33 C
Phnom Penh

លោក ហ៊ុន ម៉ាណែត ថា​កេរដំណែល​ឪពុក​លោក​បន្សល់​ទុក​គឺ​សុខ​សន្តិភាព​និង​ការ​អភិវឌ្ឍ

ដោយ ឌឹ ខេមបូឌា ដេលី

បទវិភាគ

កូនប្រុស​ច្បង​មេដឹកនាំ​គណបក្ស​ប្រជាជន​កម្ពុជា លោក ហ៊ុន សែន គឺ​លោក ហ៊ុន ម៉ាណែត លើកឡើង​ថា កេរដំណែល​ក្រោម​ការ​ដឹកនាំ​របស់​ឪពុក​លោក គឺ​លោក ហ៊ុន សែន ក្រោយ​ដឹកនាំ​ប្រទេស​ជាង ៤០​ឆ្នាំ បាន​បន្សល់​ឱ្យ​កម្ពុជា​នូវ​សមិទ្ធផល​ដ៏​ធំធេង គឺ​សុខ​សន្តិភាព និង​ការ​អភិវឌ្ឍ និង​ការ​រីកចម្រើន​របស់​ប្រជាពលរដ្ឋ​ខ្មែរ​ទូទាំង​ប្រទេស។

អនាគត​បេក្ខភាព​នាយករដ្ឋមន្ត្រី​របស់​គណបក្ស​ប្រជាជន​កម្ពុជា​ដែល​កំពុង​ចម្រូងចម្រាស លោក ហ៊ុន ម៉ាណែត បាន​បញ្ចេញ​វីដេអូ​ឃ្លីប​មួយ​កាលពី​ថ្ងៃទី​១៦ កុម្ភៈ ថា កម្ពុជា​ដែល​ក្រោម​ការ​ដឹកនាំ​របស់​លោក ហ៊ុន សែន អស់​រយៈពេល ៤៣​ឆ្នាំ ទើប​មាន​ការ​រីកចម្រើន​ដូច​សព្វថ្ងៃ​នេះ ដូច្នេះ​ឪពុក​របស់​លោក​នឹង​មិន​បំផ្លាញ​ចោល​នូវ​សមិទ្ធផល​ដែល​ជា​ស្នាដៃ​របស់​ខ្លួន​ដែល​ខិតខំ​កសាង​កន្លងមក​នោះ​ទេ។

កូនប្រុស​បង្កើត​មេដឹកនាំ​ក្រាញ​អំណាច​បំផុត​នៅ​កម្ពុជា លោក ហ៊ុន ម៉ាណែត លើកឡើង​ថា ការ​អភិវឌ្ឍ និង​ការ​រីកចម្រើន​នៅ​ទីក្រុង​ភ្នំពេញ ដូចជា​តំបន់​កោះពេជ្រ និង​ទីតាំង​ផ្សេង​ទៀត សុទ្ធសឹងតែ​ជា​ស្នាដៃ​នៃ​ការ​ដឹកនាំ​របស់​លោក ហ៊ុន សែន ទាំងអស់។

លោក​បន្ថែម​ថា កាល​ពី​មុន​មិន​មាន​ការ​អភិវឌ្ឍ​អ្វី​នោះ​ទេ​នៅ​តំបន់​ទាំងនេះ ប៉ុន្តែ​បច្ចុប្បន្ន​មាន​ការ​អភិវឌ្ឍ មាន​អគារ​ទំនើប មាន​ផ្សារ​ទំនើប​ជាច្រើន ដែល​ការ​អភិវឌ្ឍ​ទាំងនេះ​បាន​ផ្តល់​ការងារ​ជូន​ប្រជាពលរដ្ឋ​ខ្មែរ​ច្រើន​ណាស់។

កូនប្រុស​ច្បង​បុរស​ខ្លាំង​ខាង​គំរាម​សម្លាប់ លោក ហ៊ុន ម៉ាណែត បញ្ជាក់​ថា ដើម្បី​កើតមាន​សមិទ្ធផល​ទាំងនេះ លោក ហ៊ុន សែន រួម​ជាមួយ​ថ្នាក់​ដឹកនាំ​របស់​គណបក្ស​ប្រជាជន​កម្ពុជា​គ្រប់​ជាន់​ថ្នាក់ បាន​លះបង់​កម្លាំង​កាយ​ចិត្ត​បំពេញ​ភារកិច្ច​ជួយ​កសាង​ជាតិ​គ្រប់​កាលៈទេសៈ​ទម្រាំ​មាន​ថ្ងៃ​នេះ។

ការ​អះអាង​នេះ ធ្វើឡើង​ផ្ទុយ​ស្រឡះ​ពី​ការ​មើល​ឃើញ​របស់​មជ្ឈដ្ឋាន​ទូទៅ​ដែល​រិះគន់​ថា កម្ពុជា​ដែល​ក្រោម​ការ​ដឹកនាំ​របស់​លោក ហ៊ុន សែន ជាង ៤០​ឆ្នាំ​មក​នេះ មាន​តែ​បែកបាក់​ជាតិ បាត់បង់​ទឹកដី ជំពាក់​បរទេស រំលោភ​ច្បាប់ និង​បង្កើត​នូវ​អំពើ​និទ្ទណ្ឌភាព ជាដើម។

អ្នកវិភាគ​ឯករាជ្យ និង​ជា​ប្រធាន​វេទិកា​ពលរដ្ឋ លោក គឹម សុខ ប្រាប់​សារព័ត៌មាន The Cambodia Daily នៅ​ថ្ងៃទី​១៧ កុម្ភៈ នេះ​ថា បើ​មើល​តែ​មួយ​ជ្រុង ហើយ​និង​មាន​ចេតនា​ភូត​កុហក​ផង​នោះ លោក ហ៊ុន ម៉ាណែត អាច​និយាយ​បាន​ថា សមិទ្ធផល​នានា​នៅ​កម្ពុជា​សព្វថ្ងៃ​នេះ​ជា​ស្នាដៃ​របស់​លោក ហ៊ុន សែន ប៉ុន្តែ​សំណួរ​មួយ​ដែល​គេ​ត្រូវតែ​សួរ​ថា ហេតុ​អ្វី​នៅ​មុន​កិច្ចព្រមព្រៀង​សន្តិភាព​ទីក្រុង​ប៉ារីស​ឆ្នាំ​១៩៩១ លោក ហ៊ុន សែន ដែល​បាន​ដឹកនាំ​កម្ពុជា​តាំង​ឆ្នាំ​១៩៨៥ ក្រោយ​វៀតណាម​លើក​បន្តុប ម្តេច​ក៏​មិន​កសាង​ប្រទេស​កម្ពុជា​ឲ្យ​ដូច​សព្វថ្ងៃ​នេះ។

លោក គឹម សុខ លើកឡើង​ថា ក្រោយ​កិច្ចព្រមព្រៀង​សន្តិភាព​ទីក្រុង​ប៉ារីស​ឆ្នាំ​១៩៩១ កម្ពុជា​បាន​ទទួល​ការ​ជួយ​ជ្រោមជ្រែង​ច្រើន​ណាស់​ពី​សហគមន៍​អន្តរជាតិ​ក្រោម​ស្មារតី និង​កិច្ចព្រមព្រៀង​នៃ​កិច្ចសន្យា​អន្តរជាតិ​មួយ​នេះ ក្នុង​នោះ​មាន​ទាំង​ជំនួយ​ឥត​សំណង កម្ចី​មាន​ការប្រាក់​ទាប ជំនួយ​អនុគ្រោះ​សេដ្ឋកិច្ច​ពាណិជ្ជកម្ម ដូចជា GSP របស់​សហរដ្ឋ​អាមេរិក និង EBA របស់​សហភាព​អឺរ៉ុប ជាដើម។

លោក​បន្ថែម​ថា ជំនួយ​មនុស្សធម៌​ដ៏​ធំធេង​បែប​នេះ កម្ពុជា​មិន​ដែល​បាន​ទទួល​ទេ​នៅ​មុន​កិច្ចព្រមព្រៀង​សន្តិភាព​ទីក្រុង​ប៉ារីស ដូច្នេះ​លោក ហ៊ុន ម៉ាណែត គួរ​សិក្សា​ពី​ប្រវត្តិសាស្ត្រ​ឡើងវិញ។

អ្នកវិភាគ​ឯករាជ្យ​រូប​នេះ​បញ្ជាក់​ថា ការពិត​លោក ហ៊ុន សែន ទៅវិញ​ទេ​ដែល​ជា​មេរោគ​ធ្វើ​ឲ្យ​រាំង​ស្ទះ​ដល់​ដំណើរការ​នៃ​ការ​អភិវឌ្ឍ​របស់​កម្ពុជា ព្រោះតែ​ការ​ដឹកនាំ​តាម​បែប​រដ្ឋប្រហារ​អចិន្ត្រៃយ៍​រំលោភ​ច្បាប់​គ្រប់​បែប​យ៉ាង ទើប​ត្រូវ​សហគមន៍​អន្តរជាតិ​ដក​សេចក្តី​ទុកចិត្ត​កាត់បន្ថយ​ជំនួយ​មនុស្សធម៌​យ៉ាង​ច្រើន​សន្ធឹកសន្ធាប់​ពី​កម្ពុជា​ត្រឡប់​ទៅវិញ។

លោក គឹម សុខ គូស​បញ្ជាក់​ថា បើ​មិន​មាន​មេដឹកនាំ​ដូច​លោក ហ៊ុន សែន កម្ពុជា​នឹង​មាន​ការ​រីកចម្រើន​ដូច​ប្រទេស​ម៉ាឡេស៊ី ក្នុង​ពេល​បច្ចុប្បន្ន​នេះ បើ​គិត​ចាប់តាំងពី​ក្រោយ​ការ​បោះឆ្នោត​ឆ្នាំ​១៩៩៣ មក។ តែ​ផ្ទុយទៅវិញ កម្ពុជា​បាន​ធ្លាក់​ដុនដាប​ទៅ​ជា​ប្រទេស​ក្រីក្រ ដោយសារតែ​ការ​ដឹកនាំ​មិន​ត្រឹមត្រូវ​របស់​លោក ហ៊ុន សែន អស់​រយៈពេល​ជាង ៤០​ឆ្នាំ​មក​នេះ។

កម្ពុជា​ដែល​ក្រោម​ការ​ដឹកនាំ​របស់​លោក ហ៊ុន សែន ក្រោយ​វៀតណាម​លើក​បន្តុប​ធ្វើ​ជា​នាយករដ្ឋមន្ត្រី​កាលពី​ឆ្នាំ​១៩៨៥ ត្រូវ​គេ​មើល​ឃើញ​ថា ប្រទេស​ដ៏​កម្សត់​នេះ​បាន​ធ្លាក់​ទៅ​ក្នុង​គ្រោះថ្នាក់​ដែល​អាច​នឹង​បាត់បង់​ប្រទេស​ទាំងមូល​នៅ​ថ្ងៃ​អនាគត ដូចជា៖

  • ការ​ចុះហត្ថលេខា​ឱ្យ​ជនជាតិ​វៀតណាម​ឱ្យ​ទៅ​រស់នៅ​លើ​ទឹកដី​កម្ពុជា​ដោយ​ខុស​ច្បាប់
  • ការ​ចុះហត្ថលេខា​កំណត់​ព្រំដែន​ទឹក និង​គោក​ជាមួយ​វៀតណាម​ដោយ​ខុស​ច្បាប់
  • ការ​កែប្រែ​ផែនទី​ដោយ​ខុស​ច្បាប់
  • និង​ការ​កាត់​កោះត្រល់ រួម​ទាំង​ចង្កោម​កោះ​នានា​ឱ្យ​វៀតណាម​ដោយ​ខុស​ច្បាប់ ជាដើម៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស