មេដឹកនាំកម្ពុជា លោក ហ៊ុន សែន ប្ដេជ្ញាអភិវឌ្ឍតំបន់តាមដងទន្លេ ជំរុញឲ្យមានការអភិវឌ្ឍសេដ្ឋកិច្ចមូលដ្ឋាន ការការពារ និងអភិរក្សធនធានធម្មជាតិ ដោយឈរលើការប្ដេជ្ញាចិត្តច្បាស់លាស់ក្នុងការរក្សាតុល្យភាពរវាងផលប្រយោជន៍សេដ្ឋកិច្ច សង្គម បរិស្ថាន និងវប្បធម៌ទៅថ្ងៃអនាគត។
ប្រមុខរាជរដ្ឋាភិបាលកម្ពុជា លោក ហ៊ុន សែន ចេញលិខិតអបអរសាទរក្នុងពិធីបុណ្យទន្លេលើកទី៧ ដែលប្រព្រឹត្តទៅចាប់ពីថ្ងៃទី០៨ រហូតដល់ថ្ងៃទី១០ ខែមីនា ឆ្នាំ២០២៣ នៅខេត្តកំពង់ធំ ក្រោមប្រធានបទ «ទន្លេរបស់យើង ដើម្បីបច្ចុប្បន្ន និងអនាគត» ថា ពិធីបុណ្យទន្លេគឺជាព្រឹត្តិការណ៍ទេសចរណ៍ដ៏សំខាន់មួយសម្រាប់ប្រទេសកម្ពុជា។
លោកនាយករដ្ឋមន្ត្រី ហ៊ុន សែន លើកឡើងថា ពិធីបុណ្យទន្លេមិនត្រឹមតែចូលរួមចំណែកក្នុងការផ្សព្វផ្សាយសក្ដានុពលទេសចរណ៍នៃខេត្តជាប់ដងទន្លេរបស់កម្ពុជាប៉ុណ្ណោះទេ ប៉ុន្តែថែមទាំងចូលរួមគាំទ្រនយោបាយរបស់រាជរដ្ឋាភិបាលក្នុងការយកចិត្តទុកដាក់លើការអភិវឌ្ឍតំបន់តាមដងទន្លេប្រកបដោយនិរន្តរភាពថែមទៀត។
មេដឹកនាំខ្មែរលោក ហ៊ុន សែន បញ្ជាក់ថា ទឹកទន្លេជាប្រភពនៃការចិញ្ចឹមបីបាច់ជីវិត និងជាកន្លែងបណ្តុះបណ្តាលនូវវប្បធម៌ និងអរិយធម៌តាំងពីបុរាណមក ហើយទន្លេក៏ជាអំណោយពីធម្មជាតិដែលជាទីបង្អែកសម្រាប់ការរស់នៅរបស់ប្រជាពលរដ្ឋខ្មែរផងដែរ។
ខេត្តកំពង់ធំ គឺជាខេត្តមួយដែលស្ថិតនៅចំកណ្តាលនៃប្រទេសកម្ពុជា និងមានព្រំប្រទល់ជាប់បឹងទន្លេសាបវែងជាងគេក្នុងចំណោមខេត្តទាំង ៥ ផ្សេងទៀត ដូចជាខេត្តសៀមរាប ខេត្តពោធិ៍សាត់ ខេត្តបន្ទាយមានជ័យ ខេត្តបាត់ដំបង និងខេត្តកំពង់ឆ្នាំង ហើយក៏ជាខេត្តដែលជាអតីតរាជធានីពីបុរាណដែលបានកប់ទុកនូវរឿងរ៉ាវប្រវត្តិសាស្ត្ររាប់មិនអស់ផងដែរ។
បឹងទន្លេសាប គឺជាអាងស្តុកទឹកធម្មជាតិ និងជាជម្រកមច្ឆជាតិដ៏សំខាន់សម្រាប់ប្រជាជនកម្ពុជា ដែលមានទំហំសរុបចំនួន ៣ពាន់គីឡូម៉ែត្រការ៉េនៅរដូវប្រាំង និងមានទំហំចំនួន ១ម៉ឺនគីឡូម៉ែត្រការ៉េនៅរដូវវស្សា និងជាមជ្ឈមណ្ឌលនេសាទមួយយ៉ាងធំ។ ពោលគឺជាមជ្ឈមណ្ឌលត្រីធំជាងគេនៅលើពិភពលោកផងដែរ ដោយសារតែបឹងនេះសម្បូរទៅដោយព្រៃលិចទឹកដែលជាជម្រកដ៏សុខសាន្ត និងជាអាហារដ៏សម្បូរបែបសម្រាប់មច្ឆជាតិគ្រប់ប្រភេទ។
យ៉ាងណាក៏ដោយ ក្រុមអ្នកសង្កេតការណ៍លើកឡើងថា បឹងទន្លេសាបដែលត្រូវរដ្ឋាភិបាលចាត់ទុកជាបេះដូងនៃប្រទេសកម្ពុជាដែលមានទាំងត្រី និងទឹកសម្រាប់ឲ្យប្រជាជនកម្ពុជាប្រកបរបរកសិកម្ម មិនត្រូវបានគ្រប់គ្រងឲ្យបានត្រឹមត្រូវនោះទេ។ ជាក់ស្តែង នៅរដូវវស្សា ពលរដ្ឋត្រូវរងគ្រោះដោយជន់ទឹកទន្លេ ប៉ុន្តែនៅរដូវប្រាំង ពលរដ្ឋត្រូវរងគ្រោះដោយសារតែខ្វះទឹកទៅវិញ ខណៈរដ្ឋាភិបាលមិនមានវិធានការទប់ស្កាត់បញ្ហានេះនៅឡើយទេ ក្រោមការដឹកនាំរបស់ខ្លួនជាង ៤០ឆ្នាំមកនេះ។
ជុំវិញបញ្ហានេះ ពលរដ្ឋក្នុងខេត្តកំពង់ធំ ស្រុកកំពង់ស្វាយ បានប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះកាលពីពេលថ្មីៗនេះថា ក្នុងតំបន់របស់ពួកគេតែងរងនូវការជន់លិចពីទឹកបឹងទន្លេសាបនៅរដូវវស្សាជារៀងរាល់ឆ្នាំ ប៉ុន្តែនៅរដូវប្រាំង ពួកគេត្រូវទិញទឹកពីក្រសួងធនធានទឹក ដើម្បីធ្វើស្រែប្រាំងដែលតម្រូវឲ្យពួកគេបង់លុយទៅឱ្យមន្ទីរកសិកម្មទៅវិញ។
ចំណែកប្រជាពលរដ្ឋក្នុងខេត្តពោធិ៍សាត់ ស្រុកកណ្ដៀង បានប្រាប់សារព័ត៌មាន The Cambodia Daily ដែរថា ពួកគេមិនអាចធ្វើស្រែនៅរដូវវស្សាបានទេ ព្រោះមិនអាចទប់ទល់នឹងជំនន់ទឹកទន្លេបាន ដូច្នេះពួកគេត្រូវប្តូរមកធ្វើស្រែនៅរដូវប្រាំងវិញ ប៉ុន្តែត្រូវបង់លុយឱ្យក្រុមហ៊ុនដែលផ្គត់ផ្គង់ទឹកចំនួន ២៥ម៉ឺនរៀលក្នុងមួយហិកតារ ដើម្បីទទួលបានទឹកបង្ហូរចូលក្នុងស្រែរបស់ពួកគេ។
សារព័ត៌មាន The Cambodia Daily បានរកឃើញថា ប្រជាពលរដ្ឋដែលរស់នៅក្នុងខេត្តជាប់បឹងទន្លេសាបដែលត្រូវប្រកបរបរធ្វើស្រែប្រាំងសព្វថ្ងៃនេះ ត្រូវតែទិញទឹកពីក្រុមហ៊ុនផ្គត់ផ្គង់ទឹក ឬត្រូវបង់លុយឲ្យទៅមន្ទីរកសិកម្ម ជាដើម ដើម្បីទទួលបានទឹកសម្រាប់ធ្វើកសិកម្មរបស់ខ្លួន។ បញ្ហានេះ ជាភស្តុតាងមួយបង្ហាញថា បឹងទន្លេសាបមិនមែនជាទ្រព្យសម្បត្តិរបស់ពលរដ្ឋកម្ពុជាទូទៅនោះទេ ប៉ុន្តែជាទ្រព្យសម្បត្តិរបស់មន្ត្រីរាជការសម្រាប់ប្រើប្រាស់ដើម្បីកេងចំណេញពីប្រជាពលរដ្ឋទៅវិញ។
ទាក់ទិននឹងបញ្ហានេះ ប្រធានរាជបណ្ឌិត្យសភា បណ្ឌិត សុខ ទូច ធ្លាប់បានអះអាងកាលពីចុងឆ្នាំ២០២២ ថា បឹងទន្លេសាប គឺជាទ្រព្យដ៏មហាសាលរបស់កម្ពុជា ប៉ុន្តែប្រសិនបើរដ្ឋាភិបាលកម្ពុជាមិនអាចទប់ស្កាត់ការនេសាទខុសច្បាប់ និងការពារនូវការគោករាក់របស់បឹងទន្លេសាបនេះឱ្យបានទាន់ពេលទេ នឹងធ្វើឱ្យបាត់បង់ផលត្រីយ៉ាងធ្ងន់ធ្ងរទៅថ្ងៃអនាគត។ ក្រៅពីនេះ ក៏មិនអាចធានានូវទំហំទឹកសម្រាប់ប្រជាពលរដ្ឋដែលប្រកបរបរកសិកម្មបានដែរ៕