លោក ហ៊ុន សែន ដកតួនាទីលោក ឈឺន សុធន ពីអភិបាលស្រុកបរសេដ្ឋ ហើយផ្ទេរទៅឲ្យធ្វើការផ្នែករដ្ឋបាលខេត្តកំពង់ស្ពឺ វិញ បន្ទាប់ពីមានសំណើពីរដ្ឋមន្ត្រីក្រសួងមហាផ្ទៃ ក្រោយអង្គភាពប្រឆាំងអំពើពុករលួយហៅកាត់ ACU បានចេញលិខិតព្រមានឈប់បើកដៃឲ្យឈ្មួញប្រមូលទិញដីរដ្ឋដោយខុសច្បាប់បន្តទៀត។
ក្នុងអនុក្រឹត្យដែលចុះហត្ថលេខាដោយលោក ហ៊ុន សែន កាលពីថ្ងៃទី៦ ខែមីនា ឆ្នាំ២០២៣ បានសម្រេចផ្ទេរភារកិច្ចលោក ឈឺន សុធន ដែលមានឋានន្តរស័ក្តិឧត្តមមន្ត្រីថ្នាក់លេខ៥ ពីអភិបាលស្រុកបរសេដ្ឋ ទៅធ្វើការងារផ្នែករដ្ឋបាល ឲ្យទៅបម្រើការងារនៅរដ្ឋបាលខេត្តកំពង់ស្ពឺ ចាប់ពីថ្ងៃចុះហត្ថលេខានេះតទៅ។
ការសម្រេចផ្ទេរភារកិច្ចលោក ឈឺន សុធន ដោយយោងតាមសំណើរដ្ឋមន្ត្រីក្រសួងមហាផ្ទៃ លោក ស ខេង នេះមិនបានបញ្ជាក់ពីមូលហេតុឡើយ។
ការស្នើសុំរបស់រដ្ឋមន្ត្រីក្រសួងមហាផ្ទៃ លោក ស ខេង បានធ្វើឡើងស្របពេលដែលអង្គភាពប្រឆាំងអំពើពុករលួយហៅកាត់ ACU កាលពីថ្ងៃទី១៦ ខែមករា ឆ្នាំ២០២៣ បានចេញលិខិតមួយដោយព្រមានទៅលោក ឈឺន សុធន អភិបាលស្រុកបរសេដ្ឋ ឈប់បើកដៃឲ្យលោកស្រី វន់ ឈើវិនគីអាសាយណាវ ប្រមូលទិញដីរដ្ឋដោយខុសច្បាប់បន្តទៀត។
តែយ៉ាងណា កាលពីថ្ងៃទី១៦ ខែមករា ឆ្នាំ២០២៣ ប្រធានអង្គភាពប្រឆាំងអំពើពុករលួយហៅកាត់ ACU លោក ឱម យ៉ិនទៀង បានព្រមានទៅអភិបាលស្រុកបរសេដ្ឋ លោក ឈឺន សុធន បន្ទាប់ពីមន្ត្រីរូបនេះបានបើកផ្លូវឲ្យស្ត្រីឈ្មោះ វន់ ឈើវិនគីអាសាយណាវ ដើរប្រមូលទិញដីរដ្ឋដោយខុសច្បាប់ ដែលរៀបចំដោយលោក ស៊ិន សារុន នាយករដ្ឋបាលក្រោមការគ្រប់គ្រងរបស់មន្ទីរបរិស្ថានខេត្តលក់ឲ្យឈ្មួញ៕