អភិបាលខេត្តព្រះសីហនុ លោក គួច ចំរើន អះអាងថា បទល្មើសបង្ខាំង ការជំរិតទារប្រាក់ ការធ្វើទារុណកម្ម ការជួញដូរមនុស្ស អំពើសញ្ចរកម្ម និងល្បែងស៊ីសងអនឡាញខុសច្បាប់ ដែលកើតឡើងក្នុងខេត្តព្រះសីហនុ កន្លងមក ត្រូវបានកាត់បន្ថយ ព្រោះមិនទទួលបានពាក្យបណ្ដឹងពីជនរងគ្រោះច្រើនដូចមុនទៀតឡើយ។
ថ្លែងក្នុងសន្និសីទសារព័ត៌មាននៅថ្ងៃទី១៥ កុម្ភៈ លោក គួច ចំរើន លើកឡើងថា នៅក្រោយពេលដែលសមត្ថកិច្ចបានរួមគ្នាគ្រប់គ្រង ដឹកនាំ និងចាត់វិធានការនៅពេលចាប់ផ្ដើម ក្នុងមួយថ្ងៃៗបណ្ដឹងចូលផេកក្រឡាហោមរហូតដល់សិប (បណ្ដឹង) ដល់ពេលនេះធូរស្បើយ ឥឡូវនេះអាចឈានដល់ខែដែលអត់មានពាក្យបណ្ដឹងក៏មានដែរ។ លោកថាស្ថានការណ៍ត្រូវបានធូរស្បើយ។
លោកបានបន្ថែមទៀតថា បើទោះជាស្ថានការណ៍ធូរស្បើយ ប៉ុន្តែអាជ្ញាធរមានសមត្ថកិច្ចក្នុងខេត្តនេះនៅតែបន្តសកម្មភាពក្នុងការតាមដាន ស្រាវជ្រាវ ដើម្បីបង្ក្រាបបទល្មើស និងរក្សាសន្តិសុខ និងសណ្ដាប់ធ្នាប់ដល់ពលរដ្ឋក្នុងមូលដ្ឋាន។
លោកបន្តថា ក្រៅពីបទល្មើសជួញដូរមនុស្ស និងបទល្មើសបច្ចេកវិទ្យាជាដើម ប៉ុន្មានឆ្នាំចុងក្រោយនេះ ខេត្តព្រះសីហនុក៏ជួបបញ្ហាសំណង់អគារជាប់គាំងផងដែរ ហើយបញ្ហានេះអូសបន្លាយដល់បច្ចុប្បន្ន។ លោកថា បច្ចុប្បន្នមានសំណង់អគារដែលជាប់គាំងនោះមានចំនួន ១០០៦សំណង់អគារខ្ពស់។
លោកបន្ថែមថា ក្នុងចំណោមសំណង់អគារជាងមួយពាន់នោះ យ៉ាងហោចណាស់មាន ៣៥៩អគារត្រូវបានផ្អាកការសាងសង់ទាំងស្រុង ៨៩អគារកំពុងដំណើរការសាងសង់ឡើងវិញ អគារចំនួន ២៥៥ដែលសាងសង់រួច តែមិនមានសកម្មភាពអាជីវកម្ម និងអគារចំនួន ៣០៣ កំពុងមានសកម្មភាពអាជីវកម្ម។
ជុំវិញបញ្ហានេះ គណៈកម្មាធិការប្រយុទ្ធប្រឆាំងអំពើជួញដូរមនុស្ស បានចេញសេចក្តីប្រកាសព័ត៌មានស្ដីពីលទ្ធផលនៃកិច្ចប្រជុំត្រួតពិនិត្យនៃការអនុវត្តយុទ្ធនាការប្រយុទ្ធប្រឆាំងគ្រប់ទម្រង់នៃអំពើជួញដូរមនុស្ស កាលពីថ្ងៃទី៧ ខែតុលា ឆ្នាំ២០២២ ថា ខ្លួនបានរកឃើញជនបរទេសដែលបានចូលមកបម្រើការនៅកម្ពុជាចំនួន ១០ទីតាំងក្នុងខេត្តព្រះសីហនុ ដែលមានចំនួនជាង ២៧០០នាក់ ក្នុងនោះជនបរទេសដែលមានលិខិតឆ្លងដែនចំនួនជាង ១៩០០នាក់ និងជនបរទេសដែលគ្មានប័ណ្ណការងារចំនួនជាង ១៥០០នាក់ផងដែរ។
គួរបញ្ជាក់ផងដែរថា កាលពីដើមខែកញ្ញា រដ្ឋមន្ត្រីក្រសួងមហាផ្ទៃ លោក ស ខេង បានត្អូញត្អែរថា កម្ពុជាកំពុងធ្លាក់ចូលទៅក្នុងបញ្ហាធំៗពីរ គឺកម្ពុជាត្រូវបានគេដាក់ឱ្យស្ថិតក្នុងបញ្ជីប្រផេះនៃក្រុមប្រទេសដែលមានហានិភ័យខ្ពស់ខាងការលាងលុយកខ្វក់ និងត្រូវគេដាក់ចំណាត់ថ្នាក់ទី៣ ក្នុងបញ្ជីខ្មៅនៃក្រុមប្រទេសជួញដូរមនុស្ស ដែលពិភពលោកបង្កើនការតាមដានសម្រាប់ឆ្នាំ២០២២ នេះផងដែរ ដែលធ្វើឱ្យប៉ះពាល់ដល់មុខមាត់របស់កម្ពុជាយ៉ាងធ្ងន់ធ្ងរ។
ក្រសួងការបរទេសអាមេរិក កាលពីថ្ងៃទី១៩ ខែកក្កដា ក៏បានបញ្ចេញរបាយការណ៍ប្រចាំឆ្នាំ២០២២ ស្ដីពីការជួញដូរមនុស្សរបស់ខ្លួនផងដែរ ដែលទម្លាក់កម្ពុជា វៀតណាម តំបន់ម៉ាកាវ និងប្រទេសផ្សេងទៀតពីបញ្ជីខ្មៅស្ថិតក្រោមការឃ្លាំមើលនៅកម្រិតពីរ (Tier 2 Watch List) ទៅកម្រិត៣ (Tier 3 Watch List) ដែលធ្វើឲ្យកម្ពុជាស្ថិតនៅក្នុងបញ្ជីខ្មៅនៃការជួញដូរមនុស្សធ្ងន់ធ្ងរសព្វថ្ងៃនេះ៕