មន្ត្រីជាន់ខ្ពស់របស់គណបក្សសង្គ្រោះជាតិ សម្រេចពឹងពាក់មេធាវីលោក សឺន ជុំជួន ឱ្យជួយការពារក្តីជូនសកម្មជនគណបក្សសង្គ្រោះជាតិ លោក ហ៊ុន កុសល ក្រោយពីរងនូវការចោទប្រកាន់ពីបទប្រមាថអង្គព្រះមហាក្សត្រពីលោក ហ៊ុន សែន និងត្រូវឃុំខ្លួននៅក្នុងពន្ធនាគារព្រៃស។
អតីតអ្នកទោសនយោបាយ និងជាមន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា ប្រាប់សារព័ត៌មាន The Cambodia Daily នៅថ្ងៃទី៤ មេសា នេះថា ការចោទប្រកាន់របស់លោក ហ៊ុន សែន ទៅលើសកម្មជនគណបក្សសង្គ្រោះជាតិបែបនេះ ត្រូវគេវាយតម្លៃថាជារឿងដែលស្ថិតក្នុងរបៀបវារៈនយោបាយច្រើនជាង។ ជាងនេះទៀត បើពិនិត្យទៅលើការលើកឡើងរបស់លោក ហ៊ុន កុសល ក៏នៅតែរកមិនទាន់ឃើញថាជាការប្រមាថអង្គព្រះមហាក្សត្រនៅឡើយនោះដែរ។
លោក មាជ សុវណ្ណារ៉ា លើកឡើងថា ការពឹងពាក់មេធាវីការពារក្តីនេះ ទោះបីជាមិនមានសង្ឃឹមថានឹងឈ្នះក្តីក៏ដោយ ប៉ុន្តែលោកត្រូវតែធ្វើទៅតាមនីតិវិធីរបស់តុលាការ ហើយនៅពេលនេះ លោក ហ៊ុន កុសល បានឯកភាពព្រមទទួលយកមេធាវីលោក សឺន ជុំជួន ឱ្យជួយការពារក្តីរបស់លោកហើយបន្ទាប់ពីបានជួបមេធាវីកាលពីថ្ងៃចន្ទដើមសប្ដាហ៍នេះ។
មន្ត្រីជាន់ខ្ពស់គណបក្សសង្គ្រោះជាតិរូបនេះបញ្ជក់ថា ជំហររបស់លោក ហ៊ុន កុសល មិនតក់ស្លុតទេ គឺនៅតែរឹងមាំដដែល។ លោកបន្ថែមថា នេះក៏ដោយសារតែលោក ហ៊ុន កុសល ជាមនុស្សដែលធ្លាប់ធ្វើសមាធិពីមុនមក ដែលធ្វើឱ្យស្ថានភាពផ្លូវចិត្តរបស់លោកនឹងធឹងបែបនេះ។
កាលពីថ្ងៃទី៣ ខែមេសា ឆ្នាំ២០២៣ មន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា បានសុំពឹងពាក់មេធាវីលោក សឺន ជុំជួន ឱ្យជួយការពារក្តីលោក ហ៊ុន កុសល ដែលត្រូវជាប្អូនធម៌របស់លោក បន្ទាប់ពីលោក ហ៊ុន កុសល ត្រូវបានតុលាការចោទប្រកាន់ និងសម្រេចឃុំខ្លួននៅមណ្ឌលអប់រំកែប្រែ «ម១» កាលពីពេលថ្មីៗនេះ។
ការឃុំខ្លួននេះ ធ្វើឡើងបន្ទាប់ពីសកម្មជនគណបក្សសង្គ្រោះជាតិ លោក ហ៊ុន កុសល ត្រូវបានសមត្ថកិច្ចក្រុងភ្នំពេញចាប់ខ្លួនកាលពីថ្ងៃទី២១ ខែមីនា ឆ្នាំ២០២៣ បន្ទាប់ពីលោកបញ្ចេញមតិលើបណ្ដាញសង្គមហ្វេសប៊ុក ដោយលើកឡើងថា «ឃើញពួកគេធ្វើបាបព្រះទ័យ និងបន្ទាបព្រះចេស្តាព្រះមហាក្សត្រខ្មែរបែបនេះ ក្នុងនាមលោកជាអ្នកនយោបាយជំនាន់ក្រោយ ប្ដេជ្ញាថានឹងប្រើសមត្ថភាពដែលមានទាំងប៉ុន្មាន ការពារព្រះចេស្តារបស់ព្រះអង្គ និងព្រះរាជបល័្លង្កដែលប្រជារាស្ត្រខ្មែរមិនអាចខ្វះបានតទៅថ្ងៃមុខ»។
ជុំវិញការចាប់ខ្លួននេះ សាលាដំបូងរាជធានីភ្នំពេញបានសម្រេចឃុំខ្លួនលោក ហ៊ុន កុសល ជាបណ្ដោះអាសន្ន ដែលត្រូវបានដាក់ឲ្យស្ថិតនៅក្រោមការពិនិត្យពីបទប្រមាថអង្គព្រះមហាក្សត្រ និងបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គមផងដែរ។
ទាក់ទិននឹងបញ្ហានេះ កាលពីថ្ងៃទី២២ ខែមីនា ឆ្នាំ២០២៣ មេដឹកនាំបក្សកាន់អំណាច លោក ហ៊ុន សែន ព្រមានថា លោកនឹងមិនលើកលែង ឬអធ្យាស្រ័យឱ្យលោក ហ៊ុន កុសល ដាច់ខាតចំពោះការចេញសារប្រមាថព្រះចេស្តាព្រះមហាក្សត្របែបនេះ ព្រោះថាការលើកឡើងនោះ គឺជាចេតនាអាក្រក់ប៉ុណ្ណោះ។
យ៉ាងណាក៏ដោយ សកម្មជនគណបក្សសង្គ្រោះជាតិម្នាក់ទៀតដែលត្រូវសមត្ថកិច្ចចាប់ខ្លួនជុំវិញការលើកឡើងជាមួយលោក ហ៊ុន កុសល គឺលោក យឹម ស៊ីណន ត្រូវបានលោក ហ៊ុន សែន សម្រេចដោះលែងក្រោយឃុំខ្លួនបាន ១សប្តាហ៍ បន្ទាប់ពីលោក យឹម ស៊ីណន ចេញវីដេអូសុំទោសលោក ហ៊ុន សែន និងព្រះមហាក្សត្រជាសាធារណៈកាលពីថ្ងៃទី២៨ ខែមីនា ឆ្នាំ២០២៣ កន្លងទៅនោះ។
ជុំវិញបញ្ហានេះ កាលពីថ្ងៃទី២២ ខែមីនា ឆ្នាំ២០២៣ វេទិកាពលរដ្ឋអំពាវនាវឱ្យរដ្ឋាភិបាលកម្ពុជាទម្លាក់ចោលបទចោទ និងដោះលែងសកម្មជនគណបក្សសង្គ្រោះជាតិ លោក ហ៊ុន កុសល ដោយឥតលក្ខខណ្ឌ ព្រោះថាការលើកឡើងរបស់សកម្មជនរូបនេះគ្រាន់តែជាទម្រង់សេរីភាពក្នុងការបញ្ចេញមតិប៉ុណ្ណោះ មិនមែនជាការញុះញង់ដូចការចោទប្រកាន់ឡើយ។
វេទិកាពលរដ្ឋអំពាវនាវឱ្យអាជ្ញាធរកម្ពុជាដោះលែងលោក ហ៊ុន កុសល វិញដើម្បីធានានូវការបញ្ចេញមតិនៅកម្ពុជាដោយគ្មានការគំរាមកំហែង ខណៈការលើកឡើងរបស់ពួកគាត់មិនបានរំលោភលើមាត្រាណាមួយនៃច្បាប់របស់ប្រទេសកម្ពុជានោះទេ៕