35 C
Phnom Penh

នាយករដ្ឋមន្ត្រី​ជប៉ុន​ទៅ​ជួប​លោក ហ្សេឡេនស្គី ខណៈ​លោក ស៊ី ជួប​ជន​ត្រូវ​ចោទ​ឧក្រិដ្ឋកម្ម​សង្គ្រាម

ដោយ ឌឹ ខេមបូឌា ដេលី

បទវិភាគ

ក្រសួង​ការបរទេស​ជប៉ុន ប្រកាស​ព័ត៌មាន​ថា​លោក​នាយករដ្ឋមន្ត្រី Fumio Kishida ត្រូវ​ជួប​ជាមួយ​លោក​ប្រធានាធិបតី​អ៊ុយក្រែន លោក វ៉ូឡូឌីមៀ ហ្សេឡេនស្គី ក្នុង​ដំណើរ​ទស្សនកិច្ច​ដ៏​ភ្ញាក់ផ្អើល​មួយ​ទៅ​កាន់​ទីក្រុង​គៀវ នៅ​ថ្ងៃ​អង្គារ​នេះ។

ទីភ្នាក់ងារ​សារព័ត៌មាន​ជប៉ុន Kyodo នៅ​ថ្ងៃ​អង្គារ ទី​២១ ខែ​មីនា បាន​ស្រង់​សេចក្ដី​ប្រកាស​ព័ត៌មាន​របស់​ក្រសួង​ការបរទេស​ជប៉ុន មក​ចុះផ្សាយ​ថា លោក គីស៊ីដា នឹង​បញ្ជាក់​ប្រាប់​ទៅ​លោក ហ្សេឡេនស្គី ពី​ការ​គោរព​ចំពោះ​វីរភាព​ក្លាហាន និង​ឆន្ទៈ​តស៊ូ​យ៉ាង​មោះមុត​របស់​ប្រជាជន​អ៊ុយក្រែន ដែល​ក្រោក​ឈរ​ឡើង​ដើម្បី​ការពារ​ប្រទេស​ជាតិ​របស់​ខ្លួន​ក្នុង​សង្គ្រាម​ឈ្លានពាន​របស់​រុស្ស៊ី។

បើ​តាម​សេចក្ដី​ប្រកាស​ព័ត៌មាន​នេះ លោក គីស៊ីដា នឹង​បង្ហាញ​ផង​ដែរ​ពី​សាមគ្គីភាព និង​ការ​គាំទ្រ​ឥត​ងាករេ​របស់​ជប៉ុន និង​ក្រុម​ប្រទេស G-7 ចំពោះ​ប្រជាជន​អ៊ុយក្រែន។

តាម​ទីភ្នាក់ងារ​សារព័ត៌មាន​ជប៉ុន Kyodo នាយករដ្ឋមន្ត្រី​ជប៉ុន លោក Fumio Kishida ដែល​ធ្វើ​ទស្សនកិច្ច​ទៅ​កាន់​ប្រទេស​អ៊ុយក្រែន នៅ​ថ្ងៃ​អង្គារ ទី​២១ ខែ​មីនា នេះ មួយ​ថ្ងៃ​បន្ទាប់ពី​លោក​បាន​ជួប​ពិភាក្សា​ការងារ​ជាមួយ​នាយករដ្ឋមន្ត្រី​ឥណ្ឌា លោក ណារិនដ្រា ម៉ូឌី ក្នុង​ទីក្រុង​ញូវដេលី ហើយ​លោក​ត្រូវ​ចេញ​ដំណើរ​ទៅ​រដ្ឋធានី​គៀវ ប្រទេស​អ៊ុយក្រែន។

នេះ​ជា​លើក​ទី​មួយ​ហើយ​ដែល​មេដឹកនាំ​នៅ​អាស៊ី​ខាងកើត ធ្វើ​ដំណើរ​ទៅ​ប្រទេស​អ៊ុយក្រែន ដែល​កំពុង​ហែកហួរ​ដោយ​សង្គ្រាម​ឈ្លានពាន​ពី​មហាអំណាច​រុស្ស៊ី ហើយ​ជួប​ជាមួយ​ប្រធានាធិបតី​អ៊ុយក្រែន លោក ហ្សេឡេនស្គី ត្រូវ​បាន​ចាត់ទុក​ថា​ជា​វីរជន​នៃ​ប្រជាជន​អ៊ុយក្រែន។ ជប៉ុន​ជា​ប្រទេស​មួយ​ក្នុង​ចំណោម ៥៤​ប្រទេស ដែល​តែងតែ​បញ្ជូន​រដ្ឋមន្ត្រី​ការពារ​ជាតិ និង​រដ្ឋមន្ត្រី​ការបរទេស​ទៅ​ប្រជុំ​ក្នុង​ក្រុម​ប្រទេស​ផ្ដល់​ជំនួយ​ទៅ​ឱ្យ​អ៊ុយក្រែន។ តែ​សម្រាប់​ជប៉ុន មិនទាន់​ឃើញ​ប្រកាស​ផ្ដល់​ជំនួយ​យោធា​ទៅ​ឱ្យ​អ៊ុយក្រែន នោះ​ទេ លើកលែង​ជំនួយ​សាច់ប្រាក់​សុទ្ធ និង​ជំនួយ​មនុស្សធម៌។

យ៉ាងណា ការ​ដែល​នាយករដ្ឋមន្ត្រី​ជប៉ុន ទៅ​ទីក្រុង​គៀវ ហើយ​ជួប​នឹង​ប្រធានាធិបតី​អ៊ុយក្រែន ត្រូវ​បាន​កត់ត្រា​ថា​ជា​មេដឹកនាំ​ប្រទេស​ឧស្សាហកម្ម​ជឿនលឿន G-7 ចុងក្រោយ​គេ​ហើយ​ដែល​ទៅ​ជាន់​ដី​ប្រទេស​មួយ​ក្នុង​ទ្វីប​អឺរ៉ុប​កំពុង​ធ្លាក់​ក្នុង​ភ្នក់ភ្លើង​សង្គ្រាម។ វត្តមាន​របស់​នាយករដ្ឋមន្ត្រី​ជប៉ុន នៅ​លើ​ទឹកដី​អ៊ុយក្រែន គឺជា​ការ​បង្ហាញ​សាមគ្គីភាព និង​ការ​គាំទ្រ​ឥត​រួញរា​ចំពោះ​អ៊ុយក្រែន ក្នុង​នាម​ជប៉ុន​ធ្វើជា​ប្រធាន​នៃ​ក្រុម​ប្រទេស G-7 នៅ​ឆ្នាំ​២០២៣ នេះ។

ដំណើរ​ទស្សនកិច្ច​របស់​នាយករដ្ឋមន្ត្រី​ជប៉ុន ទៅ​ជួប​លោក ហ្សេឡេនស្គី នៅ​ថ្ងៃ​អង្គារ ទី​២១ មីនា នេះ គឺ​មួយ​ថ្ងៃ​បន្ទាប់ពី​ប្រធានាធិបតី​ចិន ទៅ​ជួប​លោក វ៉្លាឌីមៀរ ពូទីន ប្រធានាធិបតី​រុស្ស៊ី។ ទស្សនកិច្ច​របស់​លោក ស៊ី ទៅ​ជួប​លោក ពូទីន ក្រោយ​ប៉ុន្មាន​ថ្ងៃ​ប៉ុណ្ណោះ​ដែល​លោក ពូទីន បាន​ក្លាយ​ជា​ជន​ត្រូវ​ចោទ​ពី​បទ​ឧក្រិដ្ឋកម្ម​សង្គ្រាម​ដោយ​តុលាការ​ឧក្រិដ្ឋកម្ម​អន្តរជាតិ ICC ដែល​មាន​មូលដ្ឋាន​នៅ​ក្រុង​ឡាអេ ប្រទេស​ហុឡង់ដ៍។

លោក ស៊ី ជីនពីង និង​លោក ពូទីន បាន​ជួប​ប្រជុំ​គ្នា​ដោយ​បាន​ពិភាក្សា​ពី​ខ្លឹមសារ​នៃ​ឯកសារ ១២​ចំណុច​របស់​ប្រទេស​ចិន ស្ដីពី​ជម្លោះ​នៅ​អ៊ុយក្រែន ដែល​ក្នុង​នោះ​រួមមាន​ការ​អំពាវនាវ​ឲ្យ​មាន​ការ​សន្ទនា​គ្នា​ឈាន​ទៅ​រក​ការ​អនុវត្ត​បទ​ឈប់​បាញ់​គ្នា។ ជំនួប​ថ្ងៃទី​២ រវាង​លោក ស៊ី ជីនពីង និង​លោក ពូទីន ក្នុង​ក្រុង​មូស្គូ នា​ថ្ងៃទី​២១ ខែ​មីនា ឆ្នាំ​២០២៣ គឺជា​ជំនួប​ផ្លូវការ​បន្ទាប់ពី​ជំនួប​ថ្ងៃទី​១ មិន​ជា​ផ្លូវការ​កន្លងមក​នោះ​មាន​រយៈពេល​ដល់ ៤​ម៉ោង​កន្លះ។ ក្នុង​ជំនួប​នៅ​ថ្ងៃទី​២១ មីនា នេះ លោក ស៊ី ជីនពីង នឹង​ជជែក​លម្អិត​អំពី​ខ្លឹមសារ​រក​សន្តិភាព​ទាំង ១២​ចំណុច​ជាមួយ​នឹង​លោក ពូទីន។

ទោះជា​យ៉ាងណា​ក៏ដោយ សហរដ្ឋ​អាមេរិក​បាន​ថ្លែង​បង្ហាញ​នូវ​ការ​មិន​ទុកចិត្ត និង​ចោទ​ថា ផែនការ​សន្តិភាព​របស់​ប្រទេស​ចិន​ជុំវិញ​ការ​បញ្ចប់​សង្គ្រាម​នៅ​អ៊ុយក្រែន អាច​ជា​លេស​ក្នុង​ការ​ពន្យារ​ពេល​ដើម្បី​ជួយ​រុស្ស៊ី​ពង្រឹង​កងទ័ព​តែប៉ុណ្ណោះ។

ចំពោះ​វត្តមាន​របស់​មេដឹកនាំ​ចិន​ក្នុង​ក្រុង​មូស្គូ គឺជា​ដំណើរ​ដែល​ចង់​មក​ជួយ​រុស្ស៊ី​នោះ​ទៅវិញ។

ប្រមុខ​ការទូត​សហរដ្ឋ​អាមេរិក​បាន​ថ្លែង​ថា ពិភពលោក​ទាំងមូល​មិន​ត្រូវ​ចាញ់​កល​ចំពោះ​វត្តមាន​មេដឹកនាំ​ប្រទេស​ចិន ដែល​មក​ជួប​ប្រធានាធិបតី​រុស្ស៊ី​នោះ​ទេ។ លោក Anthony Blinken បាន​ព្រមាន​ទុក​ជា​មុន​ថា ជំនួប​រវាង​មេដឹកនាំ​រុស្ស៊ី និង​ចិន បើ​រុស្ស៊ី​យល់ព្រម​ឱ្យ​មាន​បទ​ឈប់​បាញ់​គ្នា គឺជា​ល្បិច​កិច្ចកល​ដែល​រុស្ស៊ី​ត្រូវការ​ពង្រឹង​ទ័ព​របស់​ខ្លួន​ឡើងវិញ ដែល​លោក​ថា​រុស្ស៊ី​កំពុង​ចុះ​ខ្សោយ​ទ័ព​ថ្មើរជើង និង​ការ​ថមថយ​សព្វាវុធ។

តាម​គំនិត​របស់​សហរដ្ឋ​អាមេរិក ការ​ដក​ទ័ព​រុស្ស៊ី​ទាំងអស់​ចេញពី​ទឹកដី​អ៊ុយក្រែន គឺជា​កត្តា​ចាំបាច់​នៃ​សញ្ញា​បញ្ឈប់​ការ​ឈ្លានពាន។ តែ​នៅ​ក្នុង​ផែនការ​សន្តិភាព​របស់​ចិន ពុំ​មាន​បញ្ជាក់​ត្រង់​នេះ​ទេ ហើយ​សូម្បី​ចំណុច​អំពី​អធិបតេយ្យភាព​ក៏​ពុំ​បញ្ជាក់​ច្បាស់លាស់​ដែរ។

តែ​បែប​នេះ​ក្ដី ក្រសួង​ការបរទេស​ចិន អះអាង​ថា ប្រធានាធិបតី ស៊ី ជីនពីង អាច​នឹង​ធ្វើ​ទំនាក់ទំនង​តាម​ប្រព័ន្ធ​វីដេអូ conference ជាមួយ​នឹង​លោក ហ្សេឡេនស្គី ដើម្បី​ជជែក​អំពី​ផែនការ​សន្តិភាព​ទាំង ១២​ចំណុច​ដែល​ចិន​ស្នើ​ឡើង​នេះ។

អ្នក​សង្កេតការណ៍​មើល​ឃើញ​ថា ចិន​កំពុង​ចង់​បង្ហាញ​ថា ខ្លួន​គេ​អព្យាក្រឹត្យ មិន​លម្អៀង​ទៅ​រក​រុស្ស៊ី​ទេ ហើយ​ក៏​មិន​លម្អៀង​ទៅ​រក​អ៊ុយក្រែន​ដែរ។

តែ​បើ​លោក ស៊ី មិន​បាន​ទៅ​ជួប​លោក ហ្សេឡេនស្គី ដូច​លោក អង់តេញូ គូតារ៉េស អគ្គលេខាធិការ​អង្គការ​សហប្រជាជាតិ ដែល​បាន​ទៅ​ជួប​លោក ពូទីន នៅ​ក្រុង​មូស្គូ ហើយ​ទៅ​ជួប​លោក ហ្សេឡេនស្គី នៅ​ក្រុង​គៀវ វា​ពុំ​មាន​សញ្ញា​ណា​មួយ​បញ្ជាក់​ថា ចិន​កំពុង​ឈរ​នៅ​លើ​វិថី​អព្យាក្រឹត្យ​នោះ​ទេ ទោះជា​ជួប​លោក ហ្សេឡេនស្គី តាម​ទូរស័ព្ទ ឬ​តាម​ ប្រព័ន្ធ​វីដេអូ conference ក៏ដោយ​នោះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស