មេដឹកនាំខ្មែរដែលក្តោបក្តាប់អំណាចផ្ដាច់មុខនៅកម្ពុជា លោក ហ៊ុន សែន ព្រមានថានឹងទម្លាយលិខិតរបស់រដ្ឋមន្ត្រីជាង ២០ក្រសួងនៅតាមបណ្ដាញសង្គម និងប្រព័ន្ធផ្សព្វផ្សាយ ប្រសិនបើពួកគេនៅតែបន្តធ្វើឲ្យមានកំហុសឆ្គង ឬខុសអក្ខរាវិរុទ្ធទៀតនោះ។
បុរសខ្លាំងកម្ពុជាដែលដឹកនាំរដ្ឋាភិបាលដោយឯកបក្ស លោក ហ៊ុន សែន លើកឡើងក្នុងពិធីចែកសញ្ញាបត្រដល់និស្សិតនៃសាកលវិទ្យាល័យបៀលប្រាយ នៅថ្ងៃទី១៦ ខែមីនា ឆ្នាំ២០២៣ នេះថា កន្លងមកមានតែក្រសួង៤ ទេ ដែលធ្វើការងារបានល្អ គឺក្រសួងមហាផ្ទៃ ក្រសួងសេដ្ឋកិច្ច និងហិរញ្ញវត្ថុ ក្រសួងវប្បធម៌ និងវិចិត្រសិល្បៈ និងក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច ផងដែរ។
មេដឹកនាំរំលោភអំណាចអចិន្ត្រៃយ៍នៅកម្ពុជា លោក ហ៊ុន សែន បញ្ជាក់ថា កន្លងមកមានរដ្ឋមន្ត្រីមួយចំនួនបានដាក់លិខិតមកលោកមិនបានចុះកាលបរិច្ឆេទនោះទេ ហើយលោកក៏បានសរសេរអក្សរប៊ិកក្រហមត្រឡប់ទៅវិញដែរ ប៉ុន្តែរឿងដដែលនេះនៅតែបន្តកើតមានរហូតដល់ពេលនេះ។
មេដឹកនាំខ្មែរដែលដឹកនាំប្រទេសតាមប្រព័ន្ធផ្ដាច់ការ លោក ហ៊ុន សែន ព្រមានថាលោកនឹងទម្លាយលិខិតរបស់រដ្ឋមន្ត្រីមួយចំនួនដែលនៅតែបន្តធ្វើឲ្យមានកំហុសឆ្គង ឬខុសអក្ខរាវិរុទ្ធ តាមបណ្ដាញសង្គម និងប្រព័ន្ធផ្សព្វផ្សាយ ប្រសិនបើលិខិតពួកគេដាក់មកលោកនៅតែបន្តមានកំហុសទៀតនោះ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី១៦ មីនា នេះថា ការលើកឡើងរបស់ប្រមុខរដ្ឋាភិបាលអំពីភាពខ្ជីខ្ជារបស់មន្ត្រីក្រោមឱវាទរបស់ខ្លួន អាចបណ្តាលមកពីហេតុផលចម្បងមួយចំនួន ដូចជាពួកគេសំអាងថាគ្មានបក្សប្រឆាំងរិះគន់ ហើយក៏អាចមកពីពួកគេរវល់តែធ្វើកិច្ចការបក្ស ជាជាងការងារប្រទេសជាតិ និងអាចមកពីភាពគ្មានការទទួលខុសត្រូវដែលជាលក្ខណៈផ្ទាល់ខ្លួនរបស់មន្ត្រីទាំងនោះផងដែរ។
លោក សេក សុជាតិ លើកឡើងថា ប្រសិនបើមានគណបក្សប្រឆាំងរិះគន់ដើម្បីកែលំអការដឹកនាំរបស់រដ្ឋាភិបាល មន្ត្រីទាំងនោះក៏ប្រហែលជាគ្មានភាពខ្ជីខ្ជាបែបនេះដែរ។ លោកបន្ថែមថា ប្រព័ន្ធដឹកនាំដោយឯកបក្សដែលគ្មានគណបក្សប្រឆាំងឃ្លាំមើល គឺជាវិបត្តិមួយសម្រាប់ធានាដល់ការអភិវឌ្ឍប្រទេសជាតិយ៉ាងធ្ងន់ធ្ងរ។
ទាក់ទិននឹងបញ្ហានេះ អ្នកស្រាវជ្រាវការអភិវឌ្ឍសង្គម បណ្ឌិត កែម ឡី ធ្លាប់បានលើកឡើងនៅប្រទេសអូស្ត្រាលី កាលពីពេលដែលលោកនៅមានជីវិតថា រដ្ឋាភិបាលកម្ពុជាដែលដឹកនាំដោយបក្សកាន់អំណាចរបស់លោក ហ៊ុន សែន តែងពង្រីកក្រសួងឲ្យបានច្រើនដើម្បីចែកតំណែងគ្នា ក្នុងគោលដៅពង្រឹងអំណាចរបស់គណបក្សប្រជាជនកម្ពុជា ប៉ុន្តែការងាររបស់ពួកគេសម្រាប់ប្រទេសជាតិ គឺគ្មានប្រសិទ្ធភាពឡើយ។
បណ្ឌិត កែម ឡី លើកឡើងថា នៅប្រទេសជឿនលឿន ដូចជាប្រទេសអូស្ត្រាលី ជាដើម គេព្យាយាមបង្រួមក្រសួងដែលមានការងារក្នុងទម្រង់ដូចគ្នាឲ្យស្ថិតនៅតែមួយក្រសួងប៉ុណ្ណោះ ដូចជាក្រសួងរ៉ែ និងថាមពល ក្រសួងធនធានទឹក និងឧតុនិយម ក្រសួងអភិវឌ្ឍន៍ជនបទ និងក្រសួងបរិស្ថាន ជាដើម ចូលមកក្នុងក្រសួងកសិកម្ម រុក្ខាប្រមាញ់ និងនេសាទ តែមួយប៉ុណ្ណោះ ដើម្បីកុំឲ្យខ្ជះខ្ជាយលុយជាតិ ប៉ុន្តែកម្ពុជាបែរជាព្យាយាមពង្រាយក្រសួងទាំងនេះឲ្យកាន់តែច្រើនទៅវិញ។
កាលពីអាណត្តិទី៥ ឆ្នាំ២០១៣ សមាជិកគណៈរដ្ឋមន្ត្រីនៃរាជរដ្ឋាភិបាលកម្ពុជាដែលដឹកនាំដោយគណបក្សប្រជាជនកម្ពុជា សរុបទាំងអស់មានជាង ២៣០រូប ប៉ុន្តែបើទោះបីជានៅអាណត្តិទី៦ ឆ្នាំ២០១៨ លោក ហ៊ុន សែន បានចេញអនុក្រឹត្យមិនយករដ្ឋលេខាធិការជាសមាជិករដ្ឋាភិបាលបន្តទៀតក៏ដោយ ក៏ពួកគេនៅតែបន្តទទួលប្រាក់ខែពីរដ្ឋាភិបាលដដែល គ្រាន់តែមានរូបភាពល្អមើលថា រដ្ឋាភិបាលរបស់គាត់មានសមាជិកគណៈរដ្ឋមន្ត្រីតិចជាងមុនប៉ុណ្ណោះ។
ប្រទេសកម្ពុជាមានក្រសួងស្ថាប័នទាំងអស់ ២៨ក្រសួង ហើយក្រសួងនីមួយៗ គឺមានរដ្ឋលេខាធិការដ្ឋានចំនួនមួយដូចៗគ្នាទាំងអស់ ក្នុងនោះមានក្រសួងការពារជាតិ ក្រសួងមហាផ្ទៃ និងក្រសួងការបរទេស និងសហប្រតិបត្តិការអន្តរជាតិ ជាដើម៕