បេក្ខជនអនាគតនាយករដ្ឋមន្ត្រីរបស់បក្សកាន់អំណាចដ៏ចម្រូងចម្រាសក្នុងបក្សកាន់អំណាច គឺលោក ហ៊ុន ម៉ាណែត អំពាវនាវឱ្យបេក្ខជនដែលត្រៀមប្រឡងចូលជាទាហាន ត្រូវតែប្រើប្រាស់សមត្ថភាពផ្ទាល់ខ្លួន មិនត្រូវរំពឹងលើការអន្តរាគមន៍ពីឪពុកម្ដាយនោះឡើយ។
បេក្ខជនអនាគតនាយករដ្ឋមន្ត្រីរបស់បក្សកាន់អំណាចដែលញាំញីទៅដោយការគំរាមកំហែងផ្ទៃក្នុងខ្លួនឯងរូបនេះ បានលើកឡើងក្នុងអំឡុងពេលពិនិត្យវិញ្ញាសាប្រឡងជ្រើសរើសនាយទាហានជំនាន់ថ្មីឆ្នាំ២០២៣ កាលពីថ្ងៃទី៥ ខែមីនា ឆ្នាំ២០២៣ ថា បេក្ខជនទាំងអស់ត្រូវតែជឿទុកចិត្តលើខ្លួនឯង កុំពឹងផ្អែកលើអ្នកដទៃ កុំពឹងលើអ្នកជិតខាង និងកុំពឹងលើប្រ៊ីយ៉ុងឱ្យសោះ។
លោ ហ៊ុន ម៉ាណែត បន្ថែមថា ពួកគេក៏មិនត្រូវពឹងទៅលើឪពុកម្ដាយ អ៊ំ ពូ មីង ឬបងប្អូនឲ្យជួយអន្តរាគមន៍នោះឡើយ ហើយក៏មិនត្រូវពឹងទៅលើការសូកប៉ាន់នោះដែរ។
បេក្ខជនអនាគតនាយករដ្ឋមន្ត្រីបក្សកាន់អំណាចដែលមានការអន្តរាគមន៍ឪពុកខ្លួនឯង លោក ហ៊ុន ម៉ាណែត បញ្ជាក់ថា បេក្ខជនទាំងអស់ត្រូវតែជឿជាក់លើសមត្ថភាពចំណេះដឹងរបស់ខ្លួន ជាជាងពឹងអ្នកដទៃ ព្រោះថាខ្លួនឯងប្រឡងជាប់ គឺជាប់ដោយមោទកភាព ជាប់ដោយសមត្ថភាពផ្ទាល់ខ្លួន ដែលជាស្នាដៃរបស់ខ្លួនឯងផ្ទាល់។
ប្រធានវេទិកាពលរដ្ឋ លោក គឹម សុខ ប្រាប់សារព័ត៌មាន The Cambodia Daily នៅថ្ងៃទី៦ មីនា នេះថា ការលើកឡើងរបស់លោក ហ៊ុន ម៉ាណែត ជារឿងគួរឱ្យអាម៉ាស់បំផុត នៅពេលដែលខ្លួនគាត់មុននឹងបានឡើងតំណែងខ្ពង់ខ្ពស់ដូចសព្វថ្ងៃនេះ មិនមែនត្រឹមតែមានការអន្តរាគមន៍ពីលោក ហ៊ុន សែន ដែលជាឪពុកនោះទេ គឺមានការគំរាមបង្កសង្គ្រាមផ្ទៃក្នុងបក្សខ្លួនឯងថែមទៀត ដូច្នេះការលើកឡើងរបស់លោក ហ៊ុន ម៉ាណែត គឺដូចគ្នានឹងសត្វគីង្គក់លក់ឡេដូច្នោះដែរ។
លោក គឹម សុខ លើកឡើងថា បើនិយាយពីការប្រឡងដោយយុត្តិធម៌ និងគ្មានការអន្តរាគមន៍ពីឪពុកម្ដាយ លោក ហ៊ុន ម៉ាណែត នៅពេលនេះគ្រាន់តែជាកូនទាហានម្នាក់ប៉ុណ្ណោះ ប៉ុន្តែដោយសារតែលោក ហ៊ុន សែន ជាឪពុករបស់គាត់ដែលហ៊ានរំលោភច្បាប់ រំលោភសិទ្ធិមន្ត្រីជាន់ខ្ពស់ក្នុងបក្សកាន់អំណាច ទើបអាចលើកបន្តុបលោក ហ៊ុន ម៉ាណែត ឱ្យឈរក្នុងតំណែងខ្ពង់ខ្ពស់ដូចសព្វថ្ងៃនេះបាន ដូច្នេះបើផ្អែកទៅលើភស្តុតាងទាំងនេះ គាត់មិនសក្ដិសមមកនិយាយអំពីការប្រឡងដោយប្រើសមត្ថភាពទៅកាន់បេក្ខជនទាំងនោះឡើយ។
ក្រោយពីលោក ហ៊ុន ម៉ាណែត បញ្ចប់ការសិក្សានៅសហរដ្ឋអាមេរិកកាលពីឆ្នាំ១៩៩៩ និងនៅប្រទេសអង់គ្លេស ហើយត្រឡប់មកធ្វើការក្នុងរដ្ឋាភិបាលរបស់លោក ហ៊ុន សែន ដែលជាឪពុកបង្កើតរបស់ខ្លួន លោក ហ៊ុន ម៉ាណែត ត្រូវបានដំឡើងតំណែងទាំងក្នុងបក្ស និងក្នុងជួររដ្ឋាភិបាលយ៉ាងឆាប់រហ័សជាបន្តបន្ទាប់ ក្រោមការជ្រោមជ្រែងគ្រប់បែបយ៉ាងពីលោក ហ៊ុន សែន ដែលជាឪពុកបង្កើតរបស់លោក។
ជាក់ស្តែង កាលពីដើមខែកក្កដា ឆ្នាំ២០១៨ លោកត្រូវបានតែងតាំងជាអគ្គមេបញ្ជាការរងនៃកងយោធពលខេមរភូមិន្ទ ហើយនៅដើមខែកញ្ញា ឆ្នាំ២០១៨ លោកក៏ត្រូវបានលោក ហ៊ុន សែន ស្នើទៅព្រះមហាក្សត្រតែងតាំងជាមេបញ្ជាការកងទ័ពជើងគោកថែមទៀត។
លុះដល់ខែធ្នូ ឆ្នាំ២០១៨ កូនប្រុសច្បងរបស់លោក ហ៊ុន សែន រូបនេះក៏ត្រូវបានបញ្ចូលទៅក្នុងសមាជិកគណៈអចិន្ត្រៃយ៍នៃគណបក្សប្រជាជនកម្ពុជា ដែលជាអង្គការចាត់តាំងកំពូលរបស់បក្សកាន់អំណាចផងដែរ។ លើសពីនេះ លោក ហ៊ុន ម៉ាណែត ក៏កាន់តួនាទីជាមេបញ្ជាការនៃកងកម្លាំងពិសេសប្រឆាំងភេរវកម្មថែមទៀត។
ក្រោយពីលោក ហ៊ុន ម៉ាណែត កាន់កាប់តំណែងកំពូលៗជាបន្តបន្ទាប់មក នៅចុងខែធ្នូ ឆ្នាំ២០២១ លោក ហ៊ុន សែន បានប្រកាសគាំទ្រលោក ហ៊ុន ម៉ាណែត ឱ្យឈរជាបេក្ខជនអនាគតនាយករដ្ឋមន្ត្រីរបស់គណបក្សប្រជាជនកម្ពុជាបន្ទាប់ពីលោកថែមទៀត បើទោះបីជាលោក ហ៊ុន សែន ធ្លាប់ប្រកាសជាសាធារណៈកាលពីខែមិថុនា ឆ្នាំ២០០៨ ថាលោកនឹងមិនអនុញ្ញាតឲ្យកូនប្រុសរបស់លោកធ្វើជានាយករដ្ឋមន្ត្រីបន្តពីរូបលោកក៏ដោយ។
ជុំវិញបញ្ហានេះ លោក ហ៊ុន សែន ធ្លាប់គំរាមថា អ្នកដែលមានបំណងធ្លាប់ចង់សម្លាប់រូបលោកកាលពីមុន ហើយចង់ធ្វើឃាតលោកដើម្បីទប់ស្កាត់មិនឱ្យលោក ហ៊ុន ម៉ាណែត ធ្វើជានាយករដ្ឋមន្ត្រីទៀតនោះ ពួកគេក៏មិនរួចខ្លួនដែរ ព្រោះថាគាត់បានស្គាល់អ្នកទាំងនោះអស់ហើយ គ្រាន់តែគាត់មិនធ្វើអ្វីលើពួកគេប៉ុណ្ណោះ។
ក្រុមអ្នកសង្កេតការណ៍លើកឡើងថា ដោយផ្អែកលើភស្តុតាង និងហេតុផលដែលលោក ហ៊ុន សែន គំរាមអ្នកដទៃ និងការធ្វើអន្តរាគមន៍គ្រប់បែបយ៉ាងកន្លងមក បង្ហាញថាលោក ហ៊ុន ម៉ាណែត គ្មានសមត្ថភាពប្រកួតប្រជែងជាមួយអ្នកដទៃដើម្បីឆ្ពោះទៅកាន់តំណែងដែលខ្លួនកំពុងគ្រប់គ្រងសព្វថ្ងៃនេះទេ បើគ្មានការចេញមុខពីលោក ហ៊ុន សែន ដែលជាឪពុកនោះ៕