រដ្ឋបាលរាជធានីភ្នំពេញបញ្ចេញរថយន្តដឹកអ្នកដំណើររបស់រដ្ឋាករស្វយ័តដឹកជញ្ជូនសាធារណៈ (City Bus) ចំនួន ៣៤៥គ្រឿង សម្រាប់ដឹកជញ្ជូនប្រជាពលរដ្ឋពីរាជធានីភ្នំពេញទៅតាមបណ្តាខេត្តនៅទូទាំងប្រទេសដោយមិនបង់ប្រាក់ ទាំងទៅ ទាំងមក ក្នុងឱកាសបុណ្យចូលឆ្នាំថ្មីប្រពៃណីជាតិ។
អភិបាលរាជធានីភ្នំពេញ លោក ឃួង ស្រេង នៅថ្ងៃទី១៣ ខែមេសា ឆ្នាំ២០២៣ នេះ នាំកម្លាំងចុះត្រួតពិនិត្យប្រជាពលរដ្ឋដែលត្រូវធ្វើដំណើរតាមរថយន្តរបស់សាលារាជធានីភ្នំពេញទៅតាមបណ្តាខេត្តនានា ក្នុងនោះរថយន្ត ៧គ្រឿងសម្រាប់ប្រើប្រាស់ជាសេវាដឹកជញ្ជូនប្រជាពលរដ្ឋក្នុងរាជធានីភ្នំពេញ ខណៈរថយន្ត ២៧៥គ្រឿងផ្សេងទៀត គឺសម្រាប់ប្រើប្រាស់ដឹកជញ្ជូនប្រជាពលរដ្ឋទាំងទៅទាំងមកតាមបណ្តាខេត្តនានានៅទូទាំងប្រទេស។
លោក ឃួង ស្រេង អះអាងថា ចំពោះការធ្វើដំណើរពីទីក្រុងភ្នំពេញទៅខេត្តកំពង់ឆ្នាំង ពោធិ៍សាត់ បាត់ដំបង បន្ទាយមានជ័យ និងខេត្តកំពង់ធំ សាលារាជធានីភ្នំពេញបានត្រៀមរថយន្តសរុប ១១៨គ្រឿងសម្រាប់ត្រៀមដឹកជញ្ជូនប្រជាពលរដ្ឋ។ ដោយឡែកតាមបណ្តាខេត្តផ្សេងទៀត ក៏មានការបែងចែករថយន្តសម្រាប់ដឹកជញ្ជូនដូចគ្នាដែរ។
ការបញ្ចេញរថយន្តដឹកជញ្ជូនប្រជាពលរដ្ឋក្នុងឱកាសបុណ្យចូលឆ្នាំខ្មែរនេះ ធ្វើឡើងតាមបញ្ជារបស់លោកនាយករដ្ឋមន្ត្រី ហ៊ុន សែន ដែលបានប្រកាសកាលពីពេលកន្លងទៅនេះ។
កាលពីថ្ងៃទី៦ ខែកុម្ភៈ ឆ្នាំ២០២៣ ប្រមុខរដ្ឋាភិបាលកម្ពុជា លោក ហ៊ុន សែន បានបញ្ជាឲ្យអភិបាលរាជធានីភ្នំពេញ លោក ឃួង ស្រេង ត្រៀមរថយន្តក្រុងដើម្បីដឹកជញ្ជូនពលរដ្ឋទៅស្រុកកំណើតក្នុងឱកាសបុណ្យចូលឆ្នាំប្រពៃណីជាតិខ្មែរនៅថ្ងៃទី១៤ ខែមេសា ឆ្នាំ២០២៣ នេះ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី១៣ មេសា នេះថា ការបញ្ចេញរថយន្តដើម្បីជួយសម្រួលការធ្វើដំណើររបស់ប្រជាពលរដ្ឋសម្រាប់ឱកាសបុណ្យចូលឆ្នាំខ្មែរនេះ គឺជាមធ្យោបាយដ៏ល្អ ព្រោះថាការធ្វើដំណើររបស់ប្រជាពលរដ្ឋព្រមៗគ្នាទៅតាមបណ្តាខេត្តនៅក្នុងឱកាសបុណ្យជាតិបែបនេះ គឺតែងប្រឈមនឹងការដំឡើងថ្លៃរថយន្តពីសំណាក់ម្ចាស់រថយន្តឈ្នួលមួយចំនួនដោយចៀសមិនផុតនោះឡើយ។
លោក សេក សុជាតិ លើកឡើងថា ប្រសិនបើរាជរដ្ឋាភិបាលធ្វើបែបនេះឲ្យបានរៀលរាល់ឆ្នាំ គឺរឹតតែល្អ ដើម្បីជួយដោះស្រាយបញ្ហានៃការធ្វើដំណើររបស់ប្រជាពលរដ្ឋដែលតែងតែកកស្ទះដោយសារការកើនឡើងនៃអ្នកធ្វើដំណើរក្នុងរដូវបុណ្យទានម្តងៗ ហើយប្រសិនបើរដ្ឋាភិបាលអាចធ្វើបានរាល់ឆ្នាំមែននោះ ក៏ជាការបញ្ចៀសនូវការរិះគន់ដែលលើកឡើងថា ការបញ្ចេញរថយន្តដឹកជញ្ជូនប្រជាពលរដ្ឋនៅមុនពេលបោះឆ្នោតនេះ គឺគ្រាន់តែជាការកេងចំណេញនយោបាយនោះ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិតរូបនេះបញ្ជាក់ថា បើរដ្ឋាភិបាលអាចធ្វើបែបនេះបានរាល់ៗឆ្នាំ នឹងទទួលបាននូវការសាទរពីប្រជាពលរដ្ឋពីគ្រប់មជ្ឈដ្ឋានកាន់តែខ្លាំង។ ជាងនេះទៀត ក៏ជាមុខមាត់របស់រដ្ឋាភិបាលផងដែរដែលជាផ្នែកមួយបង្ហាញឲ្យឃើញពីការយកចិត្តទុកដាក់ចំពោះប្រជាពលរដ្ឋនៅពេលមានបុណ្យជាតិរបស់ខ្លួន។
យ៉ាងណាក៏ដោយ ក្រុមអ្នកសង្កេតការណ៍លើកឡើងថា ការបញ្ចេញឡានរាប់រយគ្រឿងដើម្បីដឹកប្រជាពលរដ្ឋដោយឥតគិតថ្លៃនេះ ពិតមែនតែអាចជួយសម្រួលដល់ការធ្វើដំណើររបស់ប្រជាពលរដ្ឋក្នុងពេលចូលឆ្នាំខ្មែរនេះ ប៉ុន្តែចេតនាពិតប្រាកដរបស់លោក ហ៊ុន សែន ជាចម្បង មិនមែនដើម្បីជួយសម្រួលការធ្វើដំណើរប្រជាពលរដ្ឋទេ គឺដើម្បីសន្លឹកឆ្នោតនៅថ្ងៃបោះឆ្នោតនាខែកក្កដា ឆ្នាំ២០២៣ ខាងមុខនេះប៉ុណ្ណោះ។
ប្រភពដដែលបញ្ជាក់ថា រាល់សកម្មភាពរបស់គណបក្សប្រជាជនកម្ពុជាដែលគេមើលឃើញថាជាការយកចិត្តទុកដាក់ចំពោះប្រជាពលរដ្ឋ ប៉ុន្តែការពិត ពួកគេគឺធ្វើដើម្បីតែដោះដូរសន្លឹកឆ្នោតប៉ុណ្ណោះ។ ក្នុងន័យនេះ គឺមានន័យថា បើសកម្មភាពទាំងឡាយណាមិនបានផលចំណេញទេ ពួកគេនឹងមិនធ្វើជាដាច់ខាត បើទោះបីជារឿងនោះគឺជាតម្រូវការចាំបាច់របស់ប្រជាពលរដ្ឋក៏ដោយ។
យ៉ាងណាក៏ដោយ អភិបាលរាជធានីភ្នំពេញ លោក ឃួង ស្រេង អះអាងនៅថ្ងៃទី១៣ មេសា នេះថា ការរៀបចំរថយន្តក្រុងសម្រាប់ប្រជាពលរដ្ឋនៅពេលនេះ គឺបានរួមចំណែកជួយកាត់បន្ថយការចំណាយរបស់ប្រជាពលរដ្ឋមួយផ្នែកធំ ជាពិសេសបានចូលរួមយ៉ាងសំខាន់ក្នុងការទប់ស្កាត់ការដំឡើងថ្លៃរបស់ក្រុមហ៊ុនដឹកជញ្ជូនមួយចំនួនផងដែរ៕