អ្នកវិភាគនយោបាយ និងមន្ត្រីបក្សសង្គ្រោះជាតិ ហៅការតែងតាំងកូនចៅរបស់ខ្លួនក្នុងស្ថាប័នដែលខ្លួនកំពុងដឹកនាំ ថាជារបបដឹកនាំសង្គមមួយដែលពោរពេញទៅដោយការសម្លាប់មរតក និងព្រលឹងជាតិ មុននឹងពួកគេកម្ទេចពូជសាសន៍ឯងជាចុងក្រោយដោយសារមានលោក ហ៊ុន សែន ធ្វើជាគំរូ។
ការអះអាងនេះ ធ្វើឡើងបន្ទាប់ពីបុរសខ្លាំងកាន់អំណាចជិត ៤០ឆ្នាំនៅកម្ពុជា គឺលោក ហ៊ុន សែន បានតែងតាំងកូនស្រីរបស់លោក ជា ចាន់តូ អគ្គទេសាភិបាលនៃធនាគារជាតិកម្ពុជា ឲ្យទៅជាអគ្គទេសាភិបាលរងនៃធនាគារជាតិកម្ពុជា។
ក្នុងព្រះរាជក្រឹត្យចុះហត្ថលេខាដោយប្រមុខរដ្ឋស្តីទី លោក សាយ ឈុំ កាលពីថ្ងៃទី១ ខែមីនា ឆ្នាំ២០២៣ បានត្រាស់បង្គាប់តែងតាំងអ្នកស្រី ជា សិរី ជាអគ្គទេសាភិបាលរងធនាគារជាតិនៃកម្ពុជា ដែលមានឋានៈស្មើរដ្ឋមន្ត្រីចាប់ពីថ្ងៃចុះហត្ថលេខានេះតទៅ។ ការត្រាស់បង្គាប់តែងតាំងកូនស្រីរបស់លោក ជា ចាន់តូ នេះ ធ្វើឡើងបន្ទាប់ពីមានសំណើពីលោក ហ៊ុន សែន។
អ្នកវិភាគនយោបាយ និងជាប្រធានវេទិកាពលរដ្ឋ លោក គឹម សុខ បានសរសេរលើហ្វេសប៊ុកថា ការតែងតាំងកូនជាអនុប្រធាន ប្រពន្ធជាប្រធានរដ្ឋបាល និងហិរញ្ញវត្ថុ ហើយសាច់ញាតិជាសេនាធិការ ខណៈឪជាប្រធានស្ថាប័ន វាជារបបដឹកនាំសង្គមដែលសម្លាប់មរតក និងព្រលឹងជាតិ មុនកម្ទេចពូជសាសន៍ឯងជាចុងក្រោយ។
ចំណែកតំណាងរាស្ត្រគណបក្សសង្គ្រោះជាតិមួយរូប គឺលោក អ៊ុំ សំអាន ក៏បានលើកឡើងដែរថា ការតែងតាំងអ្នកស្រី ជា សិរី ក្នុងតួនាទីជាអគ្គទេសាភិបាលរង ខណៈលោក ជា ចាន់តូ ជាឪពុកមានតួនាទីជាទេសាភិបាលនៃធនាគារជាតិកម្ពុជានេះ វាបង្ហាញពីការប្រមូលគ្រួសាររបស់ខ្លួនកាន់តំណែងក្នុងកន្លែងខ្លាញ់ដើម្បីកុំឲ្យបែកទ្រព្យ។
លោកចាត់ទុកការតែងតាំងកូនៗក្នុងស្ថាប័នដែលពួកគេកំពុងដឹកនាំនេះ ឆ្លុះបញ្ចាំងឲ្យឃើញថា ប្រទេសកម្ពុជាបច្ចុប្បន្នកំពុងតែបង្ហាញពីការកាន់តំណែងតពូជតាំងពីថ្នាក់កំពូលរហូតដល់ថ្នាក់ក្រោម ដោយមានលោក ហ៊ុន សែន ធ្វើជាគំរូក្នុងការបន្តតំណែងតពូជតត្រកូលនេះ។
ចំណែកអ្នកប្រើប្រាស់បណ្ដាញសង្គមជាច្រើន ក៏បានរិះគន់ករណីនេះដែរ ហើយពួកគេបាននាំគ្នាប្រៀបធៀបថា កូនកសិករទោះបីមានសមត្ថភាពប៉ុនណា ក៏មិនអាចបានតួនាទី និងកាន់តំណែងបែបនេះឡើយ។
ការតែងតាំងកូន គ្រួសារ និងសាច់ញាតិតពូជត្រកូលនេះ ធ្វើឡើងស្របពេលដែលលោក ហ៊ុន សែន មេដឹកនាំដែលកាន់អំណាចចំនួន ៣៨ឆ្នាំនៅកម្ពុជា ហើយបច្ចុប្បន្នលោកកំពុងត្រួសត្រាយផ្លូវដើម្បីផ្ទេរអំណាចឲ្យកូនប្រុសច្បងរបស់គាត់ គឺលោក ហ៊ុន ម៉ាណែត ធ្វើជានាយករដ្ឋមន្ត្រីបន្តវេន។
ពួកគេនិយាយថា ដោយសារតែការដឹកនាំក្រាញអំណាចរបស់លោក ហ៊ុន សែន បែបនេះហើយ បានជាមន្ត្រីគ្រាក់ៗរបស់គាត់នៅក្នុងស្ថាប័នរដ្ឋធំៗ កំពុងប្រជែងគ្នាដាក់កូនចៅ គ្រួសារ និងសាច់ញាតិរបស់ពួកគេនៅតាមក្រសួង ឬស្ថាប័នសំខាន់ៗរបស់រដ្ឋ។
ជាក់ស្ដែង ដូចជាកូនរបស់រដ្ឋមន្ត្រីក្រសួងធនធានទឹក និងឧតុនិយម លោក លឹម គានហោ ត្រូវបានតែងតាំងជារដ្ឋលេខាធិការ និងជាអនុរដ្ឋលេខាធិការក្រសួងធនធានទឹក ខណៈលោក កែវ បេងវឌ្ឍន៍ អគ្គនាយកដ្ឋានហិរញ្ញវត្ថុថ្នាក់ក្រោមជាតិនៃក្រសួងសេដ្ឋកិច្ច បានដាក់ប្អូនប្រុសបង្កើតរបស់ខ្លួនឈ្មោះ កែវ បេងវី ធ្វើជាអគ្គនាយករង ហើយកូនបង្កើតឈ្មោះ កែវ បេងវឌ្ឍន៍វិស្ណុ ត្រូវបានលោក កែវ បេងវឌ្ឍន៍ ដាក់ឲ្យធ្វើជាប្រធាននាយកដ្ឋានគ្រប់គ្រងហិរញ្ញវត្ថុ រដ្ឋបាលថ្នាក់ក្រោមជាតិទី៣ នៅក្នុងអគ្គនាយកដ្ឋានហិរញ្ញវត្ថុថ្នាក់ក្រោមជាតិនៃក្រសួងសេដ្ឋកិច្ច។
ក្រៅពីការតែងតាំងកូនស្រីរបស់លោក ជា ចាន់តូ នាពេលថ្មីៗនេះ ការតែងតាំងសែស្រឡាយ និងបក្ខពួករបស់ខ្លួនក៏មាននៅតាមក្រសួងស្ថាប័នរដ្ឋផ្សេងទៀតដែរ ខណៈអំពើពុករលួយនៅកម្ពុជានេះកំពុងចាក់ឫសយ៉ាងជ្រៅក្នុងស្ថាប័ននីមួយៗក្នុងប្រទេសកម្ពុជា។
អង្គការតម្លាភាពអន្តរជាតិ (Transparency International) កាលពីថ្ងៃទី៣១ ខែមករា ឆ្នាំ២០២៣ ចាត់ចំណាត់ថ្នាក់អំពើពុករលួយឆ្នាំ២០២២ នៅកម្ពុជាស្ថិតនៅក្នុងលេខរៀង១៥០ ក្នុងចំណោម ១៨០ប្រទេស ដែលចំណាត់ថ្នាក់នេះបង្ហាញថា កម្ពុជានៅតែមានអំពើពុករលួយអាក្រក់ជាងគេបន្ទាប់ពីប្រទេសមីយ៉ាន់ម៉ា បើប្រៀបធៀបទៅនឹងបណ្តាប្រទេសក្នុងតំបន់អាស៊ាន៕