ភរិយាបណ្ឌិត កែម ឡី និងក្រុមអ្នកឃ្លាំមើលសង្គមនៅក្រៅស្រុក លើកឡើងថា បុគ្គលម្នាក់ៗមានសិទ្ធិក្នុងការសម្រេចចិត្តរៀងៗខ្លួនក្នុងការជ្រើសរើសផ្លូវដើររបស់គេ គ្មាននរណាម្នាក់មានសិទ្ធិទៅហាមឃាត់អ្នកដទៃឡើយ។
ភរិយាបណ្ឌិត កែម ឡី គឺអ្នកស្រី ប៊ូ រចនា ប្រតិកម្មថា បណ្ឌិត កែម ឡី បានលាចាកលោកនេះទៅជិត ៧ឆ្នាំហើយ ហេតុអ្វីមានមនុស្សខ្លះយកគាត់មកពាក់ព័ន្ធក្នុងការសម្រេចចិត្តរបស់អ្នកដទៃទៀត ព្រោះថាមនុស្សម្នាក់ៗមានសិទ្ធិជ្រើសរើសផ្លូវដើររបស់គេ គ្មាននរណាម្នាក់មានសិទ្ធិទៅហាមឃាត់អ្នកដទៃឡើយ។
អ្នកស្រី ប៊ូ រចនា លើកឡើងថា សូម្បីតែម្តាយឪពុកបង្កើតក៏មិនអាចហាមឃាត់ការសម្រេចចិត្តរបស់កូនដែរ កុំថាឡើយដល់ទៅអ្នកដែលធ្លាប់អះអាងថាខ្លួនជាសិស្សបណ្ឌិត កែម ឡី នោះ។ អ្នកស្រីបន្ថែមថា បណ្ឌិត កែម ឡី មិនដែលចេះវាយប្រហារនរណាទេ ហើយប្រសិនបើគាត់នៅមានជីវិត គាត់ក៏មិនប្រកាន់នឹងមនុស្សដែលវាយប្រហារគាត់ដែរ ព្រោះគាត់មិនមែនជាមនុស្សដែលចូលចិត្តជាន់ពន្លិចអ្នកដទៃ រួចលើកខ្លួនឯងនោះទេ ប៉ុន្តែបណ្ឌិត សេង សារី បែរជាយកអ្នកដែលស្លាប់មកវាយប្រហារទៅវិញ។
កាលពីថ្ងៃទី២២ ខែកុម្ភៈ ឆ្នាំ២០២៣ អ្នកគាំទ្របក្សប្រឆាំងភាគីលោក សម រង្ស៊ី គឺបណ្ឌិត សេង សារី បានសរសេរលើគណនីហ្វេសប៊ុករបស់ខ្លួនថា លោកចង់ប្រាប់ទៅបណ្ឌិត កែម ឡី ដែលជាម្ចាស់ទ្រឹស្ដីនៃឃ្លាមួយ គឺ «ត្រីហែលបណ្តោយទឹកជាត្រីងាប់» ថា កូនសិស្សរបស់លោកកំពុងអនុវត្តទ្រឹស្ដីនេះបានយ៉ាងល្អ គឺកំពុងតែហែលបញ្ច្រាសហើយ គឺហែលបញ្ច្រាសទ្រឹស្ដីរបស់បណ្ឌិត កែម ឡី តែម្តង ដែលគាត់គឺជាគ្រូរបស់អ្នកទាំងនោះ។
អ្នកគាំទ្របក្សប្រឆាំងរូបនេះលើកឡើងថា បើបណ្ឌិត កែម ឡី បានឃើញដោយផ្ទាល់ភ្នែក មិនដឹងជាគាត់សប្បាយចិត្តប៉ុនណាទេ ព្រោះថាពេលនេះ កូនសិស្សរបស់គាត់កំពុងជោគជ័យយ៉ាងខ្លាំងដែលទទួលបានតួនាទីធំៗណាស់។ បណ្ឌិត សេង សារី បន្ថែមថា គ្រូខ្លាំង សិស្សពិតជាមិនខ្សោយមែន។
ការលើកឡើងរបស់បណ្ឌិត សេង សារី បែបនេះ ទំនងជាសំដៅដល់យុវជនមួយចំនួនដែលតាំងខ្លួនឯងជាសិស្សបណ្ឌិត កែម ឡី កាលពីមុន ប៉ុន្តែបាននាំគ្នាទៅចុះចូលជាមួយគណបក្សប្រជាជនកម្ពុជា និងទទួលបានតំណែងក្នុងជួររដ្ឋាភិបាលនៅពេលនេះ។
យ៉ាងណាក៏ដោយ គេក៏មិនដែលបានឃើញបណ្ឌិត កែម ឡី ប្រកាសថាអ្នកណាម្នាក់ជាកូនសិស្សរបស់គាត់នោះទេកាលពីពេលដែលលោកនៅមានជីវិត គ្រាន់តែលោកដឹកនាំអ្នកទាំងនោះឱ្យធ្វើកិច្ចការដើម្បីសង្គមជាតិប៉ុណ្ណោះ។
ទាក់ទិននឹងបញ្ហានេះ ប្រធានចលនាយុវជនគណបក្សសង្គ្រោះជាតិប្រចាំប្រទេសកូរ៉េខាងត្បូង លោក មាស ពិសាស បានលើកឡើងក្នុងប្រអប់បញ្ចេញមតិដោយចាត់ទុកថា ការលើកឡើងរបស់បណ្ឌិត សេង សារី គឺជាទង្វើមិនសមរម្យ និងហួសពីក្រមសីលធម៌ក្នុងនាមជាមនុស្សម្នាក់ដែលទទួលបានការអប់រំខ្ពង់ខ្ពស់កន្លងមក។
យ៉ាងណាក៏ដោយ កាលពីពេលដែលបណ្ឌិត សេង សារី នៅជាអ្នកស្រាវជ្រាវការអភិវឌ្ឍសង្គម លោកធ្លាប់បានអះអាងថា មរណភាពបណ្ឌិត កែម ឡី គឺជាការបាត់បង់ «ទ្រព្យរស់» របស់ជាតិ ដែលធ្លាប់ផ្តល់យោបល់ និងចំណេះដឹងទូលំទូលាយដល់ការអភិវឌ្ឍសង្គម និងពលរដ្ឋ ប៉ុន្តែក្រោយពីលោកត្រូវបានគេមើលឃើញថា ឈានជើងចូលក្នុងវិស័យនយោបាយគាំទ្រខាងបក្សប្រឆាំង ក៏មានការប្រែប្រួលដោយប្រកាន់និន្នាការនយោបាយជុំវិញការបញ្ចេញមតិរបស់លោកជាបន្តបន្ទាប់រហូតដល់ពេលនេះ។
អនុប្រធានវេទិកាពលរដ្ឋ លោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី២៣ កុម្ភៈ នេះថា ក្នុងនាមជាបុគ្គលឯករាជ្យ ជាអ្នកប្រជាធិបតេយ្យ និងជាបញ្ញវន្តដែលទទួលបានការអប់រំខ្ពង់ខ្ពស់ គួរតែធ្វើសកម្មភាពណាមួយដែលនាំទៅដល់ការបង្រួបបង្រួមស្មារតីជាតិឡើងវិញ ស្របពេលដែលសង្គមខ្មែរកំពុងធ្លាក់ចូលទៅក្នុងការហែកហួរគ្នាដោយការដណ្តើមអំណាចរបស់អ្នកនយោបាយនៅពេលនេះ។
លោក ម៉ែន ណាត លើកឡើងថា ក្រុមអ្នកប្រជាធិបតេយ្យ និងបញ្ញវន្ត មិនគួរធ្វើសកម្មភាព ឬចលនាណាមួយដែលនាំឱ្យមានការបែកបាក់កម្លាំងសាមគ្គីជាតិបន្ថែមទៀតទេ ព្រោះការបាក់សាមគ្គីរបស់ពួកគេ គឺជាជោគជ័យដ៏ធំធេងរបស់អ្នកកាន់អំណាចផ្ដាច់ការ។
បណ្ឌិត កែម ឡី គឺជាអ្នកស្រាវជ្រាវការអភិវឌ្ឍសង្គមដ៏ឆ្នើមមួយរូបដែលត្រូវបានខ្មាន់កាំភ្លើងបាញ់សម្លាប់កាលពីថ្ងៃទី១០ ខែកក្កដា ឆ្នាំ២០១៦។ ពិតមែនតែជីវិតរបស់លោកត្រូវបាត់បង់ ប៉ុន្តែលោកបានបន្សល់នូវទស្សនៈឧត្តមគតិដើម្បីជាតិជាច្រើន ដូចជាឃ្លាថា «ជូតទឹកភ្នែករួចបន្តដំណើរទៅមុខទៀត» និងពាក្យដែលគេចងចាំគ្រប់គ្នា គឺ «និយាយការពិត ជាជាងនិយាយការពារ» ជាដើម។
ជាងនេះទៀត លោកក៏បានបន្សល់នូវបេសកកម្មជាច្រើនដែលមិនទាន់បានបញ្ចប់ ដែលវីរភាព និងជាគំរូសម្រាប់អ្នកជំនាន់ក្រោយយកតម្រាប់តាម ដូចជាបេសកកម្ម ១០០រាត្រី បេសកកម្មរូតវាំងននសង្គម និងបេសកកម្មតស៊ូមតិដើម្បីការរីកចម្រើនផ្នែកលទ្ធិប្រជាធិបតេយ្យ និងការអភិវឌ្ឍសេដ្ឋកិច្ចជាតិ ជាដើម៕