លោក ហ៊ុន សែន ចុះហត្ថលេខាលើអនុក្រឹត្យមួយដោយច្រឡំប្រគល់ដីរដ្ឋលើសដល់ទៅជាង ៦០ហិកតារតាមសំណើរបស់រដ្ឋមន្ត្រីក្រសួងដែនដី នគរូបនីយកម្ម និងសំណង់ លោក ជា សុផារ៉ា ឲ្យក្រុមហ៊ុន រាម ស៊ីធី លែន អែន ហៅស៍ (Ream City Land and House) ធ្វើជាកម្មសិទ្ធិឯកជនស្ថិតក្នុងឃុំរាម ស្រុកព្រៃនប់ ខេត្តព្រះសីហនុ។
លោក ហ៊ុន សែន បានចេញអនុក្រឹត្យមួយកាលពីថ្ងៃទី៥ ខែតុលា ឆ្នាំ២០២២ ដែលត្រូវបានទម្លាយកាលពីចុងសប្តាហ៍កន្លងទៅនេះ ដើម្បីលុបអនុក្រឹត្យចាស់ដែលខ្លួនបានចុះហត្ថលេខាច្រឡំផ្តល់ដីរដ្ឋនៅឃុំរាម ស្រុកព្រៃនប់ ខេត្តព្រះសីហនុ ទំហំ ៦៩ហិកតារ និង ៩៩អា កាលពីថ្ងៃទី២០ ខែឧសភា ឆ្នាំ២០២២ វិញ។
មេដឹកនាំខ្មែរដែលត្រៀមកាត់ដីរដ្ឋ ១លានហិកតារឱ្យក្រុមហ៊ុនឯកជនធ្វើជាកម្មសិទ្ធិនៅទូទាំងប្រទេស លោក ហ៊ុន សែន បានសម្រេចកែសម្រួលខ្លឹមសារអនុក្រឹត្យចាស់ដែលបានផ្តល់ដីឱ្យក្រុមហ៊ុន Ream City Land and House មកជាទំហំ ៩ហិកតារ ៤៧អា និង ៥៥សង់ទីអា វិញ ដោយផ្អែកលើស្មារតីអនុក្រឹត្យដែលលោកបានចុះហត្ថលេខាកាលពីថ្ងៃទី០៥ ខែតុលា ឆ្នាំ២០២២ កន្លងទៅនោះ។
កាលពីថ្ងៃទី២០ ខែឧសភា ឆ្នាំ២០២២ លោក ហ៊ុន សែន បានចេញអនុក្រឹត្យប្រគល់ដីរដ្ឋឱ្យក្រុមហ៊ុន Ream City Land and House ធ្វើជាកម្មសិទ្ធិឯកជនស្ថិតក្នុងឃុំរាម ស្រុកព្រៃនប់ ខេត្តព្រះសីហនុ ទំហំ ៦៩ហិកតារ និង ៩៩អា តាមសំណើរបស់រដ្ឋមន្ត្រីក្រសួងដែនដី នគរូបនីយកម្ម និងសំណង់ លោក ជា សុផារ៉ា ជាថ្នូរដែលក្រុមហ៊ុនបានផ្ដល់កញ្ចប់ថវិកាចំនួន ១០លានដុល្លារអាមេរិកសម្រាប់ចំណាយក្នុងការសាងសង់អគារថ្មីនៃសាលាខេត្តព្រះសីហនុ និងកញ្ចប់ថវិកាមួយចំណែកទៀតដែលបានចំណាយក្នុងការស្ថាបនាផ្លូវក្នុងខេត្តនេះ។
អង្គការ Client Earth បានបង្ហាញរបាយការណ៍របស់ខ្លួនកាលពីពេលកន្លងទៅថា ជាង ៤០% នៃផ្ទៃដីរបស់កម្ពុជា ឬប្រហែល ៧,៥លានហិកតារ ត្រូវបានបែងចែកជាតំបន់ការពារធម្មជាតិក្នុងចំណោមតំបន់ការពារ ៥៣ផ្សេងទៀត។
ភាគច្រើននៃតំបន់ទាំងនេះត្រូវបាន «ការពារ» តែឈ្មោះប៉ុណ្ណោះ និងបានរងគ្រោះដោយការកាប់បំផ្លាញព្រៃឈើគិតតាំងពីការកាប់ឈើខុសច្បាប់ជាលក្ខណៈទ្រង់ទ្រាយធំ និងការចូលទៅរស់នៅកាន់កាប់បង្កើតជាភូមិមកជាច្រើនទសវត្ស ដូចជាករណីនៅតំបន់អភិរក្សដែនជម្រកសត្វព្រៃនៅព្រៃឡង់ ជាដើម។
ទាក់ទិននឹងបញ្ហានេះ កាលពីថ្ងៃទី៣០ ខែវិច្ឆិកា ឆ្នាំ២០២២ លោក ហ៊ុន សែន បានចុះហត្ថលេខាលើអនុក្រឹត្យមួយដោយកំណត់ដីសាធារណៈរបស់រដ្ឋជិត ១លានហិកតារនៅក្នុងតំបន់ការពារធម្មជាតិក្នុងខេត្តចំនួន១៥ រួមមានខេត្តត្បូងឃ្មុំ ក្រចេះ មណ្ឌលគិរី រតនគិរី ស្ទឹងត្រែង កំពង់ធំ និងខេត្តតាកែវ ជាដើម ដើម្បីត្រៀមធ្វើអនុបយោគ និងបែងចែកសម្រាប់កម្មសិទ្ធិឯកជនឱ្យទៅក្រុមហ៊ុនឯកជននានាដើម្បីធ្វើការអភិវឌ្ឍ។
ទាក់ទិននឹងការបែងចែកដីរដ្ឋឱ្យបុគ្គលឯកជន និងក្រុមហ៊ុនឯកជននេះ ឧកញ៉ាដែលជិតស្និទ្ធនឹងលោក ហ៊ុន សែន ជាច្រើននាក់ រួមទាំងសាច់ញាតិ និងកូនបង្កើតរបស់គាត់ផង បានទទួលដីរដ្ឋជាច្រើនរយហិកតារធ្វើជាកម្មសិទ្ធិ ដូចជាឧកញ៉ា ពុង ឃាវសែ ឧកញ៉ា សេង ញ៉ក និងភរិយា គឺអ្នកស្រី លី អាផណ និងឧកញ៉ា លី យ៉ុងផាត់ ជាដើម ដែលមានរហស្សនាមថាស្ដេចកោះកុងសព្វថ្ងៃនេះ។ ជាងនេះទៀត អ្នកស្រី ហ៊ុន ម៉ាណា និងអ្នកស្រី ហ៊ុន ម៉ាលី ដែលត្រូវជាកូនស្រីបង្កើតរបស់លោក ហ៊ុន សែន ក៏ទទួលបានដីរដ្ឋរាប់រយហិកតារផងដែរ។
មន្ត្រីអង្គការឃ្លាំមើលការអភិវឌ្ឍសង្គមចំនួន ២ស្ថាប័ន រួមមានអង្គការលីកាដូ (LICADHO) និងអង្គការស្រាវជ្រាវជាតិកម្ពុជា ឬហៅកាត់ ស៊ី.អិន.រ៉ូ (CNRO) ប្រចាំខេត្តព្រះសីហនុ ធ្លាប់បានបង្ហាញកង្វល់កាលពីពេលកន្លងទៅថា សព្វថ្ងៃនេះដីគម្របព្រៃឈើឆ្នាំ២០០២ ដែលរដ្ឋាភិបាលបានរក្សាទុកកំពុងរងការបំផ្លាញ និងពុះច្រៀកធ្វើកម្មសិទ្ធិឯកជនឱ្យទៅអ្នកមានទ្រព្យធន និងអ្នកមានអំណាចក្នុងជួររដ្ឋាភិបាលកម្ពុជាព្រោងព្រាតបច្ចុប្បន្ននេះ។
ការចុះហត្ថលេខាលើអនុក្រឹត្យដែលត្រូវកាត់ដីរដ្ឋទំហំ ៦៩ហិកតារ ៩៩អា មកជា ៩ហិកតារ ៤៧អា ៥៥សង់ទីអា ដែលលើសដល់ទៅ ៦០ហិកតារ និង ៤៤អានេះ គេនៅមិនដឹងថា តើលោក ជា សុផារ៉ា ស្នើច្រឡំ ឬលោក ហ៊ុន សែន ខ្លួនឯងចុះហត្ថលេខាដោយមិនមើលសំណើនោះទេ ទើបមានការចេញអនុក្រឹត្យថ្មីលុបអនុក្រឹត្យចាស់របស់ខ្លួនបែបនេះ៕