28 C
Phnom Penh

ក្រុមហ៊ុន​ឧកញ៉ា ឡេង ណាវ៉ាត្រា ត្រូវ​បាន​សង្ស័យ​រកស៊ី​លាង​លុយ​តាម​ការ​វិនិយោគ​ជាច្រើន​ប៉ុន្តែ​គ្មាន​ប្រាក់​ចំណូល

ដោយ ឌឹ ខេមបូឌា ដេលី

បទវិភាគ

ឧកញ៉ា​ជំនាន់​ថ្មី​ម្នាក់​ក្នុង​ចំណោម​ឧកញ៉ា​ចាស់​វស្សា ១២​នាក់ គឺ​លោក ឡេង ណាវ៉ាត្រា ដែល​មាន​ទ្រព្យសម្បត្តិ​ច្រើន ហើយ​លឿន​ជាងគេ​នៅ​កម្ពុជា ពុំ​ដែល​ទទួល​បាន​ប្រាក់ចំណេញ​ពី​គម្រោង​វិនិយោគ​ទាំងអស់​របស់​ខ្លួន​នោះ​ទេ។

ក្រុម​អ្នក​ឃ្លាំមើល​សង្ស័យ​ថា ឧកញ៉ា​រូប​នេះ​អាច​កំពុង​ដឹកនាំ​បងប្អូន​បង្កើត​របស់​ខ្លួន​ទាំង​គ្រួសារ​ឲ្យ​រកស៊ី​លាង​លុយ​កខ្វក់​សម្រាប់​គ្រួសារ​អ្នក​មាន​អំណាច​នៅ​កម្ពុជា ដែល​តម្រូវ​ឲ្យ​សមត្ថកិច្ច​ត្រូវ​បើក​ការ​ស៊ើប​អង្កេត ដើម្បី​ទប់ស្កាត់​ការ​លាង​លុយ​កខ្វក់​នេះ។

កាលពី​អំឡុង​ឆ្នាំ​២០១៨ ឧកញ៉ា ឡេង ណាវ៉ាត្រា ធ្លាប់​ប្រកាស​ជា​សាធារណៈ​ថា ទ្រព្យសម្បត្តិ​របស់​លោក​សរុប​ទាំងអស់​គិត​ទាំង​អចលនទ្រព្យ​ផ្សេងៗ​ថែម​ទៀត​ផង មាន​ទំហំ​ទឹកប្រាក់​ប្រមាណ ២០​លាន​ដុល្លារ​អាមេរិក ប៉ុន្តែ​ចាប់តាំងពី​ឆ្នាំ​២០២១ មក ឧកញ៉ា ឡេង ណាវ៉ាត្រា បាន​ចាប់ផ្តើម​បញ្ចេញ​សាច់ប្រាក់​ឧបត្ថម្ភ​ដល់​រដ្ឋាភិបាល​របស់​លោក ហ៊ុន សែន ក្រោម​រូបភាព​មនុស្សធម៌​ជា​លុយ​សុទ្ធ ដែល​គិត​មក​ទល់​នឹង​ពេលនេះ​មាន​ទំហំ​ទឹកប្រាក់​ប្រមាណ ២៥​លាន​ដុល្លារ​ហើយ​ក្នុង​រយៈពេល ៥​ឆ្នាំ។

បន្ទាប់ពី​មាន​ការ​ឧបត្ថម្ភ​លុយ​សុទ្ធ​ដ៏​ច្រើន​សន្ធឹកសន្ធាប់​របស់​ឧកញ៉ា ឡេង ណាវ៉ាត្រា គេ​ក៏​ឃើញ​មេដឹកនាំ​បក្ស​កាន់​អំណាច លោក ហ៊ុន សែន សងគុណ​ដល់​ឧកញ៉ា​រូប​នេះ​វិញ ដោយ​ផ្តល់​ដី​សម្បទាន​សឹង​គ្រប់​ទីកន្លែង​ដើម្បី​អង្កន់​ជា​ដី​ឡូត៍​សម្រាប់​លក់។

ឧកញ៉ា ឡេង ណាវ៉ាត្រា ទទួល​បាន​សិទ្ធិ​គម្រោង​អភិវឌ្ឍន៍​នៅ​ឧទ្យាន​សួនសត្វ​ភ្នំ​តាម៉ៅ​ពី​រដ្ឋាភិបាល ដោយ​ក្រុមហ៊ុន​របស់​លោក​ដាក់​គ្រឿងចក្រ​ឈូស​ឆាយ​ព្រៃ​នៅ​តំបន់​នោះ​រាប​ដល់​ដី​អស់​ប្រមាណ ៦០០​ហិកតារ​កាលពី​អំឡុង​ខែ​សីហា ឆ្នាំ​២០២២ ប៉ុន្តែ​ក្រោយ​មក លោក ហ៊ុន សែន ក៏​បាន​ប្រកាស​ផ្អាក​គម្រោង​នេះ​វិញ​បន្ទាប់ពី​មាន​ការ​តវ៉ា​ពី​ពលរដ្ឋ​សឹង​ទូទាំង​នគរ។

ផ្ទាំង​រូបថត​ឧកញ៉ា ឡេង ណាវ៉ាត្រា និង​ឧកញ៉ា ឃុន សៀ ភ្ជាប់​ជាមួយ​ទិដ្ឋភាព​ឈូស​ឆាយ​ព្រៃ​ភ្នំ​តាម៉ៅ​ដែល​ក្រុម​យុវជន​ស្រឡាញ់​បរិស្ថាន​ធ្វើ​យុទ្ធនាការ​នៅ​លើ​បណ្ដាញ​សង្គម​ហ្វេសប៊ុក​ដើម្បី​ពហិការ​ប្រើប្រាស់​ផលិតផល​ក្រុមហ៊ុន​នេះ។

ជុំវិញ​បញ្ហា​នេះ មាន​ពលរដ្ឋ​ជាច្រើន​ទាមទារ​ឱ្យ​លោក ហ៊ុន សែន ផ្ដន្ទាទោស​ដាក់​ពន្ធនាគារ​ម្ចាស់​ក្រុមហ៊ុន​ដែល​កាប់​បំផ្លាញ​ព្រៃឈើ​ភ្នំ​តាម៉ៅ​នោះ​ទៅ​តាម​ផ្លូវច្បាប់ ប៉ុន្តែ​មេដឹកនាំ​បក្ស​កាន់​អំណាច​រូប​នេះ​ប្រតិកម្ម​ថា បើ​ចង់​ចាប់​ម្ចាស់​ក្រុមហ៊ុន​នោះ​ដាក់​គុក គឺ​មាន​តែ​ចាប់​លោក​ដាក់​គុក​តែម្តង​ទៅ។ បញ្ហា​នេះ ជា​មូលហេតុ​មួយ​អាច​ឱ្យ​គេ​ដាក់​ការ​សង្ស័យ​បាន​ថា អាជីវកម្ម​របស់​ឧកញ៉ា ឡេង ណាវ៉ាត្រា គឺ​មាន​ក្រុម​គ្រួសារ​ត្រកូល «ហ៊ុន» ជា​ម្ចាស់​ពិតប្រាកដ​ដែល​នៅ​កាង​ពីក្រោយ​ធ្វើជា​ខ្នង​បង្អែក​ដ៏​រឹងមាំ និង​ដ៏​មាន​ឥទ្ធិពល។

កាលពី​ថ្ងៃទី​២២ ខែ​មករា ឆ្នាំ​២០២៣ ឧកញ៉ា ឡេង ណាវ៉ាត្រា បាន​អះអាង​ថា ក្រុមហ៊ុន​របស់​លោក​កំពុង​ធ្វើ​អាជីវកម្ម​ស្រប​ច្បាប់​ដែល​ទទួល​បាន​ប្រាក់​ចំណេញ​ពី​ការ​លក់​ផ្ទះ​រាប់​សែន​ល្វែង និង​លក់​ដី​ឡូត៍​រាប់​សែន​ឡូត៍ ដោយ​មិន​ចាំបាច់​ឈរ​ឈ្មោះ​លាង​លុយ​កខ្វក់​ឱ្យ​អ្នក​ណា​នោះ​ឡើយ។

ការ​អះអាង​របស់​លោក ឡេង ណាវ៉ាត្រា ធ្វើឡើង​បន្ទាប់ពី​សារព័ត៌មាន ឌឹ ខេមបូឌា ដេលី បាន​ចុះផ្សាយ​អត្ថបទ​ស៊ើបអង្កេត​មួយ​ដោយ​លាតត្រដាង​អំពី​ក្រុមហ៊ុន​របស់​លោក​មាន​ភាព​មិន​ប្រក្រតី​ជាច្រើន​ជុំវិញ​ប្រភព​ចំណូល និង​ប្រតិបត្តិការ​ហិរញ្ញវត្ថុ​តាមរយៈ​នៃ​ការ​ផ្តល់​សាច់ប្រាក់​សុទ្ធ​រាប់​លាន​ដុល្លារ​អាមេរិក​ក្នុង​មួយ​លើកៗ​ដល់​រដ្ឋាភិបាល​ឯក​បក្ស​របស់​លោក ហ៊ុន សែន ក្រៅ​ប្រព័ន្ធ​ធនាគារ​ក្រោម​រូបភាព​កម្មវិធី​មនុស្សធម៌​កន្លងមក ដែល​ទំហំ​ទឹកប្រាក់​នោះ​មាន​ចំនួន​សឹង​លើស​ពី​ទ្រព្យសម្បត្តិ​សរុប​របស់​ក្រុមហ៊ុន​ឧកញ៉ា​វ័យ​ក្មេង​នេះ​ទៅទៀត។

លោក​នាយករដ្ឋមន្ត្រី ហ៊ុន សែន និង​អ្នកឧកញ៉ា ឡេង ណាវ៉ាត្រា។

លោក ឡេង ណាវ៉ាត្រា បាន​លើកឡើង​ថា បើ​និយាយ​អំពី​មុខរបរ​របស់​លោក គឺ​មិន​ពិបាក​យល់​នោះ​ទេ ព្រោះ​លោក​សង់​ផ្ទះ​លក់​តម្លៃ​ពី ១​ម៉ឺន ៨​ពាន់​ដុល្លារ ($១៨០០០) ទៅ​ដល់ ១២​ម៉ឺន​ដុល្លារ​ក្នុង​ផ្ទះ​មួយ​ល្វែង។

លោក​ថា លោក​អាច​វាយតម្លៃ​ជា​មធ្យមភាគ គឺ ៣​ម៉ឺន​ដុល្លារ ហើយ​លក់​រាប់​ម៉ឺន​ល្វែង គុណ​មើល​ទៅ តើ​ឃើញ​លុយ​ប៉ុន្មាន​នោះ? លោក​បន្ត​ថា នេះ​នៅ​មិនទាន់​រាប់​បញ្ចូល​ដី​ឡូត៍​លំនៅឋាន​រាប់​សែន​ឡូត៍​ដែល​គិត​ជា​មធ្យមភាគ​តែ ៣​ពាន់​ដុល្លារ ($៣០០០) ប៉ុណ្ណោះ ហើយ​គេ​អាច​គុណ​លុយ​ទៅ​មើល​ឃើញ​ថា​ប៉ុន្មាន​ហើយ។

ឧកញ៉ា​វ័យ​ក្មេង​ដែល​ក្លាយ​ជា​អ្នក​មាន​ទ្រព្យធន​លឿន​ដូច​ក្រឡាប់​បាតដៃ​រូប​នេះ លើកឡើង​ថា ប្រសិនបើ The Cambodia Daily ចង់​ដឹង​ច្បាស់​ពី​មុខរបរ ឬ​អាជីវកម្ម​របស់​លោក​មែន ពួកគេ​អាច​មក​ស្រុក​ខ្មែរ ហើយ​ពេល​នោះ​លោក​នឹង​បង្ហាញ​ពី​គម្រោង​នានា​ជុំវិញ​ការ​ប្រតិបត្តិការ​ជំនួញ​របស់​ខ្លួន​ជាមិនខាន។

អ្នក​ឧកញ៉ា​ដែល​គេ​សង្ស័យ​ពី​ការ​បង្កើត​មុខ​ជំនួញ​មិន​ប្រក្រតី​រូប​នេះ ក៏​បាន​ស្នើ​ឱ្យ​អង្គភាព​ប្រឆាំង​អំពើពុករលួយ​នៅ​សហរដ្ឋ​អាមេរិក ទៅ​ស៊ើប​អង្កេត​ទ្រព្យសម្បត្តិ​របស់​លោក ហ្វ្លយដ៍ មេវេដឺរ (Floyd Mayweather) ដោយសារ​លោក ហ្វ្លយដ៍ បាន​បង្ហោះ​លុយ​ដ៏​ច្រើន​សន្ធឹកសន្ធាប់​ផង​ដែរ​នៅ​ពេល​ដែល​គាត់​វាយ​ឈ្នះ​គូប្រកួត​ម្តងៗ។

ដើម្បី​ជួយ​ការពារ​ប្អូនប្រុស​របស់​ខ្លួន​នៅ​លើ​បណ្ដាញ​សង្គម ឧកញ៉ា ឡេង ប្រុស ជា​អគ្គនាយករង​ក្រុមហ៊ុន ហ្គាឡាក់ស៊ី ណាវ៉ាត្រា គ្រុប ដែល​ជា​បង​ទី​មួយ​របស់​លោក ឡេង ណាវ៉ាត្រា បាន​ប្រដៅ​សារព័ត៌មាន ឌឹ ខេមបូឌា ដេលី និង​អ្នកវិភាគ​ឯករាជ្យ​ទាំង​កំរោល​ថា គួរ​បន្ត​ស្រាវជ្រាវ​ឲ្យ​បាន​ច្រើន​ជាង​នេះ ចាំ​យក​មក​ចុះ​ផ្សាយ ហើយ​ការ​វិភាគ ការ​ចោទ​ស្មានៗ​ធ្វើ​ឲ្យ​ប៉ះពាល់ និង​ជះ​ឥទ្ធិពល​យ៉ាង​ធ្ងន់ធ្ងរ​ដល់​បុគ្គល ក្រុម​គ្រួសារ ក្រុមហ៊ុន និង​រហូត​ដល់​អ្នក​រាប់​អាន​លោក ឡេង ណាវ៉ាត្រា ផង​ដែរ។

លោក​ថា លោក ឡេង ភត្រា ឬ ឡេង ណាវ៉ាត្រា រកស៊ី​ប្រកប​អាជីវកម្ម​រាល់​ថ្ងៃ​មិន​មាន​អ្វី​ជា​អាថ៌កំបាំង​ឡើយ ការ​លក់ដូរ និង​សកម្មភាព​ផ្សេងៗ​ផុស​លើ​ហ្វេសប៊ុក​ទាំងអស់។

អតីត​ពលករ​នៅ​ប្រទេស​កូរ៉េ ដែល​បាន​ងារ​ជា​ឧកញ៉ា​តាមរយៈ​ប្អូនបង្កើត​របស់​ខ្លួន​រូប​នេះ​បាន​អះអាង​ថា អ្នក​ដែល​ធ្លាប់​តាមដាន​សកម្មភាព​លោក ឡេង ភត្រា បាន​ដឹង​ចាប់តាំងពី​ពេល​ដែល​ប្អូនប្រុស​របស់​លោក​ចាប់ផ្ដើម​ជួយ​សង្គម​ម្ដងៗ​ក្នុង​ទំហំ​ទឹកប្រាក់​ពី ៨០-១០០​លាន​រៀល ឬ​ពី ២-៣​ម៉ឺន​ដុល្លារ​រហូត​ដល់​ចំនួន​ពី ២ ទៅ ៣​លាន​ដុល្លារ ហើយ​សរុប​មក​ទល់​ពេលនេះ​មាន​ចំនួន​ជាង ២០​លាន​ដុល្លារ ដែល​ភាគច្រើន​តែង​បង្ហាញ​ជា​លុយ​សុទ្ធ។

លោក ឡេង ណាវ៉ាត្រា ពេល​ធ្វើ​ជា​ពលករ​នៅ​ប្រទេស​កូរ៉េ។

លោក​ថា ប្រជាជន​ខ្មែរ​ភាគច្រើន​ក៏​កាន់​លុយ​សុទ្ធ​ចាយ ទិញ​ម្ហូប​អាហារ ទិញ​រថយន្ត ដី និង​ផ្ទះ​ជាដើម ហើយ​គ្រប់​គ្នា​ដឹង​ច្បាស់​លើ​ពិភពលោក​នេះ បើ​អ្នក​ណា​ម្នាក់​រកស៊ី​ខុស​ច្បាប់ គេ​មិន​បង្ហាញ​ឲ្យ​អ្នក​ដទៃ​ឃើញ​នោះ​ទេ។ លោក​ថា កុំ​ថា​ឡើយ​រាប់​លាន​ដុល្លារ សូម្បី​តែ​មួយ​សេន​ក៏​គេ​បិទបាំង​ដែរ នេះ​ជា​ធម្មជាតិ​របស់​មនុស្ស​ទៅ​ហើយ។

លោក ឡេង ប្រុស និយាយ​ថា អ្នក​រកស៊ី​ស្រប​ច្បាប់​តែងតែ​បង្ហាញ​លុយកាក់​តាម​របៀប​ផ្សេងៗ​ពី​គ្នា។ អ្នក​ខ្លះ​បង្ហាញ​ជា​តួលេខ អ្នក​ខ្លះ​បង្ហាញ​ចំនួន​លុយ​ជា​សែក អ្នក​ខ្លះ​បង្ហាញ​ចំនួន​លុយ​ជា​ផ្ទាំង​ក្រដាស​តែ​មួយ​សន្លឹក​ក៏​មាន​ដែរ។ លោក​ក៏​បាន​ចោទ​ជា​សំណួរ​ថា តើ​នៅ​កម្ពុជា​គ្រាន់តែ​ជួយ​ជា​លុយ​សុទ្ធ ហើយ​បង្ហាញ​ដល់​អ្នក​ដទៃ​ឲ្យ​ឃើញ​នោះ វា​ខុស​ច្បាប់​ដែរ​ឬ​ទេ?

លោក​អះអាង​ថា គេ​អាច​គណនា​បាន​ផ្ទះ​មួយ​តម្លៃ ៣​ម៉ឺន​ដុល្លារ ហើយ ១​ម៉ឺន​ផ្ទះ គឺ​ស្មើ​នឹង ៣០០​លាន​ដុល្លារ​បាត់​ទៅ​ហើយ ហើយ​ក្រោយ​ចំណាយ និង​បង់​ពន្ធ​ជូន​រដ្ឋ​អស់​ហើយ ចំណេញ​តែ ១០% ក៏​អាច​មាន​លុយ​សម្រាប់​មក​ជួយ​សង្គម​បាន​ដែរ។

លោក ឡេង ប្រុស អះអាង​ថា ក្រៅពី​ផ្ទះល្វែង វីឡា នៅ​លើ​ផ្លូវជាតិ​លេខ ៣, ៤, ៦ ផ្លូវ​វេងស្រេង ដី​ឡូត៍​នៅ​ផ្លូវជាតិ​លេខ ៣, ៤, ៥, ៦, ៥១ ក្រុមហ៊ុន​របស់​អ្នកឧកញ៉ា ឡេង ណាវ៉ាត្រា ក៏​មាន​គម្រោង​ដីធ្លី និង​ផ្ទះល្វែង​ស្ទើរ​គ្រប់​ខេត្ត ដូចជា​នៅ​ខេត្ត​កណ្ដាល កំពង់ស្ពឺ ក្រុង​ព្រះសីហនុ កំពង់ឆ្នាំង បាត់ដំបង សៀមរាប បន្ទាយមានជ័យ ជាដើម។ លោក​បន្ត​ថា មាន​អ្នក​រកស៊ី​ដី ផ្ទះសម្បែង​នៅ​កម្ពុជា​ជាច្រើន​ទទួល​បាន​ជោគជ័យ ពិសេស​ចាប់ពី​ឆ្នាំ​២០១៦ មក មិនមែន​មាន​តែ​លោក ឡេង ភត្រា ឬ ឡេង ណាវ៉ាត្រា ម្នាក់​នោះ​ទេ​ដែល​ក្លាយ​ជា​ឧកញ៉ា​នោះ។

ចំណែក​លោក ព្រាប សុវត្ថិ ដែល​ជា​តារា​ចម្រៀង​ប្រុស​លំដាប់​កំពូល​ល្បីល្បាញ​ខាង​ច្រៀង​ចម្រៀង​បែប​សម័យ ហើយ​ដែល​ចម្រៀង​របស់​លោក​ភាគច្រើន​ចម្លង​ពី​ថៃ និង​ពី​ចិន អស់​រយៈពេល​ជាង​ពីរ​ទសវត្ស​ចាប់តាំងពី​លោក​បាន​ចូលរួម​ប្រឡូក​ក្នុង​វិស័យ​សិល្បៈ​ដំបូង​កាលពី​ឆ្នាំ​១៩៩២ ជាមួយ​ផលិតកម្ម ហង្សមាស ហើយ​ពេល​ថ្មីៗ​នេះ​លោក​បាន​មក​ចូលរួម​ជីវភាព​ជា​តារា​ចម្រៀង​ប្រចាំ​ផលិតកម្ម Galaxy Navatra និង​បាន​ក្លាយ​ខ្លួន​ជា​ឧកញ៉ា​កាលពី​ខែ​មេសា ឆ្នាំ​២០២២ ក៏​បាន​ចេញ​មុខ​ប្រតិកម្ម​ផង​ដែរ ដោយ​សរសេរ​នៅ​លើ​ហ្វេសប៊ុក​របស់​លោក​ថា ការ​ផ្សាយ​ព័ត៌មាន​រឿង​អ្នកឧកញ៉ា ឡេង ណាវ៉ាត្រា គ្រាន់តែ​ជា​ការ​ចោទប្រកាន់​ចង់​កេង​ចំណេញ​ខាង​ផ្នែក​នយោបាយ​ប៉ុណ្ណោះ។

លោក ព្រាប សុវត្ថិ និយាយ​ថា វា​ជា​រឿង​មួយ​ដ៏​អយុត្តិធម៌​សម្រាប់​ក្រុមហ៊ុន Galaxy Navatra Group ហើយ​ធ្វើ​ឲ្យ​ប៉ះពាល់​ជីវភាព​បុគ្គលិក​រាប់​ពាន់​នាក់ និង​អ្នក​ដែល​រស់​ក្រោម​ការ​ផ្គត់ផ្គង់​របស់​ក្រុមហ៊ុន​ដល់​ទៅ​រាប់​ម៉ឺន​នាក់​ឯណោះ។

អ្នកឧកញ៉ា ឡេង ណាវ៉ាត្រា ពេល​ចុះ​ចែក​អំណោយ​ជាមួយ​លោក​នាយករដ្ឋមន្ត្រី ហ៊ុន សែន នៅ​ខេត្ត​បន្ទាយមានជ័យ កាលពី​ថ្ងៃទី​២១ ខែ​តុលា ឆ្នាំ​២០២២។

ទោះជា​យ៉ាងណាក៏ដោយ មនុស្ស​ជំនិត​របស់​តារា​ចម្រៀង​វ័យ ៤៧​ឆ្នាំ​រូប​នេះ កាលពី​ខែ​កញ្ញា ឆ្នាំ​២០២០ បាន​ទម្លាយ​ប្រាប់​ក្រុម​អ្នក​សារព័ត៌មាន​ថា លោក ព្រាប សុវត្ថិ សល់​ទ្រព្យសម្បត្តិ​ខ្ទង់ ៣០​លាន​ដុល្លារ​ពី​ការ​ចាប់​អាជីព​ជា​តារា​ចម្រៀង​អស់​រយៈពេល​ជាង ២០​ឆ្នាំ ហើយ​មនុស្ស​ជាច្រើន​បាន​ចាត់ទុក និង​ហៅ​លោក ព្រាប សុវត្ថិ ថា​ជា ”សេដ្ឋី” តាំងពី​មុន​លោក​ឡើង​ធ្វើជា​ឧកញ៉ា​មក​ម្ល៉េះ។

មុន​ក្លាយ​ខ្លួន​ជា​ឧកញ៉ា បុរស​វ័យ ៤៧​ឆ្នាំ​រូប​នេះ​មាន​ការងារ និង​មុខជំនួញ​ជាច្រើន​នៅ​ក្នុង​ដៃ ដូចជា៖

  • ជា​តារា​ចម្រៀង​ប្រចាំ​ផលិតកម្ម Galaxy Navatra
  • ជា​ម្ចាស់ Brand សាប៊ូ​កក់​សក់ ព្រាប សុវត្ថិ
  • ហាង​កាត់សក់ ព្រាប សុវត្ថិ
  • ផ្ទះ ព្រាប សុវត្ថិ ដែល​លក់​បាយ​ម្ហូប បុកល្ហុង និង​នំ​បញ្ចុក
  • គម្រោង​ដី​ឡូត៍ ព្រាប សុវត្ថិ
  • បុរី ព្រាប សុវត្ថិ
  • អ្នក​តំណាង​ផលិតផល​ទូរស័ព្ទ​ដៃ Vivo
  • ទូត​សុឆន្ទៈ​របស់​ក្រុមហ៊ុន​រថយន្ត Isuzu
  • ទូត​សុឆន្ទៈ​ធនាគារ DGB
  • និង​ជា​ទូត​សុឆន្ទៈ​របស់​គម្រោង​ខុនដូ និង​លំនៅឋាន​ប្រណិត Morgan Enmaison រួម​ទាំង​ការងារ​ជាមួយ​ក្រុមហ៊ុន​ផ្សេងៗ​ជាច្រើន​ទៀត។

ក្រៅពី​ការងារ និង​មុខជំនួញ​ទាំងនេះ ឧកញ៉ា ព្រាប សុវត្ថិ ក៏​មាន​ក្របខ័ណ្ឌ​នៅ​ក្នុង​ក្រសួង​ការពារ​ជាតិ​ផង​ដែរ ដោយ​បច្ចុប្បន្ន​លោក​មាន​ឋានន្តរស័ក្តិ​ជា​វរសេនីយ៍ឯក និង​មាន​តួនាទី​ជា​នាយរង​ការិយាល័យ​ទី​៥ នៃ​កងទ័ព​ជើងគោក។

មិន​ខុស​គ្នា​ពី​លោក ព្រាប សុវត្ថិ តារា​ប្រុស​ស្រី​ប្រចាំ​ផលិតកម្ម Galaxy Navatra ដូចជា​លោក​ឧកញ៉ា ខេមរៈ សេរីមន្ត ដែល​ទើប​នឹង​ចុះ​កុងត្រា​ជាមួយ​ផលិតកម្ម Galaxy Navatra កាលពី​ខែ​មករា កញ្ញា តន់ ចាន់ស៊ីម៉ា និង​លោក ប៊ុន សុណារិន (ហៅ ខេម) ដែល​កន្លងមក​មាន​បញ្ហា​ជាមួយ​ផលិតកម្ម ថោន ពាក់ព័ន្ធ​រឿង​មិនទាន់​ផុត​កុងត្រា បែរ​ជា​ទៅ​ច្រៀង​នៅ​ផលិតកម្ម​ផ្សេង ក៏​បាន​យក​សារ​ដូចៗ​គ្នា​មក​បង្ហោះ​លើ​ហ្វេសប៊ុក​ផ្ទាល់ខ្លួន​របស់​ពួកគេ​ផង​ដែរ។

ទោះជា​យ៉ាងណាក៏ដោយ មន្ត្រី​ជាន់ខ្ពស់​របស់​រដ្ឋាភិបាល​មួយ​រូប​ដែល​អះអាង​ក្នុង​លក្ខខណ្ឌ​មិន​បញ្ចេញ​ឈ្មោះ បាន​លើកឡើង​ថា ការ​ដែល​លេច​មុខ​លោក ព្រាប សុវត្ថិ និង​លោក ខេមរៈ សេរីមន្ត នៅ​ក្នុង​វិស័យ​អចលនទ្រព្យ​ជាមួយ​លោក ឡេង ណាវ៉ាត្រា ដោយសារតែ​អ្នក​ដែល​ប្រើប្រាស់​លោក ឡេង ណាវ៉ាត្រា គ្រោង​នឹង​ឈប់​ប្រើ​អ្នកឧកញ៉ា​រូប​នេះ​នៅ​ក្នុង​ពេល​ឆាប់ៗ​ខាងមុខ​នេះ​ហើយ។

មន្ត្រី​ដដែល​អះអាង​ថា អ្នក​ដែល​ប្រើប្រាស់​ឧកញ៉ា​រូប​នេះ​ខឹងសម្បា ដោយសារតែ​ឧកញ៉ា​រូប​នេះ​បាន​ធ្វើ​ឲ្យ​បាត់បង់​ផល​ប្រយោជន៍​ជាច្រើនលើក​ច្រើនសា ព្រោះតែ​ចរិត​ក្រអឺតក្រទម​ដើរ​តែ​ឈ្លោះ​ជាមួយ​អ្នក​ណា​ដែល​ហ៊ាន​ប៉ះទង្គិច​ជាមួយ​រូបគេ រហូត​ដល់​មាន​ការ​ឈ្លោះ​គ្នា​បែក​អូរ​ហូរ​ជា​ស្ទឹង​ជាមួយ​អ្នកកាសែត​កន្លង​មក ជាដើម។

បុគ្គលិក​ម្នាក់​របស់​ក្រុមហ៊ុន ឡេង ណាវ៉ាត្រា ដែល​បាន​ប្រាប់​សារព័ត៌មាន The Cambodia Daily ក្នុង​លក្ខខណ្ឌ​មិន​បញ្ចេញ​ឈ្មោះ បាន​ឲ្យ​ដឹង​ថា ក្រោយពី​អត្ថបទ​ស៊ើបអង្កេត​របស់​សារព័ត៌មាន ឌឹ ខេមបូឌា ដេលី បាន​ចេញ​ផ្សា​យមក លោក ឡេង ណាវ៉ាត្រា បាន​បញ្ជា​ឲ្យ​បុគ្គលិក​គ្រប់​ផ្នែក​ទាំងអស់​របស់​ខ្លួន​ចូល​វាយប្រហារ​ផេក (Page) ឬ​ទំព័រ​ហ្វេសប៊ុក​របស់​សារព័ត៌មាន ឌឹ ខេមបូឌា ដេលី ហើយ​បុគ្គលិក​ទាំងអស់​ត្រូវតែ​នាំគ្នា​ចូល​មក​សរសេរ​នៅ​ក្នុង​ផេក​របស់​អ្នកឧកញ៉ា ដោយ​រំលេច​នូវ​ការ​សរសើរ​លើក​តម្កើង​អំពី​គុណសម្បត្តិ​របស់​អ្នកឧកញ៉ា​ថែម​ទៀត​ផង។

បុគ្គលិក​ដដែល​បាន​ឲ្យ​ដឹង​ទៀត​ថា កន្លងមក​លោក​ឧកញ៉ា​រូប​នោះ​ក៏​មាន​ជម្លោះ​ពាក្យ​សម្ដី​ជាមួយ​សារព័ត៌មាន​អនឡាញ KCTV Cambodia ផង​ដែរ បន្ទាប់ពី​សារព័ត៌មាន​នោះ​បាន​ផ្សាយ​អំពី​សកម្មភាព​មិន​ប្រក្រតី​របស់​ខ្លួន​ក្នុង​ការ​រកស៊ី​ដី​ឡូត៍។

លោក​ថា ឧកញ៉ា​រូប​នោះ​បាន​បង្ហោះ​សារ​វាយប្រហារ និង​បង្ហោះ​រូប​ផ្តេសផ្តាស​ដែល​ធ្វើ​ឲ្យ​ប៉ះពាល់​ទៅ​ដល់​អ្នកសារព័ត៌មាន​មួយ​ចំនួន​ដែល​មាន​រូបថត​នៅ​ក្នុង​នោះ​ផង​ដែរ ហើយ​អ្នកសារព័ត៌មាន​ទាំងនោះ​ក៏​បាន​បង្ហោះ​សារ​វាយបក​វិញ ដោយ​ទាមទារ​ឲ្យ​ឧកញ៉ា ឡេង ណាវ៉ាត្រា ត្រូវ​ចេះ​គោរព​សិទ្ធិ​បុគ្គល​ផង​ដែរ។

ទោះជា​យ៉ាងណាក៏ដោយ ប្រភព​ម្នាក់​ដែល​សុំ​មិន​បញ្ចេញ​ឈ្មោះ បាន​ផ្ញើ​សារ​មក​សារព័ត៌មាន ឌឹ ខេមបូឌា ដេលី ឆ្លើយតប​នឹង​ប្រតិកម្ម​របស់​លោក​ឧកញ៉ា ឡេង ណាវ៉ាត្រា ថា ឃើញ​លោក​ក្មួយ​ដែល​ជា​អ្នកឧកញ៉ា​បាន​ព្យាយាម​ពន្យល់​សាធារណជន​ពី​ក្បួន​រកស៊ី តាំងពី​នៅ​ជា​កម្មករ រហូត​ក្លាយ​ជា​អ្នកឧកញ៉ា​កាន់កាប់​ទ្រព្យសម្បត្តិ​ខ្ទង់​រយ​ពាន់​លាន​ដុល្លារ។

ប្រភព​ដដែល​និយាយ​ថា អ្នកឧកញ៉ា​ចាំបាច់​ពន្យល់​ក្បាច់ក្បូរ​ហូរ​ជា​ស្ទឹង​ធ្វើ​អី? បើ​ស្អាតស្អំ​នូវ​លុយ​រាប់​លាន​ដុល្លារ​ទៅ​ហើយ ជួល​ក្រុមហ៊ុន​សវនកម្ម​អន្តរជាតិ ដូចជា PwC ឬ Deloit មក​ធ្វើ​សវនកម្ម ហើយ​ចេញ​របាយការណ៍​ជា​សាធារណៈ​ទៅ ថា​យើង​ស្អាតស្អំ​កម្រិត​ណា នោះ​វា​ចប់​ទៅ​ហើយ? មិន​បាច់​ខំប្រឹង​បកស្រាយ​អ្វី​នោះ​ទេ។

ប្រភព​ដដែល​លើកឡើង​ថា លុយ​របស់​អ្នកឧកញ៉ា​មិន​ហ៊ាន​ដាក់​ក្នុង​ធនាគារ​ទេ ដោយសារ​ធនាគារ​គេ​មិន​ហ៊ាន​ទទួល​លុយ​នោះ ព្រោះ​វា​ជា​លុយ​ដែល​គ្មាន​ប្រភព ហើយ​អ្នកឧកញ៉ា​ក៏​ព្យាយាម​បើក​ធនាគារ​ខ្លួនឯង​ដែរ តែ​បើក​ក៏​មិន​បាន ព្រោះ​វា​ពាក់ព័ន្ធ​នឹង​ប្រព័ន្ធ​ធនាគារ​អន្តរជាតិ បើក​បាន​តែ​គ្រឹះស្ថាន​ហិរញ្ញវត្ថុ​ដែល​ទម្លាក់​កម្ចី​ឲ្យ​អតិថិជន​ជា​លុយ​សុទ្ធ​ប៉ុណ្ណោះ។

ប្រភព​ដដែល​និយាយ​ថា អ្នកឧកញ៉ា​ជា​អ្នក​ផ្តល់​ជំនួយ​ធំ​ជាងគេ​ដល់​រដ្ឋាភិបាល ដោយ​ដឹក​លុយ​សុទ្ធ មិនមែន​ដក​ពី​ធនាគារ​ទេ គឺ​ដក​ចេញពី​ទូ​ដែក​នៅ​ផ្ទះ​អ្នក​ធំ​ម្នាក់ ហើយ​ថា​អ្នកឧកញ៉ា​ក៏​ជួយ​ដល់​កាកបាទក្រហម​ដែរ ហើយ​លុយ​នោះ​ក៏​មិន​បាន​ដក​ចេញ​ពី​ធនាគារ​ដែរ ប៉ុន្តែ​លុយ​នោះ​ត្រូវ​បាន​ដឹក​ទាំង​ឡានៗ​ជូន​កាកបាទក្រហម​តែម្តង។

ប្រភព​ដដែល​និយាយ​ថា ប្រសិនបើ​លុយ​នោះ​អាច​បង្វិល​ទៅ​ធនាគារ ដោយ​មិន​ចាំបាច់​បង្កើត​ជា​ជំនួញ​ណា​មួយ​នោះ ក៏​កូន​អ្នក​ធំ​នោះ​មិន​ប្រើ​អ្នកឧកញ៉ា​ឲ្យ​ធ្វើ​ការងារ​នេះ​ដែរ។

ប្រភព​ដដែល​និយាយ​ថា ឈ្មោះ​របស់​អ្នកឧកញ៉ា​បាន​កត់ត្រា​នៅ​ក្នុង​បញ្ជី​សង្ស័យ​អ្នក​លាង​លុយ​អន្តរជាតិ​នៅ​ក្នុង​ប្រទេស​កម្ពុជា​ទៅ​ហើយ ដូច្នេះ​ប្រសិនបើ​អ្នកឧកញ៉ា​ធ្វើ​ដំណើរ​ចេញ​ទៅ​ក្រៅ​ស្រុក ជាពិសេស​អឺរ៉ុប ឬ​ទៅ​អាមេរិក សូម​ប្រុងប្រយ័ត្ន​ផង ជាពិសេស​មន្ត្រី​ជាន់ខ្ពស់​នៃ​ក្រសួង​កសិកម្ម​មួយ​ចំនួន​កំពុង​ជាប់​ឃុំ​ក្នុង​សហរដ្ឋ​អាមេរិក ករណី​ជួញដូរ​សត្វ​ស្វា​ដែល​ជិត​ផុត​ពូជ​ទៅ​កាន់​សហរដ្ឋ​អាមេរិក​នោះ។

ជា​សារ​ឆ្លើយតប​ចំពោះ​ការ​លើកឡើង​នោះ លោក ឡេង ណាវ៉ាត្រា បាន​សរសេរ​នៅ​លើ​ហ្វេសប៊ុក​របស់​ខ្លួន​ថា លោក​ដឹង​ហើយ​ថា​ចង់​ឱ្យ​គេ​ដាក់ black list លើ​រូបលោក​នោះ ហើយ​លោក​ក៏​ប្រាប់​ទៅ​វិញ​ដែរ​ថា លោក​កើត​នៅ​កម្ពុជា គឺ​ស្លាប់​នៅ​កម្ពុជា មិន​រត់​ចោល​ស្រុក​ឡើយ។

បុគ្គលិក​ម្នាក់​ទៀត​របស់​លោក​ឧកញ៉ា ឡេង ណាវ៉ាត្រា បាន​ប្រាប់​សារព័ត៌មាន The Cambodia Daily ក្នុង​លក្ខខណ្ឌ​មិន​បញ្ចេញ​ឈ្មោះ បាន​ឲ្យ​ដឹង​ថា ក្រុមហ៊ុន​របស់​លោក ឡេង ណាវ៉ាត្រា មាន​ដូចជា​វិស័យ​អចលនទ្រព្យ បុរី និង​ដី​ឡូត៍ ឡេង ណាវ៉ាត្រា វិស័យ​ផលិត​ចម្រៀង ហ្គាឡាក់ស៊ី ណាវ៉ាត្រា ផ្សារ​កសិផល ឡេង ណាវ៉ាត្រា និង​គ្រឹះស្ថាន​មីក្រូហិរញ្ញវត្ថុ ឡេង ណាវ៉ាត្រា។

ប្រភព​ដដែល​និយាយ​ថា មួយ​រយៈ​នេះ ក្រុមហ៊ុន ហ្គាឡាក់ស៊ី ណាវ៉ាត្រា គ្រុប រក​ចំណូល​បាន​ត្រឹម​តែ​បុរី និង​ដី​ឡូត៍ ឡេង ណាវ៉ាត្រា បន្តិចបន្តួច​ប៉ុណ្ណោះ គឺ​មិន​ដូច​កាលពី​ដំបូង​ឡើយ គឺ​ថយ​ចុះ​ស្ទើរតែ ៩០% ព្រោះ​តែ​ការ​បាត់បង់​ទំនុកចិត្ត​ពី​សំណាក់​មជ្ឈដ្ឋាន​ជុំវិញ​ខ្លួន។

ជាពិសេស​ទៅ​ទៀត នៅ​ពេល​ផ្ទុះ​កូវីដ-១៩ នៅ​ឆ្នាំ​២០១៩ ប្រទេស​បាន​បិទ​ខ្ទប់​ទាំងស្រុង ហើយ​ពេល​នោះ គ្មាន​អ្នក​ណា​ម្នាក់​ខ្វល់​រឿង​ទិញ​ផ្ទះ​នោះ​ទេ គឺ​ខ្វល់​តែ​រក​អង្ករ​ច្រក​ឆ្នាំង​តែប៉ុណ្ណោះ ប៉ុន្តែ​លោក​ឧកញ៉ា​បែរ​ជា​បញ្ចេញ​លុយ​រាប់​លាន​ដុល្លារ​ជួយ​រដ្ឋាភិបាល​ទប់ស្កាត់​ជំងឺ​កូវីដ-១៩ ទៅវិញ។

បុគ្គលិក​ដដែល​រូប​នោះ​បាន​លើកឡើង​ថា ផលិតកម្ម ហ្គាឡាក់ស៊ី ណាវ៉ាត្រា មិន​មាន​ប្រាក់​ចំណេញ​នោះ​ទេ ដោយសារ​ក្រុមហ៊ុន​នេះ​ត្រូវ​បង់​ថ្លៃ​ឈ្នួល​ទៅ​ឲ្យ​តារា​ចម្រៀង​ល្បីៗ និង​ការ​ចំណាយ​ទៅ​លើ​បុគ្គលិក​ផលិតកម្ម ហើយ​ផលិតកម្ម​ច្រៀង​នេះ​ទៀតសោត​មិន​មាន​ប្រាក់​ចំណូល​ទេ ដោយសារ​មិន​មាន​ក្រុមហ៊ុន​ឧបត្ថម្ភ។ ចំពោះ​ផ្សារ​កសិផល​វិញ ក៏​ស្ងាត់​ទៅ​វិញ​ហើយ​ដែរ មិន​មាន​ដំណើរការ​ល្អ​នោះ​ទេ ជាពិសេស​គម្រោង​បុរី និង​ដី​ឡូត៍ គឺ​ស្ងាត់ជ្រងំ​សឹង​គ្រប់​ទីកន្លែង។ ជាង​នេះ​ទៅ​ទៀត គឺ​អតិថិជន​ដែល​បាន​ទិញ​ផ្ទះ ក៏ដូចជា​គម្រោង​ដី​ឡូត៍​តាម​ខេត្ត​នានា បាន​សម្ដែង​ការ​ខកបំណង និង​មិន​ពេញចិត្ត​ជា​ខ្លាំង​ដែល​ពួកគាត់​បាន​ទិញ និង​បង់​លុយ​អស់​ហើយ ហើយ​ត្រូវ​ដល់​កុងត្រា​ប្រគល់​ផ្ទះ តែ​បែរ​ជា​មិន​បាន​ចូល​រស់នៅ​ក្នុង​ផ្ទះ។

ចំពោះ​គ្រឹះស្ថាន​មីក្រូហិរញ្ញវត្ថុ ឡេង ណាវ៉ាត្រា វិញ​ទៀតសោត ក៏​មាន​តែ​ការ​ផ្តល់​កម្ចី​ឲ្យ​អតិថិជន​ដែល​ទិញ​ដី​ទិញ​ផ្ទះ​បង់​រំលស់​របស់​គម្រោង​តែប៉ុណ្ណោះ គឺ​គ្មាន​សង្វាក់​សេវាកម្ម​អ្វី​នោះ​ឡើយ។

បុគ្គលិក​រូប​នោះ​ទម្លាយ​ថា ការ​មិន​យកចិត្ត​ទុកដាក់ និង​ភាព​កម្សោយ​នៃ​ធនធាន​មនុស្ស​របស់​ក្រុមហ៊ុន ហ្គាឡាក់ស៊ី ណាវ៉ាត្រា គ្រុប ដោយសារ​ក្រុមហ៊ុន​នេះ​ញាំញី​ទៅ​ដោយ​គ្រួសារ​និយម​ដែល​មាន​តែ​កម្លាំង តែ​គ្មាន​ចំណេះ​ជំនាញ​មក​គ្រប់គ្រង និង​ដឹកនាំ (Families Company) ទើប​បច្ចុប្បន្ន​នេះ គម្រោង​បុរី និង​ដី​ឡូត៍ ឡេង ណាវ៉ាត្រា កំពុង​ជួប​បញ្ហា​ជាច្រើន​ដូចជា៖

  • ទី​១ ខាង​គ្រឿងចក្រ ឡាន​ចាក់​ដី​ចាក់​ខ្សាច់​បាន​ដក​ចេញពី​ការដ្ឋាន ដោយសារតែ​មិន​បាន​បង់​លុយ​តាម​កិច្ចសន្យា​កុងត្រា។
  • ទី​២ ជាង​សំណង់​បាន​រត់​ចោល​ការដ្ឋាន​ឈប់​ធ្វើការ​ដោយសារតែ​មិន​បាន​បើក​លុយ​កម្លាំង​ពលកម្ម​ឲ្យ​កម្មករ​ទៀងទាត់។
  • ទី​៣ ខាង​គ្រឿងសំណង់​ក៏​ឈប់​ផ្គត់ផ្គង់ ព្រោះ​ជំពាក់​ក្រុមហ៊ុន​យូរ​ពេក មិន​ងាយ​សង​ត្រឡប់​ទៅ​វិញ។
  • ទី​៤ ភ្នាក់ងារ​ដែល​ជា​អ្នកលក់​មិន​យក​ប្រាក់ខែ (Free Lancer) ក៏​ឈប់​ទៅ​ជួយ​លក់​គម្រោង​ទាំងនោះ ដោយសារតែ​ក្រុមហ៊ុន​មិន​បាន​បើក​ប្រាក់​កម្រៃជើងសា​ដូច​ដែល​មាន​ចែង​នៅ​ក្នុង​កិច្ចសន្យា​ថា ប្រសិនបើ​អតិថិជន​បង់​ប្រាក់​រួច​ចាប់ពី ៣០% ឡើង​ទៅ គឺ​ក្រុមហ៊ុន​នឹង​ផ្តល់​កម្រៃជើងសា ១០០% ឲ្យ​មក​ខាង​ភ្នាក់ងារ​ត្រឹមតែ​បី​ទៅ​បួន​សប្តាហ៍​យ៉ាង​យូរ។ ជា​អកុសល ក្រុមហ៊ុន​របស់​លោក ឡេង ណាវ៉ាត្រា ហាក់​ពន្យារពេល​ក្នុង​ការ​បើក​ប្រាក់​កម្រៃ​ជើងសា​ដល់​ភ្នាក់ងារ​លក់​ផ្ទះ​របស់​លោក​អស់​រយៈពេល​យូរ​ខែ​មក​ហើយ។

ចំណែក​គម្រោង​នៅ​បុរី ឡេង ណាវ៉ាត្រា នៅ​លើ​ផ្លូវជាតិ​លេខ ៦A វិញ គឺ​ក្រុមហ៊ុន​បាន​សន្យា​នៅ​ក្នុង​កុងត្រា​ទិញ​ផ្ទះ​ជាមួយ​នឹង​អតិថិជន​ថា ចាប់ពី ១៨​ខែ​ទៅ ២៤​ខែ នឹង​ផ្តល់​សោ​ឲ្យ​អតិថិជន​អាច​ចូល​រស់នៅ​បាន​ហើយ ប៉ុន្តែ​រហូត​ដល់​កំណត់​កុងត្រា​ប្រគល់​សោ អតិថិជន​ទាំងនោះ​នៅតែ​មិន​មាន​ផ្ទះ​រស់នៅ ហើយ​កន្លែង​ខ្លះ​សូម្បីតែ​ចាក់​ដី​មួយ​ឡាន​ក៏​គ្មាន​ដែរ។ ចំណែក​កន្លែង​ខ្លះ​ទៀត​ទើប​នឹង​បុក​គ្រឹះ​ក៏​មាន​ដែរ។

អតិថិជន​របស់​ក្រុមហ៊ុន​នេះ​មាន​ការ​រអ៊ូរទាំ​អំពី​ការ​យឺតយ៉ាវ​របស់​ក្រុមហ៊ុន ដែល​យក​លុយ​ពួកគេ​រួច​អស់​ហើយ តែ​បែរ​ជា​មិន​មាន​ការ​សាងសង់​ផ្ទះ​ណា​មួយ​ឲ្យ​ពួកគេ​ដូច​ការ​សន្យា​នោះ​ឡើយ។ ក្រុម​អតិថិជន​ទាំងនោះ​អះអាង​ថា ក្រុមហ៊ុន​របស់​លោក ឡេង ណាវ៉ាត្រា ធ្វើ​ឲ្យ​គេ​បាត់បង់​ទំនុកចិត្ត និង​មាន​ការ​មិន​ពេញចិត្ត​ខ្លាំង​ទៅ​លើ​ក្រុមហ៊ុន។

អ្វី​ដែល​គួរ​ឲ្យ​ឆ្ងល់​ជាង​នេះ​ទៅ​ទៀត​នោះ គឺ​ក្រុមហ៊ុន​របស់​អ្នកឧកញ៉ា ឡេង ណាវ៉ាត្រា បាន​យក​លុយ​ពី​អតិថិជន​រួច​រាល់​អស់​ហើយ៖

  • ហេតុ​អ្វី​បាន​ជា​មិន​ព្រម​សាងសង់​ផ្ទះ​ឲ្យ​គេ?
  • ហេតុ​អ្វី​បាន​ជា​មិន​បើក​លុយ​ឲ្យ​ខាង​ភ្នាក់ងារ​លក់ដូរ​ផ្ទះសម្បែង និង​ដី​ឡូត៍?
  • ហេតុ​អ្វី​បាន​ជា​មិន​បើក​លុយ​ឲ្យ​ខាង​ជាងសំណង់?
  • ហេតុ​អ្វី​បាន​ជា​មិន​បើក​លុយ​ឲ្យ​ខាង​គ្រឿងចក្រ​ឲ្យ​បាន​ទៀងទាត់?

កត្តា​ទាំងអស់​នេះ​ហើយ​ដែល​នាំ​ឲ្យ​មាន​ភាព​ស្ងាត់ជ្រងំ​សឹង​គ្រប់​គម្រោង​អចលនទ្រព្យ​នោះ។

បុគ្គលិក​រូប​នោះ​លើកឡើង​ថា បច្ចុប្បន្ន​មាន​នៅ​គម្រោង​បុរី និង​ដី​ឡូត៍ ឡេង ណាវ៉ាត្រា ៦A និង​គម្រោង​ដី​ឡូត៍​ល្វាឯម ដែល​កំពុង​បន្ត​លក់​យ៉ាង​ស្ងាត់ជ្រងំ ដោយសារតែ​មិន​បាន​បើក​លុយ​កម្រៃជើងសា​ឲ្យ​ភ្នាក់ងារ​លក់ (Free Lancer)។ ហេតុ​ដូច្នេះ​ហើយ​បាន​ជា​មិន​មាន​ភ្នាក់ងារ​ណា​ម្នាក់​ទៅ​ចូលរួម​ជួយ​លក់​នោះ​ដែរ។

ពួកគេ​និយាយ​ថា ដោយសារ​ខាង​ក្រុមហ៊ុន​មិន​បើក​លុយ​ឲ្យ​ខាង​គ្រឿងចក្រ ហេតុ​ដូច្នេះ​ហើយ​បាន​ជា​ម្ចាស់​គ្រឿងចក្រ​ដក​គ្រឿងចក្រ​ចេញពី​ការដ្ឋាន ឈប់​បន្ត​ចាក់​ខ្សាច់ ឬ​ចាក់​ដី​តទៅទៀត។

អ្នកលេង​ហ្វេសប៊ុក​ម្នាក់​ដែល​មាន​គណនី​ឈ្មោះ កូន​នាគ​ឆ្លងដែន បាន​ចូល​សរសេរ​បញ្ចេញមតិ​នៅ​ក្នុង​កម្មវិធី Idea Talk របស់​សារព័ត៌មាន The Cambodia Daily កាលពី​សប្តាហ៍​កន្លងទៅ​ថា «លោក​ឧកញ៉ា​អើយ​ជួយ​សង​លុយ​ថ្លៃ​ខ្សាច់​ផង»។

បុគ្គលិក​ម្នាក់​ទៀត​របស់​ក្រុមហ៊ុន ឡេង ណាវ៉ាត្រា បាន​ប្រាប់​សារព័ត៌មាន The Cambodia Daily ក្នុង​លក្ខខណ្ឌ​មិន​បញ្ចេញ​ឈ្មោះ ដោយ​លម្អិត​អំពី​គម្រោង​វិនិយោគ​ទាំង ៥ របស់​លោក ឡេង ណាវ៉ាត្រា ថា បុរី ឡេង ណាវ៉ាត្រា ៦A ស្ថិត​ក្នុង​ភូមិ​អន្លង់ស្លែង ឃុំ​សំបួរមាស ស្រុក​មុខកំពូល ខេត្ត​កណ្តាល ដែល​បាន​បើក​លក់​ក្រោយពី​មាន​ការ​ស្ងប់ស្ងាត់​នៃ​ជំងឺ​កូវីដ-១៩ កាលពី​ខែ​ឧសភា ឆ្នាំ​២០២១ គឺ​មាន​ផ្ទៃដី​ប្រមាណ​ជាង ១០០​ហិកតារ និង​អាច​សាងសង់​ផ្ទះ​សរុប​ជាង ៥​ពាន់​ខ្នង រួម​មាន​ផ្ទះល្វែង ផ្ទះ​វីឡា និង​ដី​ទុក​ស្ថាបនា​ហេដ្ឋារចនាសម្ព័ន្ធ​ផ្សេងៗ។ នៅ​ក្នុង​គម្រោង​នោះ​ផង​ដែរ ប្រជាពលរដ្ឋ​បាន​ផ្អើល​នាំគ្នា​ទៅ​ទិញ​មួយ​ប្រាវ ដោយសារ​ក្រុមហ៊ុន​បញ្ចុះ​តម្លៃ​រហូត​ដល់ ១​ម៉ឺន​ដុល្លារ ហើយ​នៅ​ពេល​បង់​ប្រាក់​ផ្តាច់​ទៅ​ឲ្យ​គម្រោង​ភ្លាមៗ ក្រុមហ៊ុន​សន្យា​ថា​នឹង​ប្រគល់​ផ្ទះ​ជូន​អតិថិជន​ក្នុង​រយៈពេល ២៤​ខែ ឬ​ពីរ​ឆ្នាំ​បន្ទាប់ពី​ថ្ងៃ​ចុះ​កុងត្រា​បង់​ផ្តាច់។

ប្រភព​ដដែល​ឲ្យ​ដឹង​ទៀត​ថា មួយ​ប្រាវ​ពេល​នោះ ក្រុមហ៊ុន​សប្បាយ​កើប​លុយ​ខ្លាំង​ណាស់ ពីព្រោះ​ក្រុមហ៊ុន​អាច​លក់​ផ្ទះ​បាន​រាប់​ពាន់​ល្វែង​ឯណោះ។ ប៉ុន្តែ​សព្វថ្ងៃ​នេះ គម្រោង​នោះ​ហាក់​ស្ងាត់ជ្រងំ​ទៅ​វិញ ដោយសារ​តែ​ម្ចាស់ផ្ទះ​ភាគច្រើន​លើស​ពី ៧០% នៅ​មិនទាន់​ទទួល​បាន​ផ្ទះ​នៅឡើយ ស្រប​ពេល​ដែល​កុងត្រា​ទិញ​ផ្ទះ​របស់​ពួកគេ​បាន​លើស​កាលកំណត់​ទៅ​ហើយ​ក៏ដោយ។

អតិថិជន​ខ្លះ​រអ៊ូរទាំ​ថា ក្តី​សង្ឃឹម​ក្នុង​ការ​ទទួល​បាន​ផ្ទះ​ថ្មី​ដែល​ពួកគេ​បាន​ទិញ​ពី​គម្រោង​លក់​ផ្ទះ​របស់​លោក ឡេង ណាវ៉ាត្រា ហាក់ដូចជា​នៅ​ឆ្ងាយ​ដូច​ជើងមេឃ​អ៊ីចឹង​ដែរ។ ពួកគេ​និយាយ​ថា កុំ​ថា​ឡើយ​ត្រឹម​ផ្ទះ សូម្បីតែ​ការ​បុក​គ្រឹះ​សង់​ផ្ទះ ឬ​ការ​ចាក់​ដី​សង់​ផ្ទះ​នៅ​មិនទាន់​ឃើញ​ចាក់​បាន​មួយ​ឡាន​ផង។

ប្រភព​ដដែល​បាន​ឲ្យ​ដឹង​ទៀត​ថា ដី​ឡូត៍ ឡេង ណាវ៉ាត្រា ៦A ដែល​មាន​ទីតាំង​ស្ថិត​ក្នុង​ភូមិ​អន្លង់ស្លែង ឃុំ​សំបួរមាស ស្រុក​មុខកំពូល ខេត្ត​កណ្តាល ជា​គម្រោង​ដែល​បាន​បើក​លក់​កាលពី​ចុង​ខែ​កក្កដា ឆ្នាំ​២០២២។ គម្រោង​នោះ​មាន​លក់​តែ​ដី​សុទ្ធ​ប៉ុណ្ណោះ ដែល​មាន​ផ្ទៃដី​ប្រមាណ ៦០​ហិកតារ​មាន​ចំនួន​ឡូត៍​សរុប ២​ពាន់​ឡូត៍ ហើយ​គម្រោង​នេះ​លក់​ដាច់​ខ្លាំង​ម្តង​ទៀត​ដោយ​មាន​ការ​ចុះ​កុងត្រា ២៤​ខែ ឬ​ពីរ​ឆ្នាំ​ទើប​អនុញ្ញាត​ឱ្យ​អតិថិជន​អាច​ចូល​ប្រើប្រាស់​ដី​ដែល​ពួកគេ​ទិញ​នោះ​បាន។

បច្ចុប្បន្ន គម្រោង​នោះ​ក៏​កំពុងតែ​ស្ងាត់​គ្មាន​ការ​អភិវឌ្ឍ​អ្វី​បន្ត​ទៀត​នោះ​ឡើយ ហើយ​ដែល​បញ្ហា​នេះ​បាន​នាំ​ឲ្យ​អតិថិជន ឬ​អ្នក​ទិញ​ដី​មាន​ក្តី​បារម្ភ​ជា​ខ្លាំង ស្រប​ពេល​ដែល​ពួកគេ​មិនទាន់​អាច​សួរនាំ​អ្វី​កើត​ទៅ​ខាង​ភាគី​ក្រុមហ៊ុន ពីព្រោះ​មិន​ទាន់​ដល់​ពេល​ត្រូវ​ទទួល​បាន​ដី​របស់​ពួកគេ​ទៅ​តាម​កិច្ចសន្យា ឬ​កុងត្រា។

ប្រភព​ដដែល​ឲ្យ​ដឹង​ទៀត​ថា ដី​ឡូត៍​លំនៅឋាន ឡេង ណាវ៉ាត្រា ព្រះប្រសប់ ស្ថិត​នៅ​ភូមិ​ស្វាយ ឃុំ​ស្វាយពោធិ៍ ស្រុក​ស្រីសន្ធរ ខេត្ត​កំពង់ចាម ដែល​បាន​បើក​ទទួល​ប្រាក់​កាលពី​ដើម​ខែ​តុលា ឆ្នាំ​២០២២ មាន​ផ្ទៃដី​ប្រមាណ ២០០​ហិកតារ និង​មាន​ដី​ប្រហែល ១​ម៉ឺន​ឡូត៍។ គម្រោង​នេះ​ក៏​លក់​ដាច់​បាន​តែ​ប៉ុន្មាន​ថ្ងៃ​ដំបូង​ប៉ុណ្ណោះ ហើយ​គម្រោង​នេះ​ក៏​មាន​សភាព​ស្ងាត់ជ្រងំ​ទៅ​វិញ​រហូត​មក​ទល់​បច្ចុប្បន្ន​នេះ។ គម្រោង​នេះ​សរុប​មក​លក់​បាន​ប្រហែល ៣០% ប៉ុណ្ណោះ។ គម្រោង​នេះ​ក៏​មាន​ភាព​ស្ងាត់ជ្រងំ​ក្នុង​ការ​អភិវឌ្ឍ​ដែរ ព្រោះ​ម្ចាស់​គ្រឿងចក្រ​បាន​ដក​គ្រឿងចក្រ​ចេញពី​គម្រោង ដោយសារ​ក្រុមហ៊ុន​មិន​ព្រម​បើក​លុយ​ឲ្យ​ម្ចាស់​គ្រឿងចក្រ​តាម​កិច្ចសន្យា។

បុគ្គលិក​ដដែល​និយាយ​ថា ដី​ឡូត៍​ល្វាឯម ស្ថិត​ក្នុង​ឃុំ​បឹងគ្រុំ ស្រុក​ល្វាឯម ខេត្ត​កណ្តាល ដែល​បាន​បើក​លក់​កាលពី​ពាក់កណ្តាល​ខែ​វិច្ឆិកា ឆ្នាំ​២០២២ មាន​ផ្ទៃដី​ប្រមាណ​ជាង ៤០០​ហិកតារ ក៏​លក់​មិន​ទទួល​បាន​ជោគជ័យ​ដែរ ហើយ​ចាប់តាំងពី​ការ​បើក​លក់​រហូត​ដល់​បច្ចុប្បន្ន គឺ​ស្ងាត់​ជ្រាប​មិន​មាន​អតិថិជន​ឡើយ ព្រោះតែ​មិន​មាន​ការ​ចូលរួម​ពី​ភ្នាក់ងារ​លក់ ឬ (Free Lancer) ដោយសារតែ​ក្រុមហ៊ុន​នៅ​មិន​ទាន់​បើក​ប្រាក់​កម្រៃ​ជើងសា ឬ Commission ឲ្យ​ពួកគេ។

បុគ្គលិក​ដដែល​និយាយ​ថា ដី​ឡូត៍​លំនៅឋាន ឡេង ណាវ៉ាត្រា ៦A ចំនួន ៩៣​ហិកតារ ដែល​បើក​លក់​កាលពី​ដើម​ខែ​ធ្នូ ឆ្នាំ​២០២២ ក៏​ខាត​ទាំងស្រុង​ដែរ មិន​មាន​អតិថិជន​ឡើយ ហើយ​លក់​បាន​តែ​បន្តិចបន្តួច​ប៉ុណ្ណោះ។

សរុប​ជា​រួម​មក គឺ​គម្រោង​លេខ​១ លក់​បាន​ចំណូល​ប្រហែល​ជិត ១០០​លាន​ដុល្លារ ដក​ថ្លៃ​ដើម​អាច​ចំណេញ​បាន​ប្រហែល ២៥​លាន​ដុល្លារ តែ​នៅ​មិន​ទាន់​សាងសង់​ឲ្យ​អតិថិជន​ភាគច្រើន។ គម្រោង​លេខ​២ លក់​បាន​ចំណូល​ប្រហែល ១៥​លាន​ដុល្លារ ដក​ថ្លៃ​ដើម ចំណេញ​ប្រហែល ៣​លាន​ដុល្លារ។ គម្រោង​លេខ​៣ នៅ​មិន​ទាន់​មាន​ព័ត៌មាន​អំពី​ការ​ចំណេញ ឬ​ខាត​នោះ​ទេ។ គម្រោង​លេខ​បួន ខាត​រាប់​លាន​ដុល្លារ។ ចំណែក​គម្រោង​លេខ​៥ ខាត​រាប់​លាន​ដុល្លារ។ បើ​បូក​ដក​គុណ​ចែក​គម្រោង​ទាំងអស់ គឺ​គ្មាន​បាន​ចំណូល​ជា​ដុំកំភួន​អ្វី​នោះ​ទេ។

បុគ្គលិក​រូប​នេះ​និយាយ​ថា បច្ចុប្បន្ន ក្រុមហ៊ុន ឡេង ណាវ៉ាត្រា កំពុង​ធ្លាក់​ប្រជាប្រិយភាព​ជា​ខ្លាំង​ដោយសារ​មិន​បាន​ធ្វើ​ទៅ​តាម​កិច្ចសន្យា​សាងសង់​ផ្ទះ​ឲ្យ​អតិថិជន​ឲ្យ​ស្រប​ទៅ​តាម​កុងត្រា​ទិញ​លក់ និង​ការ​ចូល​ទៅ​រស់នៅ​ក្នុង​គេហដ្ឋាន​ថ្មី។ ជាង​នេះ​ទៅ​ទៀត ក្រុមហ៊ុន​កំពុង​ប្រឈម​នឹង​ការ​ធ្វើ​បាតុកម្ម​ពី​សំណាក់​ម្ចាស់​គ្រឿងចក្រ ឡាន​ដឹក​ដី ដឹក​ខ្សាច់ មេជាង កូនជាង​ខាង​សំណង់ និង​ភ្នាក់ងារ​លក់ Free Lancer ទៀត​ផង។

លោក ឡេង ភត្រា ហៅ ឡេង ណាវ៉ាត្រា ជា​ឧកញ៉ា​ក្មេង​ជាងគេ​នៅ​កម្ពុជា​ដែល​មាន​អាយុ ៣៥​ឆ្នាំ មាន​ស្រុកកំណើត​នៅ​ភូមិ​ត្រពាំងសាលា ឃុំ​ឈើកាច់ ស្រុក​បាភ្នំ ខេត្ត​ព្រៃវែង ក្នុង​គ្រួសារ​ក្រីក្រ​មួយ​ដែល​មាន​ឪពុក​ឈ្មោះ ឡុង យឿន កន្លងមក​មាន​មុខរបរ​ជា​អ្នក​ស៊ីឈ្នួល​រែក​ដី ម្ដាយ​ឈ្មោះ ប៉ែន ងឿន បាន​ស្លាប់​អំឡុង​ឆ្នាំ​២០១២។ ដោយសារតែ​ជីវភាព​ក្រីក្រ លោក ឡេង ណាវ៉ាត្រា បាន​បញ្ឈប់​ការ​សិក្សា​ត្រឹម​កម្រិត​មធ្យមសិក្សា​បឋម​ភូមិ​ថ្នាក់​ទី​៩។

ដើម្បី​ជួយ​ជីវភាព​គ្រួសារ លោក ឡេង ណាវ៉ាត្រា បាន​ឆ្លង​ប្រទេស​ទៅ​ធ្វើ​ការងារ​ជា​ពលករ​នៅ​ប្រទេស​កូរ៉េខាងត្បូង អំឡុង​ឆ្នាំ​២០១០ ដល់​ឆ្នាំ​២០១៤ នៅ​ពេល​នោះ​លោក​ក៏​ធ្លាប់​ជា​អ្នកគាំទ្រ​គណបក្ស​សង្គ្រោះ​ជាតិ​ម្នាក់ ដែល​រិះគន់​ការ​ដឹកនាំ​របស់​លោក ហ៊ុន សែន តាមរយៈ​បទ​ចម្រៀង​ដែល​មាន​ពលករ​ខ្មែរ​ក្នុង​ប្រទេស​កូរ៉េ​ចូលរួម​ផង​ដែរ។

លោក ឡេង ណាវ៉ាត្រា មាន​បងប្អូន​ចំនួន​បួន​នាក់ ដែល​សុទ្ធតែ​ទទួល​បាន​គោរមងារ​តែងតាំង​ជា​ឧកញ៉ា​ចំនួន​បី​នាក់ និង​អ្នកឧកញ៉ា​ម្នាក់​ពី​ព្រះមហាក្សត្រ​នៃ​ព្រះរាជាណាចក្រ​កម្ពុជា ដែល​ចេញ​មុខ​រកស៊ី​ជា​សាធារណៈ​សព្វថ្ងៃ​នេះ និង​បូក​រួម​ទាំង​សែស្រឡាយ​ដែល​មាន​តែ​កម្លាំង ប៉ុន្តែ​មិន​មាន​ចំណេះដឹង។

ពួកគេ​កំពុង​ធ្វើ​ប្រតិបត្តិការ​នៅ​ក្នុង​ក្រុមហ៊ុន ហ្គាឡាក់ស៊ី ណាវ៉ាត្រា គ្រុប ដូចជា៖

  • ឧកញ៉ា ឡេង ប្រុស ជា​អគ្គនាយករង​ក្រុមហ៊ុន ហ្គាឡាក់ស៊ី ណាវ៉ាត្រា គ្រុប (ជា​បង​ទី​មួយ)
  • អ្នកឧកញ៉ា ឡេង ភត្រា ហៅ ឡេង ណាវ៉ាត្រា ជា​អគ្គនាយក​ក្រុមហ៊ុន ហ្គាឡាក់ស៊ី ណាវ៉ាត្រា គ្រុប
  • ឧកញ៉ា ឡេង និមល មាន​គម្រោង​បុរី និង​ដី​ឡូត៍​ផ្ទាល់ខ្លួន
  • អ្នកស្រី​ឧកញ៉ា ឡេង បញ្ចពណ៌ ជា​អគ្គនាយករង​ក្រុមហ៊ុន ហ្គាឡាក់ស៊ី ណាវ៉ាត្រា គ្រុប ដែល​ជា​ប្អូនស្រី​ពៅ​របស់​គ្រួសារ​នេះ
  • រួម​ទាំង​ឪពុកមា បងប្អូន​ជីដូនមួយ ក្មួយ​បង្កើត និង​ក្មួយប្រសា ដែល​កំពុង​កាន់កាប់​នូវ​អាជីវកម្ម​ផ្សេងៗ​នៅ​ក្នុង​ក្រុមហ៊ុន​របស់​លោក ឡេង ណាវ៉ាត្រា ផង​ដែរ។

អ្នកឧកញ៉ា ឡេង ណាវ៉ាត្រា មាន​ភរិយា គឺ​អ្នកស្រី ឈឺន ស្រីម៉ាច ត្រូវ​បាន​ប្រភព​ច្បាស់ការ​មួយ​ទម្លាយ​ឲ្យ​ដឹង​ថា​ជា​ក្មួយស្រី​របស់​ឧត្តមសេនីយ៍ ហ៊ីង ប៊ុនហៀង អគ្គ​មេបញ្ជាការ​រង​នៃ​កងយោធពល​ខេមរភូមិន្ទ នាយករង​ខុទ្ទកាល័យ​របស់​លោក​នាយករដ្ឋមន្ត្រី និង​ជា​មេបញ្ជាការ​បញ្ជាការដ្ឋាន​កង​អង្គរក្ស។

នៅ​ឆ្នាំ​២០១៨ អ្នកឧកញ៉ា ឡេង ណាវ៉ាត្រា បាន​ប្រកាស​ជា​សាធារណៈ​ថា លោក​មាន​ទ្រព្យសម្បត្តិ​ប្រហែល ២០​លាន​ដុល្លារ​បន្ទាប់ពី​ប្រឡូក​លើ​វិស័យ​អចលនទ្រព្យ​បាន​ពីរ​ឆ្នាំ ប៉ុន្តែ​ចាប់តាំងពី​ឆ្នាំ​២០១៨ មក លោក ឡេង ណាវ៉ាត្រា មិន​បាន​ប្រកាស​ជា​សាធារណៈ​ទៀត​នោះ​ទេ។

អ្នកឧកញ៉ា ឡេង ណាវ៉ាត្រា បច្ចុប្បន្ន​លេច​មុខមាត់​ក្នុង​សង្គម​តាមរយៈ​ការ​ផ្ដល់​ថវិកា ២៥​លាន​ដុល្លារ​ក្នុង​រយៈពេល ៥​ឆ្នាំ​ចុងក្រោយ​ឱ្យ​រដ្ឋាភិបាល​លោក ហ៊ុន សែន កាកបាទក្រហម​កម្ពុជា មន្ទីរពេទ្យ​គន្ធបុប្ផា ដើម្បី​ទប់ទល់​គ្រោះ​មហន្តរាយ ប្រយុទ្ធ​ប្រឆាំង​នឹង​ជំងឺ​កូវីដ-១៩។

អ្នកឧកញ៉ា ឡេង ណាវ៉ាត្រា និង​ភរិយា គឺ​លោកជំទាវ ឈឺន ស្រីម៉ាច។

លោក ឡេង ណាវ៉ាត្រា ចាប់ផ្ដើម​លេច​មុខមាត់​ខ្លាំង​ក្រោយ​លោក​ទទួល​បាន​ងារ​ជា​ឧកញ៉ា​នៅ​ឆ្នាំ​២០១៨ និង​ជា​អ្នកឧកញ៉ា​នៅ​ឆ្នាំ​២០២១។

លោក​មាន​រថយន្ត​ម៉ាក​ល្បីៗ​ប្រមាណ ១០​គ្រឿង ដូចជា៖

  • រ៉ូលរ៉យស៍ (Roll Royce)
  • ឡាំបូហ្គីនី (Lamborghini)
  • ហ្វើរ៉ារី (Ferrari) ផច្ឆ (Porsche)
  • និង​ប៊ែនលី (Bentley)
  • ព្រមទាំង​ឧទ្ធម្ភាគចក្រ​ផ្ទាល់ខ្លួន​មួយ​គ្រឿង​ទៀត ដែល​សរុប​ជា​ទឹកប្រាក់​រាប់​សិប​លាន​ដុល្លារ។
រថយន្ត​ខ្លះៗ​របស់​អ្នកឧកញ៉ា ឡេង ណាវ៉ាត្រា។

លោក ម៉ាកឃើស៍ ហាដគី (Marcus Hardtke) ដែល​បាន​ធ្វើការ​ជាមួយ​ក្រុម​បរិស្ថាន និង​ការ​អភិរក្ស​មួយ​ចំនួន​នៅ​កម្ពុជា​ចាប់តាំងពី​ពាក់កណ្តាល​ទសវត្សរ៍​ឆ្នាំ​១៩៩០ មក និយាយ​ថា វិធី​លាង​លុយ​របស់​ឧកញ៉ា​មួយ​ចំនួន​នៅ​កម្ពុជា ធ្វើឡើង​តាមរយៈ​ការ​វិនិយោគ​ទៅ​លើ​គម្រោង​ជាច្រើន ដូចជា​ការ​បើក​បនល្បែង​ស៊ីសង ឬ​កាស៊ីណូ សណ្ឋាគារ ក្រុមហ៊ុន​អចលនទ្រព្យ មីក្រូហិរញ្ញវត្ថុ ការ​ទិញ​របស់​ទំនើបៗ​ក្នុង​តម្លៃ​ថ្លៃ និង​ធ្វើ​សកម្មភាព​សប្បុរសធម៌។ លោក​ថា ពួកគេ​មិន​ទទួល​ចំណូល​ពី​គម្រោង​វិនិយោគ​ទាំងអស់​នោះ​ទេ ប៉ុន្តែ​ពួកគេ​ប្រកាស​ថា​ពួកគេ​ចំណេញ​លើ​គម្រោង​ទាំងនោះ។

លោក​បន្ត​ថា កា​លាង​លុយ​កខ្វក់​ក៏​មិនមែន​មាន​តែ​ឧកញ៉ា​ខ្មែរ​មួយ​ចំនួន​នោះ​ដែរ ប៉ុន្តែ​ក៏​មាន​ជនជាតិ​ចិន​ជាច្រើន​កំពុងតែ​លាង​លុយ​នៅ​កម្ពុជា​សព្វថ្ងៃ​នេះ។

លោក Marcus និយាយ​ថា ការ​លាង​លុយ​មាន​វិធី​ជាច្រើន​ដំណាក់កាល​ដូចជា ការ​ដាក់​លុយ​ចូល​ប្រព័ន្ធ​ហិរញ្ញវត្ថុ​ស្រប​ច្បាប់ ឬ​ហៅថា (PLACEMENT) គឺ​លុយ​កខ្វក់​ត្រូវ​បាន​បំបែក​ទៅ​ជា​ចំណែក​ផ្សេង​គ្នា​ច្រើន ហើយ​យក​ទៅ​ដាក់​ជា​បញ្ញើ ឬ​ជា​ការ​វិនិយោគ​នៅ​ក្នុង​ប្រព័ន្ធ​ហិរញ្ញវត្ថុ ដូចជា​ស្ថាប័ន​ហិរញ្ញវត្ថុ កាស៊ីណូ ហាង​លក់​ទំនិញ ឬ​អាជីវកម្ម​តូច​ធំ​ផ្សេងៗ​ទាំង​ក្នុង និង​ក្រៅ​ប្រទេស។

លោក​បន្ត​ថា ក្រៅពី​នេះ​គេ​ក៏​អាច​រត់​ពន្ធ​រូបិយប័ណ្ណ​ទៅ​ក្រៅ​ប្រទេស ដែល​ភាសា​អង់គ្លេស​ហៅ (Currency Smuggling) ការ​ផ្លាស់ប្ដូរ​រូបិយប័ណ្ណ (Currency Exchange) ការ​ដាក់​លាយ​បន្លំ​ជាមួយ​លុយ​ដែល​មាន​ក្នុង​ប្រព័ន្ធ​ស្រាប់ (Blending Fund) និង​ការ​ទិញ​ទ្រព្យ​ផ្សេងៗ​ដែល​មិន​ត្រូវការ​សំណុំ​បែបបទ​ច្បាស់លាស់។

លោក​បន្ត​ថា ដំណើរការ​នេះ​នឹង​ធ្វើ​ឲ្យ​លុយ​កខ្វក់​ទាំងនោះ​កាន់តែ​មាន​ភាព​ងាយស្រួល​ក្នុង​ការ​បម្លែង ឬ​ផ្ទេរ​តាមរយៈ​ធនាគារ ហើយ​ឧក្រិដ្ឋជន​ងាយ​នឹង​បន្ត​ដំណើរការ​លាង​លុយ​តទៅទៀត។

លោក Marcus និយាយ​ថា វិធីសាស្ត្រ​មួយ​ទៀត​នោះ គឺ​ការ​ក្លែង​បន្លំ ឬ​បំបិទ​ប្រភព​របស់​លុយ បន្ទាប់ពី​ដាក់​លុយ​ចូល​ប្រព័ន្ធ​ហិរញ្ញវត្ថុ​ស្រប​ច្បាប់។ ពួក​ឧក្រិដ្ឋជន​ត្រូវការ​ក្លែង​បន្លំ ឬ​បំបិទ​ប្រភព​របស់​លុយ ឬ​ធ្វើ​ឲ្យ​ប្រតិបត្តិការ​លុយ​មាន​ភាព​សាំញ៉ាំ ដើម្បី​ធ្វើ​ឲ្យ​កាន់តែ​ពិបាក​រក​ឃើញ​ប្រភព​លុយ​កខ្វក់​ទាំងនោះ និង​ដើម្បី​លាក់​បាំង​សកម្មភាព​នៃ​ការ​លាង​លុយ។ ពួកគេ​អាច​ទិញ​វត្ថុ​មាន​តម្លៃ​ដែល​អាច​លក់​ចេញ​វិញ​បាន​នៅ​ក្រៅ​ប្រទេស និង​ការ​បម្លែង​សាច់ប្រាក់​ទៅ​ជា​មូលប្បទានប័ត្រ ជាដើម។

លោក​បាន​ពន្យល់​ទៀត​ថា មាន​វិធីសាស្ត្រ​មួយ​ទៀត គឺ​ការ​ដក​លុយ​ចេញ​បន្ទាប់ពី​លាង គឺ​លុយ​ទាំងនោះ​អាច​ធ្វើ​ចរាចរ​បាន​នៅ​ក្នុង​សេដ្ឋកិច្ច និង​ប្រព័ន្ធ​ហិរញ្ញវត្ថុ​ដោយ​ស្រប​ច្បាប់ ហើយ​វា​ថែមទាំង​ត្រូវ​បាន​មើល​ឃើញ​ថា​លុយ​ទាំងនោះ​ចេញពី​ប្រភព​ស្រប​ច្បាប់​ទៀត​ផង។

ក្នុង​ដំណាក់កាល​នេះ លុយ​ទាំងនោះ​នឹង​ត្រូវ​បាន​យក​ទៅ​វិនិយោគ​បន្ត​លើ​អចលនទ្រព្យ ឬ​អាជីវកម្ម​ស្រប​ច្បាប់​នានា ដោយ​លុយ​ដែល​បង្កើត​បាន​បន្តបន្ទាប់​ពី​នេះ សុទ្ធសឹងតែ​ជា​លុយ​ដែល​នឹង​ត្រូវ​បាន​ចាត់ទុក​ថា​មក​ពី​ប្រភព​ស្រប​ច្បាប់​ទាំងអស់។

លោក​ថា ប៉ុន្តែ​មិនមែន​គ្រប់​ការ​លាង​លុយ​ទាំងអស់​សុទ្ធតែ​បាន​ឆ្លងកាត់​ដំណាក់កាល​ទាំង ៣​ប្រភេទ​នេះ​ទេ ព្រោះ​វា​អាច​ស្ថិត​ទៅ​តាម​ស្ថានភាព​នៃ​លុយ​កខ្វក់​ទាំងអស់​នោះ​ដែរ។

អ្នកវិភាគ​នយោបាយ សង្គម និង​ជា​ប្រធាន​វេទិកា​ពលរដ្ឋ លោក លោក គឹម សុខ

អ្នកវិភាគ​ឯករាជ្យ និង​ជា​ប្រធាន​វេទិកា​ពលរដ្ឋ លោក គឹម សុខ បាន​ថ្លែង​នៅ​ក្នុង​កម្មវិធី Idea Talk របស់​សារព័ត៌មាន The Cambodia Daily ថា ប្រភព​លុយ​របស់​ឧកញ៉ា ឡេង ណាវ៉ាត្រា មាន​ភាព​មិន​ច្បាស់លាស់​ជាច្រើន ព្រោះ​ថា​កាលពី​ឆ្នាំ​២០១៨ ឧកញ៉ា​វ័យ​ក្មេង​រូប​នេះ​បាន​ប្រកាស​ថា ទ្រព្យសម្បត្តិ​សរុប​ដែល​ខ្លួន​មាន គឺ​រាប់​ទាំង​ដី​ឡូត៍ និង​អគារ​សំណង់​ផ្សេងៗ គឺ​មាន​ប្រមាណ​ត្រឹមតែ ២០​លាន​ដុល្លារ​អាមេរិក​ប៉ុណ្ណោះ។

លោក​បន្ថែម​ថា ប៉ុន្តែ​រយៈពេល​ប្រមាណ​ជា ៣​ឆ្នាំ​ចុង​ក្រោយ​នេះ ឧកញ៉ា ឡេង ណាវ៉ាត្រា អាច​ផ្តល់​ប្រាក់​ឧបត្ថម្ភ​ដល់​រដ្ឋាភិបាល​លោក ហ៊ុន សែន ជាង ២០​លាន​ដុល្លារ ស្រប​ពេល​ដែល​ក្រុមហ៊ុន​ដែល​មាន​អាយុកាល​ច្រើន​ឆ្នាំ​កំពុង​ប្រឈម​នឹង​ការ​ក្ស័យធន​ដោយសារ​ជំងឺ​កូវីដ-១៩ កាលពី​ពេល​កន្លងទៅ។

លោក​បន្ត​ថា នេះ​នៅ​មិន​ទាន់​គិត​ដល់​ទំហំ​ទឹក​លុយ​ដែល​គាត់​យក​ទៅ​ទិញ​គោរមងារ​ជា​ឧកញ៉ា​សម្រាប់​ខ្លួនឯង និង​បងប្អូន​ប្រុស​ស្រី​របស់​គាត់​ជាច្រើន​នាក់​ផ្សេង​ទៀត​ផង​នោះ។

អ្នកវិភាគ​ឯករាជ្យ​រូប​នេះ​លើកឡើង​ជា​ចម្ងល់​ថា ក្រុមហ៊ុន ឡេង ណាវ៉ាត្រា ត្រឹមតែ​ជា​ក្រុមហ៊ុន​ដែល​អាច​រកស៊ី​បាន​តែ​ក្នុង​ស្រុក តែ​បែរ​ជា​បង្ហាញ​ពី​ការ​ចាយ​លុយ​ដ៏​ច្រើន​លើសលប់ និង​ចរាចរ​លុយ​ដោយ​គ្មាន​ការ​ទទួលស្គាល់​ពី​ធនាគារ​ថែម​ទៀត ខណៈ​ក្រុមហ៊ុន​ដែល​មាន​វិសាលភាព​រកស៊ី​ជា​លក្ខណៈ​អន្តរជាតិ មិន​ទាន់​មាន​លទ្ធភាព​បង្ហាញ​សក្ដានុពល​ប្រើ​លុយ​របស់​ខ្លួន​បែប​នេះ​ផង ប៉ុន្តែ​ក្រុមហ៊ុន ឡេង ណាវ៉ាត្រា នៅតែ​គ្មាន​ការ​ស៊ើបអង្កេត​ពី​ប្រភព​លុយ​ទាំងនោះ​ពី​រដ្ឋាភិបាល​លោក ហ៊ុន សែន រហូត​ដល់​ពេលនេះ។

លោក គឹម សុខ លើកឡើង​ថា ការ​ធ្វើ​ប្រតិបត្តិការ​ហិរញ្ញវត្ថុ​របស់​ឧកញ៉ា ឡេង ណាវ៉ាត្រា ដោយ​មិន​ប្រើប្រាស់​ប្រព័ន្ធ​ធនាគារ​កន្លងមក ជា​ហេតុផល​មួយ​បង្ហាញ​ថា ឧកញ៉ា​រូប​នេះ​គ្មាន​ផែនការ​ពង្រីក​អាជីវកម្ម​ជា​លក្ខណៈ​អន្តរជាតិ​ទេ។ ដូច្នេះ​ក៏​អាច​បញ្ជាក់​បាន​ដែរ​ថា គាត់​មិន​មាន​លក្ខណសម្បត្តិ​ជា​អ្នកជំនួញ​ឡើយ គឺ​អាច​ត្រឹមតែ​ជា​អ្នក​ធ្វើ​តាម​គេ ឬ​ឈរ​ឈ្មោះ​ឱ្យ​គេ​ប៉ុណ្ណោះ ព្រោះ​ថា​ក្នុង​នាម​ជា​អ្នកជំនួញ​ដែល​កាន់កាប់​ក្រុមហ៊ុន​ធំៗ គឺ​ត្រូវ​មាន​គំនិត​វែងឆ្ងាយ​ដើម្បី​ពង្រីក​វិសាលភាព​របស់​ខ្លួន​ជា​លក្ខណៈ​អន្តរជាតិ ដែល​ត្រូវ​បង្កើត​កេរ្តិ៍​ឈ្មោះ​ឱ្យ​ល្អ​សម្រាប់​ដៃគូ​ជំនួញ​ផ្សេងៗ​ទុកចិត្ត​សហការ​ជាមួយ ជាពិសេស​ការ​បង្កើត​ទំនុកចិត្ត​លើ​ប្រភព​ចំណូល និង​ការ​ចរាចរ​សាច់ប្រាក់​របស់​ខ្លួន​តែម្តង។

ប្រធាន​វេទិកា​ពលរដ្ឋ​រូប​នេះ​បញ្ជាក់​ថា ជា​ឱកាស​ល្អ​នៅ​ពេល​ដែល​មាន​ការ​ស៊ើបអង្កេត ឬ​ចុះផ្សាយ​ពី​សារព័ត៌មាន​ពី​ភាព​មិន​ប្រក្រតី​របស់​ខ្លួន ហើយ​ឧកញ៉ា ឡេង ណាវ៉ាត្រា មិន​គួរ​ប្រើ​ទស្សនៈ​ផ្ទាល់ខ្លួន​បកស្រាយ​ការពារ​ក្រុមហ៊ុន ឬ​ទង្វើ​របស់​ខ្លួន​នោះ​ទេ ប៉ុន្តែ​អ្វី​ដែល​អាច​បញ្ជាក់​ពី​ភាព​ស្អាតស្អំ​របស់​ក្រុមហ៊ុន​លោក គឺ​ការ​ប្រកាស​ពី​ប្រភព​ចំណូល​ផ្ទាល់ខ្លួន និង​ភាព​ស្រប​ច្បាប់​នៃ​ការ​ធ្វើ​ប្រតិបត្តិការ​របស់​ក្រុមហ៊ុន​នេះ​តែប៉ុណ្ណោះ ជាពិសេស​គឺ​ការ​ប្រតិបត្តិការ​ហិរញ្ញវត្ថុ​របស់​ខ្លួន​ក្រៅ​ប្រព័ន្ធ​ធនាគារ​ដែល​គេ​ចាត់ទុក​ថា​ជា​ការ​ប្រតិបត្តិការ​សាច់ប្រាក់​មិន​ប្រក្រតី​កន្លងមក។

ប្រភព​ម្នាក់​ស្និទ្ធ​នឹង​លោក ឡេង ណាវ៉ាត្រា ដែល​សុំ​មិន​បញ្ចេញ​ឈ្មោះ​ដើម្បី​សុវត្ថិភាព បាន​ប្រាប់​សារព័ត៌មាន ឌឹ ខេមបូឌា ដេលី ថា តាម​ការ​សម្គាល់ អតីត​ពលករ​នៅ​ប្រទេស​កូរ៉េខាងត្បូង​រូប​នេះ​ពុំ​មាន​លុយ​ច្រើន​ពី​ការងារ​ជា​កម្មករ​នោះ​ទេ ដូច្នេះ​ចាប់ពី​ឆ្នាំ​២០១២ ដល់​ឆ្នាំ​២០១៤ កម្មករ​រូប​នោះ​តែងតែ​ច្រៀង​លេង​បង្ហាញ​អំពី​សកម្មភាព​កម្សត់​ឯកា សកម្មភាព​របស់​កម្មករ​នៅ​ប្រទេស​កូរ៉េ ដើម្បី​ដាក់ YouTube រក​លុយ​បន្ថែម​ពី​ការងារ​ជា​ពលករ​តែប៉ុណ្ណោះ។

ប្រភព​ដដែល​ឲ្យ​ដឹង​ទៀត​ថា ដោយសារ​តែ​មាន​ទំនាក់ទំនង​ជាមួយ​ភរិយា​បច្ចុប្បន្ន គឺ​អ្នកស្រី ឈឺន ស្រីម៉ាច ជា​ក្មួយស្រី​របស់​លោក ហ៊ីង ប៊ុនហៀង នៅ​ឆ្នាំ​២០១៤ លោក​ត្រូវ​បាន​អតីត​ឯកអគ្គរាជទូត​កម្ពុជា​ប្រចាំ​ប្រទេស​កូរ៉េខាងត្បូង បាន​ទាក់ទង​ធ្វើ​សកម្មភាព​បញ្ចុះបញ្ចូល​ពលករ​ខ្មែរ​នៅ​ទីនោះ​ឲ្យ​ងាក​មក​គាំទ្រ​បក្ស​ប្រជាជន​កម្ពុជា​នៅ​ក្នុង​ប្រទេស​កូរ៉េខាងត្បូង។

ប្រភព​ដដែល​អះអាង​ថា ដោយ​ឧកញ៉ា​រូប​នោះ​ធ្វើ​សកម្មភាព​បាន​ជោគជ័យ ក៏​ត្រូវ​បាន​លោក ហ៊ុន ម៉ានិត កូនប្រុស​របស់​លោក​នាយករដ្ឋមន្ត្រី ហ៊ុន សែន ដែល​ទើប​បាន​ដំឡើង​ឋានៈ​ស្មើ​រដ្ឋមន្ត្រី​បន្ថែម​លើ​តួនាទី​បច្ចុប្បន្ន​ជា​អគ្គនាយក​នៃ​នាយកដ្ឋាន​ស្រាវជ្រាវ​ចារកម្ម​នៃ​ក្រសួង​ការពារ​ជាតិ ដែល​ជា​ម្ចាស់​ភាគហ៊ុន​របស់​ក្រុមហ៊ុន​ល្បែង​ស៊ីសង​នៅ​កណ្តាល​ទីក្រុង​ភ្នំពេញ គឺ​ណាហ្គា​វើលដ៍ ទុកចិត្ត​យក​មក​ប្រើប្រាស់។

ប្រភព​ដដែល​ថា អាច​ដឹង​ថា​លុយ​របស់​ឧកញ៉ា​រូប​នេះ​ជា​លុយ​កខ្វក់ ឬ​យ៉ាង​ណា សូម​ក្រឡេក​មើល​សកម្មភាព​ចាយ​លុយ​តាមរយៈ​សកម្មភាព​សប្បុរសធម៌ គឺ​ឧកញ៉ា​រូប​នេះ​ពុំ​ដែល​មាន​លុយ​តាម​ប្រព័ន្ធ​ធនាគារ​នោះ​ទេ គឺ​តែងតែ​យក​លុយ​សុទ្ធ​ទាំង​ឡានៗ​យក​ទៅ​ប្រគល់​ឲ្យ​ដល់​ដៃ​តែម្តង ដែល​ខុស​ពី​ឧកញ៉ា​ផ្សេងៗ​ទៀត​ដែល​គេ​ធ្វើការ​ផ្ទេរ​លុយ​តាមរយៈ​ធនាគារ។

ប្រភព​ដដែល​បន្ត​ឲ្យ​ដឹង​ទៀត​ថា លុយ​របស់​លោក ឡេង ណាវ៉ាត្រា គឺ​ជា​លុយ​ធ្លាក់​មកពី​លើ​មេឃ​ទាំង​កុងតឺន័រ។ បច្ចុប្បន្ន​នេះ គេ​កំពុងតែ​ផ្ទេរ​លុយ​នោះ​ឲ្យ​ទៅ​ជា​លុយ​ស្រប​ច្បាប់​តាមរយៈ​បង្កើត​គ្រឹះស្ថាន​មីក្រូហិរញ្ញវត្ថុ ឡេង ណាវ៉ាត្រា ឃែភីថល ម.ក មាន​ទីស្នាក់ការ​កណ្ដាល​ស្ថិត​នៅ​លើ​អគារ​លេខ H07B នៃ​មហាវិថី​អូស៊ីអាយស៊ី ភូមិ​គៀនឃ្លាំង សង្កាត់​ជ្រោយចង្វារ ខណ្ឌ​ជ្រោយចង្វារ រាជធានី​ភ្នំពេញ ដែល​មាន​ប្អូនស្រី​ពៅ គឺ​ឧកញ៉ា ឡេង បញ្ចពណ៌ ជា​សមាជិក​ក្រុមប្រឹក្សាភិបាល។

ប្រភព​ដដែល​ថា ទៅ​ថ្ងៃ​ក្រោយ​នៅ​ពេល​ដែល​លុយ​កខ្វក់​របស់​គ្រួសារ​ត្រកូល «ហ៊ុន» ដែល​ឧកញ៉ា​រូប​នេះ​បាន​លាង​ទៅ​ជា​លុយ​ស្រប​ច្បាប់​ហើយ​នោះ គេ​នឹង​ចាប់ផ្តើម​ប្រើប្រាស់​លុយ​តាមរយៈ​ចរន្ត​ធនាគារ​វិញ​ម្តង ព្រោះ​លុយ​នោះ​បាន​ក្លាយ​ទៅ​ជា​លុយ​ស្រប​ច្បាប់​ទៅ​ហើយ។

ស្ថាបនិក​ចលនា​មាតា​ធម្មជាតិ លោក អាឡិចហាន់ដ្រូ ហ្គន់សាឡេស ដេវិតសុន (Alejandro Gonzalez Davidson)

ស្ថាបនិក​ចលនា​មាតា​ធម្មជាតិ លោក អាឡិចហាន់ដ្រូ ហ្គន់សាឡេស ដេវិតសុន (Alejandro Gonzalez Davidson) ធ្លាប់​បាន​ប្រាប់​សារព័ត៌មាន ឌឹ ខេមបូឌា ដេលី ថា មុខជំនួញ​របស់​លោក ឡេង ណាវ៉ាត្រា មាន​ចំណុច​មិន​ប្រក្រតី និង​សង្ស័យ​ជាច្រើន ដោយសារ​ក្រុមហ៊ុន​នេះ​ជា​ក្រុមហ៊ុន​ក្នុង​ស្រុក និង​ធ្វើ​ជំនួញ​តែ​នៅ​ក្នុង​ប្រទេស​កម្ពុជា ប៉ុន្តែ​បែរ​ជា​មាន​លុយ​វាល់​លាន​ដុល្លារ ខណៈ​ពលរដ្ឋ​ខ្មែរ​ជាច្រើន​មាន​ជីវភាព​ក្រីក្រ ដែល​រង​ផល​ប៉ះពាល់​ដោយសារ​វិបត្តិ​ជំងឺ​កូវីដ-១៩ ហើយ​បែរ​ជា​លោក ឡេង ណាវ៉ាត្រា មាន​លទ្ធភាព​ផ្ដល់​លុយ​សុទ្ធ​ដល់​រដ្ឋាភិបាល​រាប់​លាន​ដុល្លារ​ទៅវិញ។

លោក អាឡិចហាន់ដ្រូ ហ្គន់សាឡេស ដេវិតសុន អះអាង​ថា បើ​ប្រទេស​មាន​ប្រព័ន្ធ​ច្បាប់​រឹងមាំ លុយ​បរិច្ចាគ​រាប់​លាន​ដុល្លារ​ជា​សាច់ប្រាក់​បែប​នេះ នឹង​គេច​មិន​ផុត​ពី​ការ​ចោទ​សួរ​ពី​សំណាក់​ស្ថាប័ន​ជំនាញ​របស់​រដ្ឋាភិបាល ឬ​សភា​របស់​ប្រទេស​នោះ​ឡើយ ពីព្រោះ​គេ​បារម្ភ​ថា លុយ​នេះ​ជា​លុយ​កខ្វក់​ដែល​បាន​មកពី​អំពើ​ទុច្ចរិត ហើយ​កំពុង​ត្រូវ​បាន​លាង​សម្អាត​ក្រោម​រូបភាព​ជា​ជំនួយ​មនុស្សធម៌។ លោក អាឡិច ថា​លោក​ជឿជាក់​ថា លោក ឡេង ណាវ៉ាត្រា ប្រាកដជា​កំពុង​ឈរ​ឈ្មោះ​រកស៊ី និង​លាង​លុយ​កខ្វក់​ឱ្យ​គ្រួសារ​លោក ហ៊ុន សែន តែម្តង។

ចំណែក​អនុប្រធាន​វេទិកា​ពលរដ្ឋ លោក ម៉ែន ណាត ប្រាប់​សារព័ត៌មាន The Cambodia Daily ថា ការ​អះអាង​របស់​ឧកញ៉ា ឡេង ណាវ៉ាត្រា គឺ​មិន​មាន​ភាព​ស្រប​គ្នា​ជាមួយ​នឹង​សកម្មភាព​របស់​គាត់ ជាពិសេស​ចំនួន​លុយ​សុទ្ធ​ដែល​គាត់​បាន​ផ្តល់​ទៅ​ឱ្យ​រដ្ឋាភិបាល​លោក ហ៊ុន សែន ក្រោម​ជំនួយ​មនុស្សធម៌​ក្នុង​ទំហំ​ទឹកប្រាក់​រាប់​លាន​ដុល្លារ​អាមេរិក ដែល​មិន​បាន​ឆ្លងកាត់​ធនាគារ គឺជា​រឿង​មិន​ប្រក្រតី​រួច​ទៅ​ហើយ។

លោក​បន្ត​ថា ប្រសិនបើ​រដ្ឋាភិបាល​ដែល​ដឹកនាំ​ដោយ​ឯក​បក្ស​សព្វថ្ងៃ​នេះ​មាន​ភាព​ត្រឹមត្រូវ ពួកគេ​ត្រូវតែ​ចាត់​វិធានការ​ស៊ើបអង្កេត​ភ្លាមៗ​ជុំវិញ​ការ​ចរាចរ​លុយ​សុទ្ធ ដែល​មាន​ចំនួន​ច្រើន​លើសលប់​ដែល​ផ្តល់​ឱ្យ​កម្មវិធី​មនុស្សធម៌​នា​ពេល​កន្លងមក​នោះ ដើម្បី​ឱ្យ​ប្រាកដ​កថា ការ​ចរាចរ​សាច់ប្រាក់​ដោយ​ការ​ប្រកប​អាជីវកម្ម និង​ផ្តល់​ជូន​គម្រោង​សប្បុរសធម៌​ពី​ឧកញ៉ា​វ័យ​ក្មេង​រូប​នេះ​ជា​លុយ​ដែល​ស្រប​ច្បាប់​ត្រឹមត្រូវ​ដែល​មិនមែន​ជា​ការ​លាង​លុយ​កខ្វក់។

អនុប្រធាន​វេទិកា​ពលរដ្ឋ លោក ម៉ែន ណាត។

អនុប្រធាន​វេទិកា​ពលរដ្ឋ​រូប​នេះ​បញ្ជាក់​ថា ការ​ផ្តល់​លុយ​ដ៏​ច្រើន​លើសលប់​ពី​មហាសេដ្ឋី​ណា​មួយ​ដល់​រដ្ឋាភិបាល មិនមែន​សុទ្ធតែ​ជា​រឿង​ល្អ​សម្រាប់​រដ្ឋាភិបាល​នោះ​ទេ ពេល​ខ្លះ​រដ្ឋាភិបាល​ក៏​ត្រូវ​រងគ្រោះ​ពី​ការ​លាង​លុយ​របស់​មហាសេដ្ឋី​ទាំងនោះ​ដែរ ប៉ុន្តែ​សម្រាប់​ប្រទេស​កម្ពុជា​ដែល​មាន​រដ្ឋាភិបាល​ដឹកនាំ​ដោយ​លោក ហ៊ុន សែន គេ​បាន​ដឹង​ឮ​គ្រប់​គ្នា​ទៅ​ហើយ​ថា ក្រុម​ឧកញ៉ា​មហាសេដ្ឋី​ទាំងនោះ​គឺ​សុទ្ធសឹងតែ​ជា​អ្នក​ឈរ​ឈ្មោះ​លាង​លុយ​ឱ្យ​ក្រុម​គ្រួសារ «ហ៊ុន» ទាំងអស់ ដូច្នេះ​ពួកគេ​នឹង​មិន​ត្រូវ​បាន​ស៊ើបអង្កេត​នោះ​ទេ បើ​ទោះបីជា​បាន​ចរាចរ​លុយ​មិន​ប្រក្រតី​ក៏ដោយ។

ទាក់ទិន​នឹង​បញ្ហា​នេះ រដ្ឋមន្ត្រី​ក្រសួង​មហាផ្ទៃ លោក ស ខេង អះអាង​កាលពី​ថ្ងៃទី​៨ ខែ​កញ្ញា ឆ្នាំ​២០២២ ថា មាន​បញ្ហា​ប្រឈម​ពីរ​សម្រាប់​មុខមាត់​កម្ពុជា​សព្វថ្ងៃ​នេះ​ដែល​ត្រូវ​រំដោះ​ខ្លួន​ចេញពី​ការ​ចាត់​ថ្នាក់​កម្ពុជា​ទៅ​ក្នុង​បញ្ជី​ប្រផេះ​នៅ​ក្នុង​វិស័យ​ធនាគារ ដោយ​គេ​ចាត់ទុក​ថា​កម្ពុជា​បាន​ចរាចរ​លុយ​ខ្មៅ និង​ការ​ទម្លាក់​កម្ពុជា​ទៅ​ក្នុង​ចំណាត់ថ្នាក់​ទី​៣ ក្នុង​បញ្ជី​ខ្មៅ​នៃ​ការ​ជួញដូរ​មនុស្ស។

វិស័យ​ដែល​រង​នូវ​ហានិភ័យ​ខ្ពស់​ខាង​អំពើ​លាង​លុយ​កខ្វក់​នៅ​កម្ពុជា​បច្ចុប្បន្ន​នេះ មាន​ដូចជា វិស័យ​ធនាគារ ហិរញ្ញវត្ថុ វិស័យ​សំណង់ វិស័យ​អចលនទ្រព្យ និង​វិស័យ​កាស៊ីណូ ជាដើម។

របាយការណ៍​លាង​លុយ​កាលពី​ខែ​មីនា ឆ្នាំ​២០២២ កន្លងទៅ អង្គការ​ឃ្លាំមើល​អំពើ​លាង​លុយ​កខ្វក់​លើ​ពិភពលោក​ឈ្មោះ ក្រុម​ការងារ​សកម្មភាព​ហិរញ្ញវត្ថុ (FATF) ដែល​មាន​មូលដ្ឋាន​នៅ​ទីក្រុង​ប៉ារីស (Paris) ប្រទេស​បារាំង (France) បាន​បន្ត​ដាក់​កម្ពុជា​ក្នុង «បញ្ជី​ប្រផេះ» នៃ​ក្រុម​ប្រទេស​មាន​ហានិភ័យ​ខាង​អំពើ​លាង​លុយ​កខ្វក់ ដែល​ពិភពលោក​ត្រូវ​បង្កើន​ការ​តាមដាន។

ប្រភព​ដដែល​ឲ្យ​ដឹង​ថា កម្ពុជា​បាន​បរាជ័យ​ជិត ៤​ឆ្នាំ​មក​នេះ​ដោយសារ​មិន​អាច​រំដោះ​ខ្លួន​ចេញពី «បញ្ជី​ប្រផេះ» នៃ​ក្រុម​ប្រទេស​មាន​ហានិភ័យ​ខាង​អំពើ​លាង​លុយ​កខ្វក់។

សហរដ្ឋ​អាមេរិក​កន្លង​មក បាន​ដាក់​មេកង​អង្គរក្ស​របស់​លោក ហ៊ុន សែន គឺ​លោក ហ៊ីង ប៊ុនហៀង ទៅ​ក្នុង​បញ្ជី​ខ្មៅ​ដែល​ត្រូវ​បង្កក​ទ្រព្យសម្បត្តិ​ក្រោម​ច្បាប់ ហ្គ្លូបល ម៉ែកនីតស្គី (GLOBAL MAGNITSKY ACT) កាលពី​ឆ្នាំ​២០១៨។ សហរដ្ឋ​អាមេរិក​រក​ឃើញ​ថា មេ​អង្គរក្ស​រូប​នេះ​បាន​រំលោភ​សិទ្ធិមនុស្ស​ធ្ងន់ធ្ងរ​ក្នុង​រយៈពេល​ជាច្រើន​ឆ្នាំ​ចុង​ក្រោយ​នេះ រួម​ទាំង​អំពើ​ហិង្សា​នៅ​ឆ្នាំ​២០១៣ នៅ​ក្បែរ​វត្តភ្នំ និង​អំពើ​ហិង្សា​វាយដំ​តំណាងរាស្ត្រ​បក្ស​ប្រឆាំង​ពីរ​រូប​នៅ​មុខ​រដ្ឋសភា​នៅ​ឆ្នាំ​២០១៥។

លោក ហ៊ីង ប៊ុនហៀង ក៏​ជាប់​ពាក់ព័ន្ធ​នឹង​អំពើ​ហិង្សា​ក្នុង​ការ​បង្ក្រាប​លើ​ក្រុម​អ្នក​តវ៉ា និង​សកម្មជន​បក្ស​ប្រឆាំង ដូចជា​ការ​បោក​គ្រាប់បែក​លើ​អ្នក​តវ៉ា​អហិង្សា​កាលពី​ឆ្នាំ​១៩៩៧ ដែល​ធ្វើ​ឲ្យ​ស្លាប់ និង​របួស​មនុស្ស​ជាច្រើន​នាក់ រួម​ទាំង​របួស​ជនជាតិ​អាមេរិកាំង​មួយ​រូប​ផង​ដែរ។

រហូត​មក​ទល់​ពេលនេះ យ៉ាងហោចណាស់​មាន​មន្ត្រី​យោធា​ជាន់ខ្ពស់​កម្ពុជា​ចំនួន ០៤​នាក់ រួម​ទាំង​មេ​ឈ្មួញ​ជួញដូរ​ព្រៃឈើ​កម្ពុជា​ម្នាក់ ត្រូវ​បាន​ដាក់​ទៅ​ក្នុង​បញ្ជី​ខ្មៅ​របស់​សហរដ្ឋ​អាមេរិក។

ឧត្តមសេនីយ៍​ផ្កាយ​មាស​បួន និង​ជា​អគ្គនាយក​នៃ​អគ្គនាយកដ្ឋាន​សម្ភារៈ​បច្ចេកទេស ចៅ ភិរុណ និង​ឧត្ដមនាវី​ផ្កាយ​មាស​បួន​ដែល​ជា​មេបញ្ជាការ​កងទ័ព​ជើងទឹក ទៀ វិញ

អ្នក​ទាំងនោះ​រួម​មាន៖

អ្នក​ឧកញ៉ា ទ្រី ភាព ឧត្តមសេនីយ៍ ហ៊ីង ប៊ុនហៀង មេបញ្ជាការ​កង​អង្គរក្ស​របស់​លោក​នាយករដ្ឋមន្ត្រី ហ៊ុន សែន និង​ទេសរដ្ឋមន្ត្រី គន់ គីម អនុប្រធាន​ទី​មួយ​នៃ​គណៈកម្មាធិការ​ជាតិ​គ្រប់គ្រង​គ្រោះមហន្តរាយ។

ការ​ដាក់​ទណ្ឌកម្ម​នេះ រួម​មាន​ការ​បង្កក​ទ្រព្យសម្បត្តិ​ដែល​ពួកគេ​អាច​មាន​នៅ​សហរដ្ឋ​អាមេរិក និង​ការ​រឹតត្បិត​ទិដ្ឋាការ​មិន​ឱ្យ​ពួកគេ និង​សមាជិក​ក្រុម​គ្រួសារ​សាច់ញាតិ​បង្កើត​របស់​ពួកគេ​អាច​ធ្វើ​ដំណើរ​មក​ជាន់​ទឹកដី​សហរដ្ឋ​អាមេរិក​បាន។ ទណ្ឌកម្ម​នេះ​ក៏​ហាមប្រាម​មិន​ឱ្យ​ជនជាតិ​អាមេរិកាំង ឬ​ក្រុមហ៊ុន​អាមេរិកាំង​ទាំងអស់ រកស៊ី ឬ​ធ្វើ​ប្រតិបត្តិការ​សាច់ប្រាក់​ពាក់ព័ន្ធ​ដោយ​ផ្ទាល់ ឬ​ប្រយោល​ជាមួយ​បុគ្គល​កម្ពុជា​ទាំងនោះ​ឡើយ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស