អង្គការមូលនិធិសកលសម្រាប់អភិរក្សធម្មជាតិ ហៅកាត់ថា WWF សម្ដែងការសោកស្តាយចំពោះសត្វផ្សោតឈ្មោលមួយក្បាលមានទម្ងន់ ១៦០គីឡូក្រាមបានស្លាប់ ដោយសារការប្រើប្រាស់ឧបករណ៍នេសាទមង។
បើតាមអង្គការមូលនិធិសកលសម្រាប់អភិរក្សធម្មជាតិ WWF បានសរសេរលើហ្វេសប៊ុកកាលពីថ្ងៃទី១៩ ខែមីនា ឆ្នាំ២០២៣ នេះថា នៅក្នុងឆ្នាំ២០២២ កន្លងទៅនេះមានសត្វផ្សោតយ៉ាងហោចណាស់ចំនួន ១០ក្បាលបានស្លាប់ ហើយ ២៨ក្បាលបានស្លាប់ក្នុងរយៈពេល ៣ឆ្នាំចុងក្រោយនេះ។
ករណីនេះ អង្គការ WWF បានអំពាវនាវដល់អាជ្ញាធរមានសមត្ថកិច្ចពាក់ព័ន្ធទាំងអស់ រៀបចំដាក់ចេញនូវវិធានការសមស្របបន្ទាន់ ដើម្បីបញ្ឈប់កុំឲ្យសត្វផ្សោតរងគ្រោះថ្នាក់ស្លាប់បន្តទៀតដោយសារការនេសាទខុសច្បាប់ ដូចជាការប្រើមងនេសាទ និងឧបករណ៍ឆក់ ដែលកំពុងត្រូវបានប្រព្រឹត្តនៅក្នុងតំបន់អភិរក្សសត្វផ្សោត។
ចំណែករដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ ក៏បានចេញសេចក្ដីប្រកាសព័ត៌មានកាលពីថ្ងៃទី១៩ ខែមីនា ឆ្នាំ២០២៣ ឲ្យដឹងថា សត្វផ្សោតឈ្មោលដែលស្លាប់កាលពីពេលថ្មីៗនេះ ស្ថិតនៅតំបន់អភិរក្សសត្វផ្សោតកោះកូនសត្វ ឃុំកោះព្រះ ស្រុកសៀមបូក ខេត្តស្ទឹងត្រែង។
ប្រភពដដែលឲ្យដឹងថា សត្វផ្សោតឈ្មោលដែលស្លាប់មានទម្ងន់ ១៦០គីឡូក្រាម ប្រវែង ២,៣៨ម៉ែត្រ និងមានអាយុប្រមាណ ២០ឆ្នាំ ដែលការស្លាប់នេះដោយសារមានការប្រើឧបករណ៍នេសាទមង ដោយមានស្នាមរយះនៅផ្នែកពោះ ស្នាមជាប់មងនៅគល់កន្ទុយ និងព្រុយចំហៀង។
សេចក្ដីប្រកាសបញ្ជាក់ថា នៅតាមបណ្តោយដងទន្លេមេគង្គនៃខេត្តក្រចេះ និងស្ទឹងត្រែង មានសត្វផ្សោតប្រមាណ ៩០ក្បាលកំពុងរស់នៅ ហើយបច្ចុប្បន្នសត្វផ្សោតទាំងនោះក៏កំពុងរងការគំរាមកំហែងដោយឧបករណ៍នេសាទមង សន្ទូចរនង និងឧបករណ៍ឆក់ ស្របពេលដែលសត្វផ្សោតពេញវ័យអាចបន្តពូជបានមានអាយុចាប់ពី ៧ឆ្នាំ ហើយមានកូនក្នុងរយៈពេល ២ឆ្នាំម្តង។
ករណីនេះ រដ្ឋបាលជលផលអំពាវនាវទៅប្រជានេសាទនៅតំបន់នោះ ឲ្យឈប់ប្រើប្រាស់មង សន្ទូចរនង និងឧបករណ៍នេសាទមិនស្របច្បាប់ដទៃទៀតក្នុងតំបន់សត្វផ្សោតរស់នៅជាបន្ទាន់ ដើម្បីធានានិរន្តរភាពសត្វផ្សោត និងត្រីមេពូជសម្រាប់ការទាក់ទាញទេសចរណ៍ បង្កើនកេរ្តិ៍ឈ្មោះប្រជាជាតិ និងទុកសម្រាប់កូនចៅជំនាន់ក្រោយៗបានស្គាល់ និងថែរក្សាបន្ត ខណៈសត្វផ្សោតឈ្មោលដែលស្លាប់កាលពីពេលថ្មីៗនេះ គឺជាសត្វផ្សោតទីមួយនៃដើមឆ្នាំ២០២៣។
កាលពីថ្ងៃទី១៨ ខែធ្នូ ឆ្នាំ២០២២ សត្វផ្សោតអ៊ីរ៉ាវ៉ាឌី (Irrawaddy) មួយក្បាលដែលមានអាយុចន្លោះពី ១៥ឆ្នាំទៅ ២០ឆ្នាំ និងមានទម្ងន់ ១៦២គីឡូក្រាម ត្រូវបានប្រទះឃើញស្លាប់នៅក្បែរអន្លង់មួយជាប់ព្រំប្រទល់រវាងខេត្តស្ទឹងត្រែង និងខេត្តក្រចេះ ដោយសារជាប់មងនេសាទ។
ក្រោយមក នៅថ្ងៃទី២២ ខែធ្នូ ឆ្នាំ២០២២ សត្វផ្សោតញីពេញវ័យមួយក្បាលទៀតដែលមានអាយុចន្លោះ ៧ឆ្នាំទៅ ១០ឆ្នាំទម្ងន់ប្រហែល ៨៥គីឡូក្រាម ត្រូវបានគេប្រទះឃើញស្លាប់អណ្ដែតទឹកនៅចំណុចឃុំកោះទ្រង់ ក្រុងក្រចេះ ខេត្តក្រចេះ ដោយសារជាប់មងនេសាទដូចគ្នាដែរ៕