នៅក្នុងដំណាក់កាលចុងក្រោយនៃសង្គ្រាមជាមួយនឹងប្រទេសមួយជាប់នឹងរបងផ្ទះ មេដឹកនាំរបបផ្ដាច់ការនៅក្រុងមូស្គូ មានផែនការចង់បង្កភ្លក់ភ្លើងប្រល័យលោក គឺសង្គ្រាមនុយក្លេអ៊ែរ។
កាលពីថ្ងៃសៅរ៍ ទី២៥ ខែមីនា លោក វ៉្លាឌីមៀរ ពូទីន ប្រធានាធិបតីរុស្ស៊ី បានបញ្ជាទៅកងទ័ពរបស់លោកឱ្យត្រៀមដំឡើងក្បាលគ្រាប់នុយក្លេអ៊ែរយុទ្ធសាស្ត្រនៅក្នុងទឹកដីបេឡារុស ដែលមានព្រំដែនជាប់នឹងប្រទេសអ៊ុយក្រែន។ បេឡារុស ជាប្រទេសសម្ព័ន្ធភាពនឹងរុស្ស៊ី។
មេដឹកនាំរបស់ប្រទេសនេះ គឺលោក អាឡិចហ្សង់ ឌឺលូកាឆេនកូ ជាមិត្តរបស់លោក ពូទីន ផង ហើយក៏ជាអាយ៉ងនៃរបបនៅក្រុងមូស្គូ ផងដែរ។ នៅលើទឹកដីនៃប្រទេសបេឡារុស មានទ័ពរុស្ស៊ីជាង ១ម៉ឺននាក់។ រុស្ស៊ីបានដាក់ពង្រាយរួចហើយនូវប្រព័ន្ធមីស៊ីល S-300 មីស៊ីលS-400 ជាមីស៊ីលបាញ់ទម្លាក់យន្តហោះ និងមីស៊ីលផ្លោងអ៊ីនស្កាឌឺ។
លើសនេះទៀត យន្តហោះចម្បាំងរបស់រុស្ស៊ី ១០គ្រឿង ដែលអាចបំពាក់ក្បាលគ្រាប់នុយក្លេអ៊ែរខា្នតតូចក៏មាននៅលើទឹកដីបេឡារុសរួចហើយដែរ។ និយាយទៅ រុស្ស៊ីនៅសល់តែការដាក់ពង្រាយក្បាលគ្រាប់នុយក្លេអ៊ែរប៉ុណ្ណោះនៅលើទឹកដីបេឡារុស។
ការប្រកាសរបស់លោក ពូទីន ដែលបញ្ជាឱ្យកងទ័ពត្រៀមពង្រាយក្បាលគ្រាប់នុយក្លេអ៊ែរនៅលើទឹកដីបេឡារុស គឺជាផែនការថ្មីមួយទៀតអាចទៅរកការផ្ទុះសង្គ្រាមនុយក្លេអ៊ែរ ប្រសិនបើរុស្ស៊ីវាយលុកទ្រង់ទ្រាយធំម្ដងទៀតចូលទៅរដ្ឋធានីគៀវ មិនបានសម្រេច ក្នុងការផ្ដួលរំលំរដ្ឋាភិបាលប្រធានាធិបតីអ៊ុយក្រែន លោក វូឡូឌីមៀរ ហ្សេឡេនស្គី។ នេះបើយោងតាមការវិភាគរបស់ក្រុមវិទ្យាស្ថានសិក្សាសង្គ្រាមដែលមានមូលដ្ឋាននៅក្រុងវ៉ាស៊ីនតោន។
ក្រុមអ្នកវិភាគព្រមានថា បើរុស្ស៊ីបើកវាយប្រហារចូលទៅរដ្ឋធានីគៀវ ហើយអ៊ុយក្រែនទប់ទល់បានជាថ្មីទៀត មានន័យថាលោក ពូទីន អស់ក្រឡាដើរលើវិថីសង្គ្រាមដ៏បង្ហូរឈាមនេះ ដែលចារកម្មរបស់អាមេរិកប៉ាន់ប្រមាណថា ទ័ពរុស្ស៊ីបាត់បង់នៅលើទឹកដីអ៊ុយក្រែន ទាំងស្លាប់ ទាំងរបួស និងទាហានរត់ចោលអង្គភាពរបស់ខ្លួនមានជិត ២២ម៉ឺននាក់។
ក្នុងស្ថានភាពនេះហើយដែលលោក ពូទីន មេដឹកនាំប្រទេសមហាអំណាចយោធាលំដាប់ពិភពលោកទី២ អាម៉ាស់មុខជាខ្លាំង ព្រោះតែធ្វើសង្គ្រាម ១៣ខែមកនេះវាយមិនឈ្នះប្រទេសទន់ខ្សោយមួយដែលមានព្រំដែនជាប់គ្នានេះ។
គ្រាន់តែលោក ពូទីន ចេញបញ្ជាដូចនេះភ្លាម គេសង្កេតឃើញមានប្រតិកម្មភ្លាមៗពីរដ្ឋាភិបាលអ៊ុយក្រែន ពីអង្គការយោធាណាតូ ពីសហភាពអឺរ៉ុប និងសហរដ្ឋអាមេរិក។
រដ្ឋមន្ត្រីការបរទេសអ៊ុយក្រែន លោក ឌីមិនដ្រូ កូលេបា ស្នើឲ្យក្រុមប្រឹក្សាសន្តិសុខអង្គការសហប្រជាជាតិ បើកកិច្ចប្រជុំមួយជាបន្ទាន់ដើម្បីបញ្ឈប់ផែនការរបស់លោក ពូទីន ដែលថានឹងដាក់ពង្រាយក្បាលគ្រាប់នុយក្លេអ៊ែរយុទ្ធសាស្ត្រនៅបេឡារុស។
ប្រមុខការទូតអ៊ុយក្រែនរូបនេះទាមទារថា ក្រុមប្រឹក្សាសន្តិសុខត្រូវតែមូលមតិរួមជាមួយគ្នាប្រាប់ទៅក្រុងមូស្គូ ឱ្យបញ្ឈប់ជាបន្ទាន់ផែនការនេះ បើពុំនោះទេ វានឹងទៅរកសង្គ្រាមដ៏ប្រល័យ។ តែខណៈទាមទារដូចនេះ អ៊ុយក្រែនក៏បានពង្រឹងទ័ពរបស់ខ្លួនភ្លាមនៅតាមព្រំដែនអ៊ុយក្រែន ដែលជាប់នឹងបេឡារុស។
ចំណែកអង្គការយោធាណាតូវិញ ក៏បានប្រតិកម្មខ្លាំងក្លាដែរ។ អ្នកស្រី Oana Lungescu អ្នកនាំពាក្យណាតូបានលើកឡើងថា ផែនការរបស់លោក ពូទីន នាំទៅរកគ្រោះថ្នាក់ ហើយកាយវិការនេះបង្ហាញពីមិនមានការទទួលខុសត្រូវ។
អ្នកស្រីថា ណាតូតាមដានយ៉ាងប្រុងប្រយ័ត្នបំផុត ហើយបើរុស្ស៊ីធ្វើសកម្មភាពដាក់ពង្រាយគ្រាប់នុយក្លេអ៊ែរនៅលើទឹកដីបេឡារុស មែននោះ គឺជាការប្រកាសអាសន្នដ៏គ្រោះថ្នាក់នៅអឺរ៉ុប ជាពិសេសប្រទេសបេឡារុស។ អ្នកស្រីព្រមានថា ណាតូប្រឆាំងដាច់ខាត។ តែយ៉ាងណា អ្នកស្រីជឿថា រុស្ស៊ីនឹងមិនធ្វើដំណើរលើផ្លូវដ៏គ្រោះថ្នាក់នេះទេ ព្រោះវាគ្រោះថ្នាក់ដល់រុស្ស៊ីខ្លួនឯងផ្ទាល់ផងដែរ។
ដូចគ្នានេះដែរ លោក John Kirby ទីប្រឹក្សាក្រុមប្រឹក្សាសន្តិសុខជាតិសហរដ្ឋអាមេរិក ថ្លែងក្នុងបទសម្ភាសន៍ខ្លីមួយជាមួយបណ្ដាញទូរទស្សន៍ CBS ថា ពេលនេះគេមិនទាន់ឃើញថាសញ្ញាណាមួយថារុស្ស៊ីនឹងបញ្ជូនក្បាលគ្រាប់នុយក្លេអ៊ែរចេញពីទីតាំងស្តុករបស់វា ហើយឆ្ពោះទៅបេឡារុសនៅឡើយនោះទេ។
តាមលោក John Kirby ពុំមានចលនាអ្វីប្រាប់ថា រុស្ស៊ីត្រូវតែប្រើអាវុធប្រភេទនេះវាយប្រហារទៅលើអ៊ុយក្រែននោះទេ។ លោកបញ្ជាក់ថា ចំពោះក្រុងវ៉ាស៊ីនតោន នៅតែរក្សាជំហរយុទ្ធសាស្ត្រដដែល គឺឃ្លាំមើលជានិច្ច។
ចំពោះលោក Josep Borrell ប្រធានកិច្ចការបរទេសនៃសហភាពអឺរ៉ុបវិញ បានបញ្ជាក់ថា អឺរ៉ុបនឹងសម្រេចដាក់ទណ្ឌកម្មសេដ្ឋកិច្ចបន្ថែមទៀតលើបេឡារុស ប្រសិនបើប្រទេសនេះបើកផ្លូវឲ្យរុស្ស៊ីដាក់ពង្រាយក្បាលគ្រាប់នុយក្លេអ៊ែរនៅលើប្រទេសរបស់ខ្លួន។ លោកចាត់ទុកជាការគំរាមយ៉ាងខ្លាំងមកលើសន្តិសុខរបស់អឺរ៉ុបទាំងមូល។
យ៉ាងណា ទាំងលោក ពូទីន និងលោក ឌីមិនទ្រី មិនវេនឌៀវ នាយករងក្រុមប្រឹក្សាសន្តិសុខជាតិរុស្ស៊ី ដែលជាដៃស្ដាំរបស់លោក ពូទីន បាននិយាយការពារខ្លួនថាផែនការដាក់ពង្រាយគ្រាប់នុយក្លេអ៊ែរយុទ្ធសាស្ត្រនៅបេឡារុស ដោយសារអង់គ្លេសបានប្រកាសបញ្ជូនគ្រាប់កាំភ្លើងធំមានសារធាតុអ៊ុយរ៉ានីញ៉ូម ទៅឱ្យអ៊ុយក្រែន ហើយមួយទៀត ព្រោះតែសហរដ្ឋអាមេរិកបានដាក់ពង្រាយគ្រាប់នុយក្លេអ៊ែរយុទ្ធសាស្ត្រនៅតាមប្រទេសសម្ព័ន្ធមិត្តនៅអឺរ៉ុបរួចទៅហើយ។
រុស្ស៊ីជាប្រទេសមហាអំណាចនុយក្លេអ៊ែរលំដាប់ទី១ ពិភពលោក ដែលមានជាង ៦០០០គ្រាប់ ហើយសហរដ្ឋអាមេរិក មានជាង ៥៥៥០គ្រាប់។ ទាំងប្រទេសអង់គ្លេស និងបារាំង មានជិត ៦០០គ្រាប់។ ប្រទេស៣ នេះ អាមេរិក អង់គ្លេស និងបារាំង គឺជាប្រទេសសមាជិកណាតូដែលមានសក្ដានុពលខាងកងទ័ព និងសព្វាវុធ។ ចំណែកប្រទេសអាល្លឺម៉ង់ បើទោះជាពុំមានគ្រាប់នុយក្លេអ៊ែរ តែប្រទេសនេះមានសក្ដានុពលសព្វាវុធផ្សេងៗ និងកងទ័ពដ៏ខ្លាំងរបស់ក្រុមណាតូ។
តែយ៉ាងណា ការដែលលោក ពូទីន បញ្ជាឱ្យកងទ័ពត្រៀមដាក់ពង្រាយក្បាលគ្រាប់នុយក្លេអ៊ែរនៅលើទឹកដីបេឡារុស ដែលមានព្រំដែនជាប់នឹងអ៊ុយក្រែន និងមានព្រំដែនជាប់នឹងប្រទេសប៉ូឡូញ ប្រទេសលីទុយអានី និងប្រទេសឡាតវៀល ជាសមាជិកណាតូ ធ្វើឡើងបន្ទាប់ពីតុលាការឧក្រិដ្ឋកម្មអន្តរជាតិ ICC ចេញដីកាចាប់ខ្លួនលោកកាលពីថ្ងៃទី១៧ មីនា ក្រោមបទចោទ បុរសខ្លាំងនៅក្រុងមូស្គូរូបនេះពីករណីឧក្រិដ្ឋកម្មសង្គ្រាមទៅលើប្រជាជនអ៊ុយក្រែន៕