26 C
Phnom Penh

លោក ហ៊ុន សែន អះអាង​ថា​លោក​ជា​អ្នក​បញ្ជា​ឱ្យ​ចាប់​លោក យឹម ស៊ីណន និង​លោក ហ៊ុន កុសល

ដោយ ឌឹ ខេមបូឌា ដេលី

បទវិភាគ

បុរស​ខ្លាំង លោក ហ៊ុន សែន ប្រកាស​ជា​សាធារណៈ​ថា លោក​ជា​អ្នក​បញ្ជា​ឲ្យ​សមត្ថកិច្ច​ចាប់​ខ្លួន​លោក យឹម ស៊ីណន និង​លោក ហ៊ុន កុសល កាលពី​ថ្ងៃទី​២១ មីនា ត្រឹមតែ​ជាង ១​ម៉ោង​ប៉ុណ្ណោះ ព្រោះ​ពួកគេ​ប្រមាថ​ព្រះចេស្តា​ព្រះមហាក្សត្រ។

ក្នុង​ពិធី​ប្រគល់​សញ្ញាបត្រ​ដល់​និស្សិត​វិទ្យាស្ថាន​វ៉ាន់ដា នា​ថ្ងៃ​ពុធ នេះ បុរស​ខ្លាំង​ក្រាញ​អំណាច លោក ហ៊ុន សែន ថ្លែង​ថា ការ​ដែល​សមត្ថកិច្ច​ចាប់​ខ្លួន​លោក យឹម ស៊ីណន បន្ទាប់ពី​លោក​បាន​បង្ហោះ​នៅ​លើ​ហ្វេសប៊ុក​ថា «បើ​តាម​សំឡេង​ពលរដ្ឋ​តាម​ហាង​កាហ្វេ ថ្ងៃនេះ​យើង​អាច​ឃើញ​ច្បាស់​ថា​នរណា​ជា​ស្ដេច​ផែនដី​ដី​ពិតប្រាកដ»

ចំពោះ​ការ​ចាប់​ខ្លួន​លោក ហ៊ុន កុសល វិញ ដោយសារ​បាន​សរសេរ​សារ​បង្ហោះ​លើ​ហ្វេសប៊ុក​ដោយ​ធ្វើ​ឲ្យ​មាន​ការ​ភ័ន្តច្រឡំ និង​ជា​ការ​ប្រមាថ​ព្រះចេស្ដា​ព្រះមហាក្សត្រ។

ក្រៅពី​ចោទប្រកាន់​ហើយ បុរស​ខ្លាំង​កាន់​អំណាច ៣៨​ឆ្នាំ​រូប​នេះ​ប្រកាស​មិន​លើកលែង និង​អធ្យាស្រ័យ​ឲ្យ​លោក យឹម ស៊ីណន និង​លោក ហ៊ុន កុសល នោះ​ឡើយ ទោះបីជា​លោក យឹម ស៊ីណន បាន​លុប​សារ​ចេញ​វិញ​ក៏ដោយ។ លោក ហ៊ុន សែន ក៏​បាន​ចោទប្រកាន់​លើ​សកម្មជន​គណបក្ស​សង្គ្រោះ​ជាតិ​ទាំង​ពីរ​នាក់​ថា បាន​យក​រូបភាព​កន្លែង​បាំង​ក្លោះ​មក​ប្រមាថ​ព្រះចេស្តា​ព្រះមហាក្សត្រ និង​រូបលោក។

លោក​បាន​ខំ​បកស្រាយ​ទៀត​ថា មិន​បាន​អង្គុយ​ទន្ទឹម​នឹង​ព្រះមហាក្សត្រ​ដូច​មាន​ការ​បង្ហោះ​រូបភាព​លើ​បណ្ដាញ​សង្គម​ឡើយ ដោយ​ចាត់ទុក​ការ​បង្ហោះ​សារ និង​រូបភាព​នោះ​ថា​ជា​ការ​បំភ្លៃ​ការពិត​ក្នុង​ចេតនា​ប្រមាថ​លើ​រូបលោក និង​ព្រះមហាក្សត្រ។ ជាមួយ​គ្នា​នេះ លោក​ក៏​បាន​ការពារ​ខ្លួនឯង​ចំពោះ​ការ​ថ្លែង​នា​ថ្ងៃ​នេះ​ថា មិន​បាន​ដាក់​សម្ពាធ​ទៅ​តុលាការ​ដើម្បី​ឲ្យ​ចោទប្រកាន់​លើ​លោក យឹម ស៊ីណន និង​លោក ហ៊ុន កុសល នោះ​ទេ ប៉ុន្តែ​ការ​អះអាង​នេះ​ផ្ទុយ​ពី​ការពិត ដោយសារ​លោក​ជំរុញ​ឲ្យ​ចាត់​វិធានការ និង​ប្រកាស​មិន​លើកលែង​សកម្មជន​គណបក្ស​សង្គ្រោះ​ជាតិ​ទាំង​ពីរ​នេះ។

ទោះបីជា​លោក ហ៊ុន សែន ប្រកាស​ក្ដែងៗ​តាំង​ខ្លួន​ជា​អ្នក​ការពារ​ព្រះមហាក្សត្រ​ក្ដី ប៉ុន្តែ​លោក​ខ្លួនឯង​នេះ​ហើយ​ដែល​ជា​អ្នក​ប្រមាថ​អង្គ​ព្រះមហាក្សត្រ​ទាំង​បច្ចុប្បន្ន និង​កន្លងមក​នោះ។

ជាក់ស្ដែង កន្លងមក លោក​ប្រកាស​ថា ទោះបីជា​ម៉ែ​ស្ដេច និង​ឪ​ស្ដេច​ក៏​លោក​មិន​ខ្លាច​ដែរ ខណៈ​កាលពី​ឆ្នាំ​២០០៥ លោក ហ៊ុន សែន បាន​គំរាម​រំលាយ​របប​រាជា​និយម ហើយ​ដាក់​ជំនួស​មក​វិញ​នូវ​របប​សាធារណរដ្ឋ ប្រសិនបើ​ព្រះមហាក្សត្រ​មិន​ព្រម​ឡាយព្រះហស្តលេខា​លើ​សន្ធិសញ្ញា​បំពេញ​បន្ថែម​ស្ដីពី​ព្រំដែន​កម្ពុជា-វៀតណាម។

ក្រោយពី​ចាប់​ខ្លួន​នៅ​ថ្ងៃ​ពុធ​នេះ សមត្ថកិច្ច​បាន​បញ្ជូន​លោក យឹម ស៊ីណន និង​លោក ហ៊ុន កុសល ទៅ​តុលាការ ដើម្បី​សាកសួរ​បន្ទាប់ពី​បុរស​ខ្លាំង​លោក ហ៊ុន សែន ចោទ​ថា​ប្រមាថ​ចំពោះ​អង្គ​ព្រះមហាក្សត្រ។

លោក យឹម ស៊ីណន គឺជា​អតីត​ប្រធាន​ចលនា​យុវជន​គណបក្ស​សង្គ្រោះ​ជាតិ​ប្រចាំ​ប្រទេស​កូរ៉េខាងត្បូង។ លោក​ធ្លាប់​ត្រូវ​បាន​តុលាការ​ក្រុង​ភ្នំពេញ​ចោទប្រកាន់​ពី​បទ «រួម​គំនិត​ក្បត់ និង​ញុះញង់» ពាក់ព័ន្ធ​រឿង​ដំណើរ​វិលត្រឡប់​របស់​លោក សម រង្ស៊ី កាលពី​ឆ្នាំ​២០១៩។

ពាក់ព័ន្ធ​នឹង​ការ​ចាប់​ខ្លួន​លោក ហ៊ុន កុសល និង​លោក យឹម ស៊ីណន នេះ នាយករង​ទទួល​បន្ទុក​កិច្ចការ​តំបន់​អាស៊ី​របស់​អង្គការ​ឃ្លាំមើល​សិទ្ធិមនុស្ស​អន្តរជាតិ (Human Rights Watch) លោក Phil Robertson អះអាង​ថា សេរីភាព​នៃ​ការ​បញ្ចេញមតិ​នឹង​រលាយ​សាបសូន្យ​ក្រោម​រដ្ឋាភិបាល​របស់​លោក ហ៊ុន សែន ខណៈ​ដែល​ការ​បោះឆ្នោត​ជាតិ​ជិត​ចូល​មក​ដល់​ក្នុង​ខែ​កក្កដា។

លោក​បន្ត​ថា ការ​ចែករំលែក​មតិ​នៅ​លើ​ហ្វេសប៊ុក​អំពី​ពិធី​របស់​រដ្ឋាភិបាល​មិន​គួរ​ចាត់ទុក​ថា​ជា​បទឧក្រិដ្ឋ​នោះ​ទេ ដូច្នេះ​ការពិត គឺ​សកម្មជន​នយោបាយ យឹម ស៊ីណន និង​លោក ហ៊ុន កុសល មិន​បាន​ធ្វើ​អ្វី​ដែល​ពួកគេ​គួរ​ត្រូវ​បាន​ឃុំ​ខ្លួន​នោះ​ឡើយ។

លោក​បន្ត​ថា គ្មាន​មន្ត្រី​ណា​ម្នាក់​ហ៊ាន​ផ្គើន​នឹង​ការ​វាយតម្លៃ​របស់​លោក ហ៊ុន សែន ក្នុង​ពេល​ដ៏​រសើប​នេះ​ទេ ដូច្នេះ​សកម្មជន​ទាំង​ពីរ​នាក់​នេះ​ទំនង​ជា​ប្រឈមមុខ​នឹង​ការ​ឃុំ​ខ្លួន​រយៈពេល​វែង អម​ដោយ​ការ​កាត់ក្តី​នៅ​តុលាការ​កង់ហ្គូរូ​លើ​បទ​ចោទ​ដោយ​ប្រឌិត និង​ដោយ​ហេតុផល​នយោបាយ។

លោក Phil Robertson អះអាង​ថា ប្រសិនបើ​សិទ្ធិមនុស្ស និង​យុត្តិធម៌​នៅតែ​មាន​អត្ថន័យ​នៅ​ក្នុង​ប្រទេស​កម្ពុជា អ្នក​ទាំង​ពីរ​នេះ​គួរ​ត្រូវ​បាន​ដោះលែង​ជាបន្ទាន់ និង​ដោយ​គ្មាន​លក្ខខណ្ឌ ហើយ​មិន​មាន​ការ​ចោទប្រកាន់​ណា​មួយ​ប្រឆាំង​ពួកគេ​នោះ​ឡើយ។

ទោះជា​យ៉ាងណា​ក៏ដោយ លោក ហ៊ុន សែន នៅ​ថ្ងៃ​នេះ​បាន​និយាយ​រួច​ហើយ​ថា លោក​នឹង​មិន​អត់ឱន​ឲ្យ​លោក យឹម ស៊ីណន និង​លោក ហ៊ុន កុសល នោះ​ឡើយ។

ក្រមព្រហ្មទណ្ឌ​នៃ​ប្រទេស​កម្ពុជា​ចែង​ថា ជន​ណា​ដែល​ហ៊ាន​ប្រមាថ​ដល់​អង្គ​ព្រះមហាក្សត្រ​នឹង​ត្រូវ​ផ្ដន្ទាទោស​ដាក់​គុក​ចំនួន​ប្រាំ​ឆ្នាំ និង​ពិន័យ​ជា​ប្រាក់​ចំនួន ១០​លាន​រៀល ឬ ២៥០០​ដុល្លារ​ក្នុង​ម្នាក់៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស