មជ្ឈមណ្ឌលពាណិជ្ជកម្មកសិកម្មកម្ពុជា គ្រោងបើកផ្សារសុភ័ក្ត្រមិត្ត ដើម្បីទទួលទិញបន្លែ ផ្លែឈើ និងកសិផលផ្សេងៗពីបណ្តាសហគមន៍កសិកម្មក្នុងខេត្តជាប់ទីក្រុងភ្នំពេញ ឱ្យបានប្រមាណ ៥០០តោនក្នុងមួយថ្ងៃ ដើម្បីលើកកម្ពស់តម្លៃផលិតផលក្នុងស្រុកជូនកសិករ និងពង្រឹងយន្តការគ្រប់គ្រងបណ្ដាញខ្សែសង្វាក់ផលិតកម្មកសិកម្មនៅសហគមន៍ជនបទឱ្យមាននិរន្តរភាព។
មជ្ឈមណ្ឌលពាណិជ្ជកម្មកសិកម្មកម្ពុជា ចេញសេចក្ដីជូនដំណឹងនៅថ្ងៃទី២២ ខែកុម្ភៈ ឆ្នាំ២០២៣ ថា បច្ចុប្បន្ននេះ កសិករតែងតែត្អូញត្អែរអំពីបញ្ហាទីផ្សារកសិកម្មក្នុងការលក់កសិផលដែលកសិករផលិតបាន ផ្សារសុភ័ក្ត្រមិត្តនឹងប្រមូលទិញបន្លែ ផ្លែឈើ និងកសិផលផ្សេងៗពីបណ្តាសហគមន៍កសិកម្មនៅក្នុងខេត្តគោលដៅជុំវិញរាជធានីភ្នំពេញ ដើម្បីបញ្ចៀសនូវបញ្ហាទាំងនេះ។
ប្រភពដដែលលើកឡើងថា ដើម្បីឆ្លើយតបនឹងបញ្ហាខាងលើ មជ្ឈមណ្ឌលបានប្ដេជ្ញាចិត្តចូលរួមចំណែកជាមួយរាជរដ្ឋាភិបាល ជាពិសេសក្រសួងកសិកម្ម ក្នុងបំណងដើម្បីលើកកម្ពស់តម្លៃផលិតផលក្នុងស្រុក ពង្រីកទីផ្សារកសិកម្មជូនកសិករ និងពង្រឹងយន្តការគ្រប់គ្រងបណ្ដាញខ្សែសង្វាក់ផលិតកម្មកសិកម្មនៅសហគមន៍ជនបទ ឱ្យមាននិរន្តរភាពទៅថ្ងៃមុខ។
មជ្ឈមណ្ឌលពាណិជ្ជកម្មកសិកម្មកម្ពុជា បញ្ជាក់ថា បេសកកម្មរបស់ខ្លួនមានទិសដៅសំខាន់មួយចំនួន ដូចជាគ្រប់អាជីវករគោលដៅត្រូវបានពង្រឹងសមត្ថភាពឲ្យយល់ដឹងអំពីប្រព័ន្ធគ្រប់គ្រងអាជីវកម្មឌីជីថល បញ្ជ្រាប និងលើកកម្ពស់សមភាពយេនឌ័រតាមរយៈនៃការផ្តល់ចំណេះដឹងអភិវឌ្ឍន៍អាជីវកម្ម និងគំនិតផ្ដួចផ្ដើមបង្កើតសហគមន៍បៃតង ជាដើម នៅថ្ងៃអនាគត។
ជារៀងរាល់ឆ្នាំ កសិផលមួយចំនួនដូចជា ផ្លែល្ពៅ ដំឡូងមី ពោត និងកសិផលផ្សេងៗទៀត ត្រូវបានចាក់គរទុកចោលតាមដងផ្លូវក្នុងចម្ការ និងតាមទីផ្សារនានា ដើម្បីរង់ចាំឈ្មួញប្រមូលទិញ ដោយរំពឹងថានឹងអាចលក់បានក្នុងតម្លៃសមរម្យ ប៉ុន្តែការរំពឹងទុករបស់កសិករតែងតែមិនសមតាមបំណងនោះទេ គឺឈ្មួញតែងទម្លាក់តម្លៃកសិផលទាំងនោះតាមតែអំពើចិត្តដែលមិនអាចឱ្យកសិករអាចទទួលបានប្រាក់ចំណេញ។
ទាក់ទិននឹងបញ្ហានេះ ប្រធានសមាគមសម្ព័ន្ធកសិករកម្ពុជា (CCFC) លោក ថេង សាវឿន ធ្លាប់លើកឡើងកាលពីពេលកន្លងទៅថា ទីផ្សារបន្លែនៅកម្ពុជាស្ថិតក្នុងកម្រិតទាបដែលមិនអាចធ្វើឲ្យកសិករមានចំណូលរួចនឹងតម្លៃដើម ខណៈការដោះស្រាយរបស់អាជ្ញាធរនៅមានកម្រិតនៅឡើយ។
លោក ថេង សាវឿន បញ្ជាក់ថា បើពិនិត្យទៅលើវិធី និងយុទ្ធសាស្ត្រនៃការផលិត និងដាំបន្លែរបស់ប្រជាពលរដ្ឋ គឺធ្វើតាមអ្វីដែលគាត់ចេះពីគ្រួសារ មិនមានលក្ខណៈបច្ចេកទេស និងមានការគាំពារពីរដ្ឋ និងអ្នកជំនាញកសិកម្មនោះទេ ដូច្នេះពួកគាត់ត្រូវចំណាយដើមទុនច្រើនក្នុងការផលិតដែលពិបាកនឹងទទួលបានប្រាក់ចំណេញពីមុខរបរនេះ។
ចំណែកប្រធានវិទ្យាស្ថានមនុស្សសាស្ត្រ និងវិទ្យាសាស្ត្រសង្គមនៃរាជបណ្ឌិត្យសភាកម្ពុជា លោក ឆេង វណ្ណារិទ្ធិ ធ្លាប់បានអះអាងថា បញ្ហាទីផ្សារសម្រាប់បន្លែផ្លែឈើរបស់កសិករខ្មែរ គឺបណ្តាលមកពីកត្តាមួយចំនួន ដូចជាកត្តាបច្ចេកទេសផលិតកម្មនៅមានកម្រិតទាប និងវត្ថុធាតុដើមមានតម្លៃខ្ពស់ ជាដើម ខណៈទីផ្សារសម្រាប់កសិផលទាំងនេះគ្មានការកំណត់ជាក់លាក់ពីស្ថាប័នពាក់ព័ន្ធនៅឡើយ។
សព្វថ្ងៃនេះ កម្ពុជាត្រូវនាំចូលបន្លែពីប្រទេសជិតខាងប្រមាណជា ៩០០តោនក្នុងមួយថ្ងៃ ខណៈបន្លែនាំចូលទាំងនោះមានតម្លៃថោកជាងបន្លែក្នុងស្រុក ដែលធ្វើឱ្យតម្លៃបន្លែផ្លែឈើក្នុងស្រុកពិបាករកទីផ្សារនៅពេលកសិករខ្មែរប្រមូលផលម្តងៗ៕