ប្រធានាធិបតីសហរដ្ឋអាមេរិក លោក ចូ បៃដិន អះអាងថា ការបាញ់ទម្លាក់បាឡុងរបស់ចិន វាគ្មានអ្វីដែលអាមេរិកឈឺក្បាលដើម្បីសងជំងឺចិត្តទៅចិននោះទេ ហើយក៏គ្មានអ្វីត្រូវសុំទោសចិននោះដែរ ហើយការពិត ប្រទេសចិនត្រូវតែដឹងថាមានកំហុស ព្រោះតែបាឡុងរបស់ប្រទេសនោះរំលោភលើដែនអាកាសរបស់អាមេរិក។
នៅក្នុងសន្និសីទសារព័ត៌មាននៅទីក្រុងវ៉ាស៊ីនតោន នៅខាងមុខសេតវិមាន លោក បៃដិន បានពន្យល់ថា មិនថាឡើយបាឡុងចិននោះទេដែលត្រូវបាញ់កម្ទេច បាឡុងប្រទេសណាក៏ដោយ ឬឧបករណ៍ណាក៏ដោយ ឲ្យតែហោះចូលដែនអាកាសអាមេរិក គឺត្រូវតែបាញ់ទម្លាក់។
លោក បៃដិន ពន្យល់ថា បាឡុងរបស់ចិនដែលត្រូវបានបាញ់កម្ទេចនេះ ទោះបីចិនអះអាងថាជាបាឡុងស៊ីវិល ឬបាឡុងឧតុនិយមក៏ដោយ ក៏អាមេរិកត្រូវតែបាញ់កម្ទេចដែរ ព្រោះការហោះចូលដែនអាកាសអាមេរិក វាបង្កឲ្យមានភាពផុយស្រួយដល់សន្តិសុខជាតិអាមេរិក និងដល់ផ្លូវអាកាសចរណ៍របស់អាមេរិក។
នៅពេលថ្លែងអំពីបាឡុងរបស់ចិននេះ លោក បៃដិន បានពន្យល់ថែមទៀតអំពីឧបករណ៍មិនស្គាល់អត្តសញ្ញាណចំនួន ៣គ្រឿង ដែលកងទ័ពអាកាសអាមេរិកបានបាញ់កម្ទេច ក៏លោក បៃដិន ថ្លែងថាទោះជាឧបករណ៍នេះចេញពីប្រភពណាក៏ដោយ ក៏អាមេរិកអាចបាញ់កម្ទេចបានដែរ ឲ្យតែឧបករណ៍នោះវានៅលើលំហអាកាសអាមេរិក។
សហរដ្ឋអាមេរិកបានបាញ់ទម្លាក់ឧបករណ៍មិនស្គាល់អត្តសញ្ញាណ ឬគេហៅ UFO ដែលមានទំហំប៉ុនកូនឡានតូចមួយចំនួន ៣គ្រឿងក្នុងរយៈពេល ៣ថ្ងៃជាប់ៗគ្នាកាលពីសប្ដាហ៍មុន ដោយឧបករណ៍នោះវាបានហោះចូលលំហអាកាសរដ្ឋអាឡាស្កា ហោះលើលំហអាកាសប្រទេសកាណាដា និងហោះលើលំហអាកាសនៃឈូងសមុទ្ររដ្ឋមីឈីកែន។
ការបាញ់ឧបករណ៍ទាំងនោះ សហរដ្ឋអាមេរិកប្រើយន្តហោះចម្បាំង F-22 និង F-16 ហើយការបាញ់បាឡុងរបស់ចិន ក៏ប្រើយន្តហោះ F-22 ដោយបាញ់មីស៊ីលមួយគ្រាប់។ មកដល់ពេលនេះ នាវាជើងទឹករបស់អាមេរិកបានប្រមូលកម្ទេចកម្ទីបាឡុងរបស់ចិន ដាក់ទៅមន្ទីរពិសោធន៍ដើម្បីពិនិត្យ និងស្រាវជ្រាវនៃអង្គចងចាំរបស់បាឡុងនោះ ថាតើមានអ្វីដែលបាឡុងនេះអាចចាប់បានរូបភាពលើដែនដីរបស់សហរដ្ឋអាមេរិក។
រដ្ឋមន្ត្រីការពារជាតិអាមេរិក ឡយ អូស្ទីន បានថ្លែងបន្តថា បាឡុងរបស់ចិនវាពុំអាចជាបាឡុងស៊ីវិលដូចចិនអះអាងនោះទេ។ លោកថាវាជាបាឡុងយោធាដែលបាឡុងប្រភេទនេះ អាមេរិកមិនឱ្យហោះកាត់លំហអាកាសអាមេរិកដាច់ខាត។ សហរដ្ឋអាមេរិកប្រកាសថា ខ្លួនមិនប្រគល់កម្ទេចបាឡុងនេះទៅឱ្យចិននោះទេ ទោះបីចិនស្នើសុំក៏ដោយ ហើយអាមេរិកក៏គ្មានទទួលខុសត្រូវដើម្បីសងជំងឺចិត្តដល់ចិននោះដែរ។
ចិនបានទាមទារឲ្យអាមេរិកប្រគល់កម្ទេចបាឡុងនេះ ដោយព្រមានថា ចិននឹងសងសឹកអាមេរិកនៅពេលណាដែលអាមេរិកមានការជ្រុលជ្រួសដូចករណីបាឡុងចិនបញ្ជាមិនបាន ក៏ហោះចូលដែនអាកាសអាមេរិកនេះ។
លោក បៃដិន មិនបានថ្លែងអំពីការព្រមានរបស់ចិននោះទេ តែលោកថាករណីបាឡុងនេះ ចិនមិនត្រូវចាត់ទុកថាវាជារឿងដែលធ្វើឲ្យប៉ះពាល់ទំនាក់ទំនងអាមេរិក និងចិននោះទេ។ នៅពេលដែលអាមេរិកបាញ់ទម្លាក់បាឡុងរបស់ចិន ក៏ស្រាប់តែអ៊ុយក្រែនបាញ់ទម្លាក់បាឡុងរបស់រុស្ស៊ីធ្លាក់យ៉ាងតិច ៦គ្រឿងដែរ ដែលបានហោះចូលដែនអាកាសរបស់អ៊ុយក្រែន ជាពិសេសហោះមកដល់លំហអាកាសនៃរដ្ឋធានីគៀវ។
អ៊ុយក្រែន អះអាងថា បាឡុងទាំង ៦គ្រឿងរបស់រុស្ស៊ីនេះវាជាបាឡុងស៊ើបការណ៍ ឬចារកម្ម ហើយបាឡុងនេះធ្លាប់ហោះចូលមកលើដែនអាកាសរបស់អ៊ុយក្រែននៅមុនសង្គ្រាមផ្ទុះឡើង។ រដ្ឋាភិបាលអ៊ុយក្រែន បានប្រកាសថា ការបាញ់កម្ទេចបាឡុងរបស់រុស្ស៊ីនេះ គឺធ្វើឡើងនៅពេលដែលអ៊ុយក្រែនធ្លាក់នៅក្រោមសង្គ្រាមឈ្លានពានរបស់រុស្សី ដែលមានន័យថា រុស្សីនៅតែបង្ហាញការបន្តឈ្លានពានអ៊ុយក្រែន យូរខែទៅមុខទៀត។
មកដល់ពេលនេះ រុស្ស៊ីមិនទាន់ឃើញប្រតិកម្មដែលអ៊ុយក្រែនបាញ់ទម្លាក់បាឡុងរបស់ខ្លួនទេ។ តែរុស្ស៊ី កំពុងតែបើកប្រតិបត្តិការសឹកទ្រង់ទ្រាយធំដោយលើកទ័ពជាង ២០ម៉ឺននាក់វាយសន្ធប់នៅភាគខាងកើតប្រទេសអ៊ុយក្រែន ដោយប្រើទ័ពរថក្រោះ ទ័ពកាំភ្លើងធំ មីស៊ីល និងយន្តហោះចម្បាំងទៀតផង។
លោក ចូ បៃដិន ពន្យល់ថា ឧបករណ៍ទាំងអស់រាប់ទាំងឧបករណ៍ UFO ដែលបានហោះចូលដែនអាកាសអាមេរិក កំពុងស្ថិតក្នុងការស៊ើបអង្កេត ថាតើឧបករណ៍ទាំង ៣ នោះ វាចេញពីប្រទេសណា។ តែលោកថា វាអាចមនុស្សជាអ្នកបង្កើត ឬក៏ជាឧបករណ៍របស់ក្រុមស្រាវជ្រាវឯកជនណាមួយដែលចង់ស្រាវជ្រាវអ្វីមួយនៅលើទឹកដីអាមេរិក។
ចំណែករដ្ឋមន្ត្រីការពារជាតិអាមេរិក ឡយ អូស្ទីន ថ្លែងថា ឧបករណ៍ UFO ទាំងបីគ្រឿងនេះវាជារឿងចម្លែកដែលហោះចូលដែនអាកាសអាមេរិកចំពេលដែលអាមេរិកកំពុងតែគាំទ្រអ៊ុយក្រែនប្រឆាំងការឈ្លានពានរបស់រុស្ស៊ី ហើយវាកើតឡើងទន្ទឹមនឹងអ៊ុយក្រែនអះអាងថា ខ្លួនគេបានបាញ់ទម្លាក់បាឡុងរបស់រុស្ស៊ី ដែលហោះចូលដែនអាកាសរបស់អ៊ុយក្រែនផងដែរ។
ឥឡូវនេះ បើតាមព័ត៌មានឲ្យដឹងថា អាមេរិកពង្រឹងសមត្ថភាពដែនអាកាសយ៉ាងខ្លាំង ជាពិសេសគឺនៅរដ្ឋអាឡាស្កា ដែលកាលពីថ្ងៃ១៥ ខែកុម្ភៈ អាមេរិកបានបញ្ចេញយន្តហោះចម្បាំងជាច្រើនគ្រឿងហោះកៀងយន្តហោះទម្លាក់គ្រាប់បែករុស្ស៊ី ឲ្យចេញពីលំហអាកាសអាមេរិក។
រុស្ស៊ីបានបញ្ចេញយន្តហោះទម្លាក់គ្រាប់បែក Tu-95 និងយន្តហោះចម្បាំង ៣គ្រឿងហោះចូលដែនអាកាសរដ្ឋអាឡាស្កា គឺប៉ុន្មានថ្ងៃប៉ុណ្ណោះបន្ទាប់ពីអាមេរិកបាញ់ទម្លាក់ឧបករណ៍មិនស្គាល់អត្តសញ្ញាណ UFO ចំនួន ៣គ្រឿង ដែលវាបានហោះចូលលំហអាកាសរដ្ឋអាឡាស្កា និងទឹកដីអាមេរិកនៅរដ្ឋមីឈីកែន៕