36 C
Phnom Penh

លោក ហ៊ុន សែន សម្រេច​ចិត្ត​ធ្វើ​ជា​ប្រធាន​កិត្តិយស​សមាគម​ឧកញ៉ា​កម្ពុជា​បន្ទាប់ពី​មាន​ការ​ស្នើសុំ

ដោយ ឌឹ ខេមបូឌា ដេលី

បទវិភាគ

មេដឹកនាំ​ខ្មែរ​ក្រាញ​អំណាច​ត​វង្ស​ត្រកូល លោក ហ៊ុន សែន សម្រេច​ធ្វើជា​ប្រធាន​កិត្តិយស​នៃ​សមាគម​ឧកញ៉ា​កម្ពុជា បន្ទាប់ពី​ប្រធាន​សមាគម លោក លី យ៉ុងផាត់ ដែល​ល្បីល្បាញ​ខាង​រកស៊ី​ឈើ​ខុស​ច្បាប់ និង​រំលោភ​ដីធ្លី​ប្រជាពលរដ្ឋ​នៅ​ខេត្ត​កោះកុង ដែល​មាន​រហស្សនាម​ថា​ជា​ស្តេច​កោះកុង បាន​ស្នើសុំ​កាលពី​អំឡុង​ខែ​មករា ឆ្នាំ​២០២៣ កន្លងទៅ។

ទីស្ដីការ​គណៈរដ្ឋមន្ត្រី​បាន​ចេញ​លិខិត​មួយ​ច្បាប់​ទៅ​កាន់​ប្រធាន​សមាគម​ឧកញ៉ា​កម្ពុជា គឺ​ឧកញ៉ា លី យ៉ុងផាត់ កាលពី​ថ្ងៃទី​២៨ ខែ​មីនា ឆ្នាំ​២០២៣ នេះ​ថា លោក ហ៊ុន សែន ឯកភាព​នឹង​សំណើ​ដែល​ស្នើសុំ​ឱ្យ​លោក​ធ្វើ​ជា​ប្រធាន​កិត្តិយស​នៃ​សមាគម​ឧកញ៉ា​កម្ពុជា​ហើយ ប៉ុន្តែ​ទីស្ដីការ​គណៈរដ្ឋមន្ត្រី​ក៏​បាន​ចេញ​លិខិត​នៅ​ថ្ងៃទី​២៨ ខែ​មីនា ដដែល​ដាច់ដោយឡែក​មួយ​ទៀត​ដែរ ដែល​បាន​បញ្ជាក់​ថា សមាគម​ឧកញ៉ា​កម្ពុជា​នេះ​គឺជា​ស្ថាប័ន​តែ​មួយ​គត់​តំណាង​ឱ្យ​អ្នក​ដែល​មាន​គោរមងារ​ជា​ឧកញ៉ា​ទាំងអស់​នៅ​កម្ពុជា។

ទីស្ដីការ​គណៈរដ្ឋមន្ត្រី​បញ្ជាក់​ពី​លក្ខខណ្ឌ​ក្នុង​លិខិត​របស់​ខ្លួន​ផង​ដែរ​ថា សមាគម​ឧកញ៉ា​កម្ពុជា គឺជា​ដៃគូ​របស់​រាជរដ្ឋាភិបាល​ក្នុង​ការ​លើក​កម្ពស់​ពាណិជ្ជកម្ម និង​ការ​វិនិយោគ​នានា​នៅ​កម្ពុជា ដែល​ត្រូវ​ដាក់​ឱ្យ​ស្ថិត​នៅ​ក្រោម​អភិបាលកិច្ច​ផ្នែក​បច្ចេកទេស​របស់​ក្រុមប្រឹក្សា​អភិវឌ្ឍន៍​កម្ពុជា ដែល​មាន​លោក ហ៊ុន សែន ជា​ប្រធាន​កិត្តិយស​នៅ​ពេលនេះ។

កាលពី​ថ្ងៃទី​១៩ ខែ​មករា ឆ្នាំ​២០២៣ ប្រធាន​សមាគម​ឧកញ៉ា​កម្ពុជា ឧកញ៉ា លី យ៉ុងផាត់ បាន​ស្នើ​ឱ្យ​មេដឹកនាំ​បក្ស​កាន់​អំណាច លោក ហ៊ុន សែន ធ្វើជា​ប្រធាន​កិត្តិយស​សមាគម​ឧកញ៉ា​កម្ពុជា ក្នុង​នោះ​លោក ហ៊ុន សែន បាន​យល់ព្រម​តាម​សំណើ​នេះ​ផង​ដែរ​កាលពី​ថ្ងៃទី​២៥ ខែ​កុម្ភៈ ឆ្នាំ​២០២៣ កន្លងទៅ​នេះ។

