អ្នកឃ្លាំមើលនិយាយថា ការដាក់តាំងរូបលោក ហ៊ុន សែន ដែលមានឋានៈត្រឹមតែជានាយករដ្ឋមន្ត្រីនៅតាមទីសាធារណៈ គឺបង្ហាញពីចេតនាលើកតម្កើងមេដឹកនាំខ្មែររូបនេះជាស្តេចផែនដីយ៉ាងពិតប្រាកដ ព្រោះថាក្នុងប្រទេសប្រកាន់របបរាជានិយមមានតែព្រះមហាក្សត្រដែលមានតួនាទីជាព្រះប្រមុខរដ្ឋប៉ុណ្ណោះ ដែលស័ក្តិសមដាក់តាំងព្រះឆាយាល័ក្ខណ៍របស់ទ្រង់នៅតាមទីសាធារណៈ។
កាលពីពេលថ្មីៗនេះ អ្នកប្រើប្រាស់បណ្ដាញសង្គមហ្វេសប៊ុកបាននាំគ្នាបង្ហោះរូបភាពមួយសន្លឹកអំពីការដាក់តាំងរូបរបស់លោក ហ៊ុន សែន និងភរិយារបស់គាត់ទន្ទឹមគ្នានឹងព្រះឆាយាល័ក្ខណ៍របស់ព្រះមហាក្សត្រខ្មែរនៅក្នុងបរិវេណសួនប៉ោយប៉ែតតេជោឈ្នះឈ្នះ។
អ្នកវិភាគឯករាជ្យ និងជាប្រធានវេទិកាពលរដ្ឋ លោក គឹម សុខ ប្រាប់សារព័ត៌មាន The Cambodia Daily នៅថ្ងៃទី៦ មេសា នេះថា ការធ្វើបែបនេះជាសញ្ញាមួយបញ្ជាក់យ៉ាងច្បាស់អំពីអំណាចផ្ដាច់មុខរបស់លោក ហ៊ុន សែន បើទោះបីជាគាត់ធ្វើរឿងដែលរំលោភលើតួនាទីរបស់ព្រះមហាក្សត្រដែលជាព្រះប្រមុខរដ្ឋក៏ដោយ ក៏គ្មាននរណាហ៊ានអនុវត្តច្បាប់លើគាត់នោះដែរ។
អ្នកវិភាគឯករាជ្យរូបនេះលើកឡើងថា ការដាក់តាំងរូបខ្លួនឯងទន្ទឹមនឹងព្រះឆាយាល័ក្ខណ៍របស់ព្រះប្រមុខរដ្ឋបែបនេះ គឺជាទង្វើ និងចេតនាបន្ទាបព្រះចេស្តារបស់ព្រះមហាក្សត្រផង ហើយក៏ជាចេតនាលើកតម្កើងអំណាចខ្លួនឯងស្មើនឹងស្តេចនៃប្រទេសកម្ពុជាផង បើទោះបីគាត់មិនបាននិយាយថា គាត់មានបំណងបែបនេះក៏ដោយ ប៉ុន្តែទង្វើនេះល្មមគ្រប់គ្រាន់ដែលអាចបញ្ជាក់ពីចេតនារបស់លោក ហ៊ុន សែន ដែលមិនអាចប្រកែកបានឡើយ។
លោក គឹម សុខ បញ្ជាក់ថា ការតាំងរូបថតរបស់លោក ហ៊ុន សែន និងភរិយារបស់គាត់ គឺអ្នកស្រី ប៊ុន រ៉ានី នៅទីសាធារណៈដូចព្រះមហាក្សត្រនេះ ក៏ជាការបង្ហាញឲ្យឃើញថា គ្រួសារត្រកូលហ៊ុនជាក្រុមមេដឹកនាំសក្ដិភូមិគំរូថ្មី ដែលចាត់ទុកប្រទេសកម្ពុជាជាទ្រព្យសម្បត្តិផ្ដាច់មុខរបស់ខ្លួន ហើយទង្វើនេះគឺជាការប្រមាថចំពោះពលរដ្ឋខ្មែរ និងប្រទេសកម្ពុជាយ៉ាងធ្ងន់ធ្ងរស្របពេលដែលកម្ពុជាបានទទួលយករបបប្រជាធិបតេយ្យដែលមានពលរដ្ឋជាម្ចាស់ប្រទេសទៅហើយនោះ។
ការអះអាងនេះ ធ្វើឡើងស្របពេលដែលមានភស្តុតាងជាច្រើនបង្ហាញថា លោក ហ៊ុន សែន មានអំណាចធំសម្បើមរហូតហ៊ានដល់គំរាមព្រះមហាក្សត្រខ្មែរថែមទៀត ទាំងការប្រើប្រាស់ពាក្យសម្ដី និងទង្វើនានារាប់មិនអស់រហូតមក។
ជាក់ស្តែង កាលពីឆ្នាំ២០០៥ លោក ហ៊ុន សែន បានគំរាមរំលាយរបបរាជានិយមដោយដាក់ជំនួសមកវិញនូវរបបសាធារណរដ្ឋ ប្រសិនបើសម្ដេចព្រះបាទ នរោត្តម សីហមុនី មិនព្រមឡាយព្រះហស្តលេខាលើសន្ធិសញ្ញាបំពេញបន្ថែមឆ្នាំ២០០៥ ស្ដីពីព្រំដែនកម្ពុជា-វៀតណាម ដើម្បីឱ្យគាត់អាចចុះកិច្ចព្រមព្រៀងខុសច្បាប់នានាជាមួយរដ្ឋាភិបាលវៀតណាមបានបន្តទៀតទេនោះ។
ជាងនេះទៀត កាលពីអំឡុងឆ្នាំ២០១៨ បុរសខ្លាំងក្តាប់អំណាចទំនើងចិត្ត លោក ហ៊ុន សែន ក៏ធ្លាប់ប្រមាថព្រះចេស្តាព្រះមហាក្សត្រខ្មែរបច្ចុប្បន្នយ៉ាងធ្ងន់ធ្ងរផងដែរ ជុំវិញជម្លោះផ្ទៃក្នុងនៃក្រុមហ៊ុនស្ថានីយទូរទស្សន៍ ស៊ីអ៊ិនស៊ី (CNC) ដែលលោក ហ៊ុន សែន គំរាមថា កុំថាឡើយត្រឹមម្ចាស់ក្រុមហ៊ុនរ៉ូយ៉ាល់គ្រុប (Royal Group) ដែលជាឧកញ៉ា គិត ម៉េង សូម្បីតែម៉ែឪស្ដេចក៏លោកមិនខ្លាចដែរ ហើយបើយកម៉ែឪស្តេចមកការពារខ្លួន ក៏ការពារមិនបានទៀត។
តាមរយៈនៃការដឹកនាំក្តោបក្តាប់អំណាចរបស់លោក ហ៊ុន សែន ជាង ៤ទសវត្សមកនេះ ត្រូវគេមើលឃើញថា មេដឹកនាំខ្មែរក្រាញអំណាចរូបនេះបានរំលោភលើព្រះរាជតួនាទីរបស់ព្រះមហាក្សត្រខ្មែរយ៉ាងធ្ងន់ធ្ងរ ដូចជាការស្នើដក ឬតែងតាំងមន្ត្រីរដ្ឋាភិបាលនានាដោយគ្មានការសុំព្រះរាជគំនិតរបស់ព្រះអង្គ ជាដើម ហើយកាន់តែធ្ងន់ធ្ងរជាងនេះទៀតនោះ ព្រះរាជតួនាទីរបស់ព្រះអង្គដែលមានចែងក្នុងរដ្ឋធម្មនុញ្ញជាអាជ្ញាកណ្ដាលដើម្បីធានានូវអំណាចសាធារណៈ ក្នុងមាត្រា៨ មិនត្រូវមេដឹកនាំរូបនេះអនុវត្តតាមឡើយ ជាពិសេសនៅពេលដែលលោក ហ៊ុន សែន មានជម្លោះជាមួយមេដឹកនាំបក្សក្រៅរដ្ឋាភិបាលកន្លងមក។
កម្ពុជាក្រោមការដឹកនាំនយោបាយរបស់លោក ហ៊ុន សែន ចាប់តាំងពីឡើងកាន់តំណែងជានាយករដ្ឋមន្ត្រីឆ្នាំ១៩៨៥ មក ត្រូវគេមើលឃើញថា គាត់បានប្រើអំណាចហួសដែនកំណត់ដោយរំលោភលើសិទ្ធិមូលដ្ឋានរបស់ពលរដ្ឋ បំពានរដ្ឋធម្មនុញ្ញ រំលោភព្រះមហាក្សត្រ និងរំលោភលើច្បាប់អន្តរជាតិនានា ដូចជាកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ជាដើម។
រដ្ឋធម្មនុញ្ញនៃព្រះរាជាណាចក្រកម្ពុជាមាត្រា៧ ចែងថា ព្រះមហាក្សត្រកម្ពុជាទ្រង់គ្រងរាជសម្បត្តិ ប៉ុន្តែទ្រង់មិនកាន់អំណាចឡើយ ហើយព្រះអង្គទ្រង់នឹងគង់ជាព្រះប្រមុខរដ្ឋពេញមួយជីវិត។ ជាងនេះទៀត ព្រះមហាក្សត្រមិនអាចនរណារំលោភបំពានបានឡើយ ប៉ុន្តែព្រះមហាក្សត្រខ្មែរសព្វថ្ងៃនេះ ត្រូវគេមើលឃើញថា ទ្រង់សោយរាជ្យក្រោមការគាបសង្កត់របស់មេដឹកនាំបក្សកាន់អំណាច លោក ហ៊ុន សែន យ៉ាងជូរចត់ ក្រោយពីព្រះអង្គឡើងគ្រងរាជ្យចាប់តាំងពីឆ្នាំ២០០៤ មក៕