីជាន់ខ្ពស់នៃក្រសួងការបរទេសចិន រំពឹងថាដំណើរទស្សនកិច្ចរបស់លោក ហ៊ុន សែន ទៅកាន់ប្រទេសចិន ពីថ្ងៃទី៩ ដល់ថ្ងៃទី១១ ខែកុម្ភៈ ខាងមុខនេះ នឹងពង្រឹងមិត្តភាពដែកថែបរវាងប្រទេសទាំងពីរកាន់តែរឹងមាំ។
អ្នកនាំពាក្យក្រសួងការបរទេស លោកស្រី Mao Ning បានឆ្លើយតបទៅនឹងសំណួររបស់អ្នកកាសែតនាអំឡុងនៃសន្និសីទសារព័ត៌មានប្រចាំថ្ងៃកាលពីថ្ងៃទី៦ ខែកុម្ភៈ ថា មេដឹកនាំចិន នឹងជួបពិភាក្សាជាបន្តបន្ទាប់ជាមួយលោក ហ៊ុន សែន ដើម្បីផ្លាស់ប្ដូរទស្សនៈស៊ីជម្រៅលើទំនាក់ទំនងទ្វេភាគី រួមទាំងក្នុងតំបន់ និងអន្តរជាតិ សម្រាប់ផលប្រយោជន៍រួម។
លោកស្រីបញ្ជាក់ថា ចិននិងកម្ពុជា ជាអ្នកជិតខាងគ្នាជាប្រពៃណី និងជាមិត្តដែកថែប ដូច្នេះចិននឹងយកដំណើរទស្សនកិច្ចនេះធ្វើជាឱកាសមួយដើម្បីជំរុញឲ្យមានការរីកចម្រើនបន្ថែមទៀតក្នុងការកសាងសហគមន៍ចិន-កម្ពុជា ជាមួយនឹងអនាគតរួមគ្នា ហើយបន្តឆ្ពោះទៅមុខនៃទំនាក់ទំនងមិត្តភាពចិន-កម្ពុជាពីមួយជំនាន់ទៅមួយជំនាន់។
ក្រៅពីនិយាយពីការពង្រឹងមិត្តភាពហើយ លោកស្រី Mao Ning ក៏បានរំលឹកពីទំនាក់ទំនងរវាងប្រទេសទាំងពីរដែលសាងដោយមេដឹកនាំជំនាន់មុន ហើយបន្តកាន់តែរឹងមាំជាលំដាប់ ខណៈឆ្នាំនេះឈានដល់ខួប ៦៥ឆ្នាំនៃការស្ថាបនាទំនាក់ទំនងការទូតចិន-កម្ពុជា និងជាឆ្នាំនៃមិត្តភាពចិន-កម្ពុជា (ចិន-កម្ពុជា Friendship Year)។
ចំណែកឯលោកនាយករដ្ឋមន្ត្រី ហ៊ុន សែន បានថ្លែងនៅក្នុងពិធីជួបសំណេះសំណាលជាមួយអ្នកសារព័ត៌មានលើកទី៥ កាលពីថ្ងៃទី១៤ ខែមករា ឆ្នាំ២០២៣ កន្លងមកថា ទស្សនកិច្ចនេះវាជាការរៀបចំមួយដើម្បីរំលឹកទៅដល់ពេលវេលាដ៏លំបាក ដែលជាខួបលើកទី៣ នៃថ្ងៃដែលលោកទៅទស្សនកិច្ចក្នុងពេលវេលាដែលគេទាំងឡាយរត់ចោលចិន ដោយសារតែខ្លាចនូវជំងឺកូវីដ-១៩។
លោក ហ៊ុន សែន ក៏សង្ឃឹមដែរថា ទស្សនកិច្ចរបស់លោកនាពេលខាងមុខ នឹងមានគម្រោងថ្មីៗបន្ថែមទៀតដែលត្រូវពឹងពាក់ពីមិត្តចិន ដើម្បីអភិវឌ្ឍកម្ពុជា ដោយក្នុងនោះប្រហែលជាត្រូវរៀបចំគម្រោងផ្លូវរថភ្លើងល្បឿនលឿនផងដែរ។
លោក ហ៊ុន សែន បានបញ្ជាក់ថា អ្វីដែលបានកើតឡើងរួចមកហើយនោះ គឺកិច្ចព្រមព្រៀងពាណិជ្ជកម្មសេរីកម្ពុជា-ចិន ត្រូវបានចូលជាធរមាន ដែលឥឡូវនេះ ការជំរុញពាណិជ្ជកម្មរវាងប្រទេសទាំងពីរធ្វើកាន់តែច្រើន និងមានកិច្ចសហប្រតិបត្តិការនានាក៏នឹងត្រូវធ្វើកាន់តែច្រើនទៀតផង៕