សភាអឺរ៉ុប នឹងអនុម័តលើសេចក្តីសម្រេចមួយស្ដីពីកម្ពុជា ករណីមេដឹកនាំប្រឆាំង លោក កឹម សុខា នៅថ្ងៃទី១៦ ខែមីនា ខាងមុខនេះ បន្ទាប់ពីតុលាការក្រោមការបញ្ជារបស់លោក ហ៊ុន សែន បានកាត់ទោសឲ្យលោក កឹម សុខា ត្រូវឃុំខ្លួនក្នុងផ្ទះ ២៧ឆ្នាំ និងដកសិទ្ធិធ្វើនយោបាយអស់មួយជីវិត។
បើយោងតាម European Parliament in ASEAN កាលពីថ្ងៃទី១៣ មីនា បានឲ្យដឹងថា ក្នុងសម័យប្រជុំពេញអង្គក្នុងសប្តាហ៍នេះ នឹងធ្វើនៅទីក្រុង Strasbourg ប្រទេសបារាំង ដោយការរៀបចំកិច្ចប្រជុំអន្តរសភាសហភាពអឺរ៉ុប-ឥណ្ឌូនេស៊ី លើកទី១២។
ប្រភពដដែលបញ្ជាក់ថា កិច្ចប្រជុំនៅថ្ងៃទី១៦ ខែមីនា នេះ សភាអឺរ៉ុបក៏នឹងអនុម័តលើសេចក្តីសម្រេចមួយស្ដីពីកម្ពុជា ករណីមេដឹកនាំប្រឆាំង លោក កឹម សុខា ផងដែរ។
ចំណែកគណបក្សសង្គ្រោះជាតិដែលមានមូលដ្ឋាននៅសហរដ្ឋអាមេរិក ក៏បានចេញសេចក្ដីប្រកាសមួយកាលពីថ្ងៃទី១៣ ខែមីនា ឆ្នាំ២០២៣ ឲ្យដឹងថា ការកាត់ទោសលោក កឹម សុខា ពីបទក្បត់ជាតិ ទាំងគ្មានភស្តុតាង និងជាការប្រឌិតដោយប្រើប្រាស់ប្រព័ន្ធតុលាការជាអាវុធ ចេតនានយោបាយ ដើម្បីបំបិទមាត់លោក កឹម សុខា និងរារាំងគណបក្សសង្គ្រោះជាតិមិនឲ្យចូលរួមការបោះឆ្នោតជាតិនៅខែកក្កដា ឆ្នាំ២០២៣។
ពួកគេចាត់ទុកសាលក្រមកាត់ទោសលោក កឹម សុខា ធ្វើឡើងបន្ទាប់ពីប្រព័ន្ធផ្សព្វផ្សាយ VOD ដែលជាប្រព័ន្ធផ្សព្វផ្សាយឯករាជ្យចុងក្រោយបង្អស់របស់ប្រទេសកម្ពុជា ត្រូវបានរដ្ឋាភិបាលបញ្ជាឲ្យបិទកាលពីខែកុម្ភៈ ដែលនេះបង្ហាញឲ្យឃើញនូវបរិបទនៃការបន្តការគំរាមកំហែង និងការយាយីចំពោះជនណាដែលរិះគន់លោកនាយករដ្ឋមន្ត្រី ហ៊ុន សែន ហើយមានអ្នកទោសនយោបាយជាច្រើននៅតែកំពុងជាប់ពន្ធនាគារ។
គណបក្សសង្គ្រោះជាតិ បញ្ជាក់ថា កម្ពុជាជារដ្ឋឯកបក្សចាប់តាំងពីការបោះឆ្នោតជាតិឆ្នាំ២០១៨ ដែលគណបក្សប្រឆាំងត្រូវបានហាមឃាត់មិនឲ្យចូលរួមប្រកួតប្រជែង ដែលករណីនេះវាបានបង្ហាញឲ្យឃើញថា ការផ្ដល់ភាពស្របច្បាប់ជាអន្តរជាតិដល់លោក ហ៊ុន សែន និងជាការលើកទឹកចិត្តដល់លោក ហ៊ុន សែន ឲ្យមានភាពក្លាហានក្នុងការគាបសង្កត់អ្នកប្រជាធិបតេយ្យ ដោយសារមិនមានវិធានការជាក់ស្ដែងដើម្បីឲ្យគាត់ត្រឡប់មកមាគ៌ាប្រជាធិបតេយ្យវិញ។
ជាមួយគ្នានេះ ពួកគេទាមទារឲ្យដោះលែងលោក កឹម សុខា ជាបន្ទាន់ និងដោយគ្មានលក្ខខណ្ឌ ដើម្បីឲ្យគាត់មានសេរីភាព និងទទួលបានសិទ្ធិនយោបាយឡើងវិញ និងត្រូវតែដោះលែងអ្នកទោសនយោបាយទាំងអស់។
មួយវិញទៀត ត្រូវស្ដារនីតិសម្បទាគណបក្សសង្គ្រោះជាតិដែលត្រូវបានរំលាយ ដោយផ្អែកលើការចោទប្រកាន់ដោយប្រឌិតមកលើលោក កឹម សុខា ឡើងវិញឲ្យទាន់ពេលវេលា ដើម្បីចូលរួមក្នុងការបោះឆ្នោតថ្ងៃទី២៣ ខែកក្កដា ជាមួយនឹងថ្នាក់ដឹកនាំរបស់ខ្លួនដែលកំពុងនិរទេសខ្លួន ដោយអនុញ្ញាតឲ្យវិលត្រឡប់មកកម្ពុជាវិញដោយសុវត្ថិភាព។
ប៉ុន្តែបើរដ្ឋាភិបាលដឹកនាំដោយលោក ហ៊ុន សែន មិនព្រមដោះលែងលោក កឹម សុខា និងអ្នកទោសនយោបាយផ្សេងទៀត ព្រមទាំងមិនអនុញ្ញាតឲ្យសារព័ត៌មាន VOD បើកដំណើរការវិញទេ ពួកគេថាសភាអឺរ៉ុប សហគមន៍អន្តរជាតិ គួរតែអនុម័តវិធានការរឹតបន្តឹងប្រឆាំងនឹងមេដឹកនាំនយោបាយ និងមេដឹកនាំនៃកងកម្លាំងសន្តិសុខដែលទទួលខុសត្រូវចំពោះការរំលោភសិទ្ធិមនុស្សធ្ងន់ធ្ងរ ការរំលាយ និងការគាបសង្កត់គណបក្សប្រឆាំង។ ដូច្នេះ ប្រទេសប្រជាធិបតេយ្យទាំងអស់គួរតែផ្អាកការគាំទ្រផ្នែកហិរញ្ញវត្ថុទ្វេភាគីដល់រដ្ឋាភិបាលកម្ពុជា ហើយផ្ដោតលើការគាំទ្រដល់អង្គការសង្គមស៊ីវិល និងបក្សប្រឆាំងវិញ ខណៈការពន្យារពេលបន្ថែមរបស់អន្តរជាតិក្នុងការធ្វើសកម្មភាព និងការចាត់វិធានការសម្របសម្រួលដើម្បីសង្គ្រោះលទ្ធិប្រជាធិបតេយ្យ នឹងនាំឲ្យមានការបែកបាក់ទាំងស្រុងនូវគ្រឹះប្រជាធិបតេយ្យដែលត្រូវបានកសាងឡើងតាមរយៈកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ហើយរបបផ្ដាច់ការនឹងចំណេញបន្ថែមទៀត។
ការចេញប្រកាសរបស់គណបក្សសង្គ្រោះជាតិ ធ្វើឡើងស្របពេលដែលសភាអឺរ៉ុប នឹងរៀបចំកិច្ចប្រជុំនៅថ្ងៃទី១៦ ខែមីនា នេះ ដោយក្នុងកិច្ចប្រជុំនោះ ក៏នឹងលើកយកករណីលោក កឹម សុខា មកជជែកដែរ។
យ៉ាងណា ការប្រជុំដោយភ្ជាប់នឹងរឿងលោក កឹម សុខា របស់អឺរ៉ុបនេះ បន្ទាប់ពីតុលាការក្រុងភ្នំពេញកាលពីថ្ងៃទី៣ ខែមីនា ឆ្នាំ២០២៣ កន្លងទៅ បានប្រកាសសាលក្រមកាត់ទោសលោកឱ្យជាប់គុកក្នុងផ្ទះចំនួន ២៧ឆ្នាំ ក្រោមបទចោទប្រកាន់ពីបទ «សន្ទិដ្ឋភាពជាមួយបរទេស ឬបទឃុបឃិតត្រូវរ៉ូវគ្នាជាមួយបរទេស» ដែលរដ្ឋាភិបាលលោក ហ៊ុន សែន ថាពាក់ព័ន្ធជាមួយសហរដ្ឋអាមេរិក។
ត្បិតទោស ២៧ឆ្នាំ តុលាការកម្ពុជាមិនដាក់គុកលោក កឹម សុខា ក៏ពិតមែន ប៉ុន្តែតុលាការបានឃុំខ្លួនលោក កឹម សុខា នៅក្នុងផ្ទះ ដោយហាមជួបខ្មែរ និងជួបបរទេសដែលទំនងសំដៅលើស្ថានទូតប្រទេសលោកសេរី ដែលកន្លងមកតែងទៅជួបពិភាក្សាជាមួយលោកនៅគេហដ្ឋានរបស់លោកផ្ទាល់។
ក្រៅពីកាត់ទោស ២៧ឆ្នាំ និងហាមឃាត់ខ្មែរ ព្រមទាំងជនបរទេសជួបហើយ ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ ក៏បានដកហូតសិទ្ធិបោះឆ្នោត សិទ្ធិឈរឈ្មោះឲ្យគេបោះឆ្នោត និងសិទ្ធិធ្វើសកម្មភាពនយោបាយពេញមួយជីវិតផងដែរ។
វិធានបន្តបន្ទាប់ដោយប្រើប្រាស់ប្រព័ន្ធតុលាការពីសំណាក់លោក ហ៊ុន សែន ដើម្បីកាត់ទោសលោក កឹម សុខា ហើយបិទសារព័ត៌មាន វីអូឌី ថ្មីៗនេះ ត្រូវបានអ្នកឃ្លាំមើលលើកឡើងថាជាការត្រួសត្រាយផ្លូវរបស់លោក ហ៊ុន សែន ដើម្បីផ្ទេរអំណាចតត្រកូលទៅឲ្យកូនប្រុសរបស់លោក គឺលោក ហ៊ុន ម៉ាណែត៕