សាលាដំបូងរាជធានីភ្នំពេញ ប្រកាសសាលក្រមដោយសម្រេចផ្ដន្ទាទោសលោក កឹម សុខា ប្រធានអតីតគណបក្សសង្គ្រោះជាតិ ឲ្យជាប់ពន្ធនាគាររយៈពេល ២៧ឆ្នាំ ប៉ុន្តែមិនតម្រូវឲ្យបញ្ជូនខ្លួនទៅឃុំនៅក្នុងពន្ធនាគារនោះទេ ដោយអនុញ្ញាតឲ្យរស់នៅក្នុងផ្ទះ ព្រមទាំងដកសិទ្ធិមិនឲ្យធ្វើនយោបាយអស់មួយជីវិត។
លោក អាង ឧត្តម មេធាវីម្នាក់របស់លោក កឹម សុខា ដែលប្រាប់ក្រុមអ្នកកាសែតក្រោយចេញពីសវនាការនៅព្រឹកថ្ងៃទី៣ ខែមីនា ឆ្នាំ២០២៣ នេះថា តុលាការភ្នំពេញបានប្រកាសសាលក្រមស្ដីពីការដាក់ទោសលើលោក កឹម សុខា រយៈពេល ២៧ឆ្នាំ ដោយអនុញ្ញាតឲ្យរស់នៅក្នុងផ្ទះ។ តុលាការក៏បានដកសិទ្ធិនយោបាយជាស្ថាពរពីលោក កឹម សុខា គឺគាត់មិនអាចធ្វើនយោបាយអស់មួយជីវិត។
លោកមេធាវីរូបនេះអះអាងថា ការសម្រេចរបស់តុលាការជារឿងមិនត្រឹមត្រូវ មិនយុត្តិធម៌ គឺមិនអាចទទួលយកបានទេ។ លោកថា ក្រុមមេធាវីចង់ប្តឹងជំទាស់ទៅកាន់សាលាឧទ្ធរណ៍ តែត្រូវរង់ចាំការសម្រេចពីលោក កឹម សុខា ជាកូនក្ដីសិន។
សូមរំលឹកថា លោក កឹម សុខា ត្រូវចោទប្រកាន់តាំងពីខែកញ្ញា ឆ្នាំ២០១៧ មក ពីបទសន្ទិដ្ឋភាពជាមួយបរទេស ឬបទគប់គិតជាមួយបរទេស ដើម្បីផ្តួលរំលំរដ្ឋាភិបាលកម្ពុជា។ លោក កឹម សុខា ត្រូវបានតុលាការក្រុងភ្នំពេញដាក់ឱ្យស្ថិតក្រោមការតាមដានរបស់តុលាការតាំងពីឆ្នាំ២០១៩ មក បន្ទាប់ពីលោកត្រូវបានអាជ្ញាធរក្រុងភ្នំពេញចាប់ឃុំខ្លួនកាលពីឆ្នាំ២០១៧ កន្លងទៅ។
តុលាការចំណាយពេលអស់រយៈពេល ៥ឆ្នាំកន្លះ ទម្រាំឈានដល់ការប្រកាសសាលក្រមនាពេលនេះ៕