កូនប្រុសច្បងរបស់លោក អេង ឆៃអ៊ាង ប្រកាសថានឹងផ្ដាច់ទំនាក់ទំនងជាមួយឪពុករបស់ខ្លួន ប្រសិនបើហ៊ានវិលត្រឡប់មកកម្ពុជាវិញ ហើយចុះចូលជាមួយគណបក្សប្រជាជនកម្ពុជាជាថ្នូរទទួលបានតួនាទី និងតំណែងនោះ។
លោក អេង រតនៈ ដែលជាកូនប្រុសបង្កើតរបស់លោក អេង ឆៃអ៊ាង បានសរសេរលើហ្វេសប៊ុកកាលពីថ្ងៃទី២៥ ខែមេសា ឆ្នាំ២០២៣ ថា បើឪពុករបស់ខ្លួនត្រឡប់មកកម្ពុជាវិញដោយធ្វើតាមលោក ហ៊ុន សែន ដើម្បីបានតួនាទី និងតំណែងមែននោះ រូបលោកនិងភរិយា នឹងផ្ដាច់ទំនាក់ទំនងជាមួយឪពុកជារៀងរហូត។
ការអះអាងរបស់លោក អេង រតនៈ ដែលជាស្វាមីរបស់អ្នកស្រី ស៊ិន ចាន់ពៅរ៉ូហ្សេត ធ្វើឡើងដូច្នេះបន្ទាប់ពីលោក ហ៊ុន សែន បានប្រកាសលើកលែងទោស ព្រមទាំងផ្ដល់តួនាទី និងតំណែងដល់លោក អេង ឆៃអ៊ាង បើផ្ដាច់ខ្លួនចេញពីបក្សប្រឆាំង ហើយមកចុះចូលជាមួយបក្សប្រជាជនកម្ពុជាវិញ។
ចំណែកអតីតអនុប្រធានគណបក្សសង្គ្រោះជាតិ លោក អេង ឆៃអ៊ាង សរសេរលើហ្វេសប៊ុកដោយជំហរថា តំណែងដែលរូបលោកចង់បាននោះ គឺតំណែងកើតចេញពីការបោះឆ្នោត ត្រឹមត្រូវ និងយុត្តិធម៌របស់ពលរដ្ឋ មិនមែនតំណែងដែលលោក ហ៊ុន សែន ផ្ដល់ឲ្យនោះទេ។
លោកថា តំណែងដែលលោក ហ៊ុន សែន ផ្ដល់ឲ្យមិនស្ថិតស្ថេរនោះទេ ដោយលោក ហ៊ុន សែន ចង់ដកម៉ោងណា ឬពេលណាក៏បានដែរ បើសិនជាធ្វើសកម្មភាពមិនត្រូវចិត្តលោក ហ៊ុន សែន នោះ។
កាលពីថ្ងៃទី២៥ ខែមេសា ឆ្នាំ២០២៣ លោក ហ៊ុន សែន បានប្រកាសលើកលែងទោស និងផ្តល់តួនាទីដល់លោក អេង ឆៃអ៊ាង បើសិនវិលចូលមកកម្ពុជាវិញ ហើយធ្វើការងារឲ្យគណបក្សប្រជាជនកម្ពុជា។
លោក អេង ឆៃអ៊ាង អតីតអនុប្រធានគណបក្សសង្គ្រោះជាតិបានភៀសខ្លួនទៅរស់នៅសហរដ្ឋអាមេរិកចាប់តាំងពីមុនតុលាការកំពូលរំលាយគណបក្សសង្គ្រោះជាតិកាលពីឆ្នាំ២០១៧ ជាមួយនឹងមេដឹកនាំជាន់ខ្ពស់ផ្សេងៗទៀតផងដែរ៕