អ្នកអត្ថាធិប្បាយវិស័យកីឡាប្រដាល់ ទម្លាយថា សព្វថ្ងៃនេះ មន្ត្រីថ្នាក់ក្រោម និងម្ចាស់ក្លឹបប្រដាល់មួយចំនួនកំពុងទ្រាំនឹងការគាបសង្កត់របស់មន្ត្រីសហព័ន្ធកីឡាប្រដាល់កម្ពុជា ដែលគ្មានច្បាប់កំណត់នៃការប្រកួតឱ្យបានត្រឹមត្រូវ រហូតធ្វើឱ្យបាត់បង់សមត្ថភាពកីឡាករប្រដាល់ល្បីៗជាបន្តបន្ទាប់នៅពេលនេះ។
អ្នកអត្ថាធិប្បាយវិស័យកីឡាប្រដាល់ លោក ហេរ៉ូ បានចេញវីដេអូឃ្លីបកាលពីថ្ងៃទី២៥ ខែមេសា ឆ្នាំ២០២៣ ថា អ្នកដែលកំពុងរងនូវការគាបសង្កត់ពីមន្ត្រីសហព័ន្ធកីឡាប្រដាល់ កំពុងតែទ្រាំឱ្យផុតព្រឹត្តិការណ៍ស៊ីហ្គេមខាងមុខនេះ ព្រោះថាការផ្គូផ្គងកីឡាករប្រដាល់កន្លងមកគ្មានច្បាប់កំណត់ច្បាស់លាស់ឡើយ គឺធ្វើទៅតាមតែការចង់បានរបស់អ្នកមានអំណាច ដែលពេលខ្លះជំរុញឱ្យកីឡាករប្រដាល់ចូលប្រកួតក្នុងមួយសប្តាហ៍រហូតទៅដល់ ២ដង ដែលជាហេតុធ្វើឱ្យបាក់កម្លាំងកីឡាករប្រដាល់ និងធ្វើឱ្យខូចកីឡាករថែមទៀត។
លោក ហេរ៉ូ លើកឡើងថា គ្មានកីឡាករប្រដាល់បរទេសណាចេញប្រកួតមួយអាទិត្យម្តង ឬមួយអាទិត្យ ២ដងដូចកីឡាករខ្មែរនោះទេ ព្រោះការធ្វើបែបនេះ គឺជាបង្ខំឱ្យបាត់បង់សមត្ថភាពកីឡាករប្រដាល់ប៉ុណ្ណោះ។ ជាក់ស្តែង កីឡាករ ធឿន ធារ៉ា កីឡាករ ពេជ្រ សម្បត្តិ និងកីឡាករ ឈឿង ល្វៃ បានបាត់បង់សមត្ថភាពប្រកួតទាំងស្រុងនៅពេលនេះ ដោយសារតែពួកគេប្រកួតគ្មានពេលសម្រាកបំប៉នសុខភាព និងហាត់សមបន្ថែម។
អ្នកអត្ថាធិប្បាយវិស័យកីឡាប្រដាល់រូបនេះបញ្ជាក់ថា អ្នកចាត់ការតាមប៉ុស្តិ៍ទូរទស្សន៍ខ្លះសព្វថ្ងៃនេះ បានប្រជែងគ្នាដណ្តើមកីឡាករឱ្យទៅប្រកួតនៅប៉ុស្តិ៍ទូរទស្សន៍របស់ខ្លួន ដើម្បីស្វែងរកអ្នកទស្សនាឱ្យកាន់តែច្រើន និងដើម្បីផ្គាប់ចិត្តអ្នកគ្រប់គ្រងខាងលើ ប៉ុន្តែពួកគេមិនបានគិតគូរពីសុខភាព និងអនាគតរបស់កីឡាករប្រដាល់នោះទេ ពួកគេគិតតែប្រមូលលុយតែប៉ុណ្ណោះ ហើយលោកក៏ឆ្ងល់ដែរ ថាតើបញ្ហានេះមានជាប់ពាក់ព័ន្ធជាមួយគ្រូបង្វឹករបស់កីឡាករប្រដាល់ឬក៏អត់។
លោក ហេរ៉ូ ទម្លាយថា បច្ចុប្បន្ននេះ កីឡាករប្រដាល់ដែលបាត់បង់នូវសមត្ថភាពប្រកួតដោយសារការបង្ខំឱ្យប្រកួតញឹកញាប់មានច្រើនណាស់ ប៉ុន្តែត្រូវគេលាក់បាំងព័ត៌មាននេះ។
កាលពីយប់ថ្ងៃទី២៣ ខែមេសា កីឡាករប្រដាល់គុនខ្មែរ ធឿន ធារ៉ា បានប្រកួតជាមួយកីឡាករប្រដាល់ជនជាតិថៃ ឈ្មោះ Krongchak Por.Paoin Sor Jor Pheakuothai។ ក្នុងការប្រកួតនោះ កីឡាករប្រដាល់គុនខ្មែរ ធឿន ធារ៉ា បានបោះបង់ការប្រកួតក្នុងទឹកទីបួន បន្ទាប់ពីកីឡាករប្រដាល់ថៃ ទាត់ឱ្យរបួសដៃស្តាំរហូតដល់ប្រេះឆ្អឹងមិនអាចប្រកួតបន្តទៀតបាន។ ដោយសារតែឧបទ្ទវហេតុនេះ កីឡាករប្រដាល់គុនខ្មែរ ធឿន ធារ៉ា ត្រូវបានផ្អាកមិនឱ្យឡើងសង្វៀនប្រកួតនៅប្រទេសម៉ាឡេស៊ី នៅថ្ងៃទី៦ ខែឧសភា ឆ្នាំ២០២៣ ខាងមុខនេះបានទេ។
មួយរយៈចុងក្រោយនេះ ត្រូវគេមើលឃើញថា កីឡាករប្រដាល់គុនខ្មែរ ធឿន ធារ៉ា ឡើងសង្វៀនប្រកួតញឹកញាប់ បន្ទាប់ពីកីឡាកររូបនេះទទួលបានជ័យជម្នះជាបន្តបន្ទាប់ក្រោយយកឈ្នះកីឡាករថៃ ឈ្មោះ សៃ យុគ កាលពីដើមខែកុម្ភៈ ឆ្នាំ២០២៣។
ទាក់ទិននឹងបញ្ហានេះ កាលពីដើមខែមីនា ឆ្នាំ២០២៣ កីឡាករប្រដាល់ ពេជ្រ សម្បត្តិ ហៅក្របីព្រៃ បានចាញ់ប្រកួតកីឡាករឡាវ ឈ្មោះ ខាំភូ ដោយសន្លប់ បន្ទាប់ពីកីឡាករឡាវ ទាត់ចំក្រអូបមាត់ធ្វើឱ្យប្រេះឆ្អឹងថ្គាម។ ដោយឡែកកីឡាករគុនខ្មែរមួយរូបទៀត គឺកីឡាករ ឈឿង ល្វៃ ក៏ត្រូវរងរបួសជើងធ្ងន់ធ្ងរផងដែរ ដោយបោះបង់ការប្រកួតក្នុងទឹកទី៤ ក្នុងការប្រកួតជាមួយកីឡាករថៃ ឈ្មោះ សាមី កាលពីពាក់កណ្តាលខែមេសា នេះ។
ការរងរបួសរបស់កីឡាករប្រដាល់គុនខ្មែរខាងលើនេះ ត្រូវគេសង្កេតឃើញថា ពួកគេបានចូលរួមប្រកួតស្ទើរតែរាល់សប្តាហ៍ បន្ទាប់ពីពួកគេទទួលបានជ័យជម្នះក្នុងការប្រកួតជាប់ៗគ្នាកន្លងមក ដែលជាហេតុធ្វើឱ្យកីឡាករប្រដាល់ទាំងនោះគ្មានពេលគ្រប់គ្រាន់ដើម្បីហ្វឹកហាត់ និងដើម្បីបំប៉នសុខភាព។
សារព័ត៌មាន The Cambodia Daily មិនអាចទាក់ទងប្រធានសហព័ន្ធកីឡាកម្ពុជា លោក តែម ម៉ឺន សុំការបំភ្លឺជុំវិញបញ្ហានេះបាននៅឡើយទេរហូតដល់ម៉ោងផ្សាយនេះ។
ទាក់ទិននឹងបញ្ហានេះ លោកនាយករដ្ឋមន្ត្រី ហ៊ុន សែន កាលពីថ្ងៃទី១៦ ខែមេសា ឆ្នាំ២០២៣ នេះ បានបញ្ជាឱ្យសហព័ន្ធកីឡាប្រដាល់កម្ពុជា យកចិត្តទុកដាក់លើកីឡាករប្រដាល់របស់កម្ពុជាដែលត្រូវចូលរួមប្រកួតក្នុងព្រឹត្តិការណ៍ស៊ីហ្គេមខាងមុខឱ្យបានហ្មត់ចត់ មុននឹងព្រឹត្តិការណ៍នេះដល់ ដោយមិនអនុញ្ញាតឲ្យមានការរៀបចំការប្រកួតសម្រាប់កីឡាករប្រដាល់ទាំងនោះឡើយ ដើម្បីកុំឱ្យមានហេតុការណ៍ថ្លោះធ្លោយណាមួយកើតឡើងជាយថាហេតុសម្រាប់ការប្រកួតតាមវិញ្ញាសាក្នុងព្រឹត្តិការណ៍ស៊ីហ្គេមខាងមុខនេះ៕