សមាជិកចលនាយុវជនគណបក្សសង្គ្រោះជាតិប្រចាំប្រទេសកូរ៉េខាងត្បូង លើកឡើងថា អនុស្សាវរីយ៍ដែលធ្លាប់តស៊ូជាមួយគ្នាស្វែងរកយុត្តិធម៌សង្គម ស្វែងរកលទ្ធិប្រជាធិបតេយ្យតាមរយៈគោលនយោបាយអហិង្សារបស់លោក កឹម សុខា កន្លងមក គ្រាន់តែជាការចងចាំប៉ុណ្ណោះ បន្ទាប់ពីមន្ត្រីបក្សប្រឆាំងខ្លះបាននាំគ្នាចុះចូលជាមួយបក្សកាន់អំណាចដើម្បីទទួលអំណាច និងបុណ្យស័ក្តិ។
សមាជិកចលនាយុវជនគណបក្សសង្គ្រោះជាតិប្រចាំប្រទេសកូរ៉េខាងត្បូង លោក យ៉ង់ ស៊ីណេត បានសរសេរលើគណនីហ្វេសប៊ុករបស់លោកនៅថ្ងៃទី២៨ មេសា នេះថា អនុស្សាវរីយ៍ដែលធ្លាប់តែតស៊ូជាមួយគ្នាស្វែងរកយុត្តិធម៌សង្គម ស្វែងរកលទ្ធិប្រជាធិបតេយ្យតាមរយៈគោលនយោបាយអហិង្សាកន្លងមក គ្រាន់តែជាការចងចាំប៉ុណ្ណោះ ព្រោះថាអនុស្សាវរីយ៍ដ៏ជូរចត់ និងផ្អែមល្ហែមដែលខំតស៊ូដើម្បីទឹកដីដ៏កម្សត់របស់ខ្លួន ត្រូវរលាយទៅវិញត្រឹមតែបាយ ១ចាន និងសាច់មួយដុំទៅវិញ។
សមាជិកចលនាយុវជនគណបក្សសង្គ្រោះជាតិរូបនេះត្អូញត្អែរថា ឯណាទៅជាតម្លៃនៃគុណធម៌របស់មនុស្សដែលហ៊ានទទួលយកទឹកលុយដ៏កខ្វក់ស្រក់លើផ្នូរបុព្វបុរសដែលស្នេហាជាតិ? លោកបន្ថែមថា ការសប្បាយរីករាយទទួលយកនូវទ្រព្យសម្បត្តិជាថ្នូរនឹងការលះបង់នូវឧត្តមគតិរបស់ខ្លួន គឺជាទង្វើមួយដែលបញ្ជាក់ពីការមើលងាយវីរភាពរបស់អ្នកស្នេហាជាតិយ៉ាងខ្លាំង។
លោក យ៉ង់ ស៊ីណេត លើកជាសំណួរថា តើត្រូវធ្វើម្តេចដើម្បីឱ្យយុវជនដែលស្រឡាញ់ជាតិពិតប្រាកដគេចរួចផុតពីភាពងងឹតងងុលព្រោះតែបក្សនយោបាយ និងត្រូវធ្វើបែបណាដើម្បីឱ្យពួកគេដោះអាវបក្សមកពាក់អាវជាតិវិញ ហើយចូលរួមជាមួយគ្នាក្នុងការកសាងប្រទេសជាតិឱ្យមាននីតិរដ្ឋ មានយុត្តិធម៌សង្គម លែងមាននិន្នាការនយោបាយ ដែលធ្វើឱ្យមានការបែងចែក និងការចោទប្រកាន់គ្នាឯងទៅវិញទៅមកព្រោះតែផលប្រយោជន៍នយោបាយរៀងៗខ្លួនដូចសព្វថ្ងៃនេះ?
ការអះអាងនេះ ធ្វើឡើងបន្ទាប់ពីសកម្មជន និងមន្ត្រីបក្សប្រឆាំងខ្លះបាននាំគ្នាចុះចូលជាមួយបក្សកាន់អំណាចជាបន្តបន្ទាប់នៅពេលនេះ ស្របពេលដែលគណបក្សសង្គ្រោះជាតិក៏ត្រូវគេរំលាយ និងមេបក្សក៏ត្រូវគេកាត់ទោសឱ្យជាប់គុក ២៧ឆ្នាំថែមទៀត។
កាលពីថ្ងៃទី១៦ ខែវិច្ឆិកា ឆ្នាំ២០១៧ គណបក្សសង្គ្រោះជាតិត្រូវតុលាការកំពូលក្រុងភ្នំពេញប្រកាសរំលាយ បន្ទាប់ពីមេបក្សប្រឆាំង លោក កឹម សុខា ត្រូវបានចាប់ខ្លួនកាលពីថ្ងៃទី២ ខែកញ្ញា ឆ្នាំ២០១៧ ពីបទក្បត់ជាតិ ប៉ុន្តែនៅថ្ងៃទី៣ ខែមីនា ឆ្នាំ២០២៣ លោក កឹម សុខា ត្រូវបានសាលាដំបូងរាជធានីភ្នំពេញផ្ដន្ទាទោសឱ្យជាប់គុក ២៧ឆ្នាំ ដកសិទ្ធិធ្វើនយោបាយ និងមិនឱ្យជួបអ្នកដទៃក្រៅពីសាច់ញាតិថែមទៀត។
បន្ទាប់ពីលោក កឹម សុខា ត្រូវតុលាការផ្ដន្ទាទោសបានតែប៉ុន្មានថ្ងៃ ស្រាប់តែនៅថ្ងៃទី២១ ខែមេសា ឆ្នាំ២០២៣ លោក យឹម ស៊ីណន ដែលជាសកម្មជនស្និទ្ធនឹងលោក កឹម សុខា បានប្រកាសចូលរួមជីវភាពនយោបាយជាមួយបក្សកាន់អំណាច ខណៈលោក ហ៊ុន កុសល ក៏បានប្រកាសចុះចូលជាមួយបក្សកាន់អំណាចផងដែរកាលពីថ្ងៃទី២៣ ខែមេសា ឆ្នាំ២០២៣ នេះ។
ក្រៅពីលោក យឹម ស៊ីណន និងលោក ហ៊ុន កុសល អតីតអនុប្រធានក្រុមការងារគណបក្សសង្គ្រោះជាតិប្រចាំខេត្តសៀមរាប លោក ប៉ែន ផល្លីកា និងអតីតអ្នកតាក់តែងគោលនយោបាយសុខាភិបាលរបស់អតីតគណបក្សសង្គ្រោះជាតិ លោក ប៉ែន រដ្ឋា ក៏បានចុះចូលជាមួយបក្សកាន់អំណាចជាបន្តបន្ទាប់ថែមទៀត។
អតីតអ្នកទោសនយោបាយ និងជាអតីតមន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា ប្រាប់សារព័ត៌មាន The Cambodia Daily នៅថ្ងៃទី២៨ មេសា នេះថា ការសម្រេចចិត្តរបស់បុគ្គលម្នាក់ៗគឺជាសេរីភាពដែលមានចែងក្នុងច្បាប់ ដូច្នេះប្រសិនបើនរណាម្នាក់សុខចិត្តលះបង់ឧត្តមគតិរបស់ខ្លួនទទួលយកទ្រព្យសម្បត្តិ ទទួលយកឋានៈបុណ្យស័ក្តិតំណែងតួនាទី ឬក្នុងលក្ខខណ្ឌដែលមានសម្ពាធពីគ្រួសារ ជាដើម មិនគួរត្រូវបានស្ដីបន្ទោសនោះទេ ប៉ុន្តែសំខាន់ឱ្យតែការងាររបស់ពួកគេជួយជាតិមាតុភូមិរបស់ខ្លួនទៅថ្ងៃមុខ។
លោក មាជ សុវណ្ណារ៉ា លើកឡើងថា ការខិតខំតស៊ូរបស់លោក កឹម សុខា ដើម្បីសេរីភាព ដើម្បីយុត្តិធម៌សង្គម ដើម្បីលទ្ធិប្រជាធិបតេយ្យ គឺដើម្បីសេចក្តីសុខរបស់ពលរដ្ឋខ្មែរ និងដើម្បីប្រទេសកម្ពុជាទាំងមូល ដូច្នេះគោលការណ៍ដែលជានយោបាយអហិង្សារបស់គាត់នៅតែបើកចំហសេរីភាពពេញលេញសម្រាប់បុគ្គលម្នាក់ៗក្នុងការសម្រេចចិត្តរបស់ពួកគេរៀងៗខ្លួន ប៉ុន្តែគុណធម៌ និងគុណតម្លៃ គឺជារឿងផ្ទាល់ខ្លួនរបស់បុគ្គលម្នាក់ៗដែលពួកគេបានប្រព្រឹត្តប៉ុណ្ណោះ។
កាលពីថ្ងៃទី២៧ ខែមិថុនា ឆ្នាំ២០២១ ប្រធានគណបក្សសង្គ្រោះជាតិ លោក កឹម សុខា បានប្ដេជ្ញាថា អ្វីដែលលោកធ្លាប់បានសន្យាចំពោះអ្នកគាំទ្រគណបក្សសង្គ្រោះជាតិ និងពលរដ្ឋខ្មែរនៅតែហ៊ាន និងបន្តសន្យាជូនជនរួមជាតិដដែលថា បើទោះជាលោកស្ថិតក្នុងការរឹតត្បិតសេរីភាពបែបណាក៏ដោយ ក៏លោកនៅតែរក្សាឧត្តមគតិមិនក្បត់ប្រទេសជាតិ មិនក្បត់ឆន្ទៈពលរដ្ឋ និងមិនរត់ចោលសមរភូមិនយោបាយនៅកម្ពុជាជាដាច់ខាត៕