ប្រធានាធិបតីនៃប្រទេសបេឡារុស ដែលឡើងកាន់អំណាចដោយសារលួចបន្លំសន្លឹកឆ្នោតនៅក្នុងការបោះឆ្នោតឆ្នាំ២០២០ កំពុងស្ថិតក្នុងសភាពស្ងប់ស្ងាត់ ដោយមិនពុះកញ្ជ្រោលចិត្តចង់វាយលុកប្រទេសអ៊ុយក្រែន ទៀតនោះទេ គឺខុសពីរយៈពេល ៦ខែដំបូងនៃសង្គ្រាមរុស្ស៊ីឈ្លានពានអ៊ុយក្រែន។
នៅថ្ងៃទី១៦ ខែកុម្ភៈ នេះ ទីភ្នាក់ងារសារព័ត៌មាន Reuters បានចុះផ្សាយថា ជនផ្ដាច់ការបេឡារុស Alexander Lukashenko បានដូរជំហររបស់ខ្លួនជាច្រើនក្នុងដំណាក់កាលនេះចំពោះសង្គ្រាមដែលចៅហ្វាយរបស់លោក គឺលោក វ៉្លាឌីមៀរ ពូទីន ប្រធានាធិបតីរុស្ស៊ី ដែលបញ្ជាឱ្យលើកទ័ពលុកលុយប្រទេសអ៊ុយក្រែន។
លោក Lukashenko អះអាងថា លោកមិនដែលមានផែនការចង់ជួយកងទ័ពរុស្ស៊ី វាយប្រហារលើទឹកដីអ៊ុយក្រែន នោះទេ។ លោកបញ្ជាក់ថា សម្រាប់រូបលោកផ្ទាល់ ក៏មិនដែលរងសម្ពាធពីលោក ពូទីន ម្ដងណាដែរចំពោះការស្នើឱ្យបេឡារុស ជួយរុស្ស៊ីវាយប្រហារលើទឹកដីអ៊ុយក្រែន។
ការកែប្រែពាក្យសម្ដី ឬជំហររបស់បុរសខ្លាំងបេឡារុស រូបនេះ ដែលលោកខាងលិចចាត់ទុកថាជាអាយ៉ង ឬជាកូនអុករបស់លោក ពូទីន ត្រូវបានអ្នកសង្កេតការណ៍មើលឃើញថា ជនផ្ដាច់ការម្នាក់នេះកំពុងមើលឃើញលោក ពូទីន ឆ្ពោះទៅរកការបាត់បង់អំណាច ហើយកំពុងដើរលើផ្លូវទៅរកការចាញ់សង្គ្រាមនៅលើទឹកដីអ៊ុយក្រែន។
ភាពស្ងប់ស្ងាត់ និងការដូរជំហររបស់លោក Lukashenko នៅពេលនេះ គឺផ្ទុយស្រឡះបើគេរំលឹកជំហររបស់លោកកាលពីរយៈពេល ៦ខែដំបូងនៃសង្គ្រាមរបស់លោក ពូទីន ឈ្លានពានអ៊ុយក្រែន។
គេនៅចាំបានថា នៅពេលទ័ពរុស្ស៊ី ២៥ម៉ឺននាក់វាយលុកចូលប្រទេសអ៊ុយក្រែន ដោយមានអន្តរាគមន៍រថក្រោះ រថពាសដែក ប្រព័ន្ធកាំភ្លើងធំរាប់ពាន់គ្រឿងដោយការបាញ់ស្រោចគ្រាប់មីស៊ីល លោក Lukashenko បានថ្លែងគាំទ្រលោក ពូទីន ដោយចាត់ទុកថាសង្គ្រាមរបស់លោក ពូទីន គឺត្រឹមត្រូវ ព្រោះតែអ៊ុយក្រែននៅក្រោមការដឹកនាំរបស់លោក វូឡូឌីមៀរ ហ្សេឡេនស្គី ជាអ្នកបង្កអសន្តិសុខទៅលើប្រទេសរុស្ស៊ី ដោយសារតែចង់ក្លាយជាសមាជិកយោធាណាតូ ដែលកម្លាំងប្រជែងនឹងរុស្ស៊ី។ មិនតែប៉ុណ្ណោះ លោកព្រមានថា កងទ័ពបេឡារុស នឹងវាយប្រហារលើប្រទេសអ៊ុយក្រែន ក្នុងភាពជាសម្ព័ន្ធភាពនឹងរុស្ស៊ី។
ក្នុងស្ថានភាពសង្គ្រាមដែលរុស្ស៊ីមានប្រៀបជាងអ៊ុយក្រែន បុរសខ្លាំងបេឡារុស តែងតែទៅជួបលោក ពូទីន ដោយមានកិច្ចព្រមព្រៀងជួយរុស្ស៊ីក្នុងករណីចាំបាច់។ ក្នុងជំនួបនោះ បេឡារុសបានយល់ព្រមឱ្យរុស្ស៊ីបន្តវត្តមានកងទ័ព និងបន្ថែមទ័ពរុស្ស៊ីនៅលើទឹកដីបេឡារុស ថែមទៀត។ លើសពីនេះទៅទៀត លោកយល់ព្រមឱ្យលោក ពូទីន ដាក់ពង្រាយក្បាលគ្រាប់នុយក្លេអ៊ែរ ទៅលើទឹកដីប្រទេសបេឡារុស ទៀតផង រហូតមានការធ្វើសមយុទ្ធទ័ពរុស្ស៊ី និងទ័ពបេឡារុស នៅតាមព្រំដែនបេឡារុស ជាប់នឹងអ៊ុយក្រែន ថែមទៀត។
ចារកម្មរបស់អ៊ុយក្រែន បានឱ្យដឹងថា លោក Lukashenko បានសន្យាបញ្ជូនទ័ពជួយទ័ពរុស្ស៊ី ដោយប្រើទង់ជាតិរុស្ស៊ី នៅពេលដែលរុស្ស៊ីបើកការវាយប្រហារចេញពីព្រំដែនបេឡារុស ចូលទៅទឹកដីអ៊ុយក្រែន។
គេនៅចាំបានទៀតថា នៅពេលដែលមហាសន្និបាតអង្គការសហប្រជាជាតិថ្កោលទោសរុស្ស៊ី និងទាមទារឲ្យរុស្ស៊ីដកទ័ពចេញពីអ៊ុយក្រែន គឺបេឡារុស ជាប្រទេសមួយក្នុងចំណោមជិត ១០ប្រទេសទៀតដែលបោះឆ្នោតជំទាស់ទៅនឹងដំណោះស្រាយរបស់មហាសន្និបាតរបស់អង្គការសហប្រជាជាតិ ហើយប្រទេសនេះតែងតែប្រកាន់ជំហរបែបនេះគ្រប់ដំណាក់កាលនៃវិធានការរបស់ស្ថាប័នពិភពលោកមួយនេះ។
តែដល់ដំណាក់កាលនេះ ដែលរុស្ស៊ីអាចនឹងចាញ់សង្គ្រាមនៅលើទឹកដីអ៊ុយក្រែន ខណៈក្រុមណាតូសម្រុកបញ្ជូនសព្វាវុធធុនធ្ងន់ទៅឱ្យអ៊ុយក្រែន ហើយក៏ចំពេលដែលរុស្ស៊ី មិនអាចពង្រីកទឹកដីបានទៀត គេសង្កេតឃើញមេដឹកនាំផ្ដាច់ការបេឡារុសម្នាក់នេះផ្លាស់ប្ដូរជំហរមិនបង្កជម្លោះនឹងអ៊ុយក្រែន ដូចមុនទៀតនោះទេ។
តើកត្តាអ្វីខ្លះនៅពីក្រោយលោក Lukashenko ដែលដូរជំហរបែបនេះ?
ទីមួយ គេអាចគិតថាមេដឹកនាំបេឡារុសរូបនេះបារម្ភអំពីលោក ពូទីន អស់អំណាចដោយសារចាញ់សង្គ្រាមនៅលើទឹកដីអ៊ុយក្រែន។
ទី២ លោកអាចគិតថាពេលវេលាដែលលោក ពូទីន អស់អំណាច គឺមានច្រើនដូចជាផ្ទៃក្នុងរុស្ស៊ីបែកបាក់ និងអាចមានការធ្វើរដ្ឋប្រហារទម្លាក់លោក ពូទីន ដោយសារតែសេដ្ឋកិច្ចរបស់រុស្ស៊ីធ្លាក់ចុះធ្ងន់ធ្ងរ ហើយការងើបបះបោររបស់រុស្ស៊ី ក៏ផ្ទុះឡើងទន្ទឹមនឹងដំណើរទៅរកការចាញ់សង្គ្រាមនៅលើទឹកដីអ៊ុយក្រែន ក៏អាចនឹងកើតមាននៅពេលខាងមុខនេះ។
ទី៣ គេអាចនិយាយបានទៀតថា លោក Lukashenko ដែលប្ដូរជំហរមិនលើកទ័ពបេឡារុស ជួយរុស្ស៊ី វាយប្រហារលើអ៊ុយក្រែន ព្រោះតែលោកបារម្ភអំពីប្រទេសសមាជិកណាតូ ដែលនៅជុំវិញបេឡារុស អាចបង្កឱ្យមានសង្គ្រាមព្រំដែនជាមួយនឹងប្រទេសរបស់លោក ហើយចង់មិនចង់ សង្គ្រាមណាតូ និងបេឡារុសអាចផ្ទុះឡើង ហើយទីបំផុត របបរបស់លោកអាចនឹងគ្រោះថ្នាក់នាំឲ្យក្រុមប្រឆាំងឡើងកាន់អំណាច។
ទី៤ លោកគិតថាអ៊ុយក្រែនមានលទ្ធភាពវាយខ្ទប់កងទ័ពរុស្ស៊ី ដោយវាយរុលចូលទឹកដីបេឡារុស ទៀតផង ក្រោមកិច្ចអន្តរាគមន៍របស់ក្រុមណាតូ។
សរុបទៅ កត្តាទាំងអស់នេះអាចនាំឲ្យបុរសខ្លាំងនៅបេឡារុសម្នាក់នេះចាប់ផ្ដើមដោះដូរជំហររបស់ខ្លួនក្នុងភាពជាអាយ៉ងរបស់មេដឹកនាំរុស្ស៊ី លោក ពូទីន ចំពោះសង្គ្រាមនៅលើទឹកដីអ៊ុយក្រែន។ បើលោកធ្លាក់ក្នុងការទាញរបស់រុស្ស៊ី ក្នុងសង្គ្រាមអ៊ុយក្រែន ក៏នាំឱ្យអំណាចរបស់លោកផុយស្រួយ ហើយក្រុមបក្សពួករបស់លោកទាំងអស់ ក៏នឹងគ្រោះថ្នាក់ជាមួយនឹងការអស់អំណាចរបស់លោកផងដែរ៕