32 C
Phnom Penh

លោក ហ៊ុន សែន ថា​សេរីភាព​លោក​បាត់បង់​អស់​ពាក់កណ្ដាល​ព្រោះ​កម្លាំង​ការពារ​ច្រើន​ពេក

ដោយ ឌឹ ខេមបូឌា ដេលី

បទវិភាគ

មេដឹកនាំ​ដែល​ក្រាញ​អំណាច​ជិត ៤០​ឆ្នាំ​នៅ​កម្ពុជា បាន​ត្អូញត្អែរ​ថា រូបលោក​បច្ចុប្បន្ន​កំពុង​ក្លាយ​ទៅ​ជា​អ្នកទោស ដោយសារ​សេរីភាព​ពាក់កណ្ដាល​ត្រូវ​បាន​បាត់បង់​ព្រោះ​តែ​មាន​កម្លាំង​ជួយ​ការពារ​ច្រើន​ពេក។

ក្នុង​ពិធី​បុណ្យ​បញ្ចុះ​ខណ្ឌសីមា​ព្រះវិហារ​ពុទ្ធាភិសេក​នៅ​រាជធានី​ ភ្នំពេញ នា​ថ្ងៃ​ចន្ទ ទី​២៤ មេសា នេះ លោក ហ៊ុន សែន ថ្លែង​ថា ថ្មីៗ​នេះ​រូបលោក និង​គ្រួសារ​ចង់​ទៅ​លេង​ខេត្ត​កែប ដោយ​ស្ងាត់ៗ ប៉ុន្តែ​បែរ​ជា​ត្រូវ​ប្រធាន​ក្រុម​ការងារ​សន្តិសុខ លោក យូ ស៊ុនឡុង ដាក់​កម្លាំង​ការពារ​សន្តិសុខ​ឲ្យ​លោក​តាំងពី​ខេត្ត​កណ្តាល ខេត្ត​កំពង់ស្ពឺ តាកែវ កំពត រហូត​ដល់​ខេត្ត​កែប ដោយ​ប្រើ​កម្លាំង​ប្រមាណ ៣០០​នាក់​អម​ជាមួយ​នឹង​ឧទ្ធម្ភាគចក្រ ៣​គ្រឿង​ថែម​ទៀត​ផង​ដែរ។

លោក ហ៊ុន សែន ថា​បញ្ហា​សន្តិសុខ​នេះ​បាន​ធ្វើ​ឲ្យ​លោក​បាត់បង់​សេរីភាព​អស់​ពាក់កណ្ដាល ដោយសារ​តែ​មាន​កម្លាំង​ដើម្បី​ការពារ​ច្រើន​ពេក ដែល​ធ្វើ​ឲ្យ​លោក​ពិបាក​ដើរហើរ​ដូច​ពលរដ្ឋ​ធម្មតា។

បុរស​ខ្លាំង​ក្រាញ​អំណាច​ត​ពូជ​នៅ​កម្ពុជា​រូប​នេះ​បាន​ចំអក​ទៅ​កាន់​មេដឹកនាំ​បក្ស​ប្រឆាំង​ថា កន្លងមក​លោក​មិន​ដែល​គិត​ថា​នឹង​បាន​ធ្វើជា​នាយករដ្ឋមន្ត្រី​ទេ ប៉ុន្តែ​បែរ​ជា​បាន​ធ្វើ និង​បំបែក​ឯកត្តកម្ម​ពិភពលោក​ដោយ​បាន​កាន់​អំណាច​យូរ​ជាងគេ​រហូត​ជិត ៤​ទសវត្សរ៍ ទាំង​អ្នក​ខ្លះ​ទោះបី​ស្លាប់​ទៅ​ជាតិ​ក្រោយ​ក៏​មិន​បាន​ធ្វើ​នាយករដ្ឋមន្ត្រី​ដែរ។

លោក ហ៊ុន សែន មិន​ត្រឹម​កាន់​អំណាច​យូរ​ទេ មេដឹកនាំ​រូប​នេះ​ក៏​កំពុង​រៀបចំ​ផ្ទេរ​អំណាច​នាយករដ្ឋមន្ត្រី​ទៅ​ឲ្យ​កូនប្រុស​ច្បង​របស់​ខ្លួន គឺ​លោក ហ៊ុន ម៉ាណែត ដើម្បី​បន្ត​វេន​ផង​ដែរ។

ក្រុម​អ្នក​សង្កេតការណ៍​និយាយ​ថា ការ​រៀបចំ​ផ្ទេរ​អំណាច​ពី​ឪពុក​ទៅ​កូន​នេះ លោក ហ៊ុន សែន បាន​ត្រួសត្រាយ​ផ្លូវ​សម្រាប់​លោក ហ៊ុន ម៉ាណែត ដោយ​បញ្ជា​ទៅ​តុលាការ​ឲ្យ​កាត់ទោស​ប្រធាន​គណបក្ស​សង្គ្រោះ​ជាតិ លោក កឹម សុខា ចំនួន ២៧​ឆ្នាំ និង​ដក​សិទ្ធិ​មិន​ឲ្យ​ធ្វើ​នយោបាយ​អស់​មួយ​ជីវិត ក្រោម​បទ​ចោទប្រកាន់​ដែល​លោក ហ៊ុន សែន ថា «ក្បត់​ជាតិ»។

បច្ចុប្បន្ន លោក កឹម សុខា ត្រូវ​បាន​តុលាការ​ក្រោម​បញ្ជា​របស់​លោក ហ៊ុន សែន ឃុំ​ខ្លួន​នៅ​ក្នុង​ផ្ទះ​ជំនួស​ការ​ឃុំ​ខ្លួន​ក្នុង​ពន្ធនាគារ។

ក្រៅពី​កាត់ទោស​មេដឹកនាំ​បក្ស​ប្រឆាំង លោក កឹម សុខា ហើយ ក្នុង​ឆ្នាំ​២០២៣ នេះ លោក ហ៊ុន សែន ក៏​បាន​បិទ​ប្រព័ន្ធ​ផ្សព្វផ្សាយ​វីអូឌី ស្រប​ពេល​ដែល​សកម្មជន​សង្គម សកម្មជន​នយោបាយ និង​មេដឹកនាំ​គណបក្ស​ភ្លើង​ទៀន​មួយ​ចំនួន កំពុង​ជាប់​បណ្ដឹង​នៅ​តុលាការ និង​កំពុង​ជាប់​ពន្ធនាគារ​ផង​ដែរ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស