បុរសខ្លាំងក្រាញអំណាចតត្រកូលនៅកម្ពុជា លោក ហ៊ុន សែន ព្រមានមិនអត់ឱនឲ្យខ្មែរ និងអន្តរជាតិ បើសិនជាធ្វើសកម្មភាពដើម្បីបំផ្លាញប្រទេសកម្ពុជាដែលកំពុងពោរពេញទៅដោយសន្តិភាព។
ក្នុងពិធីប្រគល់វិញ្ញាបនបត្រ និងសញ្ញាបត្រជូនសិស្សនិស្សិតនៃវិទ្យាស្ថានខ្មែរជំនាន់ថ្មី នាថ្ងៃចន្ទ ទី៦ ខែមីនា ឆ្នាំ២០២៣ នេះ លោក ហ៊ុន សែន បានប្រកាសជាសាធារណៈដែលទំនងសំដៅលើអង្គការសង្គមស៊ីវិល និងបណ្ដាប្រទេសលោកសេរីថា កុំធ្វើសកម្មភាពដែលជំរុញឲ្យកម្ពុជាមានសង្គ្រាម។
លោកបានព្រមានមិនអត់ឱនឲ្យអ្នកទាំងនោះឡើយ ទោះបីជាខ្មែរក្ដី និងបរទេសក្ដី បើសិនជារកឃើញថា ធ្វើសកម្មភាពប្រឆាំងទៅនឹងឯករាជ្យ អធិបតេយ្យភាពកម្ពុជា ក្រោមហេតុផលប្រជាធិបតេយ្យ និងសិទ្ធិមនុស្ស ដែលលោកថាធ្វើឲ្យកម្ពុជាមានសង្គ្រាមឡើងវិញ។
ការជំរុញរបស់លោក ហ៊ុន សែន ឲ្យសង្គមស៊ីវិល និងបណ្ដាប្រទេសលោកសេរីឲ្យជួយការពារសន្តិភាពក្រោមការដឹកនាំរបស់លោកនេះ ធ្វើឡើងខណៈពលរដ្ឋនៅទូទាំងប្រទេសកម្ពុជាកំពុងហូរទឹកភ្នែកដោយការបាត់បង់ដីធ្លី ការគំរាមកំហែង និងការធ្វើទុក្ខបុកម្នេញគ្រប់រូបភាពពីសំណាក់អាជ្ញាធរ ក្រោមការដឹកនាំដោយកណ្ដាប់ដៃដែករបស់លោក។
ពលរដ្ឋខ្មែរ និងសហគមន៍អន្តរជាតិ ជំរុញឲ្យរដ្ឋាភិបាលដែលដឹកនាំដោយលោក ហ៊ុន សែន នាពេលបច្ចុប្បន្ននេះ បើកលំហលទ្ធិប្រជាធិបតេយ្យនៅកម្ពុជាឡើងវិញ ក្រោយពេលរកឃើញថា ស្ថានភាពសិទ្ធិមនុស្ស សិទ្ធិនយោបាយ និងប្រជាធិបតេយ្យនៅកម្ពុជាបានធ្លាក់ចុះខ្លាំងចាប់តាំងពីលោក ហ៊ុន សែន ប្រើតុលាការរំលាយគណបក្សសង្គ្រោះជាតិ កាលពីឆ្នាំ២០១៧ មក។
កាលពីថ្ងៃទី៣ ខែមីនា ថ្មីនេះៗ តុលាការក្រោមការបញ្ជារបស់លោក ហ៊ុន សែន បានកាត់ទោសឲ្យលោក កឹម សុខា ជាប់ពន្ធនាគារ ២៧ឆ្នាំ និងដកសិទ្ធិពលរដ្ឋ ព្រមទាំងសិទ្ធិឈរឈ្មោះបោះឆ្នោត ហើយហាមមិនឲ្យជួបខ្មែរ និងបរទេស លើកលែងតែក្រុមគ្រួសារប៉ុណ្ណោះ។
តុលាការកាត់ទោសលោក កឹម សុខា នេះ ក្រោមបទចោទប្រកាន់ «សន្ទិដ្ឋភាពជាមួយបរទេស ឬក្បត់ជាតិ» ដែលលោក ហ៊ុន សែន ចោទថាពាក់ព័ន្ធជាមួយសហរដ្ឋអាមេរិកចង់ផ្ដួលរំលំរដ្ឋាភិបាលដែលដឹកនាំដោយលោកនាពេលបច្ចុប្បន្ន។
លោក ហ៊ុន សែន ក៏បានបិទវិទ្យុសំឡេងប្រជាធិបតេយ្យ វីអូឌី កាលពីថ្ងៃទី១៣ ខែកុម្ភៈ ឆ្នាំ២០២៣ នេះដែរ។ ការបិទវិទ្យុសំឡេងប្រជាធិបតេយ្យ វីអូឌី និងកាត់ទោសប្រធានគណបក្សសង្គ្រោះជាតិ លោក កឹម សុខា ត្រូវបានសហគមន៍ជាតិ និងអន្តរជាតិរិះគន់ថា ជាវិធានការរឹតបន្តឹងសេរីភាពសាធារណៈ ជាពិសេសប្រឆាំងនឹងប្រព័ន្ធផ្សព្វផ្សាយឯករាជ្យ គណបក្សប្រឆាំង និងសង្គមស៊ីវិល ស្របពេលដែលការបោះឆ្នោតជាតិនៅខែកក្កដា ឆ្នាំ២០២៣ ជិតមកដល់នៅពេលខាងមុខនេះ។
ពួកគេក៏បានជំរុញឲ្យលោក ហ៊ុន សែន ដោះលែងលោក កឹម សុខា និងអនុញ្ញាតឲ្យស្ថាប័នព័ត៌មាន វីអូឌី ដំណើរការឡើងវិញ ដើម្បីស្ដារលទ្ធិប្រជាធិបតេយ្យ ការគោរពសិទ្ធិមនុស្ស និងសិទ្ធិនយោបាយ។
ក្រុមអ្នកឃ្លាំមើលនិយាយថា វិធានការបន្តបន្ទាប់របស់លោក ហ៊ុន សែន ដើម្បីគាបសង្កត់ គំរាមកំហែងតាមគ្រប់មធ្យោបាយដោយយកប្រព័ន្ធតុលាការជាឧបករណ៍ រួមទាំងប្រើប្រាស់អំពើហិង្សានាពេលនេះ គឺក្នុងគោលបំណងវែកផ្លូវផ្ទេរអំណាចឲ្យកូនប្រុសច្បងរបស់លោក គឺលោក ហ៊ុន ម៉ាណែត ប៉ុណ្ណោះ៕