នៅថ្ងៃចន្ទ ទី២០ កុម្ភៈ នេះ ប្រធានាធិបតីអាមេរិក លោក ចូ បៃដិន បានធ្វើដំណើរទៅដល់ទីក្រុងគៀវ ដោយពុំមានការប្រកាសឱ្យដឹងជាមុន។ ទស្សនកិច្ចរបស់មេដឹកនាំអាមេរិកវ័យ ៨០ឆ្នាំរូបនេះ ធ្វើឡើងនៅមុនគម្រប់ខួប ១ឆ្នាំនៃសង្គ្រាមឈ្លានពានរបស់រុស្ស៊ីនៅអ៊ុយក្រែន។
តាមសេចក្ដីប្រកាសព័ត៌មានរបស់សេតវិមាន បានឱ្យដឹងថា នៅទីក្រុងគៀវ លោក បៃដិន បានជួបគ្នាជាមួយប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី។ ជាមួយគ្នានេះ លោក ហ្សេឡេនស្គី បានបង្ហោះរូបថតរបស់លោកដែលចាប់ដៃលោក បៃដិន ខណៈលោកបានចេញពីវិមានប្រធានាធិបតីទៅទទួលលោក បៃដិន។
នៅក្នុងព្រឹត្តិការណ៍ជាប្រវត្តិសាស្ត្រនេះ លោក ហ្សេលេនស្គី មានទឹកមុខរីករាយ មើលទៅដូចជាការរំភើបយ៉ាងខ្លាំងដោយទទួលបានការមកធ្វើទស្សនកិច្ចរបស់មេដឹកនាំអាមេរិក ដែលជាមហាអំណាចយោធាទី១ នៃពិភពលោក មកជួបលោកផ្ទាល់នៅរដ្ឋធានីគៀវ ជាដែនដីកំពុងធ្លាក់ក្នុងភ្លក់ភ្លើងសង្គ្រាមឈ្លានពានដ៏សហាវពីសំណាក់មហាអំណាចយោធាលំដាប់ទី២ ពិភពលោក គឺប្រទេសរុស្ស៊ី។
ដំណើរទស្សនកិច្ចរបស់លោក បៃដិន គឺជាសញ្ញាដ៏សំខាន់បំផុតបង្ហាញពីការគាំទ្ររបស់រដ្ឋការអាមេរិកចំពោះប្រជាជនអ៊ុយក្រែន។
នេះជាទស្សនកិច្ចលើកដំបូងរបស់លោក បៃដិន ទៅកាន់ទីក្រុងគៀវ គិតចាប់តាំងពីសង្គ្រាមផ្ទុះឡើងកាលពីថ្ងៃទី២៤ ខែកុម្ភៈ ឆ្នាំ២០២២ ដែលលោក វ៉្លាឌីមៀរ ពូទីន ប្រធានាធិបតីរុស្ស៊ីបញ្ជាឱ្យលើកទ័ព ២៥ម៉ឺននាក់វាយលុកប្រទេសអ៊ុយក្រែន។
សេចក្ដីប្រកាសព័ត៌មានសេតវិមានបានបញ្ជាក់ថា លោក បៃដិន ពុំមានផែនការជួបជាមួយលោក ហ្សេឡេនស្គី ឬធ្វើដំណើរទៅកាន់ទីក្រុងគៀវ ទេ ប៉ុន្តែក្រោយមានដំណឹងនៃវត្តមានរបស់លោក បៃដិន នៅទីក្រុងគៀវ នៅថ្ងៃចន្ទនេះ សេតវិមានក៏បានចេញសេចក្តីថ្លែងការណ៍ផ្លូវការដោយប្រកាសថា លោក បៃដិន បានទៅដល់រដ្ឋធានីគៀវ។
កន្លងមកនេះ សេតវិមានបានប្រកាសថា លោក បៃដិន នឹងធ្វើទស្សនកិច្ចទៅកាន់ប្រទេសប៉ូឡូញ ដែលនៅជាប់អ៊ុយក្រែន ក្នុងថ្ងៃអង្គារសប្តាហ៍នេះ ដោយបញ្ជាក់ថាជាទស្សនកិច្ចក្នុងឱកាសខួប ១ឆ្នាំបន្ទាប់ពីរុស្ស៊ី បានលើកទ័ពចូលឈ្លានពានអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២។
កាលពីខែធ្នូ ឆ្នាំ២០២២ លោក ហ្សេឡេនស្គី បានបំពេញទស្សនកិច្ចចេញពីប្រទេសជាលើកដំបូងទៅកាន់រដ្ឋធានីវ៉ាស៊ីនតោន និងបានជួបលោក បៃដិន នៅសេតវិមាន។
បើតាមទីភ្នាក់ងារសារព័ត៌មាន AFP បានរាយការណ៍មកថា ស៊ីរ៉ែនបានបន្លឺសំឡេងពេញរដ្ឋធានីអ៊ុយក្រែន ខណៈដែលលោក បៃដិន បានទៅបំពេញទស្សនកិច្ចនៅទីក្រុងគៀវ ដើម្បីពិភាក្សាជាមួយប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី ប៉ុន្តែមិនមានរបាយការណ៍អំពីការបាញ់មីស៊ីល ឬការវាយប្រហារតាមផ្លូវអាកាសរបស់រុស្ស៊ីមកលើទីក្រុងគៀវ នៅឡើយទេ។
ក្នុងដំណើរទស្សនកិច្ចនេះ លោក ចូ បៃដិន បានប្រកាសផ្តល់ជំនួយយោធាថ្មីដល់អ៊ុយក្រែន ជាមួយនឹងការបង្ហាញពីសាមគ្គីភាពជាមួយប្រជាជនអ៊ុយក្រែន។
លោក បៃដិន បាននិយាយថា ទីក្រុងវ៉ាស៊ីនតោននឹងឈរជាមួយអ៊ុយក្រែនគ្រប់ស្ថានការណ៍ទាំងអស់។ រហូតមកដល់ពេលនេះ សហរដ្ឋអាមេរិកគឺជាអ្នកផ្តល់ជំនួយយោធាដ៏ធំបំផុតដល់អ៊ុយក្រែន ការពារខ្លួនប្រឆាំងនឹងការឈ្លានពានរបស់រុស្ស៊ី។
នាឱកាសនោះ លោក បៃដិន សន្យាថា ទីក្រុងវ៉ាស៊ីនតោននឹងផ្តល់កញ្ចប់ជំនួយយោធាថ្មីមួយទៀតដែលមានតម្លៃ ៥០០លានដុល្លារដល់ទីក្រុងគៀវ ដែលនឹងត្រូវប្រកាសនៅថ្ងៃអង្គារសប្តាហ៍នេះ ដោយរួមបញ្ចូលទាំងគ្រាប់រំសេវបន្ថែមទៀតសម្រាប់ប្រព័ន្ធមីស៊ីលកាំភ្លើងធំ។
យ៉ាងណា ទស្សនកិច្ចរបស់លោក បៃដិន នៅរដ្ឋធានីគៀវ ជាទីតាំងនៃភ្នក់ភ្លើងសង្គ្រាមរុស្ស៊ីឈ្លានពាន គឺមិនមែនជាលើកទី១ នៃមេដឹកនាំក្រុមបស្ចិមប្រទេសនោះទេ។
ជាបន្តបន្ទាប់ ប្រធានាធិបតី នាយករដ្ឋមន្ត្រីនៃបណ្ដាប្រទេសនៅអឺរ៉ុប និងប្រទេសជាសមាជិកណាតូ តែងតែទៅទស្សនកិច្ចនៅរដ្ឋធានីគៀវ ដោយបានជួបផ្ទាល់នឹងលោក ហ្សេឡេនស្គី មេដឹកនាំអ៊ុយក្រែន ជាវីរជនសង្គ្រាមរបស់ប្រជាជនអ៊ុយក្រែន។
ចំពោះលោក បៃដិន ត្រូវបានអ្នកសង្កេតការណ៍មើលឃើញថាជាមេដឹកនាំមហាអំណាចដ៏កំពូលបំផុតរបស់ពិភពលោក ដែលសម្រេចជាន់ទឹកដីអ៊ុយក្រែន ជាសមរភូមិកំពុងក្ដៅគគុកនៃការវាយប្រហាររបស់កងទ័ពរុស្ស៊ី។ លោក បៃដិន តែងតែប្រកាសថា ពិភពលោកមិនត្រូវឲ្យអ៊ុយក្រែនចាញ់សង្គ្រាមឈ្លានពានរបស់រុស្ស៊ីនោះទេ៕