38 C
Phnom Penh

លោក ធែល ធីលែន៖ រាល់​បណ្តឹង​ប្តឹង​លោក គឺ​គ្មាន​ឯកសារ និង​ប្រើ​ឯកសារ​ក្លែង​បន្លំ

ដោយ ឌឹ ខេមបូឌា ដេលី

បទវិភាគ

លោក ធែល ធីលែន សកម្មជន​សង្គម​ដែល​កំពុង​ត្រូវ​បាន​ឃុំ​ខ្លួន​ទាំង​អយុត្តិធម៌​ក្នុង​ពន្ធនាគារ​ខេត្ត​កណ្តាល បាន​ទម្លាយ​តាមរយៈ​លិខិត​មួយ​សន្លឹក​ដែល​បាន​ផ្ញើ​តាម​អ្នកទោស​ដែល​ត្រូវ​បាន​ដោះលែង​ពី​ពន្ធនាគារ​ខេត្ត​កណ្តាល ដោយ​បាន​រៀបរាប់​ថា រាល់​សំណុំរឿង​របស់​លោក គឺ​គ្មាន​ឯកសារ និង​មាន​ការ​ប្រើ​ឯកសារ​ក្លែង​បន្លំ ដែល​ជា​ការ​ឃុបឃិត​គ្នា​រវាង​ដើមបណ្ដឹង និង​អាជ្ញាធរ​ដែល​ជា​មន្ត្រី​តុលាការ​ខេត្ត​កណ្តាល។

សកម្មជន​សង្គម​ដែល​កំពុង​ត្រូវ​បាន​ឃុំ​ខ្លួន​ទាំង​អយុត្តិធម៌​ក្នុង​ពន្ធនាគារ​ខេត្ត​កណ្តាល រូប​នេះ​បាន​បញ្ចេញ​លិខិត​មួយ​ច្បាប់​ដែល​លោក​បាន​សរសេរ​កាលពី​ថ្ងៃទី​២៥ ខែ​មីនា ឆ្នាំ​២០២៣ និង​ត្រូវ​បាន​ផ្សព្វផ្សាយ​លើ​បណ្ដាញ​សង្គម​ហ្វេសប៊ុក​កាលពី​ថ្ងៃ​ព្រហស្បតិ៍ ទី​២៧ មេសា រៀបរាប់​ថា មក​ដល់​ពេលនេះ លោក​ត្រូវ​បាន​ឃុំ​ខ្លួន​អស់​រយៈពេល​ជិត ៦​ខែ​ហើយ ហើយ​ស្ថានភាព​នៅ​ក្នុង​ពន្ធនាគារ​របស់​លោក​នៅ​ពេលនេះ​ពិត​ជា​មិន​អាច​ទទួលយក​បាន​នោះ​ទេ។

សកម្មជន​សង្គម​រូប​នេះ​ត្អូញត្អែរ​ថា អំឡុង​ពេល​ដែល​ត្រូវ​បាន​ឃុំ​ខ្លួន តុលាការ​បាន​ចោទប្រកាន់​រូបលោក​ដល់​ទៅ ៤​ករណី​ទាំង​ដែល​លោក​មិន​បាន​ប្រព្រឹត្ត​ទាល់តែសោះ។ លោក ធែល ធីលែន បន្ថែម​ថា រាល់​ការ​ចោទ​ប្តឹង​មក​លើ​រូបលោក សុទ្ធសឹងតែ​ជា​ពាក្យ​កុហក​របស់​ដើមបណ្ដឹង​ទាំងអស់ និង​ជា​សម្ដី​របស់​ពួកគេ​ដែល​គ្មាន​ភស្តុតាង​ស្រប​ច្បាប់​ដែល​បង្ហាញ​ថា​លោក​បាន​ប្រព្រឹត្ត​នោះ​ឡើយ។

លោក ធែល ធីលែន បញ្ជាក់​ថា សំណុំរឿង​ទី​១ ប្តឹង​រូបលោក​នៅ​សាលា​ឧទ្ធរណ៍​ប្រើ​តែ​មាត់​ទទេ គ្មាន​ឯកសារ និង​ភស្តុតាង​អ្វី​ទាំងអស់។ ចំណែក​សំណុំរឿង​ទី​២ ទី​៣ និង​ទី​៤ គឺជា​ពាក្យ​បណ្តឹង​ដែល​ប្រើ​ឯកសារ​ក្លែង​បន្លំ​ដោយ​មាន​ការ​ឃុបឃិត​ជាមួយ​មន្ត្រី​តុលាការ​ខេត្ត​កណ្តាល រហូត​មក។

សកម្មជន​សង្គម​រូប​នេះ​ត្អូញត្អែរ​ថា ពិត​ជា​អាណោចអាធម៌​ណាស់​សម្រាប់​រូបលោក ដែល​កាលពី​ថ្ងៃទី​២ ខែ​កញ្ញា ឆ្នាំ​២០២០ អំឡុង​ពេល​ដែល​យក​ភរិយា​ទៅ​សម្រាល​កូន​នៅ​មន្ទីរពេទ្យ​រយៈពេល ៧​ថ្ងៃ ប៉ុន្តែ​ក្រោយពី​ត្រឡប់​មក​ផ្ទះ​វិញ លោក​បាន​ត្រូវ​គេ​ព័ទ្ធ​មិន​ឱ្យ​ចូល ហើយ​បង្ខំ​ឱ្យ​លោក​រុះរើ​ផ្ទះ​ក្នុង​ស្ថានភាព​កូវីដ-១៩ ដោយ​ក្លែង​បន្លំ​ឯកសារ​ថា ផ្ទះ​របស់​លោក​ត្រូវ​បាន​លក់​អស់​ហើយ។ ជាង​នេះ​ទៀត ពួកគេ​បាន​ប្តឹង​រូបលោក​ដល់​ទៅ ៤​ករណី​ដើម្បី​បំបិទ​មាត់​លោក​មិន​ឱ្យ​តវ៉ា​ថែម​ទៀត។

លោក ធែល ធីលែន លើក​ជា​សំណួរ​ថា ឯណា​ទៅ​បទបញ្ជា​ហាម​មិន​ឱ្យ​រឹបអូស​អចលនទ្រព្យ​ពលរដ្ឋ​អំឡុង​កូវីដ-១៩? ឯណា​ទៅ​សិទ្ធិ​រស់រាន​មាន​ជីវិត និង​សិទ្ធិ​លំនៅឋាន? ឯណា​ទៅ​ភាព​យុត្តិធម៌​សម្រាប់​ពលរដ្ឋ​ខ្មែរ​ក្រីក្រ?

កាលពី​ថ្ងៃទី​៤ ខែ​តុលា ឆ្នាំ​២០២២ សកម្មជន​សង្គម លោក ធែល ធីលែន ត្រូវ​បាន​សមត្ថកិច្ច​ចាប់​ខ្លួន​ក្រោយពី​សកម្មជន​រូប​នេះ​ត្រៀម​ទៅ​ធ្វើ​សន្និសីទ​សារព័ត៌មាន​នៅ​ទីលាន​ប្រជាធិបតេយ្យ ដើម្បី​ទាមទារ​ឱ្យ​រដ្ឋាភិបាល​កម្ពុជា​បញ្ឈប់​ការ​ចេញ​ប័ណ្ណ​ស្នាក់នៅ​អចិន្ត្រៃយ៍​ដល់​ជនបរទេស និង​លុប​គម្រោង​បង្កើត​អគារ​សិក្សា​ភាសា​វៀតណាម​នៅ​ក្នុង​សាកលវិទ្យាល័យ​ភូមិន្ទ​ភ្នំពេញ​ផង​ដែរ។

ក្រោយ​ការ​ចាប់​ខ្លួន​ភ្លាមៗ ក៏​លេច​ចេញ​នូវ​ដីកា​របស់​សាលាដំបូង​ខេត្ត​កណ្តាល ដែល​បាន​ចេញ​ដីកា​បង្គាប់​ឱ្យ​ចាប់​ខ្លួន​លោក ធែល ធីលែន ពី​បទ​ចោទ​លួច​លក់​អចលនវត្ថុ​អ្នក​ដទៃ តាម​មាត្រា​២៥៥ នៃ​ច្បាប់​ភូមិបាល ដែល​ធ្វើឡើង​នៅ​ភូមិ​ព្រែកដូនហែម ឃុំ​ព្រែកអំពិល ស្រុក​ខ្សាច់កណ្ដាល ខេត្ត​កណ្តាល កាលពី​អំឡុង​ឆ្នាំ​២០១៦។

ទាក់ទិន​នឹង​បញ្ហា​នេះ ឪពុក​បង្កើត​របស់​លោក ធែល ធីលែន គឺ​លោក ផៃ ធែល ធ្លាប់​បាន​អះអាង​កាលពី​ពេល​កន្លងទៅ​ថា តុលាការ​បាន​ឆ្លៀត​ឱកាស​យក​បញ្ហា​ផ្ទាល់ខ្លួន​កូន​របស់​លោក ដើម្បី​បង្អាក់​សកម្មភាព​តវ៉ា​រឿង​បញ្ហា​វៀតណាម​នៅ​កម្ពុជា ដោយ​ភ្ជាប់​រឿង​បងស្រី​របស់​លោក​ឈ្មោះ ខៀវ គន្ធល់ ដែល​ចង់​បាន​ដី​ចម្ការ​ជា​ចំណែក​របស់​លោក ធែល ធីលែន តាំងពី​ឆ្នាំ​២០១៦ មក។

លោក ផៃ ធែល រៀបរាប់​ថា កាលពី​ឆ្នាំ​២០០៨ លោក​បាន​ចែក​ដី​ចម្ការ​មួយ​ចំណែក​នៅ​ក្នុង​ស្រុក​ខ្សាច់កណ្ដាល ឱ្យ​ទៅ​លោក ធែល ធីលែន បន្ទាប់​មក​នៅ​ឆ្នាំ​២០១៦ លោក​បាន​ធ្វើ​លិខិត​ផ្ទេរ​កម្មសិទ្ធិ​ដីធ្លី​ដោយ​មាន​ការ​ដឹង​ឮ​ពី​អាជ្ញាធរ​មូលដ្ឋាន និង​បាន​យក​ទៅ​បញ្ចាំ​ក្នុង​តម្លៃ ១​ម៉ឺន ៦​ពាន់​ដុល្លារ​សម្រាប់​យក​ទៅ​ទិញ​រថយន្ត​រត់​ឈ្នួល។

ប៉ុន្តែ​បងស្រី​របស់​លោក​ឈ្មោះ ខៀវ គន្ធល់ និង​អ្នក​រួមផ្សំ​គំនិត​ផ្សេង​ទៀត​បាន​លួច​ធ្វើ​ប្លង់​កម្មសិទ្ធិ​ដី​នោះ ថែម​ទាំង​បាន​លួច​ធ្វើ​ពាក្យ​បណ្ដឹង​ចោទប្រកាន់​មក​លើ​កូនប្រុស​របស់​លោក ថា​បាន​លក់​អចលនវត្ថុ​របស់​ពួកគេ​ថែម​ទៀត ខណៈ​អាជ្ញាធរ​បាន​ចាប់​ខ្លួន​កូនប្រុស​របស់​លោក​ទាំង​ដែល​គ្មាន​ភស្តុតាង​គ្រប់គ្រាន់​នោះ​ឡើយ។

ទាក់ទិន​នឹង​បញ្ហា​នេះ កាលពី​ចុង​ខែ​វិច្ឆិកា ឆ្នាំ​២០២១ អតីត​ប្រធាន​សហភាព​សហជីព​កម្ពុជា លោក រ៉ុង ឈុន បាន​អះអាង​ថា លោក​បាន​សង្កេត​ឃើញ​ថា ប្រព័ន្ធ​ច្បាប់​នៅ​កម្ពុជា​គ្រាន់តែ​ជា​ទីផ្សារ​ទិញ​លក់​រឿង​ក្តី​យ៉ាង​អណាធិបតេយ្យ​ប៉ុណ្ណោះ អំឡុង​ពេល​ដែល​លោក​ត្រូវ​បាន​តុលាការ​ឃុំ​ខ្លួន​អស់​រយៈពេល​ជាង ១​ឆ្នាំ​កាលពី​ពេល​កន្លងទៅ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស