ក្រុមសង្គមស៊ីវិលទទូចឲ្យគណបក្សនយោបាយ និងអ្នកគាំទ្រនយោបាយ នាំគ្នាបង្កើតវប្បធម៌នយោបាយដោយឈរលើគោលការណ៍បង្រួបបង្រួមសាមគ្គីអធ្យាស្រ័យ ដោយទទូចឲ្យតុលាការដោះលែងអ្នកជាប់ឃុំមនសិការទាំងអស់ រួមមានសកម្មជនសង្គម សហជីព និងអ្នកនយោបាយឲ្យមានសេរីភាពវិញដើម្បីងាកមករកការផ្សះផ្សាជាតិ។
សេចក្ដីថ្លែងការណ៍របស់សមាគមសម្ព័ន្ធនិស្សិតបញ្ញវន្តខ្មែរ និងសមាគមប្រជាធិបតេយ្យនៃសេដ្ឋកិច្ចក្រៅប្រព័ន្ធ រួមទាំងសមាគមបណ្ដាញយុវជនកម្ពុជា (CYN) ចេញផ្សាយនាថ្ងៃទី១៧ ខែមេសា ឆ្នាំ២០២៣ បានលើកឡើងថា ការផ្លាស់ប្ដូរវេនរបស់ទេវតាបានញ៉ាំងសេចក្ដីរីករាយដល់មនុស្សលោក ដែលជាសញ្ញាណមួយបង្ហាញថា ពលរដ្ឋខ្មែរទូទាំងនគរបានត្រៀមកាយ វាចា និងចិត្ត ដើម្បីធ្វើរឿងថ្មីៗក្រោយពេលឆ្លងឆ្នាំខ្មែររួច។
ការទទូចរបស់អង្គការសមាគមមិនមែនរដ្ឋាភិបាលនាពេលនេះ ធ្វើឡើងបន្ទាប់ពីមុនពិធីបុណ្យចូលឆ្នាំកន្លងទៅ លោក ហ៊ុន សែន បានព្រមានតាមកម្ទេចក្រុមគណបក្សប្រឆាំងដោយប្រើប្រាស់ប្រព័ន្ធតុលាការ ដើម្បីបំបិទសំឡេងពួកគេមុនការបោះឆ្នោតនៅខែកក្កដា ខាងមុខនេះ។
បុរសខ្លាំងក្រាញអំណាចតពូជនៅកម្ពុជា ដែលបានប្រើប្រព័ន្ធតុលាការមុនការបោះឆ្នោត ដោយកាត់ទោសឲ្យប្រធានគណបក្សសង្គ្រោះជាតិ លោក កឹម សុខា ជាប់គុកក្នុងផ្ទះរយៈពេល ២៧ឆ្នាំ ពីបទ «ក្បត់ជាតិ»។ ចំណែកថ្នាក់ដឹកនាំគណបក្សភ្លើងទៀន លោក សុន ឆ័យ ត្រូវបានតុលាការកាត់ឲ្យចាញ់ក្ដីគណបក្សប្រជាជនកម្ពុជាដែលដឹកនាំដោយលោក ហ៊ុន សែន ករណីរិះគន់ការបោះឆ្នោតក្រុមប្រឹក្សាឃុំ-សង្កាត់កាលពីខែមិថុនា ឆ្នាំ២០២២ ខណៈអនុប្រធានគណបក្សភ្លើងទៀន លោក ថាច់ សេដ្ឋា កំពុងជាប់ពន្ធនាគារព្រៃសពាក់ព័ន្ធនឹងរឿងចេញសែកស្អុយ។
ចំណែកសកម្មជន ឬអ្នកគាំទ្រ និងអ្នកការពារសិទ្ធិមនុស្ស ជាដើម ត្រូវបានលោក ហ៊ុន សែន ដែលជាបុរសខ្លាំងកាន់អំណាចយូរជាងគេលើពិភពលោក ធ្វើទុក្ខបុកម្នេញ និងតាមគំរាមកំហែងលើពួកគេគ្រប់រូបភាព ដើម្បីបំបិទសំឡេង និងមតិផ្ទុយពីគណបក្សប្រជាជនកម្ពុជា។
ការបន្តធ្វើទុក្ខបុកម្នេញ និងការប្រើប្រព័ន្ធតុលាការបំបិទសំឡេងរិះគន់ ព្រមទាំងមតិផ្ទុយនេះ គឺដើម្បីរៀបចំផ្ទេរអំណាចឲ្យកូនប្រុសច្បង គឺលោក ហ៊ុន ម៉ាណែត ធ្វើជានាយករដ្ឋមន្ត្រីនៅកម្ពុជាបន្តវេនពីលោក។
ចំណែកលោក សម រង្ស៊ី ដែលចូលរួមកម្មវិធីចូលឆ្នាំខ្មែរនៅវត្តច័ន្ទរង្សី ក្នុងទីក្រុងប៉ារីស បានថ្លែងថា លោកជូនពរឲ្យពលរដ្ឋខ្មែរមានសេចក្តីសុខ សេរីភាព និងជាពិសេសលោកចង់ឃើញមេដឹកនាំខ្មែរនៅក្រោយការបោះឆ្នោតនៅចុងខែកក្កដា ឆ្នាំ២០២៣ ខាងមុខនេះ ប្រកបដោយព្រហ្មវិហារធម៌។
រីឯគណបក្សភ្លើងទៀន បួងសួងឲ្យបញ្ចប់ជម្លោះនយោបាយតាមរយៈវប្បធម៌សន្ទនា ឆ្ពោះទៅឯកភាព និងលទ្ធិប្រជាធិបតេយ្យសេរីពិតប្រាកដ៕