អ្នកវិភាគ​នយោបាយ និង​សង្គម បណ្ឌិត ឡៅ ម៉ុងហៃ ធ្លាប់​បាន​លើកឡើង​កាលពី​ពេល​កន្លងទៅ​ថា គោរមងារ​ឧកញ៉ា​នៅ​ពេលនេះ​ប្រែ​ទៅ​ជា​អស់​តម្លៃ គឺ​ដោយសារ​យន្តការ​ផ្តល់​គោរមងារ​នេះ​បាន​ប្រែ​ក្លាយ​ពី​គ្រឿង​ឥស្សរិយយស​ពិសេស ទៅ​ជា​ទំនិញ​មួយ​ប្រភេទ​ដែល​គេ​អាច​ទិញ​បាន ឲ្យ​តែ​មាន​លុយ​គ្រប់​ចំនួន​តាម​ការ​កំណត់​របស់​រដ្ឋាភិបាល ទោះ​លុយ​ទាំងនោះ​ប្រកប​ដោយ​ធម៌ ឬ​មិន​ប្រកប​ដោយ​ធម៌ ហើយ​ទោះបី​អ្នក​ទិញ​គោរមងារ​នោះ​ជា​មនុស្ស​អាវ៉ាសែ​កម្រិត​ណា​ក៏ដោយ។

ក្រុម​អ្នក​សង្កេតការណ៍​រិះគន់​ថា មនុស្ស​ដែល​ទទួល​គោរមងារ​ជា​ឧកញ៉ា ឬ​ជា​អ្នកឧកញ៉ា​នៅ​កម្ពុជា មិនមែន​ដោយសារ​ពួកគេ​ចូលរួម​កសាង​សង្គម​ជាតិ​ទេ ប៉ុន្តែ​ដោយសារ​ពួកគេ​បំផ្លាញ​ជាតិ និង​ធ្វើ​ជា​អ្នក​រក​លុយ​ជួយ​គណបក្ស​ប្រជាជន​កម្ពុជា​របស់​លោក ហ៊ុន សែន ប៉ុណ្ណោះ ដូចជា​ឧកញ៉ា ទ្រី ភាព ដែល​មាន​រហស្សនាម​ថា​ស្តេច​គ្រញូង បាន​ទទួល​គោរមងារ​ជា​អ្នកឧកញ៉ា​កាលពី​ចុង​ឆ្នាំ​២០២១ ស្រប​ពេល​ដែល​បុគ្គល​រូប​នេះ​ត្រូវ​គេ​ដឹង​ឮ​ពេញ​ប្រទេស​ថា​ជា​ឈ្មួញ​ឈើ​ខុស​ច្បាប់​នៅ​ស្រុក​ខ្មែរ ដែល​មាន​គ្រួសារ​លោក ហ៊ុន សែន នៅ​ពីក្រោយ។

ចំណែក​ឧកញ៉ា លី យ៉ុងផាត់ ដែល​មាន​រហស្សនាម​ថា​ស្តេច​កោះកុង (King of Koh Kong) ក៏​បាន​ទទួល​ងារ​ជា​អ្នកឧកញ៉ា​កាលពី​ចុង​ឆ្នាំ​១៩៩៨ ផង​ដែរ ប៉ុន្តែ​ក្រោយ​ទទួល​គោរមងារ​ជា​ឧកញ៉ា និង​ទទួល​បាន​ការ​ពេញចិត្ត​ពេញ​ថ្លើម​ពី​ក្រុម​គ្រួសារ​លោក​នាយករដ្ឋមន្ត្រី ហ៊ុន សែន ឧកញ៉ា លី យ៉ុងផាត់ បាន​ប្រើ​ឥទ្ធិពល​របស់​ខ្លួន​បញ្ជូន​កម្លាំង​កងរាជ​អាវុធហត្ថ​ទៅ​ទន្ទ្រាន​ឈូស​ឆាយ​យក​ដីធ្លី​ប្រជាពលរដ្ឋ​ខ្មែរ រួច​ដុត​ផល​ដំណាំ និង​បណ្តេញ​អ្នកស្រុក​ចេញពី​ផ្ទះ​សម្បែង​ផង​ដែរ​ក្នុង​រយៈពេល​ប៉ុន្មាន​ឆ្នាំ​ចុងក្រោយ​នេះ។

ក្រៅពី​ឧកញ៉ា ទ្រី ភាព ដែល​មាន​រហស្សនាម​ថា​ស្តេច​គ្រញូង និង​ឧកញ៉ា លី យ៉ុងផាត់ ដែល​មាន​រហស្សនាម​ថា​ស្តេច​កោះកុង (King of Koh Kong) ដែល​ជាប់​ឈ្មោះ​ជា​ឧក្រិដ្ឋជន​បំផ្លាញ​ព្រៃឈើ​ខ្មែរ ក៏​មាន​ឧកញ៉ា​ដែល​ជួញដូរ​គ្រឿងញៀន​យ៉ាង​អនាធិបតេយ្យ​ពេញ​ប្រទេស​កម្ពុជា​ថែម​ទៀត ដូចជា​ឧកញ៉ា គិត ធាង ត្រូវ​ជា​បងប្រុស​បង្កើត​របស់​ឧកញ៉ា គិត ម៉េង ដែល​ជា​មនុស្ស​ជំនិត​បំផុត​របស់​លោក ហ៊ុន សែន ជាដើម។

គិត​ចាប់ពី​ខែ​កញ្ញា ឆ្នាំ​១៩៩៤ ដល់​ខែ​កុម្ភៈ ឆ្នាំ​២០១៤ ប្រមុខ​រដ្ឋាភិបាល​កម្ពុជា​បាន​ស្នើ​ព្រះមហាក្សត្រ​ផ្តល់​គោរមងារ​ជា​ឧកញ៉ា​ដល់​អ្នក​ដែល​បាន​បរិច្ចាគ​លុយ​ជូន​រដ្ឋ​ដល់​ទៅ​ជាង ៧០០​នាក់​ឯណោះ ខណៈ​រយៈពេល ៤​ឆ្នាំ​ចុងក្រោយ​នេះ​គិត​ចាប់ពី​ឆ្នាំ​២០១៦ ដល់​ឆ្នាំ​២០២០ មាន​មនុស្ស​ចំនួន ២៥៩​រូប​ថែម​ទៀត​ដែល​ត្រូវ​ព្រះមហាក្សត្រ​ផ្តល់​គោរមងារ​ជា​ឧកញ៉ា​តាម​ការ​ស្នើសុំ​របស់​ប្រមុខ​រដ្ឋាភិបាល​កម្ពុជា ប៉ុន្តែ​បើ​គិត​ជា​សរុប​ត្រឹម​ចុង​ឆ្នាំ​២០២២ កន្លងទៅ ត្រូវ​គេ​រក​ឃើញ​ថា ចំនួន​ឧកញ៉ា​នៅ​ស្រុក​ខ្មែរ​បាន​កើនឡើង​ដល់​ទៅ​ជាង ១​ពាន់​នាក់​ហើយ​នៅ​ពេលនេះ។

កាលពី​ថ្ងៃទី​២០ ខែ​មីនា ឆ្នាំ​២០២០ លោក ហ៊ុន សែន បាន​កែសម្រួល​អនុក្រឹត្យ​ចាស់​ដែល​លោក​បាន​ចុះហត្ថលេខា​កាលពី​ថ្ងៃទី​៥ ខែ​មេសា ឆ្នាំ​១៩៩៤ ចំពោះ​សប្បុរសជន​ដែល​បាន​បរិច្ចាគ​ថវិកា​ជូន​រដ្ឋ​ចាប់ពី ១០​ម៉ឺន​ដុល្លារ​អាមេរិក​ឡើង​ទៅ​នឹង​ទទួល​បាន​គោរមងារ​ជា​ឧកញ៉ា​នោះ ត្រូវ​កែប្រែ និង​កំណត់​សាជាថ្មី​ថា អ្នក​ដែល​ចង់​បាន​គោរមងារ​ជា​ឧកញ៉ា ត្រូវ​បរិច្ចាគ​ថវិកា​ចាប់ពី ៥០​ម៉ឺន​ដុល្លារ​អាមេរិក​ឡើង​ក្នុង​ម្នាក់ៗ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស