35 C
Phnom Penh

ក្រុមប្រឹក្សា​ធម្មនុញ្ញ​និង​មន្ត្រី​រដ្ឋាភិបាល​ថ្កោលទោស​លោក សម រង្ស៊ី ចំពោះ​ការ​ប្រមាថ​ព្រះមហាក្សត្រ

ដោយ ឌឹ ខេមបូឌា ដេលី

បទវិភាគ

ក្រុមប្រឹក្សា​ធម្មនុញ្ញ​កម្ពុជា និង​មន្ត្រី​រដ្ឋាភិបាល​គ្រប់​ជាន់​ថ្នាក់ បាន​ចេញ​មុខ​ថ្កោលទោស​អតីត​មេដឹកនាំ​បក្ស​ប្រឆាំង លោក សម រង្ស៊ី ពី​បទ​ប្រមាថ​អង្គ​ព្រះមហាក្សត្រ នរោត្តម សីហមុនី ម្តង​ហើយ​ម្តង​ទៀត។

ក្រុមប្រឹក្សា​ធម្មនុញ្ញ​កម្ពុជា​ចេញ​សេចក្តី​ថ្លែងការណ៍​ថ្កោលទោស​អតីត​មេដឹកនាំ​បក្ស​ប្រឆាំង លោក សម រង្ស៊ី នៅ​ថ្ងៃទី​២១ ខែ​កុម្ភៈ ឆ្នាំ​២០២៣ នេះ​ថា ព្រះមហាក្សត្រ​ខ្មែរ​ជា​ព្រះ​និមិត្តរូប​នៃ​ឯកភាព​ជាតិ និង​និរន្តរភាព​ជាតិ ហើយ​ព្រះអង្គ​តែងតែ​គោរព​ប្រតិបត្តិ​យ៉ាង​ខ្ជាប់ខ្ជួន ត្រឹមត្រូវ​តាម​ស្មារតី​នៃ​រដ្ឋធម្មនុញ្ញ និង​ច្បាប់​ទាំងឡាយ​របស់​កម្ពុជា។ ជាង​នេះ​ទៅ​ទៀត ព្រះអង្គ​តែង​គង់​ប្រថាប់​ជា​ម្លប់​ដ៏​ត្រជាក់​នៃ​ប្រជាជាតិ និង​ប្រជារាស្ត្រ​ខ្មែរ​ផង​ដែរ។

ការ​ចេញ​សេចក្តី​ថ្លែងការណ៍​ថ្កោលទោស​នេះ ធ្វើឡើង​បន្ទាប់ពី​លោក សម រង្ស៊ី បាន​ចោទ​ជា​សំណួរ​ជាច្រើន​ទៅ​កាន់​ព្រះមហាក្សត្រ​ខ្មែរ​កាលពី​ពេល​ថ្មីៗ​នេះ។

នៅ​ថ្ងៃទី​២១ ខែ​កុម្ភៈ ឆ្នាំ​២០២៣ នេះ ក្រសួង​ស្ថាប័ន​ជាច្រើន​របស់​រដ្ឋាភិបាល​កម្ពុជា បាន​នាំគ្នា​ចេញ​លិខិត​ថ្កោលទោស​អតីត​មេដឹកនាំ​បក្ស​ប្រឆាំង លោក សម រង្ស៊ី បន្ទាប់ពី​អតីត​មេដឹកនាំ​បក្ស​ប្រឆាំង​រូប​នេះ​ចោទ​សួរ​សំណួរ​ទៅ​កាន់​ព្រះមហាក្សត្រ ដែល​មាន​ខ្លឹមសារ​ធ្វើ​ឱ្យ​ប៉ះពាល់​ដល់​ព្រះ​កិត្តិយស​របស់​ព្រះអង្គ​កាលពី​ថ្ងៃ​អាទិត្យ​ចុង​សប្តាហ៍​កន្លងទៅ​នេះ។

លោក សម រង្ស៊ី បាន​ចោទ​សួរ​ថា៖

  • តើ​ហេតុ​អ្វី​បាន​ជា​ព្រះមហាក្សត្រ​ខ្មែរ​សម្តេច​ព្រះបាទ​នរោត្តម សីហមុនី យល់ព្រម​ធ្វើ​តាម​បញ្ជា​របស់​គណបក្ស​ប្រជាជន​កម្ពុជា ដែល​ដឹកនាំ​ដោយ​លោក ហ៊ុន សែន ដោយ បិទ​ព្រះ​នេត្រ​មិន​ទទួលស្គាល់​ការពិត ហើយ​មិន​ខ្វល់​ព្រះទ័យ​ពី​ទុក្ខសោក​របស់​ប្រជារាស្ត្រ?
  • តើ​ព្រះអង្គ​ជ្រាប​ទេ​ថា គណៈកម្មាធិការ​ជាតិ​រៀបចំ​ការ​បោះឆ្នោត (គ.ជ.ប) មាន​សមាសភាព​តាម​ការ​ចាត់ចែង​របស់​បក្ស​កាន់​អំណាច​សព្វថ្ងៃ ហើយ​ធ្វើ​តាម​តែ​បញ្ជា​របស់​គណបក្ស​នេះ​ក្នុង​ការ​ជួយ​លួច​បន្លំ​សន្លឹកឆ្នោត​តាម​តែ​ទំនើងចិត្ត​រហូត​មក​នោះ?
  • តើ​ព្រះអង្គ​ជ្រាប​ទេ​ថា ការ​បោះឆ្នោត​មុនៗ​រហូត​មក​ដល់​ថ្ងៃ​នេះ បាន​ប្រព្រឹត្ត​ទៅ​ដោយ​មាន​ការ​លួច​បន្លំ​សន្លឹកឆ្នោត ដែល​វា​មិន​ឆ្លុះបញ្ចាំង​ពី​ឆន្ទៈ​ប្រជារាស្ត្រ​ខ្មែរ​ដែល​ចង់​បាន​ការ​ផ្លាស់ប្ដូរ​នោះ?

មាត្រា​៧ នៃ​រដ្ឋធម្មនុញ្ញ​កម្ពុជា​បាន​ចែង​យ៉ាង​ច្បាស់​ថា ព្រះមហាក្សត្រ​ខ្មែរ​មិន​អាច​នរណា​រំលោភ​បំពាន​បាន​ឡើយ។

ក្រុម​អ្នក​សង្កេតការណ៍​លើកឡើង​ថា បើ​លោក សម រង្ស៊ី នៅ​មាន​គំនិត​ថា​ខ្លួនឯង​ជា​អ្នក​ប្រជាធិបតេយ្យ​ដឹកនាំ​នយោបាយ​ដើម្បី​ជាតិ ដើម្បី​ទឹកដី​បន្ត​ទៀត​នោះ គាត់​មិន​គួរ​ធ្វើ​សកម្មភាព​នយោបាយ​ដោយ​ការ​រំលោភ​បំពាន​ច្បាប់ និង​រំលោភ​ព្រះមហាក្សត្រ​ខ្មែរ​ដូច​លោក ហ៊ុន សែន ធ្លាប់​ធ្វើ​នោះ​ទេ ហើយ​ថា​លោក សម រង្ស៊ី គួរតែ​ធ្វើ​ជា​គំរូ​ល្អ​សម្រាប់​ពលរដ្ឋ និង​កែប្រែ​របៀប​ដឹកនាំ​នយោបាយ​របស់​ខ្លួន​ឱ្យ​ស្រប​តាម​រដ្ឋធម្មនុញ្ញ ដែល​ជា​ច្បាប់​កំពូល​របស់​ជាតិ នោះ​ទើប​ជា​រឿង​ត្រឹមត្រូវ។

យ៉ាងណា​ក៏ដោយ លោក ហ៊ុន សែន ក៏​ជា​មេដឹកនាំ​ដែល​តែង​ប្រមាថ​ព្រះមហាក្សត្រ​មិន​ចាញ់​លោក សម រង្ស៊ី ប៉ុន្មាន​នោះ​ដែរ គឺ​មាន​តែ​ខ្លាំង​ជាង ព្រោះ​ថា​លោក ហ៊ុន សែន មិន​ត្រឹមតែ​មិន​គោរព​ព្រះរាជកិច្ច​របស់​អតីត​ព្រះមហាក្សត្រ​ខ្មែរ និង​ព្រះមហាក្សត្រ​ខ្មែរ​បច្ចុប្បន្ន​ដែល​កំពុង​គ្រងរាជ្យ​នេះ​ទេ តែ​គាត់​តែងតែ​ប្រឆាំង​នឹង​ព្រះរាជ​គំនិត​របស់​ព្រះអង្គ​រហូត​ដល់​រំលោភ​ព្រះរាជ​តួនាទី​របស់​ទ្រង់​ថែម​ទៀត។

ជាក់ស្តែង កាលពី​ឆ្នាំ​២០០៥ លោក ហ៊ុន សែន បាន​គំរាម​រំលាយ​របប​រាជា​និយម ហើយ​ដាក់​ជំនួស​មក​វិញ​នូវ​របប​សាធារណរដ្ឋ ប្រសិនបើ​សម្ដេច​ព្រះបាទ នរោត្តម សីហមុនី មិន​ព្រម​ឡាយព្រះហស្តលេខា​លើ​សន្ធិសញ្ញា​បំពេញ​បន្ថែម​ឆ្នាំ​២០០៥ ស្ដីពី​ព្រំដែន​កម្ពុជា-វៀតណាម ដើម្បី​ឱ្យ​បក្ស​កាន់​អំណាច​អាច​ចុះ​កិច្ចព្រមព្រៀង​ខុស​ច្បាប់​នានា​ជាមួយ​រដ្ឋាភិបាល​វៀតណាម បាន​បន្ត​ទៀត​ទេ​នោះ។

អ្នកវិភាគ​នយោបាយ និង​សង្គម បណ្ឌិត ឡៅ ម៉ុងហៃ ធ្លាប់​បាន​លើកឡើង​កាលពី​ពេល​កន្លងទៅ​ថា ការ​លើកឡើង​ពី​ព្រះមហាក្សត្រ មិនមែន​ដើម្បី​គ្រាន់តែ​ប្រមាថ​កាតទាន​លើ​ព្រះអង្គ​នោះ​ទេ តែ​ដើមហេតុ គឺ​អ្នក​មាន​អំណាច និង​ស្ថាប័ន​រដ្ឋ​ពាក់ព័ន្ធ​មិន​បាន​ឲ្យ​តម្លៃ​ដល់​ព្រះរាជ​សិទ្ធិ និង​អំណាច ព្រមទាំង​ព្រះរាជ​តួនាទី​របស់​ព្រះមហាក្សត្រ​ដូច​មាន​ចែង​ក្នុង​រដ្ឋធម្មនុញ្ញ​ប៉ុណ្ណោះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស