35 C
Phnom Penh

លោក ស៊ី ចាកចេញ​ពី​ក្រុង​មូស្គូ​ជាមួយ​ការ​លើក​ទឹកចិត្ត​ពី​លោក ពូទីន ចំពោះ​ផែនការ​សន្តិភាព​សម្រាប់​អ៊ុយក្រែន

ដោយ ឌឹ ខេមបូឌា ដេលី

បទវិភាគ

ប្រធានាធិបតី​ចិន លោក ស៊ី ជីនពីង ធ្វើ​ដំណើរ​ចាកចេញ​ពី​ទីក្រុង​មូស្គូ ប្រទេស​រុស្ស៊ី ហើយ​នៅ​ថ្ងៃ​ពុធ ទី​២២ មីនា នេះ បន្ទាប់ពី​បាន​ចូលរួម​ក្នុង​ជំនួប​កំពូល​ជាមួយ​ប្រធានាធិបតី​រុស្ស៊ី វ្ល៉ាឌីមៀរ ពូទីន។

ទីភ្នាក់ងារ​សារព័ត៌មាន AFP នៅ​ថ្ងៃ​ពុធ ទី​២២ ខែ​មីនា នេះ បាន​ធ្វើ​សេចក្ដី​រាយការណ៍​ថា​យន្តហោះ​ដឹក​លោក ស៊ី ជីនពីង បាន​ចេញពី​អាកាសយានដ្ឋាន Vnukovo នៃ​ទីក្រុង​មូស្គូ បន្ទាប់ពី​មេដឹកនាំ​ចិន​ទទួល​ការ​សាទរ​នៃ​ការ​ជូនដំណើរ​ដោយ​ការ​ប្រគំ​បទ​ភ្លេង​ជាតិ​រុស្ស៊ី និង​ចិន។

វត្តមាន​របស់​ប្រធានាធិបតី​ចិន នៅ​ក្រុង​មូស្គូ ធ្វើ​ឱ្យ​លោក ស៊ី ជីនពីង ក្លាយ​ជា​មេដឹកនាំ​នៃ​ប្រទេស​មហាអំណាច​នៅ​ឯ​ក្រុមប្រឹក្សា​សន្តិសុខ​អង្គការ​សហប្រជាជាតិ​ដំបូង​គេ​ដែល​បាន​ចាប់​ដៃ​លោក ពូទីន តែ​ប៉ុន្មាន​ថ្ងៃ​ប៉ុណ្ណោះ​បន្ទាប់ពី​តុលាការ​ឧក្រិដ្ឋកម្ម​អន្តរជាតិ ICC ចេញ​ដីកា​ចាប់​ខ្លួន​លោក ពូទីន ប្រធានាធិបតី​រុស្ស៊ី ករណី​ឧក្រិដ្ឋកម្ម​សង្គ្រាម​នៅ​អ៊ុយក្រែន។

លោក ស៊ី ជីនពីង ធ្វើ​ទស្សនកិច្ច​នៅ​រុស្ស៊ី រយៈពេល ៣​ថ្ងៃ​ដោយ​ចាប់ផ្ដើម​កាលពី​ថ្ងៃ​ចន្ទ​ដើម​សប្ដាហ៍​នេះ​មក។ លោក ស៊ី ជីនពីង កាលពី​ថ្ងៃ​អង្គារ បាន​ចុះហត្ថលេខា​លើ​កិច្ចព្រមព្រៀង​មួយ​ជាមួយ​សមភាគី​រុស្ស៊ី របស់​លោក គឺ​លោក​ប្រធានាធិបតី វ្ល៉ាឌីមៀរ ពូទីន ដែល​ជា​ការ​ជំរុញ​ទំនាក់ទំនង​រវាង​ប្រទេស​ទាំង​ពីរ​ចូល​ក្នុង​យុគសម័យ​ថ្មី​មួយ​នៃ​កិច្ចសហប្រតិបត្តិការ ខណៈ​មេដឹកនាំ​ទាំង​ពីរ​ពិភាក្សា​គ្នា​ជុំវិញ​ជម្លោះ​ប្រដាប់​អាវុធ​រវាង​រុស្ស៊ី និង​អ៊ុយក្រែន ដែល​ក្រុម​បស្ចិម​ប្រទេស​ចាត់ទុក​ជា​សង្គ្រាម​រុស្ស៊ី​ឈ្លានពាន​អ៊ុយក្រែន។

នៅ​ក្នុង​ជំនួប​នោះ លោក ស៊ី ប្រកាស​ពី​ការ​ចុះ​កិច្ចព្រមព្រៀង​មួយ​ធ្វើឡើង​បន្ទាប់ពី​បាន​ជួប​ពិភាក្សា​ជាមួយ​លោក ពូទីន នៅ​ឯ​វិមាន​ក្រឹមឡាំង កាលពី​ថ្ងៃ​អង្គារ។ នា​ឱកាស​នោះ លោក​ប្រធានាធិបតី​ចិន បាន​បញ្ជាក់​ថា ប្រទេស​ទាំង​ពីរ​បាន​ចុះហត្ថលេខា​លើ​សេចក្ដី​ថ្លែងការណ៍​មួយ​ស្ដីពី​ការ​ពង្រឹង​ទំនាក់ទំនង​ភាព​ជា​ដៃគូ​យុទ្ធសាស្ត្រ និង​ទំនាក់ទំនង​ទ្វេភាគី​ក្នុង​យុគសម័យ​ថ្មី​នេះ។

តែ​ជាមួយ​គ្នា​នេះ លោក ស៊ី ទទូច​ថា ចិន និង​រុស្ស៊ី គួរតែ​ធ្វើការ​ជាមួយ​គ្នា​ឱ្យ​កាន់តែ​ជិតស្និទ្ធ​បន្ថែម​ទៀត​ដើម្បី​ជំរុញ​កិច្ច​សហប្រតិបត្តិការ​គ្រប់​ជ្រុងជ្រោយ។

ចំពោះ​លោក ពូទីន វិញ ក៏​បាន​លើកឡើង​ថា រាល់​កិច្ចព្រមព្រៀង​ទាំងអស់​ត្រូវ​បាន​សម្រេច​ឡើង គឺជា​អាទិភាព​ទាំង​រុស្ស៊ី និង​ចិន។

នៅ​ក្នុង​ដំណើរ​ទស្សនកិច្ច​នៅ​ក្រុង​មូស្គូ នេះ លោក ស៊ី ក៏​បាន​នាំ​ទៅ​ជាមួយ​នូវ​ផែនការ​សន្តិភាព ១២​ចំណុច​របស់​ចិន ដែល​មាន​ក្រុង​ប៉េកាំង ចង់​ដើរ​តួនាទី​ជា​យន្តការី​ដើម្បី​ពន្លត់​ភ្នក់ភ្លើង​សង្គ្រាម​រវាង​រុស្ស៊ី និង​អ៊ុយក្រែន។

វិមាន​ក្រឹមឡាំង បាន​និយាយ​ថា ប្រធានាធិបតី​រុស្ស៊ី លោក វ្ល៉ាឌីមៀរ ពូទីន បាន​ទទួល​យក​សំណើ​របស់​ចិន ដែល​ចង់​ធ្វើជា​អ្នក​សម្របសម្រួល​ឱ្យ​មាន​ការ​ចរចា​រវាង​រុស្ស៊ី និង​អ៊ុយក្រែន។

អ្នក​នាំពាក្យ​វិមាន​ក្រឹមឡាំង លោក Dmitry Peskov បាន​និយាយ​ទៅកាន់​អ្នក​សារព័ត៌មាន​ថា មេដឹកនាំ​ទាំង​ពីរ​បាន​ពិភាក្សា​អំពី​ផែនការ​សន្តិភាព​សម្រាប់​អ៊ុយក្រែន ដែល​ស្នើ​ឡើង​ដោយ​ទីក្រុង​ប៉េកាំង។ លោក Peskov បាន​និយាយ​ថា លោក ពូទីន និង​លោក ស៊ី ជីនពីង ផ្លាស់ប្ដូរ​ទស្សនៈ​ស្ដីពី​អ៊ុយក្រែន ហើយ​ពិត​ណាស់​ប្រធានាធិបតី ពូទីន បាន​ផ្តល់​ការ​ពន្យល់​យ៉ាង​ទូលំទូលាយ​ដើម្បី​ឱ្យ​លោក​ប្រធានាធិបតី ស៊ី អាច​យល់​ពី​ស្ថានភាព​នៅ​អ៊ុយក្រែន ដែល​ជា​ជំហរ​របស់​រុស្ស៊ី។

កាលពី​ថ្ងៃទី​២៤ ខែ​កុម្ភៈ ឆ្នាំ​២០២៣ ជា​ខួប​មួយ​ឆ្នាំ​នៃ​សង្គ្រាម​លើ​ទឹកដី​អ៊ុយក្រែន ដែល​ជា​សង្គ្រាម​មហាអំណាច​រុស្ស៊ី ឈ្លានពាន​ប្រទេស​ដែល​មាន​ព្រំដែន​ជាប់​គ្នា។ ចិន​បាន​បញ្ចេញ​ផែនការ​សន្តិភាព ១២​ចំណុច​របស់​ខ្លួន ដោយ​អំពាវនាវ​ឱ្យ​មាន​ការ​សន្ទនា​រវាង​ភាគី​ទាំង​ពីរ តែ​មិន​បាន​រួម​បញ្ចូល​ផែនទី​បង្ហាញ​ផ្លូវ​ឆ្ពោះ​ទៅ​រក​ការ​បញ្ចប់​សង្គ្រាម​នោះ​ទេ ព្រោះតែ​ដូចនេះ​ហើយ​បាន​នាំ​ឱ្យ​ប្រធានាធិបតី​អ៊ុយក្រែន សុំ​ជួប​លោក ស៊ី ដោយ​ផ្ទាល់​ដើម្បី​សុំ​បន្ថែម ២​ចំណុច​ទៀត។

ពីរ​ចំណុច​នោះ លោក ហ្សេឡេនស្គី ស្នើ​ឱ្យ​រុស្ស៊ី​ដក​ទ័ព​ឱ្យ​អស់​ចេញពី​ដែនដី​អ៊ុយក្រែន គឺ​ទន្ទឹម​គ្នា​នឹង​ការ​ប្រកាស​បទ​ឈប់​បាញ់​គ្នា ហើយ​ទី​២ ទាមទារ​ឱ្យ​រុស្ស៊ី​ទទួលស្គាល់​ព្រំដែន​រួម​រុស្ស៊ី-អ៊ុយក្រែន នៅ​ឆ្នាំ​១៩៩១ ដែល​ក្នុង​នោះ​ឧបទ្វីប​គ្រីមៀរ ស្ថិត​ក្នុង​ដែនដី​របស់​អ៊ុយក្រែន។

គ្រីមៀរ ត្រូវ​រុស្ស៊ី​យក​បាន​ពី​អ៊ុយក្រែន នៅ​ខែ​មីនា ឆ្នាំ​២០១៤ តាមរយៈ​ការ​បោះឆ្នោត​ផ្ដាច់​ទឹកដី​តំបន់​សមុទ្រ​ខ្មៅ​មួយ​នេះ​ទៅ​ឱ្យ​រុស្ស៊ី ដោយ​មាន​ការ​យល់ព្រម និង​ការ​ចុះហត្ថលេខា​របស់​អតីត​ប្រធានាធិបតី​អ៊ុយក្រែន លោក វីចទ័រយ៉ាណា កូវិច។ បុរស​នេះ​រួម​នឹង​គ្រួសារ បាន​រត់​ទៅ​នៅ​រុស្ស៊ី​ភ្លាមៗ​ចំ​ពេល​ប្រជាជន និង​កងទ័ព​អ៊ុយក្រែន បះបោរ​ទម្លាក់​លោក​ពី​អំណាច។ ប្រជាជន​អ៊ុយក្រែន កាត់ទោស​លោក​ពី​ទោស​ក្បត់​ជាតិ ព្រោះតែ​ចុះហត្ថលេខា​កាត់​ទឹកដី​ឱ្យ​រុស្ស៊ី។

សហរដ្ឋ​អាមេរិក​តាមរយៈ​អ្នក​នាំពាក្យ​បាន​និយាយ​ថា ក្រុង​វ៉ាស៊ីនតោន​មើល​មិន​ឃើញ​ថា​ចិន​សក្ដិសម​ជា​អ្នក​សម្របសម្រួល​ដោយ​អព្យាក្រឹត​រវាង​ទីក្រុង​មូស្គូ និង​ទីក្រុង​គៀវ ពាក់ព័ន្ធ​នឹង​សង្គ្រាម​នៅ​អ៊ុយក្រែន នោះ​ទេ។ នេះ​ជា​ការ​វាយប្រហារ​ដោយ​ផ្ទាល់​ជា​ថ្មី​ទៀត​របស់​សហរដ្ឋ​អាមេរិក ចំពោះ​ចិន​ដែល​កំពុង​ព្យាយាម​លើក​កម្ពស់​តួនាទី​ជា​អ្នក​ស្វែងរក​សន្តិភាព​បញ្ចប់​សង្គ្រាម​នៅ​អ៊ុយក្រែន ខណៈ​ក្រុង​ប៉េកាំង មិន​បាន​ចូលរួម​ថ្កោលទោស​រុស្ស៊ី​ឈ្លានពាន​អ៊ុយក្រែន និង​ចូលរួម​ដាក់​ទណ្ឌកម្ម​សេដ្ឋកិច្ច​ទៅ​លើ​រុស្ស៊ី​នោះ​ទេ។

អ្នក​នាំពាក្យ​ក្រុមប្រឹក្សា​សន្តិសុខ​ជាតិ​អាមេរិក លោក John Kirby បាន​បញ្ជាក់​ថា ក្រុង​វ៉ាស៊ីនតោន​មើល​មិន​ឃើញ​ត្រង់​ណា​ដែល​ចិន​ជា​អាច​ដើរ​តួនាទី​ជា​ប្រទេស​អព្យាក្រឹត្យ​នោះ​ទេ ហើយ​មិន​សម​ជា​អ្នក​សម្របសម្រួល​ជួយ​ឱ្យ​ជនរងគ្រោះ​បាន​រួច​ពី​ការ​ឈ្លានពាន​របស់​រុស្ស៊ី​នោះ​ទេ។

លោក Kirby បន្ថែម​ថា ចិន​មិន​បាន​ថ្កោលទោស​រុស្ស៊ី​នោះ​ទេ​ចំពោះ​សង្គ្រាម​ឈ្លានពាន​លើ​អ៊ុយក្រែន ហើយ​នៅតែ​បន្ត​ទិញ​ប្រេង​ពី​រុស្ស៊ី ទោះបីជា​ប្រទេស​ជាច្រើន​កំពុង​ដាក់​ទណ្ឌកម្ម​លើ​ឧស្សាហកម្ម​ថាមពល​របស់​រុស្ស៊ី​ក៏ដោយ។

ទោះជា​យ៉ាងណា លោក John Kirby អះអាង​ថា សហរដ្ឋ​អាមេរិក​នៅតែ​ចង់​រក្សា​ការ​ទំនាក់ទំនង​ជាមួយ​ចិន។ តែ​ព្រមាន​ចិន​កុំ​ឱ្យ​ក្លាយ​ជា​ប្រទេស​ជួយ​បន្ត​ឱ្យ​រុស្ស៊ី​មាន​លទ្ធភាព​ធ្វើ​សង្គ្រាម​នៅ​លើ​ទឹកដី​អ៊ុយក្រែន ដែល​លោក​ថា​ការ​លួច​ជួយ​ផ្ដល់​អាវុធ​ទៅ​ឱ្យ​រុស្ស៊ី ជា​ប្រទេស​ឈ្លានពាន និង​រំលោភ​ធ្ងន់ធ្ងរ​ធម្មនុញ្ញ​អង្គការ​សហប្រជាជាតិ គឺ​ក្រុង​ប៉េកាំង​អាក្រក់​បំផុត៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស