29 C
Phnom Penh

ក្រុម​សិទ្ធិមនុស្ស​រដ្ឋាភិបាល​ថា​កម្ពុជា​ប្រឹងប្រែង​អនុវត្ត​ច្បាប់​សិទ្ធិ​នយោបាយ​និង​លើក​កម្ពស់​សិទ្ធិមនុស្ស

ដោយ ឌឹ ខេមបូឌា ដេលី

បទវិភាគ

គណៈកម្មាធិការ​សិទ្ធិមនុស្ស​របស់​រដ្ឋាភិបាល​កម្ពុជា បង្ហាញ​ពី​ការ​ខិតខំ​ប្រឹងប្រែង​របស់​រដ្ឋាភិបាល​កម្ពុជា អំពី​ការ​អនុវត្ត​ច្បាប់ ការ​អនុវត្ត​សិទ្ធិ​នយោបាយ និង​ការ​លើក​កម្ពស់​សិទ្ធិមនុស្ស​ក្នុង​កិច្ចប្រជុំ​ស្ដីពី​សិទ្ធិ​សេដ្ឋកិច្ច សង្គម និង​វប្បធម៌​របស់​កម្ពុជា នៅ​ទីក្រុង​ហ្សឺណែវ ប្រទេស​ស្វីស កាលពី​ថ្ងៃ​ពុធ ទី​២២ កុម្ភៈ។

ក្រុម​សិទ្ធិមនុស្ស​របស់​រដ្ឋាភិបាល​កម្ពុជា បាន​ចេញ​សេចក្តី​ប្រកាស​ព័ត៌មាន​ស្ដីពី​ការ​ចូលរួម​ការពារ​របាយការណ៍​ជាតិ​ពាក់ព័ន្ធ​នឹង​ការ​អនុវត្ត​កតិកាសញ្ញា​អន្តរជាតិ​ស្ដីពី​សិទ្ធិ​សេដ្ឋកិច្ច សង្គម និង​វប្បធម៌​ក្នុង​សម័យ​ប្រជុំ​លើក​ទី​៧៣ នៃ​គណៈកម្មាធិការ​សិទ្ធិ​សេដ្ឋកិច្ច សង្គម និង​វប្បធម៌​ក្នុង​ទីក្រុង​ហ្សឺណែវ ប្រទេស​ស្វីស ចាប់ពី​ថ្ងៃទី​២១ ដល់​ថ្ងៃទី​២២ ខែ​កុម្ភៈ ឆ្នាំ​២០២៣ នេះ​ថា រាជរដ្ឋាភិបាល​កម្ពុជា​តែង​ខិតខំ​រៀបចំ​លិខិត​បទដ្ឋាន​គតិយុត្តិ និង​យុទ្ធសាស្ត្រ​នានា រួម​ទាំង​ការ​អនុវត្ត​ដោយ​ផ្អែក​លើ​ទិដ្ឋភាព​ច្បាប់​ជាតិ និង​អន្តរជាតិ​ជានិច្ច។

ប្រភព​ដដែល​លើកឡើង​ថា សមាជិក​នៃ​គណៈកម្មាធិការ​សិទ្ធិ​សេដ្ឋកិច្ច សង្គម និង​វប្បធម៌​បាន​អបអរ​សាទរ​ចំពោះ​កិច្ច​ខិតខំ​ប្រឹងប្រែង​របស់​កម្ពុជា​ក្នុង​វិស័យ​សិទ្ធិមនុស្ស និង​បាន​ផ្ដល់​ជា​អនុសាសន៍​សម្រាប់​ការ​អនុវត្ត​បន្ថែម​ទៀត ដើម្បី​ជំរុញ​ឱ្យ​វិស័យ​សិទ្ធិមនុស្ស​នៅ​កម្ពុជា​កាន់តែ​ល្អ​ប្រសើរ​ថែម​ទៀត។

ក្រុម​នេះ​បញ្ជាក់​ថា ការ​ការពារ​របាយការណ៍​នេះ​ជា​យន្តការ​មួយ​របស់​គណៈកម្មាធិការ​សិទ្ធិ​សេដ្ឋកិច្ច សង្គម និង​វប្បធម៌​របស់​អង្គការ​សហប្រជាជាតិ ដែល​ត្រូវ​ធ្វើឡើង​រៀងរាល់ ៥​ឆ្នាំ​ម្តង​សម្រាប់​តាមដាន និង​ការ​ធ្វើ​ឱ្យ​ប្រសើរ​ឡើង​នូវ​ស្ថានភាព​សិទ្ធិមនុស្ស​ក្នុង​ប្រទេស​ទាំងអស់​ដែល​ជា​សមាជិក​របស់​ខ្លួន។

គណៈកម្មាធិការ​សិទ្ធិមនុស្ស​កម្ពុជា បាន​ចូលរួម​ការពារ​របាយការណ៍​ជាតិ​ពាក់ព័ន្ធ​នឹង​ការ​អនុវត្ត​កតិកាសញ្ញា​អន្តរជាតិ​ស្ដីពី​សិទ្ធិ​សេដ្ឋកិច្ច សង្គម និង​វប្បធម៌​ចាប់ពី​ថ្ងៃទី​២១ ដល់​ថ្ងៃទី​២២ ខែ​កុម្ភៈ ឆ្នាំ​២០២៣ ក្នុង​កិច្ចប្រជុំ​លើក​ទី​៧៣ នៅ​ទីក្រុង​ហ្សឺណែវ ដោយ​ពិភាក្សា​លើ​ប្រធានបទ ៤​ផ្នែក​សំខាន់ៗ រួម​មាន៖

  • ផ្នែក​ទី​១ ផ្ដោត​ទៅ​លើ​កិច្ច​ការពារ​បរិស្ថាន និង​ធនធាន​ធម្មជាតិ ជនជាតិ​ដើម​ភាគតិច ការ​ចុះបញ្ជី​ដីធ្លី​របស់​ជនជាតិ​ដើម​ភាគតិច វិធានការ​ប្រឆាំង​អំពើពុករលួយ វិធានការ ឬ​គោល​នយោបាយ​ប្រឆាំង​នឹង​ការ​រើសអើង និង​សិទ្ធិ​ស្ត្រី និង​សមភាព​យេនឌ័រ។
  • ផ្នែក​ទី​២ គឺ​ផ្ដោត​ទៅ​លើ​សិទ្ធិ​ការងារ ប្រាក់ឈ្នួល​អប្បបរមា និង​នីតិវិធី​ក្នុង​ការ​ដោះស្រាយ​វិវាទ​ការងារ អធិការកិច្ច​ការងារ សិទ្ធិ​សហជីព និង​មូលនិធិ​សន្តិសុខ​សង្គម។
  • ផ្នែក​ទី​៣ គឺ​លើកឡើង​អំពី​ការ​ប្រឆាំង​អំពើ​ជួញដូរ​មនុស្ស សន្តិសុខ​ស្បៀង សណ្ដាប់ធ្នាប់​សាធារណៈ និង​លំនៅឋាន ការ​បណ្តេញ​ចេញ និង​ការ​ផ្លាស់​ទីលំនៅ​ដោយ​បង្ខំ និង​ក្របខ័ណ្ឌ​ច្បាប់​ស្ដីពី​សុខភាព​ផ្លូវចិត្ត​ផង​ដែរ។
  • ផ្នែក​ទី​៤ គឺ​ផ្ដោត​លើ​សិទ្ធិ​ទទួល​ការ​អប់រំ និង​សិទ្ធិ​វប្បធម៌​ថែម​ទៀត។

ក្នុង​រយៈពេល​ចុងក្រោយ​នេះ មុន​នឹង​ការ​បោះឆ្នោត​ឆ្នាំ​២០២៣ មក​ដល់ ត្រូវ​គេ​មើល​ឃើញ​ថា មេដឹកនាំ​បក្ស​កាន់​អំណាច លោក ហ៊ុន សែន បាន​គំរាមកំហែង​សិទ្ធិ​មូលដ្ឋាន​របស់​ពលរដ្ឋ សិទ្ធិ​នយោបាយ សេរីភាព​សារព័ត៌មាន សិទ្ធិ​ការងារ និង​បន្ត​ចាប់​ខ្លួន​សកម្មជន​សង្គម សកម្មជន​សិទ្ធិមនុស្ស មេដឹកនាំ​សហជីព និង​សកម្មជន​នយោបាយ​ដែល​រិះគន់​ការ​ដឹកនាំ​មិន​ត្រឹមត្រូវ​របស់​ខ្លួន​ជា​បន្តបន្ទាប់។

កាលពី​ចុង​ឆ្នាំ​២០២២ អ្នក​រាយការណ៍​ពិសេស​របស់​អង្គការ​សហប្រជាជាតិ​ទទួល​បន្ទុក​សិទ្ធិមនុស្ស​ប្រចាំ​នៅ​កម្ពុជា បាន​លើកឡើង​នៅ​ក្នុង​កិច្ចប្រជុំ​ក្រុមប្រឹក្សា​សិទ្ធិមនុស្ស​អង្គការ​សហប្រជាជាតិ​លើក​ទី​៤៩ នៅ​ទីក្រុង​ហ្សឺណែវ នៃ​ប្រទេស​ស្វីស ថា ទិដ្ឋភាព​សិទ្ធិមនុស្ស និង​លទ្ធិប្រជាធិបតេយ្យ​នៅ​ក្នុង​ប្រទេស​កម្ពុជា នៅតែ​បង្ក​ការ​ព្រួយ​បារម្ភ​ធ្ងន់ធ្ងរ​ដដែល ព្រោះ​ថា​លំហ​សេរីភាព​របស់​ពលរដ្ឋ និង​សិទ្ធិ​នយោបាយ​នៅ​កម្ពុជា​កាន់តែ​រួម​តូច និង​កំពុង​ដើរ​ថយក្រោយ ដោយសារតែ​កម្ពុជា​ស្ថិត​ក្នុង​ការ​គ្រប់គ្រង​តាម​បែប​ឯក​បក្ស​សព្វថ្ងៃ​នេះ។

ចំណែក​អង្គការ Freedom House បាន​ចេញ​សេចក្តី​រាយការណ៍​របស់​ខ្លួន​កាលពី​ឆ្នាំ​២០២២ ថា ប្រព័ន្ធ​នយោបាយ​របស់​ប្រទេស​កម្ពុជា ត្រូវ​បាន​លោក ហ៊ុន សែន គ្រប់គ្រង​ផ្តាច់​មុខ​ទាំងស្រុង ក្នុង​នោះ​គណបក្ស​ប្រឆាំង បណ្ដាញ​សារព័ត៌មាន​ឯករាជ្យ អ្នក​តវ៉ា​ទាមទារ​សិទ្ធិ​សេរីភាព និង​ប្រជាពលរដ្ឋ​ខ្មែរ​រស់នៅ​ក្នុង​ភាព​ភ័យ​ខ្លាច​គ្រប់ៗ​គ្នា៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស