37 C
Phnom Penh

លោក កឹម សុខា អះអាង​ថា​រដ្ឋាភិបាល​អាល្លឺម៉ង់​កំពុង​តាមដាន​សិទ្ធិ​សេរីភាព​របស់​លោក

ដោយ ឌឹ ខេមបូឌា ដេលី

បទវិភាគ

លោក កឹម សុខា ថ្លែង​ថា ប្រធានាធិបតី និង​រដ្ឋាភិបាល​អាល្លឺម៉ង់ បាន​និង​កំពុង​តាមដាន​ករណី​សិទ្ធិ​សេរីភាព​របស់​លោក​អំឡុង​ពេល​បំពេញ​ទស្សនកិច្ច​នៅ​កម្ពុជា។

ការ​លើកឡើង​នេះ បន្ទាប់ពី​ប្រធានាធិបតី​អាល្លឺម៉ង់ លោក Frank-Walter Steinmeier និង​ភរិយា​មក​បំពេញ​ទស្សនកិច្ច​ផ្លូវការ​នៅ​កម្ពុជា​ពី​ថ្ងៃ​ទី​១៣ ដល់​ថ្ងៃទី​១៦ ខែ​កុម្ភៈ។ ក្នុង​ដំណើរ​ទស្សនកិច្ច​នេះ ប្រធានាធិបតី​អាល្លឺម៉ង់ លោក Frank-Walter Steinmeier ក៏​បាន​ចូល​ពិភាក្សា​ការងារ​ជាមួយ​លោក កឹម សុខា ដែរ។

បើ​តាម​លោក កឹម សុខា សរសេរ​លើ​ហ្វេសប៊ុក​ដោយ​ថ្លែង​អំណរគុណ​ប្រធានាធិបតី​លោក Frank-Walter Steinmeier ព្រមទាំង​ភរិយា​របស់​លោក និង​គណៈប្រតិភូ​នៅ​ថ្ងៃទី​១៥ ខែ​កុម្ភៈ នេះ ដែល​បាន​ផ្តល់​តម្លៃ​ដល់​លោក​ចំពោះ​ការ​តស៊ូ​ដោយ​អហិង្សា និង​មាន​ការ​អត់ធ្មត់ ដើម្បី​បុព្វហេតុ​លើកស្ទួយ​សិទ្ធិមនុស្ស និង​លទ្ធិប្រជាធិបតេយ្យ​នៅ​ក្នុង​ប្រទេស​កម្ពុជា។

ក្នុង​ជំនួប​នេះ ប្រធានាធិបតី​លោក Frank-Walter Steinmeier បាន​បញ្ជាក់​ទៅកាន់​លោក កឹម សុខា ថា រូបលោក ព្រមទាំង​រដ្ឋាភិបាល រដ្ឋសភា សហព័ន្ធ​អាល្លឺម៉ង់ ក៏ដូចជា​សហភាព​អឺរ៉ុប និង​សហគមន៍​អន្តរជាតិ បាន​និង​កំពុង​តាមដាន​ករណី​សិទ្ធិ​សេរីភាព​របស់​លោក ស្រប​ពេល​ការ​បោះឆ្នោត​ជាតិ​នៅ​កម្ពុជា​ខិត​ជិត​ចូល​មក​ដល់។

បើ​តាម​លោក កឹម សុខា ឲ្យ​ដឹង​ថា សហព័ន្ធ​អាល្លឺម៉ង់ គឺជា​ប្រទេស​ដ៏​មាន​ឥទ្ធិពល​ទាំង​នយោបាយ និង​សេដ្ឋកិច្ច​ក្នុង​សហភាព​អឺរ៉ុប ក៏ដូចជា​ក្នុង​ពិភពលោក ហើយ​ដែល​ប្រទេស​និង​ប្រជាពលរដ្ឋ​នេះ​ធ្លាប់​ឆ្លងកាត់​សង្គ្រាម​លោក​ដ៏​ធ្ងន់ធ្ងរ បន្ទាប់​មក​ក៏​បាន​វិល​មក​ប្រកាន់ខ្ជាប់​នូវ​របប​ប្រជាធិបតេយ្យ សេរី ពហុបក្ស​ដ៏​រឹងមាំ និង​ដែល​បច្ចុប្បន្ន​នេះ ប្រជាពលរដ្ឋ​អាល្លឺម៉ង់​មាន​សិទ្ធិ​សេរីភាព និង​ជីវភាព​រស់នៅ​ខ្ពង់ខ្ពស់។

ក្រៅពី​ជួប​លោក កឹម សុខា ហើយ ប្រមុខរដ្ឋ​សហព័ន្ធ​អាល្លឺម៉ង់ នឹង​មាន​កិច្ចពិភាក្សា​ជាមួយ​ថ្នាក់​ដឹកនាំ​កំពូលៗ មេដឹកនាំ​នយោបាយ និង​តំណាង​អង្គការ​សង្គម​ស៊ីវិល​មួយ​ចំនួន​ផង​ដែរ។ បន្ទាប់ពី​បញ្ចប់​ទស្សនកិច្ច​នៅ​កម្ពុជា នៅ​ថ្ងៃទី​១៦ លោក និង​លោកស្រី Elke Bundenbender នឹង​បន្ត​ទៅ​កាន់​ប្រទេស​ម៉ាឡេស៊ី សម្រាប់​ដំណើរ​ទស្សនកិច្ច​ផ្លូវ​រដ្ឋ​នៅ​ទីនោះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស